ADB ຫລຸດຄາດຄະເນເສດຖະກິດປະເທດ ກຳລັງພັດທະນາໃນອາຊີປີນີ້-ປີໜ້າ

- advert banner 728 90 728x90 - ADB ຫລຸດຄາດຄະເນເສດຖະກິດປະເທດ ກຳລັງພັດທະນາໃນອາຊີປີນີ້-ປີໜ້າ

     ທະນາຄານ​ເພື່ອ​ການ​ພັດທະນາ​ແຫ່ງ​ອາຊີ (ADB) ຄາດ​ຄະ​ເນ​ວ່າ: ການ​ຂະຫຍາຍຕົວ​ທາງ​ເສດຖະກິດ​ຂອງ​ກຸ່ມ​ປະ​ເທດ​ກຳລັງ​ພັດທະນາ​ໃນ​ພາກພື້ນອາຊີ​ຈະ​ຊ້າ​ລົງ​ຫລາຍ​ກວ່າ​ການ​ຄາດ​ຄະ​ເນ​ໄວ້​ໃນ​ປີ​ນີ້ ​ແລະ ປີໜ້າ ​ໂດຍ​ຄາດ​ວ່າການ​ຂະຫຍາຍຕົວ​ທາງ​ເສດຖະກິດ​ທັງ​ໃນ​ປີ 2019 ​ແລະ 2020 ຈະ​ຫລຸດ​ລົງ​ສູ່​ລະດັບ 5,2% ຈາກ​ທີ່​ເຄີຍ​ຄາດ​ຄະ​ເນ​ໄວ້ 5,4% ​ໃນ​ປີ​ນີ້ ​ແລະ 5,5% ​ໃນ​ປີໜ້າ ​ເນື່ອງ​ຈາກ​ການ​ລົງທຶນ​ພາຍ​ໃນ​ປະ​ເທດອ່ອນ​ແອ​ລົງ ​ເພາະ​ປັດ​ໄຈ​ພາຍ​ນອກ​ເຊັ່ນ: ສົງຄາມ​ການ​ຄ້າ ອາ​ເມ​ລິ​ກາ-ຈີນ.

- new3 - ADB ຫລຸດຄາດຄະເນເສດຖະກິດປະເທດ ກຳລັງພັດທະນາໃນອາຊີປີນີ້-ປີໜ້າ

     ສຳນັກ​ຂ່າວ​ກຽວ​ໂດ​ລາຍ​ງານ​ວ່າ: ກຸ່ມ​ປະ​ເທດ​ກຳລັງ​ພັດທະນາ​ໃນ​ພາກພື້ນອາຊີ​ນັ້ນປະກອບ​ມີ​ປະ​ເທດ​ສະມາຊິກ 45 ຊາດ ລວມທັງ ຈີນ ​ແລະ ອິນ​ເດຍ ​ແຕ່​ບໍ່​ລວມຍີ່ປຸ່ນ.

      ADB ລະບຸ​ໃນ​ລາຍ​ງານ Asian Development Outlook Supplement ວ່າ: ຄວາມ​ເຄັ່ງ​ຕຶງ​ດ້ານ​ການ​ຄ້າ​ທີ່​ຍືດ​ເຍື້ອຍັງ​ເປັນຄວາມ​ສ່ຽງ​ຕົ້ນຕໍ​ຕໍ່ທ່າ​ອ່ຽງ​ເສດຖະກິດ. ພ້ອມ​ທັງ​ລະບຸ​ເຖິງ​ປັດ​ໄຈ​ຕ່າງໆ​ເຊັ່ນ: ການ​ຂະຫຍາຍຕົວ​ຊ້າ​ຂອງ​ການ​ຄ້າ​ໂລກ ​ແລະ ກິດຈະກຳ​ທາງ​ເສດຖະກິດ ​ແລະ ການ​ຂະຫຍາຍ​ຕົວ​ຊ້າ​ຂອງ​ອຸດສາຫະກຳ​ເອ​ເລັກ​ໂຕຣນິກທົ່ວ​ໂລກ.

