ງານວາງສະແດງ ສິນຄ້າກະສິກໍາອິນຊີລາວ ໄດ້ຮັບຄວາມສົນໃຈຈາກມວນຊົນເປັນຢ່າງດີ
ໃນວັນທີ 28-29 ພະຈິກນີ້, ກົມປູກຝັງ ກະຊວງກະສິກໍາ-ປ່າໄມ່ ຮ່ວມກັບ ກະຊວງອຸດສາຫະກໍາ-ການຄ້າ ແລະ ອົງການສະຫະປະຊາຊາດ ເພື່ອການພັດທະນາ, ໄດ້ຈັດງານວາງສະແດງສິນຄ້າກະສິກໍາອິນຊີລາວ ຂຶ້ນຢູ່ສວນເຈົ້າຟ້າງຸ່ມ ນະຄອນຫຼວງວຽງຈັນ, ຊຶ່ງມີມວນຊົນເຂົ້າຮ່ວມເປັນຈໍານວນຫຼາຍ, ເພື່ອໂຄສະນາຜົນສໍາເລັດ ຂອງການພັດທະນາກະສິກໍາອິນຊີໃນໄລຍະຜ່ານມາ, ທັງເປັນການສົ່ງເສີມການຜະລິດກະສິກຳອິນຊີ ຕາມມາດຕະຖານແຫ່ງຊາດ, ພາກພື້ນ ແລະ ສາກົນ ເພື່ອເປັນສິນຄ້າກະສິກໍາສະອາດ ທັງເປັນການປົກປ້ອງຜູ້ຜະລິດ ແລະ ຜູ້ບໍລິໂພກ ແລະ ປົກປັກຮັກສາສະພາບແວດລ້ອມ.
ງານວາງສະແດງຄັ້ງນີ້, ມີກຸ່ມຜູ້ຜະລິດ, ສະມາຄົມ, ສະຫະກອນ, ບໍລິສັດ ແລະ ຜູ້ປະກອບການເຂົ້າຮ່ວມ 78 ຫົວໜ່ວຍ. ໃນນັ້ນ, ກະສິກຳອິນຊີມີ 66 ຫົວໜ່ວຍ ແລະ ກະສິກຳທີ່ດີ 2 ຫົວໜ່ວຍ, ຊຶ່ງປະກອບມີ: ພືດຜັກ, ໝາກໄມ້, ເຂົ້າ, ຊາ, ກາເຟ ແລະ ຜະລິດຕະພັນປຸງແຕ່ງອີກຈໍານວນໜຶ່ງ, ທີ່ໄດ້ຮັບການຢັ້ງຢືນຄຸນນະພາບຕາມມາດຕະຖານກະສິກໍາອິນຊີ ທີ່ເປັນຜົນງານຈາກການພັດທະນາໃນຂະແໜງກະສິກໍາຢູ່ປະເທດເຮົາ.
