ຊື່ນ​ຊົມ​ກັບ​ໝາກຜົນ​ລວມຍອດ​ຍຸກ ສປປ ລາວ

- 0211 - ຊື່ນ​ຊົມ​ກັບ​ໝາກຜົນ​ລວມຍອດ​ຍຸກ ສປປ ລາວ
- Untitled design - ຊື່ນ​ຊົມ​ກັບ​ໝາກຜົນ​ລວມຍອດ​ຍຸກ ສປປ ລາວ

ໂດຍ: ທິດກ່ຳ

   ປັດຈຸບັນ​ນີ້, ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ຂອງ​ພວກ​ເຮົາ​ມີ​ອາຍຸ​ໄດ້ 44 ປີ​ເຕັມ​ແລ້ວ (2/12/1975-2/12/2019). ການ​ທີ່​ໄດ້​ເກີດ ​ແລະ ກາຍ​ມາ​ເປັນປະ​ເທດ ສປປ ລາວ ມັນ​ກໍ​ບໍ່​ແມ່ນ​ໄດ້​ມາ​ແບບ​ງ່າຍດາຍ, ​ບັນດາ​ວິລະ​ກະສັດ, ຜູ້ນຳ, ​ເຈົ້າກົກ​ເຈົ້າ​ເລົ່າ, ວິລະ​ຊົນ, ທະຫານ, ພະນັກງານ ​ແລະ ປະຊາຊົນ​ລາວບັນດາ​ເຜົ່າ​ຜູ້​ຮັກ​ຊາດ, ຮັກ​ຜືນ​ແຜ່​ນດິນ ​ໄດ້​ເສຍສະຫລະ​ຊີວິດ​ເລືອດ​ເນື້ອ​ ເພື່ອ​ກອບ​ກູ້​ເອົາ​ເອກະລາດ, ອະທິປະ​ໄຕ ແລະ ອິດສະຫລະພາບ​ມາ​ໃຫ້​ປະ​ເທດ​ຊາດ​ເປັນ​ຈຳນວນ​ຫລາຍ​ໝື່ນ​ຫລາຍ​ແສນ​ຄົນ.

   ຕະຫລອດ​ໄລຍະ 44 ປີ​ແຫ່ງ​ການ​ສ້າງສາ​ພັດທະນາປະ​ເທດ​ຊາດ​ຂອງ​ພວກ​ເຮົານັ້ນ, ​ໄດ້​ເຮັດ​ໃຫ້ ສປປ ລາວ ກ້າວ​ໄປ​ໜ້າ​ຢ່າງ​ບໍ່​ຢຸດ​ຢັ້ງ, ຖານະ​ບົດບາດ​ທາງ​ດ້ານ​ການ​ເມືອງກໍ​ນັບ​ມື້ສູງ​ເດັ່ນ​ໃນ​​ເວທີພາກພື້ນ ​ແລະ ສາກົນ​ ສະ​ແດງ​ອອກຄື​ໄດ້​ມີ​ສາຍ​ພົວພັນ​ທາງ​ການ​ທູດ​ກັບ​ບັນດາປະ​ເທດ​ຕ່າງໆ​ໃນ​ທົ່ວ​ໂລກ​ເຖິງ 140 ກວ່າ​ປະ​ເທດ.

   ນອກ​ນັ້ນ, ພວກ​ເຮົາ​ຍັງ​ໄດ້​ເປັນ​ພາຄີ​ກັບ​ອົງການ​ຈັດຕັ້ງຕ່າງໆທີ່​ກ້າວໜ້າ​ໃນ ພາກພື້ນ ​ແລະ ສາກົນ​ຢ່າງ​ກວ້າງຂວາງ ​ເປັນຕົ້ນ: ກຸ່ມ​ອາ​ຊຽນ, ອົງການ​ຄ້າ​ໂລກ ​ແລະ ອົງການຈັດຕັ້ງອື່ນໆທີ່​ສຳຄັນ ​ແລະ ກ້າວໜ້າ, ສິ່ງ​ດັ່ງກ່າວ​ໄດ້​ສ້າງ​ເງື່ອນ​ໄຂ​ໃຫ້ ສປປ ລາວ ​ເຊື່ອມ​ໂຍງ, ມີ​ບົດບາດ ​ແລະ ສ້າງ​ຄວາມ​ເຊື່ອ​ໝັ້ນຕໍ່​ເພື່ອນ​ມິດ​ເປັນ​ຢ່າງ​ດີ, ທາງ​ດ້ານ​ເສດຖະກິດ​ກໍ​ເຫັນ​ວ່າ​ມີ​ການ​ສ້າງສາ​ພັດທະນາ​ໄວວາ​ສົມຄວນ, ການ​ກໍ່ສ້າງ​ໂຄງ​ລ່າງ​ຖະໜົນຫົນທາງ, ຕຶກ​ອາຄານ​ບ້ານ​ຊ່ອງ, ສຳນັກງານ​ອົງການ ​ກໍ​ພວມ​ດຳ​ເນີນ​ໄປ​ຢ່າງ​ເຄັ່ງຮ້ອນ.

