ສະ​ພາ​ຍີ່​ປຸ່ນ ເຫັນ​ພ້ອມ​ຂໍ້​ຕົກ​ລົງ​ການ​ຄ້າ​ກັບ​ອາ​ເມ​ລິ​ກາຫວັງ​ດຶງ​ທ່ານ ທ​ຣຳ ຟື້ນ​ຟູ TPP

- 11 2 - ສະ​ພາ​ຍີ່​ປຸ່ນ ເຫັນ​ພ້ອມ​ຂໍ້​ຕົກ​ລົງ​ການ​ຄ້າ​ກັບ​ອາ​ເມ​ລິ​ກາຫວັງ​ດຶງ​ທ່ານ ທ​ຣຳ ຟື້ນ​ຟູ TPP
- AGL banner - ສະ​ພາ​ຍີ່​ປຸ່ນ ເຫັນ​ພ້ອມ​ຂໍ້​ຕົກ​ລົງ​ການ​ຄ້າ​ກັບ​ອາ​ເມ​ລິ​ກາຫວັງ​ດຶງ​ທ່ານ ທ​ຣຳ ຟື້ນ​ຟູ TPP

     ສຳ​ນັກ​ຂ່າວ​ກຽວ​ໂດ​ລາຍ​ງານ​ວ່າ: ລັດ​ຖະ​ສະ​ພາ​ຂອງ​ຍີ່​ປຸ່ນ ໄດ້​ລົງ​ມະ​ຕິ​ເຫັນ​ພ້ອມ​ຂໍ້​ຕົກ​ລົງ​ການ​ຄ້າ ຍີ່​ປຸ່ນ-ອາ​ເມ​ລິ​ກາ ໃນ​ການ​ຫລຸດ​ອັດ​ຕາ​ພາ​ສີ​ສິນ​ຄ້າ​ກະ​ສິ​ກຳ ແລະ ອຸດ​ສາ​ຫະ​ກຳ ເຊິ່ງ​ຈະ​ເລີ່ມ​ມີ​ຜົນ​ບັງ​ຄັບ​ໃຊ້​ໃນ​ວັນ​ທີ 1 ມັງ​ກອນ 2020.

     ຂໍ້​ຕົກ​ລົງ​ການ​ຄ້າ​ດັ່ງ​ກ່າວ ເປັນ​ການ​ຫາ​ລື​ຮ່ວມ​ກັນ​ລະ​ຫວ່າງ ນາ​ຍົກ​ລັດ​ຖະ​ມົນ​ຕີ ຊິນ​ໂຊ ອາ​ເບະ ຂອງ​ຍີ່​ປຸ່ນ ກັບ​ປະ​ທາ​ນາ​ທິ​ບໍ​ດີ ໂດນັ​ລ ທ​ຣຳ ແຫ່ງ​ອາ​ເມ​ລິ​ກາ ໃນ​ເດືອນ​ກັນ​ຍາ ເຊິ່ງ​ໄດ້​ຜ່ານ​ການ​ພິ​ຈາ​ລະ​ນາ​ເຫັນ​ພ້ອມ​ຈາກ​ທັງ​ສະ​ພາ​ຜູ້​ແທນ​ວຸດ​ທິ​ສ​ະ​ພາ​ຂອງ​ຍີ່​ປຸ່ນ​ໃນ​ເດືອນ​ພະ​ຈິກ​ຜ່ານ​ມາ ເຊິ່ງ​ຂໍ້​ຕົກ​ລົງ​ດັ່ງ​ກ່າວບໍ່​ໄດ້​ລະ​ບຸ​ວ່າ: ຕ້ອງ​ຜ່ານ​ການ​ພິ​ຈາ​ລະ​ນາ​ເຫັນ​ພ້ອມ​ຈາກ​ລັດ​ຖະ​ສະ​ພາ​ຂອງ​ອາ​ເມ​ລິ​ກາ. ດັ່ງ​ນັ້ນ ໝາຍ​ຄວາມ​ວ່າ: ຂະ​ບວນ​ການ​ອະ​ນຸ​ມັດ​ພາຍ​ໃນ​ປະ​ເທດ​ຂອງ​ທັງ​ສອງ​ຝ່າຍ​ສຳ​ເລັດ​ແລ້ວ ນຳ​ໄປ​ສູ່​ການ​ບັງ​ຄັບ​ໃຊ້​ຕໍ່​ໄປ.

