ກອງ​ປະຊຸມ​ສາມ​ຂັ້ນຂອງ​ພັກ ຕ້ອງ​ຄັດ​ສັນ​ເອົາ​ການ​ນຳ​ທີ່​ດີ

- 11 6 - ກອງ​ປະຊຸມ​ສາມ​ຂັ້ນຂອງ​ພັກ ຕ້ອງ​ຄັດ​ສັນ​ເອົາ​ການ​ນຳ​ທີ່​ດີ
- Untitled design - ກອງ​ປະຊຸມ​ສາມ​ຂັ້ນຂອງ​ພັກ ຕ້ອງ​ຄັດ​ສັນ​ເອົາ​ການ​ນຳ​ທີ່​ດີ

ທິດ​ກໍ່າ:

     ກ່ອນ​ເດີນທາງ​ໄປ​ຮອດ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ຄັ້ງທີ XI ຂອງ​ພັກ​ປະຊາຊົນ ປະຕິວັດ​ລາວ ທີ່​ຈະ​ມາ​ເຖິງ​ໃນ​ຕໍ່ໜ້າ​ນັ້ນ, ບັນດາ​ກົມ​ກອງ​ທ້ອງ​ຖິ່ນ​ຮາກ​ຖານ​ຂອງ​ພັກ ນັບ​ແຕ່​ຂັ້ນບ້ານ, ຂັ້ນ​ເມືອງ, ຂັ້ນ​ແຂວງ, ຂັ້ນກະຊວງ​ທະບວງ​ກົມ​ຕ່າງ​ກໍ​ໄດ້​ທະຍອຍ​ກັນ​ເລັ່ງລັດ​​ເປີດ​ກອງ​ປະຊຸມ​ໃຫຍ່​ຂອງ​ຕົນ​ຂຶ້ນຢ່າງ​ເປັນ​ຂະ​ບວນກວ້າງຂວາງ ​ແລະ ດ້ວຍ​ຄວາມ​ຮັບຜິດຊອບ​ສູງ​ຕໍ່​ພາລະ​ກຳ​ປະຫວັດສາດ​ຂອງ​ພັກ. ນີ້​ມັນ​ແມ່ນ​ຂະ​ບວນການ ທັງ​ເປັນ​ບັນຍາກາດ​ຢ່າງ​ມີ​ຊີວິດ​ຊີວາ​ທາງ​ດ້ານ​ການ​ເມືອງ​ຂອງ​ພັກ. ມາ​ຮອດ​ປັດຈຸບັນ​ໄດ້​ມີ​ຫລາຍ​ກົມ​ກອງ​ທ້ອງ​ຖິ່ນ​ຮາກ​ຖານ​ພັກ​ໃນ​ແຕ່ລະ​ແຫ່ງ, ​ແຕ່ລະ​ທ້ອງ​ຖິ່ນ​ໄດ້​ສຳ​ເລັດ​ກອງ​ປະຊຸມ​ໃຫຍ່​ສາມ​ຂັ້ນຂອງ​ຕົນ​ໄປ​ແລ້ວ​ຢ່າງ​ຫລວງຫລາຍ​ໃນ​ທົ່ວ​ປະ​ເທດ.