     ລາຍ​ງານ​ລະບຸ​ວ່າ: ການ​ເຕີບ​ໃຫຍ່​ທາງ​ເສດຖະກິດ​ຂອງ​ຈີນ​ຄາດ​ວ່າ​ຈະ​ຊ້າ​ລົງ​ສູ່ລະດັບ 6,1% ​ໃນ​ປີ​ນີ້ ​ແລະ 5,8% ​ໃນ​ປີໜ້າ ຈາກ​ການ​ຂະຫຍາຍຕົວ 6,6% ​ໃນ​ປີ 2018.

     ທັງ​ນີ້ ​ເສດຖະກິດ​ຂອງ​ຮົງ​ກົງ ​ເຊິ່ງ​ໄດ້​ຮັບ​ຜົນ​ກະທົບ​ຈາກ​ເຫດການ​ຄວາມ​ບໍ່​ສະຫງົບ​ທາງ​ການ​ເມືອງ​ທີ່​ຍືດ​ເຍື້ອ ​ແລະ ຕໍ່​ເນື່ອງນັ້ນ ຄາດ​ວ່າ​ຈະ​ຫລຸດ​ລົງ 1,2% ​ໃນ​ປີ​ນີ້ ​ແລະ ຂະຫຍາຍຕົວ 0,3% ​ໃນ​ປີ 2020 ຫລັງ​ຈາກ​ເຕີບ​ໃຫຍ່ 3,0% ​ໃນ​ປີ 2018.

    ADB ລະບຸ​ໃນ​ລາຍ​ງານ​ວ່າ: ການ​ຄາດ​ຄະ​ເນ​ການ​ເຕີບ​ໃຫຍ່​ທາງ​ເສດຖະກິດ​ຂອງ​ອິນ​ເດຍຫລຸດ​ລົງ​ມາ​ຢູ່ 5,1% ​ໃນ​ປີ​ນີ້ ຈາກ​ການ​ຄາດ​ຄະ​ເນ​ກ່ອນ​ໜ້າ​ນີ້ 6,5% ​ໃນ​ເດືອນ​ກັນຍາ​ຜ່ານ​ມາ ​ເນື່ອງ​ຈາກ​ການລົ້ມລະລາຍ​ຂອງ​ບໍລິສັດ​ການ​ເງິນ​ລາຍ​ໃຫຍ່​ທີ່​ບໍ່​ແມ່ນ​ທະນາຄານ​ໃນປີ 2018 ​ເຮັດ​ໃຫ້​ມີ​ການ​ຫລີກ​ເວັ້ນຄວາມ​ສ່ຽງ​ເພີ່ມ​ຂຶ້ນ​ໃນ​ຂະ​ແໜງ​ການ​ເງິນ ​ແລະ ​ເຮັດ​ໃຫ້​ສະພາບ​ສິນ​ເຊື່ອ​ທີ່​ເຄັ່ງ​ຕຶງ.

     ສຳລັບ​ເສດຖະກິດ​ຍີ່ປຸ່ນ ຄາດ​ວ່າ​ຈະ​ຂະຫຍາຍຕົວ 1,0% ​ໃນ​ປີ​ນີ້ ​ໂດຍ​ຫລຸດ​ລົງ​ຈາກ​ການ​ຄາດ​ຄະ​ເນ​ຂັ້ນຕົ້ນ 1,2% ​ເຖິງ​ວ່າການ​ຄາດ​ຄະ​ເນ​ໃນ​ປີ 2020 ຈະ​ຍັງ​ຢູ່​ທີ່ 0,5%.

     ສ່ວນ​ອັດຕາ​ເງິນ​ເຟີ້​ໃນ​ກຸ່ມ​ປະ​ເທດ​ກຳລັງ​ພັດທະນາ​ໃນ​ອາຊີ​ນັ້ນຄາດ​ວ່າ: ຈະ​ເພີ່ມ​ຂຶ້ນ​ເປັນ 2,8% ​ໃນ​ປີ​ນີ້ ​ແລະ 3,1% ​ໃນ​ປີໜ້າ ຈາກ​ລະດັບ​ທີ່​ມີ​ການ​ຄາດ​ຄະ​ເນ​ໄວ້​ໃນ​ເດືອນ​ກັນຍາ​ຜ່ານ​ມາ​ທີ່ 2,7% ທັງ​ໃນ​ປີ​ນີ້ ​ແລະ ປີໜ້າ.

error: Content is protected !!