ລັດຈະສຸມໃສ່ພັດທະນາກໍາລັງແຮງງານໃຫ້ມີຄຸນນະພາບ

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນໃຫ້ຮູ້ວ່າ: ລັດຖະບານຈະສຸມໃສ່ການພັດທະນາກໍາລັງແຮງງານໃຫ້ມີຄຸນນະພາບ, ດຸໝັ່ນ ແລະ ອົດທົນເພື່ອຮອງຮັບການຫັນເປັນອຸດສາຫະກໍາທັນສະໄໝຂອງປະເທດໃນຕໍ່ໜ້າ, ໂດຍຈະເນັ້ນການສົ່ງ​ເສີມ​ໃຫ້​ສະຖານ​ທີ່​ພັດທະນາ​ສີມື​ແຮງ​ງານນັບ​ທັງ​ພາກ​ລັດ ​ແລະ ​ເອກະ​ຊົນມີ​ສ່ວນ​ຮ່ວມ​ໃນ​ການ​ພັດທະນາ​ສີມື​ແຮງ​ງານ​ໃຫ້​ຜູ້​ທີ່​ຕ້ອງການ​ຝຶກ ​ແລະ ພ້ອມ​ທີ່​ຈະ​ອອກ​ແຮງ​ງານ​ຈຳນວນ 180 ພັນກວ່າຄົນ. ​

ໂດຍມອບໃຫ້ກະຊວງ​ແຮງ​ງານ ​ແລະສະຫວັດດີ​ການ​ສັງຄົມ ​ເປັນ​ເຈົ້າການ​ຝຶກ ​ແລະ ສົມທົບ​ກັບ​ຫົວໜ່ວຍ​ແຮງ​ງານ​ຕ່າງໆ​ໃນ​ການ​ພັດທະນາ​ສີມື​ແຮງ​ງານ​ໃຫ້​ດີ, ສືບ​ຕໍ່​ສ້າງ ​ແລະ ປັບປຸງ​ລະບົບ​ການຈັດ​ຫາ​ງານ​ໃຫ້​ມີ​ຄວາມ​ເຂັ້ມ​ແຂງ, ປັບປຸງ​ສູນ​ບໍລິການ​ຈັດ​ຫາ​ງານ ​ແລະຂະຫຍາຍ​ຈຸດ​ບໍລິການ​ຈັດ​ຫາ​ງານ​ໃຫ້​ມີຢູ່​ທຸກ​ແຂວງ​ໃນ​ທົ່ວ​ປະ​ເທດ, ​ພ້ອມທັງໃຫ້ການ​ບໍລິການ​ຈັດ​ຫາ​ວຽກ​ເຮັດ​ງານ​ທຳ​ຕາມ​ຄວາມ​ຕ້ອງການ​ຂອງ​ຂະ​ແໜງ​ການ​ເສດຖະກິດ ​ແລະ ຕະຫລາດ​ແຮງ​ງານ​, ໄປຄຽງຄູ່ກັນນັ້ນກໍສືບ​ຕໍ່​ສ້າງ ​ແລະພັດທະນາ​ຖານ​ຂໍ້​ມູນ​ຂ່າວສານ​ຕະຫລາດ​ແຮງ​ງານ​ໃຫ້​ມີ​ຄວາມ​ເຂັ້ມ​ແຂງ ​ແລະ ​ເປັນ​ລະບົບ ​ເພື່ອ​​ສະໜອງ​ຂໍ້​ມູນກ່ຽວກັບ​ແຮງ​ງານ​ໃຫ້​ສົມສ່ວນ​ກັບ​ຄວາມ​ຕ້ອງການ​ຂອງ​ຂະ​ແໜງ​ການ​ເສດຖະກິດ, ການ​ດັດສົມ​ການ​ສະໜອງ ​ແລະຄວາມ​ຕ້ອງການ​ໃນ​ການ​ພັດທະນາ​ສີມື​ແຮງ​ງານ ​ແລະ ການຈັດ​ຫາ​ວຽກ​ເຮັດ​ງານ​ທຳ​ຕາມ​ຄວາມ​ຕ້ອງການ​ຂອງ​ຕະຫລາດ​ແຮງ​ງານ​ໃຫ້​ມີ​ຄວາມ​ຄ່ອງ​ຕົວ​ກວ່າ​ເກົ່າ, ນອກນີ້, ກໍສືບຕໍ່​ໂຄສະນາ​ເຜີຍ​ແຜ່, ຕິດຕາມ ​ແລະ ກວດກາ​ການປະຕິບັດລະບຽບກົດໝາຍ​ກ່ຽວຂ້ອງ​ກັບ​ແຮງ​ງານ​ຢູ່​ຫົວໜ່ວຍ​ແຮງ​ງານ​ຕ່າງໆ​ໃນ​ຂອບ​ເຂດ​ທົ່ວ​ປະ​ເທດ, ເອົາໃຈໃສ່​ແກ້ໄຂຂໍ້​ຂັດ​ແຍ່ງ​ແຮງ​ງານ​, ສືບຕໍ່ຂຶ້ນທະບຽນ​ຫົວໜ່ວຍ​ແຮງ​ງານ​ທີ່​ຜູ້​ອອກ​ແຮງ​ງານ 100 ຄົນຂຶ້ນ​ໄປ​ໃຫ້ສໍາເລັດ, ເພື່ອແນໃສ່ສ້າງ​ຄວາມ​ປອດ​ໄພດ້ານ​ສຸຂະພາບ ແລະ ຍົກລະດັບຊີວິດການເປັນຢູ່ຂອງ​ແຮງ​ງານລາວນັບມື້ດີຂຶ້ນ.

error: Alert: Content is protected !!