     ກ່ອນ​ໜ້ານີ້ ປະ​ທາ​ນາ​ທິ​ບໍ​ດີ ທ​ຣຳ ໄດ້​ພະ​ຍາ​ຍາມ​ຊຸກ​ຍູ້​ຂໍ້​ຕົກ​ລົງ​ດັ່ງ​ກ່າວ ເພື່ອ​ຫລຸດ​ການ​ເສຍ​ດຸນ​ການ​ຄ້າ​ອາ​ເມ​ລິ​ກາ​ຕໍ່​ຍີ່​ປຸ່ນ ລວມ​ທັງ​ການ​ຮັກ​ສາ​ຜົນ​ປະ​ໂຫຍດ​ຂອງ​ກະ​ສິ​ກອນ​ຊາວ​ອາ​ເມ​ລິ​ກາ ທີ່​ໄດ້​ຮັບ​ຜົນ​ກະ​ທົບ​ໂດຍ​ກົງ​ຈາກ​ການ​ທີ່​ສິນ​ຄ້າ​ກະ​ສິ​ກຳ​ຂອງ​ອາ​ເມ​ລິ​ກາບໍ່​ສາ​ມາດ​ແຂ່ງ​ຂັນ​ກັບ​ປະ​ເທດ​ອື່ນ​ໄດ້, ຫລັງ​ຈາກ​ທີ່​ທ່ານ ທ​ຣຳ ຖອນ​ຕົວ​ອອກ​ຈາກ​ຂໍ້​ຕົກ​ລົງ​ການ​ເປັນ​ຫຸ້ນ​ສ່ວນ​ທາງ​ເສດ​ຖະ​ກິດ​ໃນ​ພາກ​ພື້ນ​ປາ​ຊີ​ຟິກ (TPP) ໃນ​ປີ 2017.

     ຕາມ​ຂໍ້​ຕົກ​ລົງ​ລະ​ຫວ່າງ​ສອງ​ຝ່າຍ​ລະ​ບຸ​ວ່າ: ຍີ່​ປຸ່ນ​ຈະ​ຫລຸດ​ອັດ​ຕາ​ພາ​ສີ​ສິນ​ຄ້າ​ກະ​ສິ​ກຳ​ນຳ​ເຂົ້າ​ຈາກ​ອາ​ເມ​ລິ​ກາ​ມູນ​ຄ່າ 7.200 ລ້ານ​ໂດ​ລາ​ສະ​ຫະ​ລັດ ລວມ​ທັງ​ຫລຸດ​ອັດ​ຕາ​ພາ​ສີ​ຊີ້ນ​ງົວ​ຂອງ​ອາ​ເມ​ລິ​ກາ​ຈາກ 38,5% ເຫລືອ​ພຽງ 9%. ນອກ​ຈາກນີ້ ສິນ​ຄ້າ​ປະ​ເພດ​ອື່ນ​ຂອງ​ອາ​ເມ​ລິ​ກາ​ເຊັ່ນ: ຊີ້ນ​ໝູ, ວາຍ ແລະ ເນີຍ​ແຂງ ກໍ​ຈະ​ໄດ້​ຮັບ​ການ​ອຳ​ນວຍ​ຄວາມ​ສະ​ດວກ​ໃນ​ການ​ເຂົ້າ​ເຖິງ​ຕະ​ຫລາດ​ຍີ່​ປຸ່ນ ແລະ ຍັງ​ສາ​ມາດ​ແຂ່ງ​ຂັນ​ກັບ​ສິນ​ຄ້າ​ຂອງ​ປະ​ເທດ​ອື່ນ​ທີ່​ເປັນ​ສະ​ມາ​ຊິກ TPP ເຊັ່ນ: ອົດ​ສະ​ຕ​ຣາ​ລີ ແລະ ກາ​ນາ​ດາ​ໄດ້​ນຳ​ອີກ.

