10 ຄະດີຢາເສບຕິດລາຍໃຫຍ່ໃນປີ 2019

- YabA - 10 ຄະດີຢາເສບຕິດລາຍໃຫຍ່ໃນປີ 2019
- Untitled design - 10 ຄະດີຢາເສບຕິດລາຍໃຫຍ່ໃນປີ 2019

ໃນປີ 2019, ເຈົ້າໜ້າທີ່ກຳລັງປ້ອງກັນຄວາມສະຫງົບ ໄດ້ເອົາໃຈໃສ່ສະກັດກັ້ນ ແລະ ປາບປາມຢາເສບຕິດ ຢ່າງຕັ້ງໜ້າ ແລະ ສາມາດຈັບຕົວຜູ້ຄ້າຂາຍຢາເສບຕິດລາຍໃຫຍ່ມາດຳເນີນຄະດີໄດ້ຫລາຍລາຍ ແລະ ໜັງສືພິມລາວພັດທະນາ ມື້ນີ້ ໄດ້ສັງລວມຂ່າວຄະດີຢາເສບຕິດໃນປີ 2019 ຄື:

ໃນວັນທີ 26 ກຸມພາ, ຕຳຫຼວດແຂວງວຽງຈັນ ໄດ້ລົງແກ້ໄຂ​ເປົ້າໝາຍ​ຄ້າຂາຍ​ຢາ​ເສບ​ຕິດ​ຢູ່ບ້ານເມືອງຄີ່ ເມືອງແມດ, ສາມາດຈັບຕົວຜູ້​ຖືກ​ຫາໄດ້ 3 ຄົນຄື: ທ້າວ ລ້ອງຊົ່ງ ອາຍຸ 21 ປີ, ທ້າວ ຄົວຊົ່ງ ອາຍຸ 35 ປີ ທັງ 2 ຢູ່ບ້ານນາກາງ ເມືອງຊະນະຄາມ ແລະ ທ້າວ ລີເຮີ ອາຍຸ 27 ປີ ຢູ່ບ້ານສາມັກຄິໄຊ ເມືອງແມດ ແຂວງວຽງຈັນ ພ້ອມຂອງກາງຢາບ້າ 78 ພັນເມັດ.

(2). ໃນເດືອນ ມີນາ, ກຳລັງ​ເຈົ້າໜ້າ​ທີ່​ ປກສ ເມືອງ ນາຊາຍທອງ ນະຄອນຫລວງວຽງຈັນ ສາມາດ​ຈັບ​ຜູ້​ຄ້າ​ຢາ​ເສບ​ຕິດ​ລາຍ​ຍ່ອຍ ຊື່​ທ້າວ ວຽງ​ເພັດ ອາຍຸ 60 ປີ ຢູ່​ບ້ານ​ໂນນ​ແກ້ວ ​ເມືອງ​ສີ​ໂຄດ​ຕະບອງ ພ້ອມ​ຂອງ​ກາງ​ຢາ​ບ້າ 1 ພັນ​ກວ່າ​ເມັດ ຈຶ່ງ​ໄດ້​ຂະຫຍາຍ​ຜົນ​ຫາ​ຜູ້​ຮ່ວມ​ຂະ​ບວນການ ​ເຊິ່ງ​ເປັນ​ລາຍ​ໃຫຍ່​ໄດ້ຕື່ມ​ອີກ​ຈຳນວນ​ໜຶ່ງ ຄື​ທ້າວ ສົມບັດ ອາຍຸ 60 ປີ, ທ້າວ ພອນ ອາຍຸ 56 ປີ ຢູ່​ບ້ານ​ນາ​ຄູນ ​ເມືອງ​ນາ​ຊາຍ​ທອງ ພ້ອມ​ຂອງ​ກາງ​ຢາ​ບ້າ​ສອງ​ແສນ​ກວ່າ​ເມັດ, ຢາ​ໄອສ໌ 1,5 ກິ​ໂລ ພ້ອມ​ດ້ວຍ​ສານ​ເຄມີ ​ແລະ ອຸປະກອນ​ບັນຈຸ​ຢາ​ເສບ​ຕິດ​ຈຳນວນ​ໜຶ່ງ​ທີ່​ຊຸກ​ເຊື່ອງ​ໄວ້​ໃນ​ເຮືອນ​ຂອງ​ພວກ​ເຂົາ ຈຶ່ງ​ໄດ້​ຢຶດ​ໄວ້​ເປັນ​ຫລັກ​ຖານ ​ເພື່ອ​ດຳ​ເນີນ​ຄະດີ​ຕາມ​ລະບຽບ​ກົດໝາຍ.

