ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ສໍາເລັດດ້ວຍຜົນຈົບງາມ

- 222 - ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ສໍາເລັດດ້ວຍຜົນຈົບງາມ
- Untitled design - ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ສໍາເລັດດ້ວຍຜົນຈົບງາມ

 (ໂດຍການເປັນກຽດເຂົ້າຮ່ວມສະຫາຍເລຂາທິການໃຫຍ່, ປະທານປະເທດບຸນຍັງວໍລະຈິດ)

     ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII, ໄດ້ອັດລົງດ້ວຍຜົນສໍາເລັດຈົບງາມ ໃນວັນທີ 6 ທັນວານີ້, ພາຍຫຼັງໄດ້ດໍາເນີນມາເປັນເວລາ 20 ວັນ, ໂດຍປະທານ​ຂອງທ່ານນາງປານີ​ ຢາ​ທໍ່​ຕູ້ປະທານ​ສະພາ​ແຫ່ງ​ຊາດ, ໃຫ້ກຽດເຂົ້າຮ່ວມ​ໂດຍທ່ານ  ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ​ ປະຕິວັດລາວ  ປະທານປະເທດ​ແຫ່ງ ສປປ ລາວ, ມີທ່ານ ທອງ​ລຸນ ສີ​ສຸ​ລິດ​ນາຍົກລັດຖະມົນຕີແຫ່ງ ສປປ ລາວ, ມີບັນດາ ອະດີດການນຳພັກ-ລັດ,  ສະມາຊິກສະພາແຫ່ງຊາດ (ສສຊ) ທຸກເຂດເລືອກຕັ້ງ  ແລະ ແຂກຖືກເຊີນເຂົ້າຮ່ວມເປັນຈຳນວນຫລາຍ.

- 111111 1024x682 - ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ສໍາເລັດດ້ວຍຜົນຈົບງາມ

ທ່ານ ປະທານສະພາແຫ່ງຊາດ ໄດ້ກ່າວບົດສູນທອນພົດ ປິດກອງປະຊຸມວ່າ: ກອງປະຊຸມຄັ້ງນີ້ໄດ້ພິຈາລະນາຮັບຮອງເອົາກົດໝາຍ 8 ສະບັບ ແລະ ມະຕິ 10 ສະບັບ ຊຶ່ງເປັນພື້ນຖານທາງດ້ານນິຕິກໍາທີ່ສໍາຄັນໃຫ້ແກ່ການພັດທະນາເສດຖະກິດ-ສັງຄົມ, ການຄໍ້າປະກັນ ການປົກປ້ອງສິດອິດສະຫຼະພາບ ແລະສິດປະຊາທິປະໄຕ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະກົດໝາຍ ກໍຄືການປະຕິບັດພັນທະພື້ນຖານຂອງພົນລະເມືອງຕໍ່ລັດ. ພິຈາລະນາ ແລະ ຮັບຮອງເອົາບັນຫາສໍາຄັນຂອງປະເທດຊາດ ເຊັ່ນ: ໄດ້ພິຈາລະນາ ແລະ ຮັບຮອງເອົາການສະເໜີແຕ່ງຕັ້ງບຸກຄະລາກອນຂອງຄະນະລັດຖະບານ 2 ຕໍາແໜ່ງ ຄື: ລັດຖະມົນຕີກະຊວງແຜນການ ແລະ ການລົງທຶນ ແລະລັດຖະມົນຕີກະຊວງຖະແຫຼງຂ່າວ-ວັດທະນະທໍາ ແລະ ການທ່ອງທ່ຽວ ຜູ້ໃໝ່, ພິຈາລະນາ ແລະ ປະກອບຄວາມເຫັນໃສ່ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາປີ 2019 ແລະ ທິດທາງປະຈໍາປີ 2020. ຕີລາຄາສູງຕໍ່ຄວາມພະຍາຍາມ ຂອງລັດຖະບານໃນການຊີ້ນໍາ-ນໍາພາ ບັນດາກະຊວງ, ອົງການປົກຄອງທ້ອງຖິ່ນທຸກຂັ້ນ ແລະ ປຸກລະດົມໃຫ້ຜູ້ປະກອບການທັງພາຍໃນ ແລະ ຕ່າງປະເທດ ກໍຄືປະຊາຊົນລາວບັນດາເຜົ່າ ພ້ອມກັນຜ່ານຜ່າຄວາມຫຍຸ້ງຍາກ, ສິ່ງທ້າທາຍ ແລະ ສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປີ 2019 ໄດ້ຮັບຜົນສໍາເລັດໃນຫຼາຍດ້ານ, ເຮັດໃຫ້ປະເທດຊາດສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວ ແລະ ຊີວິດການເປັນຢູ່ຂອງປະຊາຊົນໄດ້ຮັບການຍົກສູງດີຂຶ້ນເປັນກ້າວໆ. ຄຽງຄູ່ກັນນັ້ນ, ກອງປະຊຸມ ຍັງໄດ້ປະກອບຄວາມເຫັນ ຕໍ່ບັນດາຂໍ້ຄົງຄ້າງ, ສິ່ງທ້າທາຍ ແລະ ອຸດຕັນໃນການຄຸ້ມຄອງ, ບໍລິຫານລັດທາງດ້ານເສດຖະກິດ-ສັງຄົມ, ພ້ອມທັງສະເໜີຫຼາຍມາດຕະການ ແລະ ວິທີການແກ້ໄຂຕົວຈິງ ເພື່ອສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນງົບປະມານແຫ່ງລັດ ປີ 2020 ໃຫ້ບັນລຸຜົນສໍາເລັດຕາມຄາດໝາຍທີ່ວາງໄວ້.