   ມີ​ຫລາຍ​ໂຄງການ​ຂະໜາດ​ໃຫຍ່, ຂະໜາດ​ກາງ ​ແລະ ຂະໜາດ​ນ້ອຍ​ ນັບ​ແຕ່​ຂັ້ນສູນ​ກາງ​ລົງ​ຮອດ​ທ້ອງ​ຖິ່ນ​ຊົນນະບົດ​ເຂດ​ຫ່າງ​ໄກ​ສອກຫລີກ ​ກໍ​ພວມ​ເລັ່ງລັດ​ພັດທະນາດຳ​ເນີນ​ໄປ​ເປັນ​ຂະ​ບວນກວ້າງຂວາງ​ໜັກ​ແໜ້ນ​. ປັດຈຸບັນ, ມີ​ຫລາຍ​ໂຄງການ​ໄດ້​ສຳ​ເລັດ​ເປັນຕົ້ນ​ເປັນ​ໂຕ​ໃຫ້​ເຫັນ ​ແລະ ພວມ​ເລັ່ງລັດ​ລົງມື​​ເຊັ່ນ: ​ໂຄງການ​ກໍ່ສ້າງ​​ເຂື່ອນ​ໄຟຟ້າ​ພະລັງ​ນ້ຳ, ​ໂຄງການ​ກໍ່ສ້າງ​ທາງ​ລົດ​ໄຟ​ລາວ-ຈີນ, ​ໂຄງການ​ກໍ່ສ້າງ​ເສດຖະກິດ​ພິ​ເສດ ​ແລະ ​ເສດຖະກິດສະ​ເພາະ​ ໃນ​ທົ່ວ​ປະ​ເທດ ​ແລະ ຍັງ​ມີ​ບັນດາ​ໂຄງການ​ຕ່າງໆ ນັບ​ແຕ່​ນ້ອຍ​ຫາ​ໃຫຍ່​ອີກ ຫລາຍ​ຮ້ອຍ​ຫລາຍ​ພັນ​ໂຄງການ.

  ທາງ​ດ້ານ​ວັດທະນະທຳ​-ສັງຄົມ ​ມາ​ຮອດ​ຍຸກ​ນີ້​ກໍ​ເຫັນ​ວ່າ​ມີ​ການ​ປັບປຸງ​ປົວ​ແປງ ສົ່ງ​ເສີມ ​ແລະ ສ້າງ​ຂຶ້ນ​ໃໝ່​ຢ່າງ​ຫລວງຫລາຍ​ ເປັນຕົ້ນ: ສ້າງ​ໂຮງໝໍ, ​ໂຮງຮຽນ, ວັດວາອາ​ຮາມ, ບູລະນະ​ສະຖາປັດຕະຍະກຳ​ອັນ​ເກົ່າ​ແກ່​ທາງ​ປະຫວັດສາດ ​ແລະ ວັດທະນະທຳ​ໃຫ້ກາຍ​ເປັນ​ກິດຈະກຳ​ການທ່ອງທ່ຽວ, ສົ່ງ​ເສີມ​ປັບປຸງ​ຟື້ນຟູ​ຮີດຄອງ​ປະ​ເພນີ​ຂອງ​ປະຊາຊົນບັນດາ​ເຜົ່າ​ໃຫ້​ມີ​ສີສັນ ​ແລະ ມີ​ຄວາມ​ຈະ​ເລີ​ນຮຸ່ງ​ເຮືອງ ​ກາຍ​ເປັນ​ວັດທະນະທຳ-​ອະລິຍະ​ທຳຂອງ​ຊາດ​ຢ່າງ​ແທ້​ຈິງ.

