ຜົວຈັດວັນເກີດໃຫ້ຊູ້ທາງໃຈ ເມຍມອບໃບຢ່າເປັນຂອງຂວັນ

- 332 - ຜົວຈັດວັນເກີດໃຫ້ຊູ້ທາງໃຈ ເມຍມອບໃບຢ່າເປັນຂອງຂວັນ
- Untitled design - ຜົວຈັດວັນເກີດໃຫ້ຊູ້ທາງໃຈ ເມຍມອບໃບຢ່າເປັນຂອງຂວັນ

ລູກເມືອງພວນ

ຂ້ອຍກັບຜົວຂອງຂ້ອຍແຕ່ງງານກັນໄດ້ 9 ປີປາຍແລ້ວ, ພວກຂ້ອຍມີດວງໃຈຮ່ວມກັນ 2 ຄົນ( ຍິງໜຶ່ງ, ຊາຍໜຶ່ງ). ຊີວິດຄູ່ຂອງພວກຂ້ອຍ ມີຄວາມສະຫງົບດີ. ຜົວຂອງຂ້ອຍເປັນຄົນຮັກລູກ ແພງເມຍ.

ເລື່ອງລາວຂອງມັນເລີ່ມເກີດຂຶ້ນກ່ອນໜ້ານີ້ສອງປີ, ເມື່ອຂ້ອຍໄປກວດສຸຂະພາບຢູ່ໂຮງໝໍ ທ່ານໝໍບອກວ່າຂ້ອຍເປັນພະຍາດ ພ່ອງ ແລະ ຈະຕ້ອງໄດ້ປົວເປັນຍາວນານ. ແຕ່ນັ້ນມາ, ເວົ້າເລື່ອງຜົວໆເມຍໆ ຂ້ອຍບໍ່ຢາກສົນໃຈປານໃດ, ເຖິງແມ່ນວ່າຜົວຈະເປັນເຈົ້າການກ່ອນກໍຕາມ ແຕ່ຂ້ອຍກໍເມີນເສີຍ. ມີຫຼາຍເທື່ອຂ້ອຍຕ້ອງກັດແຂ້ວທົນເຈັບເພື່ອເອົາໃຈຜົວ ແຕ່ຜົວກໍບໍ່ປະທັບໃຈກັບຂ້ອຍເລີຍ ເພາະຂ້ອຍເອົາໃຈຜົວດ້ວຍຄວາມຈຳເປັນ.

ເມື່ອເຫັນຂ້ອຍຫ່າງເຫີນເລື່ອງລັບນອນກັບຜົວ, ຜົວຂ້ອຍກໍເກີດຄວາມສົງໄສວ່າ: ຂ້ອຍບໍ່ຮັກຜົວ ຈິ່ງບໍ່ຢາກໃກ້ກັບຜົວ. ຂ້ອຍພະຍາຍາມອະທິບາຍໃຫ້ຜົວຟັງ ແຕ່ເຂົາກໍຍັງບໍ່ສ່ວາງຄວາມສົງໄສ.

ກ່ອນໜ້ານີ້ ຂ້ອຍກັບຜົວເວົ້າເລື່ອງລັບນອນນຳກັນແມ່ນຫ້າວຫັນພໍສົມຄວນ ແຕ່ມາດຽວນີ້ ເດືອນໜຶ່ງໄດ້ເທື່ອໜຶ່ງກໍວ່າດີແລ້ວ. ຍ້ອນແນວນັ້ນ, ຜົວເມຍພວກຂ້ອຍຈຶ່ງເລີ່ມມີອັນຜິດຖຽງກັນ ເປັນປະຈຳ.

ເປັນແຕ່ບຸນ ພາຍຫຼັງເກີດລູກຜູ້ທີ່ສອງແລ້ວ, ໜ້າທີ່ການງານຂອງຂ້ອຍກໍເດີນແມ່ນແລ່ນສະດວກດີ, ຂ້ອຍຖືກເລື່ອນຕຳແໜ່ງໃຫ້ເປັນຫົວໜ້າຂະແໜງ, ມີລາຍຮັບສູງ ເງິນເດືອນກໍຫຼາຍ. ພວກລູກໆກໍໃຫ່ຍແລ້ວ, ຂ້ອຍຈຶ່ງມີເວລາແຕ້ມແຕ່ງເສີມສວຍ, ອອກກຳລັງກາຍ ຈຶ່ງເຮັດໃຫ້ຂ້ອຍມີຮູບຮ່າງງາມພໍສົມຄວນ.

