ອາກາດຮ້ອນ ເອົາໃຈໃສ່ອັກຄີໄພ

ສະບາຍດີ ເພື່ອນຜູ້ອ່ານ, ຊ່ວງໄລຍະອາທິດຜ່ານມານີ້ ສະພາບອາກາດຢູ່ປະເທດເຮົາໂດຍທົ່ວໄປແມ່ນຮ້ອນແຮງຂຶ້ນບາງມື້ຮອດ 30-40 ອົງສາ ອັນເປັນສາເຫດກໍ່ໃຫ້ເກີດອັກຄີໄພໄດ້ງ່າຍ. ດັ່ງນັ້ນ ຈຶ່ງຂໍເຕືອນໃຫ້ທຸກຄົນໃນສັງຄົມມີສະຕິໃນການນຳໃຊ້ຟືນໄຟເຂົ້າໃນຊີວິດປະຈຳວັນ ໂດຍສະເພາະຕ້ອງໝັ່ນກວດກາລະບົບສາຍໄຟ ແລະ ອຸປະກອນ ເຄື່ອງໃຊ້ໄຟຟ້າພາຍໃນເຮືອນ ແລະ ຄອບຄົວໃຫ້ດີ. ຖ້າພົບເຫັນສາຍໄຟ, ປັກສຽບໄຟ, ເຄື່ອງໃຊ້ ໄຟຟ້າອື່ນໆມີສະພາບເກົ່າແກ່ຊຸດໂຊມກໍຕ້ອງໃຫ້ປ່ຽນຖ່າຍ ແລະ ມີການປັບປຸງປົວແປງໃຫ້ຮັບປະກັນ, ສ່ວນຜູ້ນຳໃຊ້ຟືນໄຟເຂົ້າໃນການແຕ່ງຢູ່ຄົວກິນເມື່ອເຮັດສຳເລັດແລ້ວກໍຕ້ອງດັບມອດໄຟດັ່ງກ່າວໃຫ້ດີ ເພື່ອຫລີກເວັ້ນບັນຫາເກີດອັກຄີໄພໃນເວລາທີ່ລົມພັດແຮງ ແລະ ສຳລັບການໃຕ້ທູບໄຕ້ທຽນບູຊາຕ່າງໆກໍຕ້ອງປະຕິບັດຢູ່ໃນບໍລິເວນທີ່ບໍ່ມີວັດຖຸໄວໄຟ, ພ້ອມໝັ່ນກວດກາເບິ່ງໃຫ້ເປັນປະຈຳຖ້າສຳເລັດພິທີແລ້ວກໍຕ້ອງດັບມອດໄຟ ແລະ ເກັບມ້ຽນໄວ້ໃຫ້ດີ ແລະ ຄວາມຈຳເປັນຮີບດ່ວນອີກອັນໜຶ່ງກໍແມ່ນເບື້ອງມະຫາພາກໃນການອອກແຮງໂຄສະນາປຸກລະດົມປະຊາຊົນ ແລະ ຊັ້ນຄົນຕ່າງໆເຂົ້າມາຮ່ວມການສະກັດກັ້ນອັກຄີໄພໃຫ້ກວ້າງຂວາງ ແລະ ທົ່ວເຖິງ. ພ້ອມນັ້ນ ເບື້ອງເຈົ້າໜ້າທີ່ດັບມອດໄຟກໍຈະຕ້ອງໄດ້ເພີ່ມທະວີກະກຽມຄວາມພ້ອມຂອງຕົນຢູ່ສະເໝີ ນັບທັງລົດນ້ຳ, ເຄື່ອງມືອຸປະກອນ ຕະຫລອດຮອດການຮຽນຮູ້, ການເຝິກແອບໃນການມອດໄຟໃຫ້ມີຄວາມວ່ອງໄວ ແລະ ມີປະສິດທິຜົນດີຂຶ້ນກວ່າເກົ່າ, ໄປພ້ອມໆກັບການແນະນຳເຝິກແອບໃຫ້ພະນັກ ງານ, ກຳມະກອນ ຫລື ປະຊາຊົນໃນບ້ານຕ່າງໆໃຫ້ມີຄວາມຊຳນິຊຳນານໃນການຕ້ານ ແລະ ມອດໄຟຂັ້ນຕົ້ນໃຫ້ດີຂຶ້ນ.

ຖ້າເຮົາເຮັດໄດ້ແນວນີ້ກໍຈະຊ່ວຍຫລຸດຜ່ອນຄວາມເສຍຫາຍຈາກເຫດອັກຄີໄພໄດ້ດີຂຶ້ນ, ຊ່ວຍໃຫ້ບ້ານເມືອງມີຄວາມສະຫງົບປອດໄພ.

error: Alert: Content is protected !!