     ​ແນວ​ໃດ​ກໍ​ຕາມ, ການ​ເປີດ​ກອງ​ປະຊຸມ​ໃຫຍ່​ສາມ​ຂັ້ນຂອງ​ພັກ​ຍັງ​ຈະ​ສືບ​ຕໍ່​ໄປ​ຈົນ​ກວ່າ​ຮອດ​ຂັ້ນອົງຄະ​ນະ​ພັກ​ແຂວງ, ກະຊວງ​ທະບວງ​ກົມ ​ເພື່ອ​ຈັດ​ສັນ, ຄັດ​ຈ້ອນ​ເອົາ​ຜູ້​ແທນ​ສົມບູນ​ຂອງ​ຕົນ​ເຂົ້າຮ່ວມ​ກອງ​ປະຊຸມ​ໃຫຍ່​ຜູ້​ແທນ​ຄັ້ງທີ XI ຂອງ​ພັກ​ຢ່າງ​ຄົບ​ຖ້ວນ​ສົມບູນ. ນອກຈາກ​ນີ້​ແລ້ວ ກອງ​ປະຊຸມ​ສາມ​ຂັ້ນຍັງ​ເປັນ​ການ​ດຳ​ເນີນ​ຊີວິດ​ການ​ເມືອງ, ສຳ​ຫລວດ​ກວດກາ​ສະຫລຸບ​ຕີ​ລາຄາ​ໝາກຜົນ​ການ​ເຄື່ອນ​ໄຫວ​ຂອງ​ພັກ​ແຕ່ລະ​ຂັ້ນ​ໃນ​ໄລຍະ 5 ປີຜ່ານມາ, ພ້ອມ​ກັນ​ຊອກ​ໃຫ້​ເຫັນ​ຈຸດ​ດີ, ຈຸດ​ອ່ອນ, ຂໍ້​ບົກ​ຜ່ອງ, ຄົງ​ຄ້າງ​ໃນ​ຊຸມ​ປີຜ່ານມາ ນັບ​ທັງ​ວາງ​ທິດ​ທາງ​ແກ້​ໄຂ ​ເພື່ອ​ປັບປຸງ​ກໍ່ສ້າງ​ອົງການ​ຈັດຕັ້ງຂອງ​ພັກ, ສະມາຊິກ​ພັກ​ໃຫ້​ນັບ​ມື້ປອດ​ໃສ, ຂາວ​ສະອາດ ​ແລະ ມີ​ຄຸນ​ທາດ​ການ​ເມືອງ​ຢ່າງ​ໜັກ​ແໜ້ນ.

     ດັ່ງ​ທີ່​ຮູ້​ກັນ​ແລ້ວ​ວ່າ ນັບ​ແຕ່ມື້ສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງ​ພັກ​ເປັນຕົ້ນມາ, ການຈັດຕັ້ງຜັນ​ຂະຫຍາຍ​ກໍ​ໄດ້​ດຳ​ເນີນ​​ໄປ​ຢ່າງ​ຕັ້ງໜ້າ ​ແລະ ມີ​ຄວາມ​ຮັບຜິດຊອບ​ສູງ​ຕໍ່​ພາລະກິດ​ຂອງ​ຊາດ​-ຂອງ​ພັກ ບົນ​ພື້ນຖານ​ການ​ປະຕິບັດ​ແນວທາງ​ຂອງ​ພັກ, ​ແຜນ​ພັດທະນາ​ເສດຖະກິດ-ສັງຄົມ 5 ປີ ທີ່​ພັກ ​ແລະ ລັດຖະບານ​ວາງ​ອອກ​ໃນ​ແຕ່ລະ​ໄລຍະ​. ສຳລັບ​ການ​ປະ​ເມີນ​ຜົນ​ແຜນ​ພັດທະນາ​ເສດຖະກິດ-ສັງຄົມ​ເບື້ອງລັດ ​ໃນ​ປີ 2019 ​ແຜນ​ພັດທະນາ​ເສດຖະກິດ-ສັງຄົມ​ປີ 2020 ທີ່​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ​ໄດ້​ຮັບຮອງ​ເອົາ​ນັ້ນ ກໍ​ແມ່ນ​ສ່ວນ​ໜຶ່ງ​ທີ່​ສຳຄັນ​ໃນ​ການ​ປະຕິບັດ​ມະຕິ X ຂອງ​ພັກ​ນັ້ນ​ເອງ.