      ສ່ວນ​ອາ​ເມ​ລິ​ກາ​ຈະ​ຍົກ​ເລີກ ແລະ ຫລຸດ​ພາ​ສີ​ໃຫ້​ແກ່​ສິນ​ຄ້າ​ອຸດ​ສາ​ຫະ​ກຳ​ຂອງ​ຍີ່​ປຸ່ນ​ເຊັ່ນ: ອຸ​ປະ​ກອນ​ການ​ຜະ​ລິດ ແລະ ຊິ້ນ​ສ່ວນ​ເຄື່ອງ​ປັບ​ອາ​ກາດ, ແຕ່​ຂໍ້​ຕົກ​ລົງ​ບໍ່​ລວມ​ທັງ​ພາ​ສີ 2,5% ທີ່​ອາ​ເມ​ລິ​ກາ​ເກັບ​ຈາກ​ການ​ນຳ​ເຂົ້າ​ລົດ​ຍົນ​ຂອງ​ຍີ່​ປຸ່ນ ຕາມ​ຄວາມ​ຕ້ອງ​ການ​ຂອງ​ລັດ​ຖະ​ບານ​ຍີ່​ປຸ່ນ​ກ່ອນ​ທີ່​ອາ​ເມ​ລິ​ກາ​ຈະ​ຖອນ​ຕົວ​ອອກ​ຈາກ TPP.

- Wave100S AD to Website 2020 0 - ສະ​ພາ​ຍີ່​ປຸ່ນ ເຫັນ​ພ້ອມ​ຂໍ້​ຕົກ​ລົງ​ການ​ຄ້າ​ກັບ​ອາ​ເມ​ລິ​ກາຫວັງ​ດຶງ​ທ່ານ ທ​ຣຳ ຟື້ນ​ຟູ TPP

      ລັດ​ຖະ​ບານ​ຂອງ​ທ່ານ ອາ​ເບະ ລະ​ບຸ​ວ່າ: ຂໍ້​ຕົກ​ລົງ​ນີ້​ເປັນ​ການ​ໄດ້​ຜົນ​ປະ​ໂຫຍດ​ທັງ​ສອງ​ຝ່າຍ ລວມ​ທັງ​ຜູ້​ບໍ​ລິ​ໂພກ​ຊາວ​ຍີ່​ປຸ່ນ​ນຳ​ອີກ, ແຕ່​ຝ່າຍ​ຄ້ານ​ໃນ​ສະ​ພາ​ຜູ້​ແທນ​ລາ​ຊະ​ດອນ​ຂອງ​ຍີ່​ປຸ່ນ​ຂັດ​ແຍ່ງວ່າ: ລັດ​ຖະ​ບານ​ຍີ່​ປຸ່ນ​ກຳ​ລັງ​ເສຍ​ປຽບ​ຫລາຍກວ່າ ແລະ ຍັງ​ວິ​ພາກວິ​ຈານ​ວ່າ: ຂໍ້​ອ້າງ​ຂອງ​ລັດ​ຖະ​ບານ​ທີ່​ວ່າ: ຂໍ້​ຕົກ​ລົງ​ກັບ​ອາ​ເມ​ລິ​ກາ​ເທື່ອນີ້​ຈະ​ຊ່ວຍ​ໃຫ້​ການ​ເຕີບ​ໃຫຍ່​ຂອງ​ລວມຍອດ​ຜະ​ລິດ​ຕະ​ພັນ​ພາຍ​ໃນ (GDP) ເຖິງ 0,8% ຫລື ປະ​ມານ 4 ຕື້​ເຢນ (37.000 ລ້ານ​ໂດ​ລາ​ສະ​ຫະ​ລັດ) ຍັງ​ຫ່າງ​ໄກ​ຈາກ​ຄວາມ​ເປັນ​ໄປ​ໄດ້ແທ້.

