ການສໍາຫລວດສະຖິຕິທົ່ວປະເທດຄັ້ງທີ III ຈະດໍາເນີນແຕ່ເດືອນມັງກອນ-ເມສາ 2020

- advert banner 728 90 728x90 - ການສໍາຫລວດສະຖິຕິທົ່ວປະເທດຄັ້ງທີ III ຈະດໍາເນີນແຕ່ເດືອນມັງກອນ-ເມສາ 2020

  ໃນຕໍ່ໜ້ານີ້, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດຂອງປະເທດເຮົາຈະຕ້ອງໄປຕາມທິດທາງທີ່ພັກ-ລັດຖະບານກໍານົດໄວ້ໜັກແໜ້ນກວ່າເກົ່າ, ຫລັງຈາກລັດຖະບານໄດ້ກະກຽມຈະລົງສໍາຫລວດກ່ຽວກັບສະຖິຕິເສດຖະກິດ ແຕ່ວັນທີ 6 ມັງກອນຫາ 28 ກຸມພາ ແລະ ສະຖິຕິກະສິກໍາ ນັບແຕ່ເດືອນກຸມພາຫາເດືອນເມສາ 2020 ​ໃຫ້​ສຳ​ເລັດ.

- new3 - ການສໍາຫລວດສະຖິຕິທົ່ວປະເທດຄັ້ງທີ III ຈະດໍາເນີນແຕ່ເດືອນມັງກອນ-ເມສາ 2020

  ລັດຖະບານ ໃຫ້ຮູ້ວ່າ: ການສໍາຫລວດເສດຖະກິດໄດ້ກວມເອົາບັນດາຄົວເຮືອນທີ່ດໍາເນີນທຸລະກິດ, ຫົວໜ່ວຍພື້ນຖານເສດຖະກິດ, ທຸລະກິດ-ຫ້າງຮ້ານ ທີ່ດໍາເນີນການຜະລິດສິນຄ້າ ແລະ ບໍລິການຕ່າງໆໃນທົ່ວປະເທດ ນັບທັງຜູ້ລົງທຶນຄົນລາວ ແລະ ຄົນຕ່າງປະເທດທີ່ເຄື່ອນໄຫວແຕ່ 3 ເດືອນຂຶ້ນໄປ. ສ່ວນການສໍາຫລວດສະຖິຕິກະສິກໍາ ແມ່ນກໍານົດເອົາການຖືຄອງກະສິກໍາທັງໝົດທີ່ມີການຜະລິດກະສິກໍາໃນທົ່ວປະເທດເຊັ່ນ: ການຜະລິດກະສິກໍາແບບຄົວເຮືອນ ຫລື ລວມໝູ່.

ດັ່ງນັ້ນ ໃນໄລຍະດັ່ງກ່າວ ຈະມີພະນັກງານນັກເດີນສໍາຫລວດ ແລະ ນັກກວດກາຈາກສູນກາງ ແລະ ທ້ອງຖິ່ນລົງໄປພົບປະປະຊາຊົນບັນດາເຜົ່າ, ບຸກຄົນ, ນິຕິບຸກຄົນ, ຊາວຄ້າຂາຍ, ນັກທຸລະກິດ ແລະ ວິສາຫະກິດຫ້າງ-ຮ້ານຕ່າງໆ ເພື່ອເກັບກໍາຂໍ້ມູນກ່ຽວກັບການດໍາເນີນກິດຈະການຄ້າຂາຍ, ທຸລະກິດ, ການບໍລິການ ແລະ ການຜະລິດກະສິກໍາຕ່າງໆ ຈຶ່ງຂໍໃຫ້ປະຊາຊົນ, ຫົວໜ້າຄອບຄົວ, ເຈົ້າຂອງທຸລະກິດ ໃຫ້ການຮ່ວມມືຊ່ວຍເຫລືອໃນການຕອບຄໍາຖາມ ແລະ ໃຫ້ຂໍ້ມູນທີ່ຄົບຖ້ວນຕາມຄວາມຈິງໃຫ້ແກ່ນັກເດີນສໍາຫລວດຄັ້ງນີ້ດ້ວຍ ເນື່ອງຈາກຜົນສໍາຫລວດຄັ້ງສໍາຄັນນີ້ ຈະສາມາດສະໜອງຂໍ້ມູນທີ່ສໍາຄັນຫລາຍດ້ານໃຫ້ແກ່ການກໍານົດໂຄງປະກອບເສດຖະກິດແຫ່ງຊາດ, ສະພາບການປະກອບທຶນ, ການລົງທຶນ, ອັດຕາສ່ວນຕົ້ນທຶນການຜະລິດຕໍ່ລາຍຮັບລວມ ແລະ ສະເລ່ຍຕໍ່ເດືອນຂອງຫົວໜ່ວຍເສດຖະກິດພື້ນຖານ.

ສະພາບການປ່ຽນແປງຂອງການເພີ່ມຂຶ້ນ ຫລື ຫລຸດລົງໃນການເຄື່ອນໄຫວກິດຈະກໍາ, ຈໍານວນຫົວໜ່ວຍທີ່ເຮັດກິດຈະກໍາທຸລະກິດການຄ້າ, ການບໍລິການ, ອັດຕາສ່ວນການສະໜອງສິນຄ້າ ແລະ ບໍລິການທີ່ໄດ້ຜະລິດຂຶ້ນເພື່ອສົ່ງອອກ ຫລື ຮັບໃຊ້ພາຍໃນ. ຮູບແບບການຈັດຕັ້ງຂອງຫົວໜ່ວຍເສດຖະກິດພື້ນຖານ ແລະ ອັດຕາການຖືຮຸ້ນພາຍໃນ ແລະ ຕ່າງປະເທດ, ສະພາບການຖືບັນຊີ, ສະພາບແຮງງານ ແລະ ທ່າອ່ຽງການດໍາເນີນທຸລະກິດທຽບໃສ່ໄລຍະຜ່ານມາ, ສະໜອງຂໍ້ມູນໃຫ້ແກ່ນັກຄົ້ນຄວ້າວິໄຈ, ການນໍາ, ຜູ້ວາງນະໂຍບາຍ, ການສ້າງແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ ທັງເປັນການຕີລາຄາຄວາມພ້ອມທາງດ້ານເສດຖະກິດຂອງ ສປປ ລາວ ເພື່ອກ້າວເຂົ້າສູ່ຕະຫລາດໂລກ ພາຍໃຕ້ຂອບຂອງການຄ້າໂລກ (WTO) ແລະ ປະຊາຄົມເສດຖະກິດອາຊຽນ (AEC) ຕາມທິດຫັນເປັນອຸດສາຫະກໍາທັນສະໄໝ ເພື່ອເຮັດໃຫ້ປະເທດຊາດມີສະຖຽນລະພາບໝັ້ນຄົງ, ຫລຸດພົ້ນອອກຈາກປະເທດດ້ອຍພັດທະນາໃນຕໍ່ໜ້າ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.   

error: Content is protected !!