(3). ໃນວັນທີ 10 ພຶດສະພາ, ກໍາລັງເຈົ້າໜ້າທີ່ ກົມຕຳຫລວດສະກັດກັ້ນ ແລະ ຕ້ານຢາເສບຕິດ ສາມາດຈັບເຄືອຂ່າຍຂະບວນຄ້າຢາເສບຕິດລາຍໃຫຍ່ຢູ່ເຮືອນເຊົ່າຫລັງໜຶ່ງເຂດບ້ານໜອງຍາວ, ເມືອງໄຊທານີນະຄອນຫລວງວຽງຈັນ ຄື: ທ້າວ ມິດ ອາຍຸ 45 ປີ, ທ້າວ ທອງພຸດ ອາຍຸ 20 ປີທັງສອງຢູ່ບ້ານໃໝ່ພູຄໍາ, ເມືອງຫ້ວຍຊາຍແຂວງບໍ່ແກ້ວ, ທ້າວ ຢຽນຈຽນ ອາຍຸ 38 ປີສັນຊາດຈີນ ຢູ່ບ້ານ ແລະ ເມືອງຊື້ເໝົາ ແລະ ທ້າວ ອາໜິ ອາຍຸ 30 ປີສັນຊາດຈີນ ຢູ່ບ້ານມູລິງ, ເມືອງຟູເອີແຂວງຢຸນນານ, ພ້ອມຂອງກາງຢາເສບຕິດປະເພດເຮໂຣອິນຈໍານວນ 40 ແທ່ງ ລວມມີນໍ້າໜັກ 15 ກິໂລ, ພ້ອມດ້ວຍໂທລະສັບມືຖື 4 ໜ່ວຍ, ລົດໃຫຍ່ 1 ຄັນ ແລະ ເງິນສົດຈໍານວນໜຶ່ງ, ຈຶ່ງໄດ້ຢຶດໄວ້ເປັນຫລັກຖານເພື່ອດໍາເນີນຄະດີຕາມລະບຽບກົດໝາຍ.

(4). ໃນເດືອນ ມິຖຸນາ, ຕໍາ​ຫລວດແຂວງສະຫວັນນະເຂດຈັບ​ຂະ​ບວນຄ້າ​ຢາ​ເສບ​ຕິດ​ລາຍ​ໃຫຍ່​,ພ້ອມ​ຂອງກາງຢາບ້າ 18 ພັນ​ກວ່າ​ເມັດ ​ແລະ ຢາໄອສ໌ 5 ກິໂລ, ມີຜູ້ຕ້ອງຫາ 4 ຄົນຄື: ທ້າວ ເລັ່ງຫາ ອາຍຸ 40 ປີ ຢູ່ບ້ານ ນ້ຳພາວ ເມືອງຄຳເກີດ ແຂວງບໍລິຄຳໄຊ, ທ້າວ ປໍຊົງ ຫຼື (ຈົວ)ອາຍຸ 24 ປີ ຢູ່ບ້ານ ນາແສນຄຳ ເມືອງໄຊ ແຂວງອຸດົມໄຊ, ນາງ ລີຈ້າງ ອາຍຸ 16 ປີ ແລະ ນາງ ຊົວວ່າງ ອາຍຸ 16 ປີ ທັງສອງ ຢູ່ ບ້ານ ທ່າດິນແດງ ເມືອງໄຊທານີ ນະຄອນຫຼວງວຽງຈັນ ພ້ອມຂອງກາງ ຢາບ້າ 9 ມັດ ຫຼື 18.185 ເມັດ ​ແລະ ຢາໄອສ໌ 5 ຖົງ ເທົ່າກັບ 5 ກິໂລ ພ້ອມ ລົດໃຫຍ່ ຍີ່ຫໍ້ຮຸ່ນໃດ ບໍ່ຕິດປ້າຍທະບຽນ ໂທລະສັບ 9 ໜ່ວຍ, ກ້ອງຖ່າຍຮູບ 1 ໜ່ວຍ ແລະ ເງິນຈຳນວນໜຶ່ງຈຶ່ງ​ໄດ້​ຢຶດ​ໄວ້​ເປັນ​ຫລັກ​ຖານ​ເພື່ອ​ດໍາ​ເນີນ​ຄະດີ​ຕາມ​ລະບຽບກົດໝາຍ.