- 2222222222 1024x682 - ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ສໍາເລັດດ້ວຍຜົນຈົບງາມ

ກອງປະຊຸມ ໄດ້ປະຕິບັດພາລະບົດບາດຕິດຕາມກວດກາການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍຂອງລັດຖະບານອົງການປົກຄອງທ້ອງຖິ່ນ ແລະ ບັນດາມະຕິຂອງສະພາແຫ່ງຊາດເປັນຕົ້ນ: ການຈັດເກັບລາຍຮັບ, ການເຊົ່າ ແລະ ສໍາປະທານທີ່ດິນ, ການຄຸ້ມຄອງຄົນເຂົ້າ-ອອກເມືອງ ການສ້າງວິຊາຊີບ, ການພັດທະນາສີມືແຮງງານທີ່ມີຄຸນນະພາບ ແລະ ການສ້າງວຽກເຮັດງານທໍາຂອງປະຊາຊົນ ແລະ ວຽກງານອື່ນໆ. ຄຽງຄູ່ກັບຜົນສໍາເລັດທີ່ຍາດມາໄດ້ໃນໄລຍະຜ່ານມາ, ກອງປະຊຸມຍັງໄດ້ປະກອບຄວາມເຫັນຕໍ່ກັບຈຸດອ່ອນ, ຂໍ້ຄົງຄ້າງ, ສາຍເຫດ ແລະ ສະເໜີມາດຕະການແກ້ໄຂຕົວຈິງເຊັ່ນ: ຄວາມເຂັ້ມງວດໃນການຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍການປັບປຸງ ແລະ ແກ້ໄຂ ບັນດາຂອດອຸດຕັນ, ການຍົກສູງຄວາມຮັບຜິດຊອບໃນການປະຕິບັດໜ້າທີ່ຂອງເຈົ້າໜ້າທີ່ພະນັກງານຂອງຂະແໜງການກ່ຽວຂ້ອງ, ການເສີມຂະຫຍາຍຄວາມເປັນເຈົ້າ ແລະ ການມີສ່ວນຮ່ວມຂອງປະຊາຊົນໃນການປະຕິບັດພັນທະເສຍອາກອນຕໍ່ລັດ ແລະ ອື່ນໆ. ນອກນີ້ກອງປະຊຸມຍັງໄດ້ດໍາເນີນການຕິດຕາມກວດກາກັບທີ່ໃນກອງປະຊຸມດ້ວຍການຮັບຟັງການລາຍງານ, ການຕອບຄໍາຊັກຖາມ ແລະ ການຊີ້ແຈງອະທິບາຍເພີ່ມເຕີມຂອງທ່ານນາຍົກລັດຖະມົນຕີ, ຮອງນາຍົກລັດຖະມົນຕີ ແລະ ລັດຖະມົນຕີກ່ຽວຂ້ອງ ຈໍານວນໜຶ່ງ ຕໍ່ບັນຫາທີ່ພົວພັນເຖິງ ການຜະລິດ, ການບໍລິການການຈັດເກັບລາຍຮັບເຂົ້າງົບປະມານແຫ່ງລັດ, ການພັດທະນາຊົນນະບົດແກ້ໄຂຄວາມທຸກຍາກ, ການແກ້ໄຂຜົນກະທົບຈາກໄພພິບັດ, ບັນດາປາກົດການຫຍໍ້ທໍ້ຢູ່ໃນກົງຈັກລັດ ກໍຄືຢູ່ໃນສັງຄົມ ແລະ ອື່ນໆ. ກອງປະຊຸມ ສະເໜີມາຍັງລັດຖະບານ ເອົາໃຈໃສ່ປັບປຸງແກ້ໄຂຈຸດອ່ອນຂໍ້ຄົງຄ້າງ ແລະ ສິ່ງອຸດຕັນທີ່ເປັນບັນຫາຊໍາເຮື້ອໃນກົງຈັກຂອງຕົນ ໃຫ້ມີການຫັນປ່ຽນຢ່າງຕັ້ງໜ້າ, ພ້ອມນັ້ນ ກອງປະຊຸມຍັງສະເໜີມາຍັງບັນດາທ່ານລັດຖະມົນຕີກະຊວງ ຮີບຮ້ອນສ້າງແຜນປະຕິບັດງານໃນແຕ່ລະດ້ານ ຂອງອົງການຕົນ ແລະ ເອົາໃຈໃສ່ຊີ້ນໍາຊຸກຍູ້ການຈັດຕັ້ງປະຕິບັດວຽກງານ ທີ່ນອນໃນຄວາມຮັບຜິດຊອບຂອງອົງການຕົນ ແຕ່ສູນກາງລົງຮອດທ້ອງຖິ່ນ ໃຫ້ມີຜົນສັກສິດຢ່າງເປັນຮູບປະທໍາ.