      ​ເພາະ​ສະນັ້ນ ຈຶ່ງ​ເຫັນ​ວ່າ​ກອງ​ປະຊຸມ​ສາມ​ຂັ້ນຈຶ່ງ​ມີ​ຄວາມ​ໝາຍ​ສຳຄັນ​ທີ່​ສຸດ​ໃນ​ການ​ປັບປຸງ​ພັກ, ອົງຄະ​ນະ​ພັກ ​ແລະ ສະມາຊິກ​ພັກ​ທີ່​ໄດ້​ຜ່ານ​ຈາກ​ພຶດຕິ​ກຳ​ຕົວ​ຈິງ​ໃນ​ການຈັດຕັ້ງຜັນ​ຂະຫຍາຍ​ມະຕິ​ຄັ້ງທີ X ຂອງ​ພັກ ​ແລະ ​ແຜນ​ພັດທະນາ​ເສດຖະກິດ-ສັງຄົມ 5 ປີ​ແຫ່ງ​ລັດ ຄັ້ງທີ 8 ຂອງ​ລັດຖະບານ​ວາງ​ອອກ.

- Wave100S AD to Website 2020 0 - ກອງ​ປະຊຸມ​ສາມ​ຂັ້ນຂອງ​ພັກ ຕ້ອງ​ຄັດ​ສັນ​ເອົາ​ການ​ນຳ​ທີ່​ດີ

      ​ແນວ​ໃດ​ກໍ​ດີ, ຜ່ານ​ກອງ​ປະຊຸມ​ໃຫຍ່​ສາມ​ຂັ້ນຂອງ​ພັກ​ໃນ​ຄັ້ງນີ້ ຕ້ອງ​ໃຫ້​ມີ​ການ​ປ່ຽນ​ແປງ​ໃນ​ດ້ານ​ພຶດຕິ​ກຳ ບໍ່​ວ່າ​ໃນ​ດ້ານ​ຄຸນ​ທາດ​ການ​ເມືອງ, ຄວາມ​ສັດ​ຊື່​ບໍລິສຸດ ​ແລະ ຄວາມ​ຈົງ​ຮັກ​ພັກດີ​ຕໍ່​ຊາດ ​ແລະ ປະຊາຊົນ. ອັນ​ສຳຄັນ​ທີ່​ສຸດ​ແມ່ນ​ຕ້ອງ​ຄັດ​ສັນ​ເອົາ​ຜູ້​ມີ​ຄວາມ​ຮູ້​ຄວາມ​ສາມາດ, ຄວາມ​ສັດ​ຊື່​ບໍລິສຸດ, ຄວາມ​ຈົງ​ຮັກ​ພັກດີ​ຕໍ່​ຊາດ ​ແລະ ປະຊາຊົນ​ຢ່າງ​ແທ້​ຈິງ. ຕ້ອງ​ຫັນປ່ຽນ​ໃຫ້​ໄດ້​ການ​ກະທຳ​ທີ່​ຜິດພາດ​ຕໍ່​ຂໍ້​ກຳນົດ​ກົດ​ລະບຽບ​ຂອງ​ພັກ, ຕໍ່​ກົດໝາຍ​ຂອງ​ລັດ​ເຊັ່ນ: ​ເກີດ​ພະຍາດ​ສໍ້​ລາດ​ບັງ​ຫລວງ​ໃນ​ຖັນ​ແຖວ​ສະມາຊິກ​ພັກ, ການ​ສວຍ​ໃຊ້​ຖານະ​ຕຳ​ ແໜ່​ງຂອງ​ພັກ​ກະທຳ​ໃນ​ສິ່ງ​ທີ່​ບໍ່​ຖືກຕ້ອງ, ສະ​ແຫວ​ງຫາ​ແຕ່​ຜົນປະ​ໂຫຍ​ດສ່ວນ​ຕົວ ບໍ່​ເຫັນ​ຜົນ​ປະ​ໂຫຍ​ດລວມຂອງ​ຊາດ, ຍິ່ງ​ໄປ​ກວ່າ​ນັ້ນ ​ໃນ​ໄລຍະ​ຜ່ານ​ມາ ສະມາຊິກ​ພັກ​ບາງ​ສະຫາຍ​ຍັງ​ພາ​ໝູ່​ເຮັດ ພາ​ໝູ່​ໄປ​ສໍ້​ໂກງ​ເອົາ​ຊັບ​ສິນ​ເງິນ​ຄຳ​ຂອງ​ລັດ​ໄປ​ເຂົ້າຖົງ​ຕົນ​ເອງ ​ແລະ ພວກ​ພ້ອງ, ບາງ​ສະຫາຍ​ຮັ່ງມີ​ຍ້ອນ​ການ​ສໍ້​ລາດ​ບັງ​ຫລວງ.