ຫ່ວາງມໍ່ໆ ມານີ້ ຜົວຂອງຂ້ອຍມີຄວາມລື້ນເລີງຜິດປົກະຕິ, ເຂົານຸ່ງຖືເປັນລະບຽບຮຽບຮ້ອຍ ຈົບງາມ, ຊື້ເຄື່ອງຂອງຫຼາຍຢ່າງ ຂ້ອຍຈຶ່ງເກີດມີຄວາມສົງໄສ. ເມື່ອກັບມາຮອດເຮືອນກໍເຮັດວຽກເຮືອນຊ່ວຍຂ້ອຍ, ສອນໜັງສືໃຫ້ລູກ. ເມື່ອເຂົ້ານອນ ຜົວບໍ່ມີປາກສຽງນຳຂ້ອຍອີກ, ເຂົາກອດຂ້ອຍແລ້ວກໍນອນລັບໄປ.

ໂດຍສັນຊາດຕະຍານ ຂ້ອຍຮູ້ວ່າຜົວຂອງຂ້ອຍມີຊູ້ທາງໃຈ ຊຶ່ງຍິງສາວຄົນນັ້ນ ເປັນນັກສຶກສາປີສຸດທ້າຍ ກຳລັງລົງຝຶກຫັດຢູ່ບໍລິສັດຂອງຂ້ອຍເຮັດຢູ່ນັ້ນ. ຂ້ອຍເຫັນຜົວເອົາຜູ້ສາວຄົນນັ້ນເຂົ້າໄປໃນບ້ານພັກ, ຂ້ອຍເຈັບປວດ ແລະ ກໍເອັນດູຕົນລູກໆທີ່ສຸດ.

ເພື່ອຫາເສັ້ນທາງຖອນຕົວໃຫ້ແກ່ຕົນເອງ, ຂ້ອຍໄດ້ເອົາເງິນສົດທີ່ມີຢູ່ໃນເຮືອນໄປຝາກໄວ້ທະນາຄານ, ເງິນໃນບັນຊີຂອງຜົວກໍໂອນເຂົ້າໄປໃນບັນຊີຂອງຂ້ອຍຈົນໝົດ. ເມື່ອຜົວຖາມຫາເງິນ ຂ້ອຍເວົ້າວ່າ: ໄລຍະນີ້້ ນ້ອງປະຢັດເງິນໄວ້ເພື່ອຊື້ທີ່ດິນໃນລາຖືກ, ຜົວຂ້ອຍກໍບໍ່ໄດ້ສົງໃສຫຍັງ.

- Wave100S AD to Website 2020 0 - ຜົວຈັດວັນເກີດໃຫ້ຊູ້ທາງໃຈ ເມຍມອບໃບຢ່າເປັນຂອງຂວັນ

ໂດຍຜ່ານການຊອກຮູ້ຄົນໃຊ້ໃນເຮືອນ, ເຂົາເລົ່າວ່າ: ເຂົາມັກຈະເຫັນຜົວຂອງຂ້ອຍມອບດອກໄມ້, ເອົາເຄື່ອງຂອງໃຫ້ນາງສາວຄົນນັ້ນເປັນປະຈຳ. ບໍ່ສະເພາະແຕ່ເທົ່ານັ້ນ, ຜົວຂອງຂ້ອຍຍັງຮັບປາກວ່າຈະຊອກວຽກເຮັດງານທຳໃຫ້ສາວຄົນນັ້ນອີກ ພາຍຫຼັງຮຽນຈົບ.

ມີມື້ໜຶ່ງ ໂດຍຜ່ານທາງ ເຟສບຸກ, ຂ້ອຍຮູ້ວ່າ ມື້ນັ້ນເປັນວັນເກີດຂອງຊູ້ທາງໃຈຂອງຜົວ. ມື້ນັ້ນ, ຜົວຂ້ອຍແຈ້ງໃຫ້ຂ້ອຍຊາບວ່າ ເຂົາຈະກັບເຮືອນຄໍ່າແດ່ ຍ້ອນວ່າຢູ່ຫ້ອງການມີການພົບປະກັບລູກຄ້າ ວ່າຊັ້ນ. ຂ້ອຍຮູ້ວ່າ ຜົວຕົນເອງໄດ້ໄປເຊົ່າຫ້ອງ ກາລາໂອເກະ ເພື່ອຈັດວັນເກີດໃຫ້ແຟນ.