     ຫລັງ​ຈາກ​ຂໍ້​ຕົກ​ລົງ​ສະ​ບັບ​ມນີ້​ມີ​ຜົນ​ບັງ​ຄັບ​ໃຊ້​ຕົ້ນ​ປີ​ໜ້າ ທັງ​ສອງ​ປະ​ເທດ​ໄດ້​ກຳ​ນົດ​ຈະ​ຫາ​ລື​ກັນ​ອີກ​ພາຍ​ໃນ 4 ເດືອນ ເພື່ອ​ກຳ​ນົດ​ຂອບ​ເຂດ​ການ​ເຈ​ລະ​ຈາ​ການ​ຄ້າ​ເພີ່ມ​ຕື່ມ. ປະ​ທາ​ນາ​ທິ​ບໍ​ດີ ທ​ຣຳ ລະ​ບຸ​ວ່າ: ຂໍ້​ຕົກ​ລົງ​ຂອງ​ຍີ່​ປຸ່ນ​ເປັນ​ພຽງ​ຂໍ້​ຕົກ​ລົງ​ບາງ​ສ່ວນ, ສ່ວນ​ທີ່​ເຫລືອ​ຈະ​ຕາມ​ມາ​ໃນ​ປີ​ໜ້າ. ຂະ​ນະ​ທີ່ ຍີ່​ປຸ່ນ​ກໍ​ມີ​ຄວາມ​ຫວັງ​ວ່າ: ອາ​ເມ​ລິ​ກາ​ຈະ​ກັບ​ມາ​ຮ່ວມ​ໃນ TPP ອີກ.

    ນອກ​ຈາກນີ້ ສະ​ພາ​ຜູ້​ແທນ​ວຸດ​ທິ​ສະ​ພາ​ຍັງ​ລົງ​ມະ​ຕິ​ເຫັນ​ພ້ອມ​ຂໍ້​ຕົກ​ລົງ​ກັບ​ອາ​ເມ​ລິ​ກາ​ກ່ຽວ​ກັບ​ການ​ຄ້າ​ດິ​ຈິ​ທັ​ລ ເຊິ່ງ​ຈະ​ເປັນ​ການ​ອອກ​ກົດ​ລະ​ບຽບ​ກ່ຽວ​ກັບ​ການ​ຮັບ​ສົ່ງ​ຂໍ້​ມູນ​ຂ້າມ​ຊາຍ​ແດນ, ພ້ອມ​ກຳ​ນົດ​ວ່າ​ຈະ​ບໍ່​ມີ​ການ​ເກັບ​ພາ​ສີ​ຈາກ​ເນື້ອ​ໃນ​ທີ່​ສົ່ງ​ຜ່ານ​ຊ່ອງ​ທາງ​ເອ​ເລັກ​ໂຕ​ຣ​ນິກ.

- WhatsApp Image 2020 05 27 at 5 - ສະ​ພາ​ຍີ່​ປຸ່ນ ເຫັນ​ພ້ອມ​ຂໍ້​ຕົກ​ລົງ​ການ​ຄ້າ​ກັບ​ອາ​ເມ​ລິ​ກາຫວັງ​ດຶງ​ທ່ານ ທ​ຣຳ ຟື້ນ​ຟູ TPP
- WhatsApp Image 2020 05 27 at 5 - ສະ​ພາ​ຍີ່​ປຸ່ນ ເຫັນ​ພ້ອມ​ຂໍ້​ຕົກ​ລົງ​ການ​ຄ້າ​ກັບ​ອາ​ເມ​ລິ​ກາຫວັງ​ດຶງ​ທ່ານ ທ​ຣຳ ຟື້ນ​ຟູ TPP
- WhatsApp Image 2020 05 27 at 5 - ສະ​ພາ​ຍີ່​ປຸ່ນ ເຫັນ​ພ້ອມ​ຂໍ້​ຕົກ​ລົງ​ການ​ຄ້າ​ກັບ​ອາ​ເມ​ລິ​ກາຫວັງ​ດຶງ​ທ່ານ ທ​ຣຳ ຟື້ນ​ຟູ TPP
- WhatsApp Image 2020 05 27 at 5 - ສະ​ພາ​ຍີ່​ປຸ່ນ ເຫັນ​ພ້ອມ​ຂໍ້​ຕົກ​ລົງ​ການ​ຄ້າ​ກັບ​ອາ​ເມ​ລິ​ກາຫວັງ​ດຶງ​ທ່ານ ທ​ຣຳ ຟື້ນ​ຟູ TPP
error: Alert: Content is protected !!