ຈະລາຈອນຂໍໃຫ້ສັງຄົມ ປະຕິບັດ 3 ບໍ່ ເພື່ອຫລີກລ່ຽງອຸປະຕິເຫດ

    ໃນໂອກາດ, ຈັດກອງປະຊຸມວາງແຜນວຽກປ້ອງກັນອຸປະຕິເຫດຂອງເຈົ້າໜ້າທີ່ຈະລາຈອນນະຄອນຫລວງວຽງຈັນ ໃນການສະເຫລີມສະຫລອງສົ່ງທ້າຍປີເກົ່າ, ຕ້ອນຮັບປີໃໝ່ 2020, ຂຶ້ນໃນວັນທີ 18 ທັນວາ ນີ້, ຢູ່ ຫ້ອງຕຳຫລວດ ນະຄອນຫລວງວຽງຈັນ, ທ່ານ ພັນໂທ ເພັງສະຫວັນ ທຳມະບູນ ຫົວໜ້າພະແນກຈະລາຈອນ ນະຄອນຫລວງວຽງຈັນ, ໄດ້ເນັ້ນໃຫ້ເຈົ້າໜ້າທີ່ຂອງຕົນເອົາໃຈໃສ່ໂຄສະນາ ໃຫ້ສັງຄົມປະຕິບັດ 3 ບໍ່ຄື: ບໍ່ດື່ມສິ່ງມືນເມົາແລ້ວຂັບລົດ, ບໍ່ຂັບຂີ່ລົດໄວ ແລະ ບໍ່ລະເມີດກົດຈະລາຈອນ, ທັງນີ້ກໍເພື່ອເຮັດໃຫ້ການສະເຫລີມສະຫລອງປີໃໝ່ 2020 ມີບັນຍາກາດເບີກບານມ່ວນຊື່ນ ທີ່ຈະມາເຖິງນີ້ ມີຄວາມເປັນລະບຽບຮຽບຮ້ອຍ ແລະ ຫລຸດຜ່ອນການເກີດອຸປະຕິເຫດຕ່າງໆ.

    ທ່ານ ຫົວໜ້າພະແນກຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ໃນປີ 2019 ຢູ່ ນະຄອນຫລວງວຽງຈັນ ມີອຸປະຕິເຫດເກີດຂຶ້ນກ່ວາ 1 ພັນກໍລະນີ, ສົ່ງຜົນເຮັດໃຫ້ມີຜູ້ເສຍຊີວິດ 100 ກ່ວາຄົນ, ທຽບໃສ່ປີຜ່ານມາ, ຕົວເລກການເກີດອຸປະຕິເຫດ ລວມທັງຜູ້ເສຍຊີວິດ ຍັງຢູ່ໃນທ່າອ່ຽງສູງ, ຊຶ່ງສາເຫດຫລັກຂອງການເກີດອຸປະຕິເຫດຄື: ຜູ້ຂັບຂີ່ດື່ມສິ່ງມືນເມົາ, ຂັບຂີ່ລົດໄວ, ລະເມີດກົດລະບຽບຈະລາຈອນ. ໃນນີ້ ພົບວ່າອຸປະຕິເຫດດັ່ງກ່າວສ່ວນໃຫຍ່ແມ່ນເກີດຂຶ້ນໃນກຸ່ມຄົນອາຍຸ 25-40 ປີ ແລະ ຫລາຍກ່ວາ 50% ແມ່ນເສຍຊີວິດ ແລະ ບາດເຈັບ.

    ຫົວໜ້າພະແນກຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ໃນໂອກາດ ສົງ່ທ້າຍປີເກົ່າ, ຕ້ອນຮັບປີໃໝ່ນີ້, ຈະໄດ້ເອົາໃຈໃສ່ກວດກາທາດເຫລົ້າ, ຈັບຄວາມໄວ ແລະ ກວດກາລົດທີ່ບໍ່ຖືກຕ້ອງເປັນຕົ້ນ: ລົດປ້າຍຫັກ, ປ້າຍຂາດ, ລົດດັດແປງສະພາບ ແລະ ອື່ນໆ ເພື່ອໃຫ້ສັງຄົມເອົາໃຈໃສ່ປ້ອງກັນອຸປະຕິເຫດ, ໂດຍຈະເລີ່ມນຳກຳລັງກ່ວາ 1 ພັນຄົນ ລົງປະຈຳຢູ່ຈຸດສາຍທາງຕ່າງໆທີ່ຄາດວ່າຈະມີຄວາມສ່ຽງເກີດອຸປະຕິເຫດໃນໄລຍະນີ້ ຊຶ່ງຈະເລີ່ມແຕ່ວັນທີ 24 ທັນວາ ຫາ 2 ມັງກອນ 2020. ໃນນັ້ນ ຫາກພົບເຫັນຜູ້ລະເມີດດື່ມສິ່ງມືນເມົາຈະໄດ້ປັບໃໝຢ່າງເຂັ້ມງວດ.

error: Alert: Content is protected !!