(5). ໃນ ເດືອນ ສິງຫາ, ປກສ ແຂວງ ຄຳມ່ວນ ສາມາດຈັບຂະບວນການຄ້າຢາເສບຕິດລາຍໃຫຍ່ຢູ່ເຂດບ້ານໂພນພີມ, ຊຶ່ງມີຜູ້ຕ້ອງຫາຄື: ທ້າວ ທິດເພັງ ອາຍຸ 35 ປີ, ນາງ ຂັນ ອາຍຸ 33 ປີ (ທັງສອງເປັນຜົວເມຍກັນ) ແລະ ທ້າວ ຈິ ອາຍຸ 27 ປີຢູ່ບ້ານຫາດງາໃຕ້, ເມືອງສໍາພັນແຂວງຜົ້ງສາລີ, ທ້າວ ບຸນລຽມ ອາຍຸ 35 ປີຢູ່ບ້ານລະຄອນ, ເມືອງນໍ້າບາກແຂວງຫລວງພະບາງ, ທ້າວ ສິງຄໍາ ອາຍຸ 25 ປີຢູ່ບ້ານຫ້ວຍຍາງ, ເມືອງຂວາ ແຂວງຜົ້ງສາລີ, ທ້າວ ຢີ້ ອາຍຸ 21 ປີຢູ່ບ້ານສັນຕິສຸກ, ເມືອງທ່າແຂກ ແລະ ທ້າວ ດ່ອນ ອາຍຸ 24 ປີຢູ່ບ້ານດົງບູນ, ເມືອງໜອງບົກ ແຂວງຄໍາມ່ວນ, ພ້ອມຂອງກາງຢາເສບຕິດປະເພດຢາບ້າຈໍານວນ 30.000 ເມັດ, ໂດຍພວກເຂົາຖືກເຈົ້າໜ້າທີ່ຈັບຕົວໃນຂະນະສົ່ງຢາເສບຕິດໃຫ້ກັນຢູ່ເສັ້ນທາງເຂດບ້ານໂພນພີມເມືອງທ່າແຂກ.

- Wave100S AD to Website 2020 0 - 10 ຄະດີຢາເສບຕິດລາຍໃຫຍ່ໃນປີ 2019

(6). ໃນເດືອນ ສິງຫາເຊັ່ນດຽວກັນ, ປກສ ແຂວງ ອຸດົມໄຊສາມາດຈັບຕົວຜູ້ຕ້ອງຫາຄ້າຢາເສບຕິດລາຍໃຫຍ່, ພາຍຫລັງມີພົນລະເມືອງດີແຈ້ງວ່າ: ຈະມີການຂົນສົ່ງຢາເສບຕິດມາແຕ່ຕ່າງແຂວງ, ຈຶ່ງນຳກຳລັງສະກັດກັ້ນ ແລະ ພົບ​ເຫັນ​ລົດ​ເປົ້າ​ໝາຍ​ຍີ​ຫໍ້​ໂຕ​ໂຢຕາຣີ​ໂວ ໝາຍ​ເລກ​ທະບຽນ ກຣ 2644 ກໍາ​​ແພງ​ນະຄອນ ​ແລ່ນ​ມາ​ດ້ວຍ​ຄວາມ​ໄວ​ຮອດ​​ເຂດ​ບ້ານ​ມົກ​ແຄະ​ເມືອງ​ປາກ​ແບ​ງ​ແລ້ວ​ໄດ້​ລ້ຽວກັບກະທັນຫັນ​ຄືນ​ໄປ​ທາງ​ເມືອງ​ຜາ​ອຸດົມ ຈຶ່ງ​ໄດ້​ແຈ້ງ​ໃຫ້​ກໍາລັງ​ອີກຊຸດໜຶ່ງທີ່​ປະ​ຈໍາ​ຢູ່​ເສັ້ນທາງນັ້ນສະກັດລົດຄັນດັ່ງກ່າວ​​ໃຫ້​ຈອດ​ໃນເຂດ​ບ້ານ​ມົກ​​ໄຄ​ແລ້ວ​ໄດ້ກວດກາພົບ​ວ່າທ້າວ ບຸນ​ເຊັງ ອາຍຸ 32 ປີ​​ເປັນ​ຄົນ​ຂັບ ​ແລະ ທ້າວ ບີ​ວີ ອາຍຸ 25 ປີ​ຢູ່​ບ້ານ​ຊາຍ​ຈະ​ເລີ​ນ​ເມືອງ​ຫ້ວຍ​ຊາຍ​ແຂວງ​ບໍ່​ແກ້ວ ​ແລະ ພົບ​ເຫັນ​ເງິນ 100.000 ບາ​ດ (ສະກຸນ​ເງິນ​ໄທ) ​ໃນ​ຕຣັບ​ໂບຣລົດ. ຈາກ​ນັ້ນ​​ໄດ້​ເອົາ​ຕົວພວກກ່ຽວ​ມາ​ສືບສວນ-ສອບ​ສວນ ​ແລະ ​ໄດ້​ຮັບ​ສາລະ​ພາບ​ວ່າ: ​​ເງິນ​ດັ່ງ​ກ່າວ​ແມ່ນ​ຄ່າ​ຈ້າງ​ໃຫ້​ພວກ​ຕົນ​ຂົນ​ຢາ​ເສບ​ຕິດ​ປະ​ເພດ​ຢາ​ໄອ ​ແລະ ​ ​ໄດ້​ຊຸກ​ເຊື່ອງ​ໄວ້​ໃນ​ປ່າ​ເຂດ​ບ້ານ​ມົກ​​ໄຄ ​ເຈົ້າ​ໜ້າ​ທີ່ຈຶ່ງ​ໄປ​ກວດ​ຄົ້ນ​ພົບ​​ເຫັນຢາ​ໄອມີ​ນໍ້າໜັກ 120 ກິ​ໂລ ແລະ ຜ່ານ​ການ​ສືບ​ສວນ-ສອບ​ສວນພວກ​ເຂົາ​ຮັບ​ສາລະພາບ​ຕື່ມ​ວ່າ: ຢາ​ເສບ​ຕິດດັ່ງກ່າວ​​ແມ່ນ​ໄປ​ຮັບ​ມາ​ຈາກ​ຂະ​ບວນການ​ຄ້າ​ຢາ​ເສບ​ຕິດຊາວ​ມຽນມາ 2 ຄົນ​ຢູ່​ເມືອງ​ຕົ້ນ​ເຜິ້ງ​ແຂວງ​ບໍ່​​ແກ້ວ, ​​ເພື່ອ​ໄປ​ສົ່ງ​ໃຫ້​ຂະ​ບວນການ​ຄ້າ​ຢາ​ເສບ​ຕິດ​ຢູ່​ນະຄອນຫລວງ​ວຽງ​ຈັນ, ໂດຍ​ໄດ້​ຮັບ​ຄ່າ​ຈ້າງ 200.000 ບາດ ຖ້າຫາກ​ການ​ຂົນ​ສົ່ງ​ສໍາ​ເລັດ.

