ເກີດອຸປະຕິເຫດ ຢູ່ແຂວງ ຜົ້ງສາລີ ມີຜູ້ເສຍຊີວິດຄາທີ່ 5 ຄົນ

- Untitled design - ເກີດອຸປະຕິເຫດ ຢູ່ແຂວງ ຜົ້ງສາລີ ມີຜູ້ເສຍຊີວິດຄາທີ່ 5 ຄົນ

ພາຍຫລັງໄດ້ມີສື່ສັງຄົມອອນລາຍໄດ້ລາຍງານຂ່າວວ່າ: ມີອຸປະຕິເຫດລົດກະບະປີ້ນ ຢູ່ເຂດ ເມືອງ ໃໝ່ ແຂວງ ຜົ້ງສາລີ ເຮັດໃຫ້ມີຜູ້ເສຍຊີວິດຄາທີ່ 5 ຄົນ. ຕໍ່ກັບເຫດການດັ່ງກ່າວ, ທາງໜັງສືພິມລາວພັດທະນາ ໄດ້ສອບຖາມເຈົ້າໜ້າທີ່ກົມຕຳຫລວດຈະລາຈອນ ໃຫ້ຮູ້ວ່າ: ເຫດການດັ່ງກ່າວແມ່ນມີຄວາມຈິງແທ້, ຊຶ່ງເກີດຂຶ້ນໃນວັນທີ 11 ທັນວາ ນີ້, ໂດຍລົດກະບະໝາຍເລກທະບຽນ ບກ 3510 ອຸດົມໄຊ, ປີ້ນເອງ, ຢູ່ເຂດບ້ານ ສະຫລອງ, ເມືອງ ໃໝ່ ແຂວງ ຜົ້ງສາລີ, ເຮັດໃຫ້ມີຜູ້ເສຍຊີວິດຄາທີ່ 5 ຄົນ ເປັນເພດຊາຍ 3 ຄົນ ແລະ ເພດ ຍິງ 2 ຄົນ, ຊຶ່ງສາເຫດຂອງການເກີດອຸປະຕິເຫດເບື້ອງຕົ້ນແມ່ນຍ້ອນຜູ້ຂັບຂີ່ດື່ມສິ່ງມືນເມົາ, ຂັບລົດໄວ ຈົນລົດປີ້ນຕົກລົງໜອງນ້ຳ.

    ເຈົ້າໜ້າທີ່ໃຫ້ຮູ້ວ່າ: ໃນອາທິດຜ່ານມາ ທົ່ວປະເທດ ມີອຸປະຕິເຫດເກີດຂຶ້ນກ່ວາ 60 ກໍລະນີ, ສົ່ງຜົນເຮັດໃຫ້ມີຜູ້ເສຍຊີວິດ 10 ຄົນ. ສາເຫດການເກີດອຸປະຕິເຫດຍ້ອນຜູ້ຂັບຂີ່ດື່ມສິ່ງມືນເມົາ ແລະ ຂັບຂີ່ລົດໄວເກີນກຳນົດ.

    ກົມຕຳຫລວດຈະລາຈອນ ເຕືອນວ່າ: ໃນໄລຍະສະຫລອງປີໃໝ່ສາກົນນີ້, ໄດ້ເນັ້ນໃຫ້ເຈົ້າໜ້າທີ່ເອົາໃຈໃສ່ສະກັດກັ້ນອຸປະຕິເຫດ, ເປັນຕົ້ນແມ່ນການເພີ່ມທະວີກວດກາເຕັກນິກຍານພາຫະນະ ແລະ ຜູ້ຂັບຂີ່, ວາງກຳລັງເຮັດໜ້າທີ່ກວດກາຕາມຈຸດເຂົ້າ-ອອກເມືອງ, ເສັ້ນທາງຫລວງແຫ່ງຊາດ, ເສັ້ນທາງຍຸດທະສາດ ແລະ ເສັ້ນທາງຫລວງຂອງແຂວງ ເພື່ອແນໃສ່ເຮັດໜ້າທີ່ປ້ອງກັນ, ສະກັດກັ້ນອຸປະຕິເຫດທາງບົກ ແລະ ຕ້ານພວກກໍ່ອາດຊະຍາກຳອື່ນໆ. ຊຶ່ງຈະເລີ່ມດຳເນີນການແຕ່ວັນທີ 24 ທັນວາ ນີ້ເປັນຕົ້ນໄປ.

- Wave100S AD to Website 2020 0 - ເກີດອຸປະຕິເຫດ ຢູ່ແຂວງ ຜົ້ງສາລີ ມີຜູ້ເສຍຊີວິດຄາທີ່ 5 ຄົນ
- WhatsApp Image 2020 05 27 at 5 - ເກີດອຸປະຕິເຫດ ຢູ່ແຂວງ ຜົ້ງສາລີ ມີຜູ້ເສຍຊີວິດຄາທີ່ 5 ຄົນ
- WhatsApp Image 2020 05 27 at 5 - ເກີດອຸປະຕິເຫດ ຢູ່ແຂວງ ຜົ້ງສາລີ ມີຜູ້ເສຍຊີວິດຄາທີ່ 5 ຄົນ
error: Alert: ເນື້ອຫາຂ່າວມີລິຂະສິດ !!