11 ເດືອນກະຊວງການເງິນເກັບລາຍຮັບເຂົ້າງົບປະມານໄດ້ 77,89% ຂອງແຜນການ

- money - 11 ເດືອນກະຊວງການເງິນເກັບລາຍຮັບເຂົ້າງົບປະມານໄດ້ 77,89% ຂອງແຜນການ
- Untitled design - 11 ເດືອນກະຊວງການເງິນເກັບລາຍຮັບເຂົ້າງົບປະມານໄດ້ 77,89% ຂອງແຜນການ

ກອງປະຊຸມສະຫຼຸບການຈັດຕັ້ງປະຕິບັດວຽກງານການເງິນ ປະຈໍາປີ 2019 ແລະ ທິດທາງແຜນການ ປີ 2020 ຂອງກະຊວງການເງິນ ທີ່ໄດ້ຈັດຂຶ້ນໃນວັນທີ 16 ທັນວານີ້, ທີ່ຫໍປະຊຸມແຫ່ງຊາດ, ໂດຍການປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ຍົກໃຫ້ເຫັນວ່າ: ໃນໄລຍະ 11 ເດືອນຜ່ານມານີ້, ກະຊວງການເງິນ ສາມາດການເກັບລາຍຮັບໄດ້ 20.641 ຕື້ກວ່າກີບ, ເທົ່າກັບ 77,89% ຂອງແຜນການ; ໃນນັ້ນ, ລາຍຮັບພາຍໃນບັນລຸໄດ້ 20.000 ຕື້ກວ່າກີບ, ເທົ່າກັບ ເທົ່າກັບ 82% ຂອງແຜນການປີ, ທຽບໃສ່ໄລຍະດຽວກັນຂອງປີ 2018 ເພີ່ມຂຶ້ນ 3% ແລະລາຍຮັບຈາກການຊ່ວຍເຫຼືອລ້າ 580 ຕື້ກີບ ເທົ່າກັບ 28% ຂອງແຜນການປີ. ສະເພາະລາຍຮັບສູນກາງຄຸ້ມຄອງມີ 16 ພັນກວ່າຕື້ ແລະ ທ້ອງຖິ່ນ 4 ພັນກວ່າຕື້. ເຊິ່ງແຍກອອກເປັນແຕ່ລະຂະແໜງການລະອຽດດັ່ງນີ້: ສ່ວຍສາອາກອນ 9 ພັນກວ່າຕື້, ພາສີ 6 ພັນກວ່າຕື້, ຄຸ້ມຄອງການເງິນລັດວິສາຫະກິດ 2 ພັນກວ່າຕື້, ຊັບສິນຂອງລັດ 1 ພັນກວ່າຕື້ ແລະ ລາຍຮັບອື່ນໆ 8,38 ຕື້ກີບ.

ສ່ວນການປະຕິບັດລາຍຈ່າຍໃນ 11 ເດືອນ ຜ່ານມາຕົກເປັນ 23 .279 ຕື້ກີບ ເທົ່າກັບ 69% ຂອງແຜນການ. ໃນນີ້, ລາຍຈ່າຍບໍລິຫານປົກກະຕິມີ 16 ພັນກວ່າຕື້, ລາຍຈ່າຍການລົງທຶນ 7 ພັນກວ່າຕື້. ຂະນະທີ່ການຂາດດຸນໃນ11 ເດືອນ 2.636 ຕື້ກີບ ແລະ ແຫຼ່ງທຶນມາດຸ່ນດ່ຽງງົບປະມານທັງໝົດ 11.463 ຕື້ກີບ. ຄາດຄະເນການເກັບລາຍຮັບໝົດປີ 2019 ຈະໄດ້ປະມານ 25.665 ຕື້ກີບ, ເທົ່າກັບ 96,84% ຂອງແຜນການປິ. ໃນນັ້ນ, ລາຍຮັບພາຍໃນຈະໄດ້ 23.474 ຕື້ກີບ, ລາຍຮັບຈາກການຊ່ວຍເຫຼືອລ້າ 1.993 ຕື້ກີບ ແລະ ລາຍຮັບຈາກການປະກອບສ່ວນສັງຄົມ197 ຕື້ກີບ. ສ່ວນຄາດຄະເນລາຍຈ່າຍໝົດປີ 2019 ບໍ່ເກີນ 33.082 ຕື້ກີບເທົ່າກັບ 98% ຂອງແຜນດັດແກ້ ແລະ ຫຼຸດຄາດໝາຍທີ່ໄດ້ລາຍງານຕໍ່ສະພາແຫ່ງຊາດປະມານ 216 ຕື້ກີບ; ແຕ່ກໍໄດ້ຮັບປະກັນການເບີກຈ່າຍເງິນເດືອນ, ເງິນນະໂຍບາຍ ແລະ ຊ່ວຍໜູນຂອງພະນັກງານລັດຖະກອນໄດ້ສໍາເລັດ ແລະ ຮັບປະກັນການປະຕິບັດລາຍຈ່າຍບໍລິຫານກົງຈັກ ແລະລາຍຈ່າຍການລົງທຶນຂອງລັດບົນພື້ນຖານທີ່ສະພາແຫ່ງຊາດຮັບຮອງ. 

ສໍາລັບແຜນປີ 2020 ຄາດວ່າຈະເກັບລາຍຮັບໃຫ້ໄດ້ 28.997 ຕື້ກີບ ເທົ່າກັບ 16,31% ຂອງຈີດີພີ, ເພີ່ມຂຶ້ນ 9,4% ທຽບກັບປີ 2019. ໃນນັ້ນ, ລາຍຮັບຈາກພາສີ ແລະ ສ່ວຍສາອາກອນ 22.133 ຕື້ກີບ; ລາຍຮັບທີ່ບໍ່ແມ່ນພາສີ ແລະ ສ່ວຍສາອາກອນ 4.576 ຕື້ກີບ; ລາຍຮັບຈາກການຊ່ວຍເຫຼືອລ້າ 2.287 ຕື້ກີບ. ສ່ວນລາຍຈ່າຍປີ 2020 ຈະຢູ່ໃນລະດັບ 35.693 ຕື້ກີບ ເທົ່າກັບ 20,8% ຂອງຈີດີພີເພີ່ມຂຶ້ນ 5,8% ທຽບໃສ່ແຜນການປີ. ໃນນີ້, ລາຍຈ່າຍບໍລິຫານປົກກະຕິ 22.818 ຕື້ກີບ; ລາຍຈ່າຍການລົງທຶນຂອງລັດ 12.875 ຕື້ກີບ ແລະ ຄາດຄະເນການຂາດດຸນງົບປະມານ 6.696 ຕື້ກີບ.

- Wave100S AD to Website 2020 0 - 11 ເດືອນກະຊວງການເງິນເກັບລາຍຮັບເຂົ້າງົບປະມານໄດ້ 77,89% ຂອງແຜນການ
- WhatsApp Image 2020 05 27 at 5 - 11 ເດືອນກະຊວງການເງິນເກັບລາຍຮັບເຂົ້າງົບປະມານໄດ້ 77,89% ຂອງແຜນການ
- WhatsApp Image 2020 05 27 at 5 - 11 ເດືອນກະຊວງການເງິນເກັບລາຍຮັບເຂົ້າງົບປະມານໄດ້ 77,89% ຂອງແຜນການ
error: Alert: ເນື້ອຫາຂ່າວມີລິຂະສິດ !!