ທຸຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ເຂົ້າອວຍພອນຜູ້ນຳລາວໃນໂອກາດວັນຊາດ ຄົບຮອບ 44 ປີ

- advert banner 728 90 728x90 - ທຸຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ເຂົ້າອວຍພອນຜູ້ນຳລາວໃນໂອກາດວັນຊາດ ຄົບຮອບ 44 ປີ

ແຫຼ່ງຂ່າວ ຂປລ ລາຍງານວ່າ: ໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 44 ປີ (2/12/1975-2/12/2019) ບັນດາທຸຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳລາວ ໄດ້ເຂົ້າອວຍພອນທ່ານຜູ້ນຳຂອງລາວເຮົາ, ນຳໂດຍ ທ່ານ ບຸນຍັງ ວໍລະຈິດ ປະທານປະເທດ ພ້ອມພັນລະຍາ, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມພັນລະຍາ, ທ່ານ ນາງ ປານີ ຢ່າທໍ່ຕູ້ ປະທານສະພາແຫ່ງຊາດ ພ້ອມສາມີ, ທ່ານ ພັນຄຳ ວິພາວັນ ຮອງປະທານປະເທດ ພ້ອມພັນລະຍາ, ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ພ້ອມພັນລະຍາ ແລະ ການນໍາຜູ້ອື່ນໆ ໃນວັນທີ 29 ພະຈິກນີ້, ທີ່ທຳນຽບປະທານປະເທດ.

- new3 - ທຸຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ເຂົ້າອວຍພອນຜູ້ນຳລາວໃນໂອກາດວັນຊາດ ຄົບຮອບ 44 ປີ

