ຣັດເຊຍ ຖືກຫ້າມລົງແຂ່ງກິລາທຸກລາຍການ 4 ປີ
ວັນທີ 9 ທັນວານີ້, ອົງການຕໍ່ຕ້ານການໃຊ້ສານຕ້ອງຫ້າມໂລກ (ວາດາ) ປະກາດລົງໂທດ ຣັດເຊຍ ຫ້າມເຂົ້າຮ່ວມແຂ່ງຂັນມະຫະກຳກິລາໃຫຍ່ທຸກປະເພດທົ່ວໂລກເປັນເວລາ 4 ປີ ເຊິ່ງລວມທັງໂອລິມປິກເກມ 2020 ແລະ ເຕະບານໂລກ 2022 ຫລັງມີບັນຫາເລື່ອງການໃຊ້ຢາຂອງນັກກິລາ.
ຜົນການສອບສວນໃນເດືອນມັງກອນຜ່ານມາ ພົບວ່າ: ອົງການຕໍ່ຕ້ານການໃຊ້ສານຕ້ອງຫ້າມຂອງຣັດເຊຍຍັງບໍ່ໄດ້ດຳເນີນການແກ້ໄຂຂໍ້ມູນທາງແລ໊ບຄືເກົ່າ, ຄະນະກຳມະການຂອງວາດາຈຶ່ງມີມະຕິໃນການລົງໂທດຣັດເຊຍດັ່ງກ່າວ ແຕ່ຍັງເປີດໂອກາດໃຫ້ຣັດເຊຍຍື່ນອຸທອນພາຍໃນ 21 ວັນຕໍ່ຈາກນີ້ ໂດຍຈະສົ່ງເລື່ອງໄປເຖິງສານອະນຸຍາໂຕຕຸລາການກິລາ (CAS).
ຄຳສັ່ງຫ້າມດັ່ງກ່າວ ໝາຍຄວາມວ່າ: ໃນມະຫະກຳກິລາຕ່າງໆ ຣັດເຊຍ ຈະບໍ່ໄດ້ຮັບອະນຸຍາດໃຫ້ເຂົ້າຮ່ວມ, ແຕ່ຍັງມີຂໍ້ຍົກເວັ້ນສຳລັບຜູ້ທີ່ພິສູດໄດ້ວ່າຕົນເອງໃນສະອາດແທ້ ຈະລົງແຂ່ງພາຍໃຕ້ທຸງທີມອິດສະຫລະແທນ.
ດ້ານສະຫະພັນບານເຕະນາໆຊາດ ຫລື FIFA ຢືນຢັນໄດ້ຮັບໜັງສືສະເໜີຈາກ ວາດາ ແລ້ວ, ສ່ວນເລື່ອງສັ່ງຫ້າມຣັດເຊຍເຂົ້າຮ່ວມເຕະບານໂລກ 2022 ຫລື ບໍ່ ຍັງຕ້ອງພິຈາລະນາ ແລະ ຊີ້ແຈງກັນຕື່ມໃນຂອບເຂດທີ່ກ່ຽວພັນກັບກິລາບານເຕະ.
ຂະນະທີ່ ທ່ານ ວະລາດິເມຍ ປູຕິນ ປະທານາທິບໍດີຣັດເຊຍ ໃຫ້ທັດສະນະວ່າ: ການລົງໂທດຂອງ ວາດາ ຮຸນແຮງເກີນໄປ ຖ້າລົງໂທດຄວນລົງໂທດບຸກຄົນທີ່ກະທຳຜິດ ບໍ່ຄວນກວມລວມທັງປະເທດ ເຊິ່ງບໍ່ຍຸຕິທຳສຳລັບຄົນທີ່ບໍ່ມີສ່ວນກ່ຽວຂ້ອງ.
