ພາສາເກົາຫຼີ ໄດ້ຮັບການສົ່ງເສີມຢູ່ລາວ ຢ່າງເປັນທາງການ

ພິທີລົງນາມສັນຍາຮ່ວມມືດ້ານການສຶກສາພາສາເກົາຫຼີ, ໄດ້ມີຂຶ້ນໃນໂອກາດທີ່ຄະນະນຳກະຊວງສຶກສາທິການ ແລະ ກິລາ ຂອງ​ລາວໄດ້ເຂົ້າຮ່ວມກອງປະຊຸມສຸດຍອດສະເຫຼີມສະຫຼອງການພົວພັນ ອາຊຽນ-ສ ເກົາຫຼີ ຄົບຮອບ 30 ປີ ໃນວັນທີ 25-26 ພະຈິກ ຜ່ານມານີ້, ຢູ່ທີ່ ສ ເກົາຫຼີ. ລະຫວ່າງທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານນາງ ຢູ ອຶນ ແຮ ລັດຖະມົນຕີກະຊວງສຶກສາ ສ ເກົາຫຼີ, ເພື່ອສະໜັບສະໜູນການຮຽນພາສາເກົາຫຼີເປັນພາສາໜຶ່ງໃນຫຼາຍພາສາຕ່າງປະເທດທີ 2 ຊຶ່ງສາມາດເລືອກຮຽນຢູ່ໃນຊັ້ນມັດທະຍົມທີ່ມີເງື່ອນໄຂຂອງ ສປປ ລາວ; ພັດທະນາໂຄງການຝຶກອົບຮົມຄູສອນພາສາເກົາຫຼີ ແລະ ຝຶກອົບຮົມການສິດສອນພາສາເກົາຫຼີ, ພັດທະນາ ແລະ ເຜີຍແຜ່ການນຳໃຊ້ຫຼັກສູດພາສາເກົາຫຼີຊັ້ນມັດທະຍົມສຶກສາ, ປື້ມແບບຮຽນ, ເອກະສານອ້າງອີງ ແລະ ສື່ການຮຽນ-ການສອນຕ່າງໆ, ຖ້າມີຄວາມຈຳເປັນຝ່າຍ ສ ເກົາຫຼີ ຈະສົ່ງຄູສອນພາສາດັ່ງກ່າວ ໄປປະຈຳຢູ່ຕາມບັນດາໂຮງຮຽນມັດທະຍົມທີ່ມີເງື່ອນໄຂສອນພາສາເກົາຫຼີ, ສ້າງພື້ນຖານສຳລັບການພັດທະນາຄູສອນພາສາເກົາຫຼີໃນລາວ ແລະ ປະເມີນການຮຽນ-ການສອນພາສາເກົາຫຼີ.

ພ້ອມນີ້, ທັງ 2 ຝ່າຍຈະສົ່ງເສີມການຮ່ວມມື ການສຶກສາ ພາສາເກົາຫຼີໃນສະຖາບັນການສຶກສາຊັ້ນສູງ, ເປັນຕົ້ນແມ່ນການພັດທະນາ ແລະ ປັບປຸງຫຼັ້ກສູດສາຂາວິຊາເກົາຫຼີສຶກສາ ແລະ ພາສາເກົາຫຼີ, ສ້າງຄວາມເຂັ້ມແຂງດ້ານການຄົ້ນຄວ້າວິທະຍາສາດໃຫ້ແກ່ນັກສຶກສາ ແລະ ຄູອາຈານສາຂາວິຊາພາສາ ເກົາຫຼີ ແລະ ເກົາຫຼີສຶກສາ, ສ້າງຫຼັກສູດເພື່ອພັດທະນາຄູ ແລະ ອາຈານສອນພາສາ  ເກົາຫຼີໃນສະຖາບັນການສຶກສາຊັ້ນສູງຂອງລາວ. ພ້ອມທັງການແລກປ່ຽນລະຫວ່າງບັນດານັກຮຽນ-ນັກສຶກສາ, ຄູ, ສາດສະດາຈານ ແລະ ສະມາຊິກຄູອາຈານ, ການແລກປ່ຽນລະຫວ່າງໂຮງຮຽນມັດທະຍົມສຶກສາ, ສະຖາບັນການສຶກສາຊັ້ນສູງ ແລະ ສະຖາບັນການຄົ້ນຄວ້າຕ່າງໆ, ການຄົ້ນຄວ້າແລກປ່ຽນຂໍ້ມູນຂ່າວສານ ແລະ ມີໂຄງການຮ່ວມກັນກ່ຽວກັບການສຶກສາພາສາຕ່າງປະເທດໃນສະຖາບັນການສຶກສາ ແລະ ນະໂຍບາຍອື່ນໆທີ່ກ່ຽວຂ້ອງ./.

error: Alert: Content is protected !!