ໃນໂອກາດດັ່ງກ່າວ, ທ່ານ ນາງ ເບລິນດາ ອັນເຕ ທູດອາວຸໂສ ຕາງໜ້າທຸຕານຸທູດ ແລະ ອົງການຈັດຕັ້ງສາກົນ ປະຈຳລາວ ໄດ້ຂຶ້ນກ່າວອວຍພອນໃນໂອກາດອັນສະຫງ່າລາສີນີ້ວ່າ: ໃນຖານະທູດອາວຸໂສຂໍສົ່ງຄຳຊົມເຊີຍອັນອົບອຸ່ນມາຍັງບັນດາທ່ານ, ລັດຖະບານ ແລະ ປະຊາຊົນລາວ ເນື່ອງໃນໂອກາດສະເຫລີມສະຫລອງວັນຊາດຄົບຮອບ 44 ປີ, ປີນີ້ເສດຖະກິດຂອງ ສປປ ລາວ ຄາດວ່າຈະໄດ້ຮັບການຟື້ນຟູ ເຖິງວ່າຈະສືບຕໍ່ມາດຕະການຮັດກຸມທາງດ້ານງົບປະມານ ແລະ ຄວາມຜັນຜວນຂອງເສດຖະກິດໂລກ, ທະນາຄານໂລກໄດ້ລາຍງານໃນຕົ້ນປີນີ້ວ່າ: ລາວເປັນໜຶ່ງໃນບັນດາປະເທດທີ່ມີເສດຖະກິດຂະຫຍາຍຕົວໄວທີ່ສຸດ ໃນອາຊີຕາເວັນອອກ ແລະ ປາຊີຟິກ, ໃນຊຸມປີຜ່ານມາ ລັດຖະບານລາວ ຍັງມີຄວາມກ້າວໜ້າໂດຍສະເພາະແມ່ນ ການລຶບລ້າງຄວາມທຸກຍາກໃຫ້ໝົດໄປກວ່າເຄິ່ງໜຶ່ງ, ການຫລຸດຜ່ອນຄວາມອຶດຫິວ ແລະ ກຳລັງປັບປຸງປະສິດທິພາບດ້ານການສຶກສາ ແລະ ສາທາລະນະສຸກທົ່ວປະເທດ, ພວກເຮົາມີຄວາມຍິນດີຕໍ່ການຕັດສິນໃຈຂອງລັດຖະບານລາວ ເພື່ອເຮັດໃຫ້ການຄຸ້ມຄອງລັດມີຄວາມເຂັ້ມແຂງ ລວມທັງຄວາມພະຍາຍາມຂອງລັດຖະບານໃນການແກ້ໄຂຄວາມຫຍຸ້ງຍາກ ທາງດ້ານເສດຖະກິດຂອງປະເທດ ແລະ ຮັກສາການເຕີບໂຕຂອງເສດຖະກິດຕໍ່ສິ່ງທ້າທາຍທັງພາຍໃນ ແລະ ພາຍນອກ, ໃນຖານະຄູ່ຮ່ວມພັດທະນາຈະຕັ້ງໜ້າຮ່ວມມືກັບລາວ ເພື່ອຈັດຕັ້ງປະຕິບັດ ແລະ ເຮັດໃຫ້ແຜນພັດທະນາຕ່າງໆບັນລຸເປົ້າໝາຍໂດຍການຮັດແໜ້ນສາຍພົວພັນຂອງພວກເຮົາໃຫ້ເລິກເຊິ່ງກວ່າເກົ່າ, ສຶກສາຊ່ອງທາງ ແລະ ການຊຸກຍູ້ໃຫ້ມີການພົວພັນທາງດ້ານການຄ້າ ແລະ ການລົງທຶນໃຫ້ຫລາຍຂຶ້ນ, ສົ່ງເສີມການພົວພັນຮ່ວມມືລະຫວ່າງລັດຕໍ່ລັດ ປະຊາຊົນກັບປະຊາຊົນ, ລວມທັງສົ່ງເສີມການຮ່ວມມື ໃນຂອບສອງຝ່າຍພາກພື້ນ ແລະ ຫລາຍຝ່າຍນຳອີກ, ພວກເຮົາເຫັນໄດ້ເຖິງຄວາມພະຍາຍາມຂອງລັດຖະບານລາວໃນປີນີ້ ໃນການຊ່ວຍເຫລືອບັນເທົາທຸກຜົນກະທົບຈາກໄພທຳມະຊາດ ແລະ ດຳເນີນນະໂຍບາຍຕ່າງໆ ເພື່ອຮັບມືກັບໄພທຳມະຊາດ, ບັນດາທຸຕານຸທູດ ແລະ ອົງການຈັດຕັ້ງສາກົນປະຈຳລາວ ກໍໃຫ້ການສະໜັບສະໜູນ ແລະ ການຊ່ວຍເຫລືອຕໍ່ ສປປ ລາວ ໃນໄລຍະເກີດໄພທຳມະຊາດ, ເຊິ່ງກໍ່ໃຫ້ເກີດຄວາມເສຍຫາຍທາງດ້ານຊີວິດ ແລະ ຊັບສິນເປັນຈໍານວນຫຼາຍໃນເດືອນສິງຫາ ແລະ ກັນຍາ ປີນີ້.

ພວກເຮົາຂໍຢືນຢັນຕໍ່ການນຳຂອງລາວ ວ່າ: ຈະກຽມພ້ອມໃຫ້ການຊ່ວຍເຫລືອເພີ່ມເຕີມແກ່ ສປປ ລາວ ເພື່ອຮັບມືກັບໄພທຳມະຊາດ ທັງໃນຂອບສອງຝ່າຍ ຫລື ຜ່ານກົນໄກການຮ່ວມມືໃນຂອບອາຊຽນ ແລະ ຂອບການຮ່ວມມືແບບຫລາຍຝ່າຍຕ່າງໆ, ຂ້າພະເຈົ້າ ຕາງໜ້າທຸຕານຸທູດ ແລະອົງການຈັດຕັ້ງສາກົນ ປະຈຳລາວ ຂໍອວຍພອນໄຊອັນປະເສີດມາຍັງບັນດາທ່ານການນໍາຂອງ ສປປ ລາວ ຈົ່ງມີສຸຂະພາບແຂງແຮງ, ປະສົບຜົນສຳເລັດໃນໜ້າທີ່ອັນມີກຽດສູງສົ່ງຂອງທ່ານ ແລະ ຂໍໃຫ້ປະຊາຊົນລາວທຸກຖ້ວນໜ້າ ຈົ່ງມີຄວາມສຸກຄວາມຈະເລີນຮຸ່ງເຮືອງ.