- Wave100S AD to Website 2020 0 - ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ສໍາເລັດດ້ວຍຜົນຈົບງາມ

     ກອງປະຊຸມຍັງໄດ້ຮັບຟັງ ແລະ ປະກອບຄວາມເຫັນ ຕໍ່ວຽກງານຂອງອົງການກວດສອບແຫ່ງລັດ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດປະຈໍາປີ 2018 ແລະ ຜົນການກວດກາ ຕາມຜົນການກວດສອບການຈັດຕັ້ງປະຕິບັດໂຄງການລົງທຶນຂອງລັດ ປະຈໍາປີ 2014-2017 ຂອງອົງການກວດກາລັດຖະບານ ເພື່ອເປັນບ່ອນອີງໃຫ້ແກ່ການພິຈາລະນາ ແລະ ຮັບຮອງເອົາແຜນງົບປະມານແຫ່ງລັດ ປະຈໍາປີ 2020, ກອງປະຊຸມສະເໜີມາຍັງລັດຖະບານ ໂດຍສະເພາະແມ່ນລັດຖະມົນຕີ, ເຈົ້າແຂວງ, ເຈົ້າຄອງນະຄອນ ເອົາໃຈໃສ່ຊີ້ນໍາ ແລະ ຊຸກຍູ້ ຫົວໜ່ວຍງົບປະມານທີ່ຖືກກວດສອບຢູ່ຂັ້ນສູນກາງ ແລະ ທ້ອງຖິ່ນ ກໍຄືບັນດາວິສາຫະກິດຂອງລັດ ເອົາໃຈໃສ່ແກ້ໄຂຜົນການກວດສອບ ຕາມກົດໝາຍ ແລະ ຕາມມະຕິກອງປະຊຸມສະພາແຫ່ງຊາດຄັ້ງນີ້ ໃຫ້ເປັນຮູບປະທໍາ ເພື່ອແນໃສ່ສະກັດກັ້ນປາກົດການຫຍໍ້ທໍ້ໃນການລະເມີດວິໄນແຜນການ-ວິໄນການເງິນ ແລະ ກົດໝາຍ ໃນການຄຸ້ມຄອງລັດ ທາງດ້ານງົບປະມານໃຫ້ຫຼຸດລົງ. ກອງປະຊຸມຍັງໄດ້ຮັບຟັງການລາຍງານ ການເຄື່ອນໄຫວວຽກງານ ປີ 2019 ແລະ ທິດທາງປີ 2020 ຂອງອົງການໄອຍະການປະຊາຊົນສູງສຸດ, ສານປະຊາຊົນສູງສຸດ ແລະ ສະພາແຫ່ງຊາດ, ກອງປະຊຸມ ຕີລາຄາສູງ ຕໍ່ບົດປະກອບຄວາມເຫັນຂອງສູນກາງແນວລາວສ້າງຊາດ ຊຶ່ງຕາງໜ້າອົງການຈັດຕັ້ງມະຫາຊົນ, ສະຫະພັນນັກຮົບເກົ່າ ຕໍ່ການເຄື່ອນໄຫວວຽກງານຂອງສະພາແຫ່ງຊາດ ກໍຄືການບໍລິຫານລັດໃນໄລຍະໜຶ່ງປີຜ່ານມາເວົ້າລວມພ້ອມທັງສະເໜີຄວາມເຫັນທີ່ມີຄຸນປະໂຫຍດຕໍ່ກອງປະຊຸມ.