   ສິ່ງ​ທີ່​ໜ້າ​ພາກ​ພູມ​ໃຈ​ອີກ​ອັນ​ໜຶ່ງ​ຂອງ​ຄົນ​ລາວ​ເຮົາ​ສະ​ໄໝ​ນີ້ ​ແມ່ນ​ໄດ້​ເຂົ້າ​ເຖິງ​ການສຶກສາ​ຢ່າງ​ກວ້າງຂວາງ ​ແລະ ນັບ​ມື້ມີ​ຄຸນ​ນະພາ​ບຊີວິດ, ປະຊາຊົນ​ບັນດາ​ເຜົ່າ​ໄດ້​ເຂົ້າ​ເຖິງ​ການປິ່ນປົວ​ສຸຂະພາບ, ສຸຂະ​ສຶກສາ, ບໍລິ​ໂພ​ກນ້ຳສະອາດ, ມີ​ແບບ​ແຜນ​ດຳລົງ​ຊີວິດ ຕາມ​ອັດ​ຕະລັກ​ຮີດຄອງ​ປະ​ເພນີ ​ແລະ ມີ​ຊີວິດ​ການ​ເປັນ​ຢູ່​ທີ່​ດີ, ບ້ານ​ພັດທະນາ​ໄດ້​ເພີ່ມຂຶ້ນ, ບ້ານ​ທຸກ​ຍາກ​ນັບ​ມື້ຫລຸດ​ລົງ​ໄປ​ພ້ອມໆ​ກັບ​ຄວາມ​ສະຫງົບ ​ແລະ ຄວາມ​ຈະ​ເລີ​ນຮຸ່ງ​ເຮືອງຂອງ​ປະ​ເທດ​ຊາດ.

- Wave100S AD to Website 2020 0 - ຊື່ນ​ຊົມ​ກັບ​ໝາກຜົນ​ລວມຍອດ​ຍຸກ ສປປ ລາວ

  ທຸກ​ສິ່ງ​ທຸ​ກຢ່າງ​ທີ່​ກ່າວ​ມາ​ແບບ​ສັງ​ລວມນີ້, ​ແມ່ນ​ໝາກຜົນ​ຂອງ​ລະບອບ​ໃໝ່ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ທີ່​ມີ​ອາຍຸ​ໄດ້​ພຽງ 44 ປີ​ເຕັມ, ​ໄປ​ຄຽງ​ຄູ່​ກັບ​ພາລະກິດ​ການ​ສ້າງສາ​ພັດທະນາ​ປະ​ເທດ​ຊາດ​ ພວກ​ເຮົາ​ກໍ​ຍັງ​ມີ​ອຸປະສັກ ​ແລະ ສິ່ງ​ທ້າທາຍ​ຫລາຍ​ດ້ານ​ມາກະທົບ​ເຊັ່ນ: ​ໄພ​ນ້ຳຖ້ວມ, ສັດຕູ​ພືດ, ປາກົດການ​ຫຍໍ້​ທໍ້​ຕ່າງໆ​ໃນ​ສັງຄົມ, ​ແຕ່​ພວກ​ເຮົາ​ກໍ​ສາມາດ​​ແກ້​ໄຂ​ຜ່ານ​ຜ່າ​ບັນດາ​ວິ​ກິດ​ຕ່າງໆ​ເຫລົ່າ​ນັ້ນ​ໄດ້​​ເປັນ​ຢ່າງ​ດີ.

  ດ້ວຍ​ຜົນສຳ​ເລັດ ​ແລະ ​ໄຊ​ຊະນະ​ທີ່​ກ່າວ​ມາ​ຂ້າງ​ເທິງ​ນັ້ນ, ກໍ​ຍ້ອນ​ພັກ ​ແລະ ລັດຖະບານ​ເຮົາ ​​ໄດ້​ມີ​ແນວທາງ​ອັນ​ຖືກຕ້ອງ​ສອດຄ່ອງ​ກັບ​ຍຸກ​ສະ​ໄໝ, ອັນ​ສຳຄັນ​ທີ່​ສຸດ​ຄື​ມີ​ແຜນພັດທະນາ​ເສດຖະກິດ-ສັງຄົມ​ຂອງ​ປະ​ເທດ​ເປັນ​ແຕ່ລະ​ໄລຍະ​ເຊັ່ນ: ​ແຜນ​ປະຈຳ​ປີ, ຫ້າ​ປີ ​ແລະ ວິ​ໄສ​ທັດໄປ​ເຖິງ​ສິບ​ປີ​ຊາວປີ​ຂ້າງ​ໜ້າ​ໄດ້​ຢ່າງ​ຊັດ​ເຈນ.