- lattana 1 - ທຸຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ເຂົ້າອວຍພອນຜູ້ນຳລາວໃນໂອກາດວັນຊາດ ຄົບຮອບ 44 ປີ

ໃນໂອກາດນີ້, ທ່ານ ບຸນຍັງ ວໍລະຈິດ ປະທານປະເທດ ໄດ້ຕາງໜ້າການນຳພັກ-ລັດ ສະແດງຄວາມຂອບໃຈ ຕໍ່ທ່ານທູດອາວຸໂສ ແລະ ທຸຕານຸທູດ ຕະຫລອດຮອດອົງການຈັດຕັ້ງສາກົນ ປະຈຳລາວ ທີ່ເຂົ້າອວຍພອນແກ່ທ່ານການນຳພັກ-ລັດ ແລະ ປະຊາຊົນລາວທຸກຖ້ວນໜ້າ ໃນໂອກາດວັນຊາດຂອງ ສປປ ລາວ ຄົບຮອບ 44 ປີ, ຂ້າພະເຈົ້າເຊື່ອໝັ້ນວ່າ ຄໍາຍ້ອງຍໍຊົມເຊີຍ ແລະ ຄຳອວຍພອນອັນປະເສີດຂອງບັນດາທ່ານ ຈະເປັນ ແຮງບັນດານໃຈ ໃຫ້ແກ່ລັດຖະບານ ແລະ ປະຊາຊົນລາວຂອງພວກຂ້າພະເຈົ້າ ໃນການສືບຕໍ່ຈັດຕັ້ງປະຕິບັດພາລະກິດອັນສູງສົ່ງແຫ່ງການສ້າງສາພັດທະນາປະເທດຊາດຕາມທິດຍືນຍົງ ແລະ ສີຂຽວ ແນໃສ່ເຮັດໃຫ້ປະເທດລາວຫລຸດພົ້ນອອກຈາກຄວາມດ້ອຍພັດທະນາໃນອະນາຄົດໃກ້ໆນີ້.

ແລະ ປີໃໝ່ສາກົນ 2020 ໃກ້ຈະໝູນວຽນມາເຖິງໃນມໍ່ໆນີ້, ຂ້າພະເຈົ້າຕາງໜ້າພັກ-ລັດຖະບານ ແລະ ປະຊາຊົນລາວບັນດາເຜົ່າ ຂໍອວຍພອນໃຫ້ບັນດາທ່ານທຸຕານຸທູດ ແລະ ອົງການຈັດຕັ້ງສາກົນປະຈຳລາວ ທີ່ມາຮ່ວມອວຍພອນໃນຄັ້ງນີ້ ຈົ່ງມີສຸຂະພາບແຂງແຮງ, ມີຄວາມສຸກໃນຊີວິດສ່ວນຕົວ ແລະ ຄອບຄົວ, ປະສົບຜົນສຳເລັດໃນໜ້າທີ່ອັນມີກຽດສະຫງ່າຂອງທຸກໆທ່ານ ພ້ອມສົ່ງຄວາມຢ້ຽມຢາມຖາມຂ່າວ ແລະ ພອນໄຊອັນປະເສີດ ໄປຍັງປະມຸກລັດ, ຫົວໜ້າລັດຖະບານ ແລະ ປະຊາຊົນກໍຄື ການນຳອົງການຈັດຕັ້ງສາກົນ ຂອງບັນດາທ່ານມານະໂອກາດນີ້ດ້ວຍ. ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງ ສປປ ລາວ ກັບບັນດາປະເທດ ແລະ ອົງການຈັດຕັ້ງສາກົນ ໃນພາກພື້ນ ແລະ ໃນໂລກ ຈົ່ງໄດ້ຮັບການເສີມຂະຫຍາຍຂຶ້ນຢ່າງບໍ່ຢຸດຢັ້ງ ແລະ ຍືນຍົງຕະຫລອດໄປ.

error: Content is protected !!