ຫ້ອງດັ່ງກ່າວຖືກປະດັບປະດາໄປດ້ວຍແສງໄຟ, ປູມເປົ້າ, ດອກໄມ້ ແລະ ເຄັກວັນເກີດ ຢ່າງສວຍງາມ. ໂອກາດນີ້ ຂ້ອຍໄດ້ຝາກຂອງຂວັນວັນເກີດໄປໃຫ້ແຟນຂອງຜົວ ຊຶ່ງຂອງຂວັນອັນນັ້ນ ຂ້ອຍໄດ້ກະກຽມໄວ້ແຕ່ດົນແລ້ວ

ເພື່ອນສະໜິດຂອງຂ້ອຍ ຜູ້ທີ່ເອົາຂອງຂວັນຂອງຂ້ອຍໄປໃຫ້ເຂົານັ້ນ ຖາມຂ້ອຍວ່າ: ມຶງເອົາຫຍັງຝາກໄປໃຫ້ເຂົາ, ກູເຫັນສອງຄົນເຂົາໜ້າຫຼ່າຕາຈຶດເຂົ້າທັງສອງຄົນ?

ຂ້ອຍຕອບເພື່ອນວ່າ: ບໍ່ມີຫຍັງດອກ, ກູເອົາໃບຄຳຮ້ອງຂໍຢ່າຮ້າງກັບຜົວ ພ້ອມກັບຮູບຂອງສອງຄົນເຂົາເອາະເສາະກັນເພື່ອເປັນຫຼັກຖານ.

ຄືນນັ້ນ, ຜົວກັບບ້ານໄວກ່ວາທີ່ໄດ້ຄອບຂ້ອຍໃນເບື້ອງຕົ້ນ. ຄືນນັ້ນຂ້ອຍນອນບໍ່ໄດ້ຈົນຊອດແຈ້ງ. ຜົວກອດເອົາຂ້ອຍແລ້ວຂໍໂທດ ແລະ ຂໍໃຫ້ຂ້ອຍອະໄພໂທດໃຫ້ວ່າ: ບໍ່ແມ່ນຂ້ອຍຈະເອົາເຂົາດອກ ພຽງແຕ່ເປັນສິ່ງມ່ວນຊື່ນເລັກໆນ້ອຍໆ ແລະ ກໍຍ້ອນວ່າຂ້ອຍຫ່າງເຫີນກັບເຂົາເລື່ອງເທິງຕຽງນອນ. ຂ້ອຍຄຽດໃຫ້ເຂົາ ແຕ່ນັ້ນມາຮອດປັດຈຸບັນຂ້ອຍບໍ່ປາກບໍ່ເວົ້າຫຍັງກັບຜົວ.

ທ່ານຜູ້ອ່ານ ອາດຈະຖອດບົດຮຽນໄດ້ຈາກເລື່ອງລາວນີ້ ໃນການຕອບໂຕ້ຜົວແບບແນບນຽນ, ດີກ່ວາຈະຜິດຖຽງກັນ ແລະ ນຳທຳຮ້າຍກັນຟົດທົ່ວບ້ານທົ່ວເມືອງ. ຫາວິທີທາງອອກແບບງຽບສະຫງົບ ແຕ່ໄດ້ຜົນດີທີ່ສຸດ. ທ່ານຜູ້ອ່ານທັງຫລາຍຄິດແນວໃດ?

- WhatsApp Image 2020 05 27 at 5 - ຜົວຈັດວັນເກີດໃຫ້ຊູ້ທາງໃຈ ເມຍມອບໃບຢ່າເປັນຂອງຂວັນ
- WhatsApp Image 2020 05 27 at 5 - ຜົວຈັດວັນເກີດໃຫ້ຊູ້ທາງໃຈ ເມຍມອບໃບຢ່າເປັນຂອງຂວັນ
error: Alert: ເນື້ອຫາຂ່າວມີລິຂະສິດ !!