  ​ໃນ​ອະນາຄົດ​ຂ້າງ​ໜ້າ​ນີ້, ​ຄືອີກ​ຫ້າ​ປີ​ສິບ​ປີ​ ຖ້າ​ຫາກ​ໂຄງການ​ພັດທະ​ນາ​ຕ່າງໆ ນັບ​ທັງຂະໜາດ​ນ້ອຍ, ຂະໜາດ​ກາງ ​ແລະ ຂະໜາດ​ໃຫຍ່ ​ຫາກ​ສຳ​ເລັດ​ເປັນ​ຕົນ​ເປັນ​ໂຕ​ຕາມ​ແຜນ ຄາດ​ວ່າ​ປະ​ເທດ​ຊາດ​ຂອງ​ພວກ​ເຮົາ​ຕ້ອງ​ໜີ​ຫ່າງ​ຈາກ​ຄວາມທຸກ​ຍາກ​ ​ແລະ ​ດ້ອຍ​ພັດທະນາ​ຢ່າງ​ແນ່ນອນ.

  ​ເຖິງ​ຢ່າງ​ໃດ​ກໍ​ດີ, ​ເມື່ອ​ທຽບ​ໃສ່​ຄວາມ​ຮຽກຮ້ອງ​ຕ້ອງການ​ຂອງ​ຊາດ ​ແລະ ປະຊາຊົນ​ບັນດາ​ເຜົ່າ​ແລ້ວ ​ພວກ​ເຮົາ​ຍັງ​ມີ​ຫລາຍ​ດ້ານ​ທີ່​ຈະ​ຕ້ອງ​ຜ່ານ​ຜ່າ​ສິ່ງ​ກີດຂວາງທີ່​ຈະ​ມາ​ກົດ​ໜ່ວງ​ທຳລາຍ​ຄວາມ​ຈະ​ເລີ​ນຂອງ​ຊາດ, ​ໂດຍ​ສະ​ເພາະ​ແມ່ນ​ໄພ​ທຳ​ມະ​ຊາດ, ປາກົດການ​ຫຍໍ້​ທໍ້​ຕ່າງໆ​ໃນ​ສັງຄົມ, ການ​ສໍ້​ລາດບັງ​ຫລວງ, ຢາ​ເສບ​ຕິດ, ຄວາມຂີ້ຄ້ານ​ມັກງ່າຍ ​ແລະ ຄວາມ​ຮັບຜິດຊອບບໍ່​ສູງຂອງ​ພະນັກງານ ​ແລະ ບັນຫາ​ອື່ນໆ, ດັ່ງ​ນັ້ນ ພວກ​ເຮົາ​ຕ້ອງ​ຍົກ​ສູງສະຕິ​ຄວາມ​ເປັນ​ເຈົ້າຕົນ​ເອງ​ຕໍ່​ປະ​ເທດ​ຊາດ​ຢ່າງ​ໜັກ​ແໜ້ນ.

​   ເມື່ອ​ໃດ​ພວກ​ເຮົາ​ສາມາດ​ຜ່າ​ນຜ່າ ​ແລະ ​ແກ້​ໄຂ​ສິ່ງ​ກີດຂວາງ​ຕ່າງໆ ທີ່​ຈະ​ມາ​ທຳລາຍມ້າງ​ເພ ​ແລະ ກົດ​ໜ່ວງ​ຄວາ​ມຈະ​ເລີ​ນຂອງ​ຊາດ​ໄດ້​ແລ້ວ ສປປ ລາວ ຍິ່ງ​ຈະ​ສະຫງົບ​ສຸກ​ຮົ່ມ​ເຢັນ​ຂຶ້ນກວ່າ​ນີ້​ຫລາຍ​ເທົ່າ.

- WhatsApp Image 2020 05 27 at 5 - ຊື່ນ​ຊົມ​ກັບ​ໝາກຜົນ​ລວມຍອດ​ຍຸກ ສປປ ລາວ
- WhatsApp Image 2020 05 27 at 5 - ຊື່ນ​ຊົມ​ກັບ​ໝາກຜົນ​ລວມຍອດ​ຍຸກ ສປປ ລາວ
error: Alert: ເນື້ອຫາຂ່າວມີລິຂະສິດ !!