     ພິເສດກອງປະຊຸມຄັ້ງນີ້, ເປັນຄັ້ງທໍາອິດ ທີ່ໄດ້ດໍາເນີນການປະເມີນຜົນດ້ວຍການໃຫ້ຄະແນນຕໍ່ການປະຕິບັດໜ້າທີ່ຂອງບຸກຄະລາກອນທີ່ສະພາແຫ່ງຊາດເລືອກຕັ້ງ ແລະຮັບຮອງເອົາການແຕ່ງຕັ້ງ ຈໍານວນທັງໝົດ 69 ທ່ານ, ໃນນັ້ນ, ຍິງ 14 ທ່ານ ຕາມທີ່ໄດ້ກໍານົດໄວ້ໃນ ມາດຕາ 13 ຂໍ້ 5 ຂອງກົດໝາຍວ່າດ້ວຍສະພາແຫ່ງຊາດ, ຜ່ານການປະເມີນຜົນຕົວຈິງຄັ້ງນີ້ ບຸກຄະລາກອນດັ່ງກ່າວ ຍັງໄດ້ຮັບຄວາມໄວ້ວາງໃຈຈາກຕົວແທນຂອງປະຊາຊົນເປັນສ່ວນຫຼາຍ.

     ກອງປະຊຸມຮຽກຮ້ອງມາຍັງລັດຖະບານ, ອົງການລັດທຸກຂັ້ນຮີບຮ້ອນ ຈັດຕັ້ງຜັນຂະຫຍາຍບັນດາກົດໝາຍ, ມະຕິກອງປະຊຸມສະພາແຫ່ງຊາດຄັ້ງນີ້ ເອົາໃຈໃສ່ໂຄສະນາເຜີຍແຜ່ປຸກລະດົມປະຊາຊົນຍົກສູງສະຕິ ແລະ ເປັນເຈົ້າການ ປະຕິບັດບັນດາກົດໝາຍ, ບັນດາມະຕິຂອງສະພາແຫ່ງຊາດ, ພ້ອມທັງ ຄົ້ນຄວ້າ ແລະ ພິຈາລະນາ ຄວາມຄິດເຫັນຂອງບັນດາທ່ານສະມາຊິກສະພາ ກໍຄືຜູ້ມີສິດເລືອກຕັ້ງ ແລະປະຊາຊົນ ທີ່ໄດ້ສະເໜີມາ ເພື່ອມີວິທີການ, ມາດຕະການແກ້ໄຂແທດຕົວຈິງ ແລະ ຖືກຕ້ອງຕາມກົດໝາຍ, ພ້ອມທັງເອົາໃຈໃສ່ ເພີ່ມທະວີກົນໄກການປະສານສົມທົບ ລະຫວ່າງ ບັນດາຂະແໜງການຂັ້ນສູນກາງ ແລະ ທ້ອງຖິ່ນ ເພື່ອຮັບປະກັນຄວາມເປັນເອກະພາບ ໃນການຈັດຕັ້ງປະຕິບັດທິດທາງໜ້າທີ່ວຽກງານ ທີ່ກໍານົດໄວ້ໃນແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດປະຈໍາປີ 2020 ໃຫ້ໄດ້ຮັບຜົນສໍາເລັດຕາມຄາດໝາຍທີ່ວາງໄວ້.

- WhatsApp Image 2020 05 27 at 5 - ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ສໍາເລັດດ້ວຍຜົນຈົບງາມ
- WhatsApp Image 2020 05 27 at 5 - ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ສໍາເລັດດ້ວຍຜົນຈົບງາມ
error: Alert: ເນື້ອຫາຂ່າວມີລິຂະສິດ !!