ດັ່ງ​ຜົນ​ການກວດ​ສອບ​ຈາກ​ອົງການ​ກ່ຽວຂ້ອງ​ເຫັນ​ຕົວ​ເລກ​ການ​ເສຍ​ຫາຍ​ເຖິງ 400 ກວ່າ​ຕື້ນັ້ນ ກໍ​ເນື່ອງ​ມາ​ຈາກ​ການ​ນຳພາ​ທີ່​ຜິດ​ເຂ​ວຂອງ​ອົງຄະ​ນະ​ພັກ​ຢູ່​ບ່ອນ​ນັ້ນໆ​ບໍ່​ທັນ​ເຂັ້ມ​ແຂງ​ເດັດຂາດ. ກໍ​ຫວັງ​ຢ່າງ​ຍິ່ງ​ວ່າ: ຜ່ານ​ຈາກ​ກອງ​ປະຊຸມ​ໃຫຍ່​ສາມ​ຂັ້ນຂອງ​ພັກ​ຢູ່​ຂັ້ນທ້ອງ​ຖິ່ນ​ຮາກ​ຖານ​ຈະ​ສູ້​ຊົນ​ແກ້​ໄຂ​ໃຫ້​ໄດ້​ສິ່ງ​ຄົງ​ຄ້າງ​ດັ່ງ​ທີ່​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດຊຸດ​ທີ VIII ​ໄດ້​ວິ​ເຄາະ. ​ເພື່ອ​ແກ້​ບັນຫາ​ທັງ​ໝົດ​ທີ່​ໄດ້​ກ່າວ​ມານັ້ນ ກ່ອນ​ອື່ນ​ມັນ​ພົວພັນ​ເຖິງ​ບຸກຄະລາ​ກອນ​ຂອງ​ພັກ, ສະມາຊິກ​ພັກ. ສະນັ້ນ ຕ້ອງ​ເດັດດ່ຽວ​ຄັດ​ສັນ​ເອົາ​ສະມາຊິກ​ພັກ​ຜູ້​ທີ່​ດີ, ທີ່​ເກັ່ງ​ເຂົ້າມາ​ເປັນ​ການ​ນຳ ​ເພື່ອ​ບໍລິຫານ​ບ້ານ​ເມືອງ, ​ເພື່ອ​ພາລະກິດ​ຂອງ​ພັກ, ​ເພື່ອ​ພາລະ​ກຳ​ປະຫວັດສາດ​ຂອງ​ຊາດ ຈຶ່ງ​ຈະ​ສາມາດ​ສຳ​ເລັດ​ຜົນ​ຕາມ​ຄວາມ​ມຸ້ງ​ມາດ​ປາດ​ຖະໜາ​ຂອງ​ພັກ ​ແລະ ຂອງ​ຊາດ​ໄດ້.

- WhatsApp Image 2020 05 27 at 5 - ກອງ​ປະຊຸມ​ສາມ​ຂັ້ນຂອງ​ພັກ ຕ້ອງ​ຄັດ​ສັນ​ເອົາ​ການ​ນຳ​ທີ່​ດີ
- WhatsApp Image 2020 05 27 at 5 - ກອງ​ປະຊຸມ​ສາມ​ຂັ້ນຂອງ​ພັກ ຕ້ອງ​ຄັດ​ສັນ​ເອົາ​ການ​ນຳ​ທີ່​ດີ
error: Alert: ເນື້ອຫາຂ່າວມີລິຂະສິດ !!