(7). ​  ໃນວັນທີ 26 ກັນຍາ, ເຈົ້າໜ້າທີ່ ປກສ ກຸ່ມບ້ານແສນຈະເລີນ, ເມືອງຊະນະຄາມແຂວງວຽງຈັນ, ໄດ້ຮັບແຈ້ງຂ່າວຈາກພົນລະເມືອງດີວ່າຈະມີການຊື້-ຂາຍ ແລະ ຂົນສົ່ງຢາເສບຕິດລາຍ​ໃຫຍ່ຢູ່ເຂດກຸ່ມບ້ານແສນຈະເລີນ, ຈາກນັ້ນເຈົ້າໜ້າທີ່ ປກສ ກຸ່ມບ້ານຈຶ່ງໄດ້ຈັດຈັດກໍາລັງລົງຕິດຕາມ ຮອດ​ແລງວັນທີ 27 ກັນຍາ, ຈຶ່ງ​ພົບ​ເຫັນ​ຜູ້​ຕ້ອງ​ສົງ​ໄສ ຂັບຂີ່ລົດຈັກຍີ່ຫຍໍ້ເວບ ປ້າຍທະບຽນ ວຽງຈັນ ຈສ 4981 ຂຶ້ນໄປຕາມເສັ້ນທາງເຂດບ້ານນາສົມບູນ ເມືອງຊະນະຄາມ, ເຈົ້າໜ້າທີ່ຈຶ່ງໄດ້ຂໍກວດລົດ ​ແລະ ບຸກຄົນດັ່ງກ່າວ ພົບເຫັນຢາເສບຕິດປະ ເພດຢາບ້າຈໍານວນ 5 ມັດ ເທົ່າກັບ 10.000 ເມັດ, ຢາໄອຊ໌ ຈໍານວນ 2 ກິໂລ ແລະ ໂທລະສັບມືຖື 1 ໜ່ວຍ, ຈາກນັ້ນ ເຈົ້າໜ້າທີ່ ປກສ ກຸ່ມບ້ານແສນຈະເລີນຈຶ່ງໄດ້ກັກຕົວຜູ້​ຕ້ອງ​ຫາ​ດັ່ງກ່າວ​ຊື່ທ້າວ ແທ່ນ ດວງມາລາ ອາຍຸ 40 ປີ​ຢູ້ບ້ານ​ນາ​ໜໍ່, ​ເມືອງ​ໝື່ນ​ແຂວງ​ວຽງ​ຈັນ,  ພ້ອມດ້ວຍຂອງກາງສົ່ງມອບໃຫ້ເຈົ້າໜ້າທີ່ ປກສ ເມືອງຊະນະຄາມ ເພື່ອດໍາເນີນການສອບສວນຕາມຂັ້ນຕອນຂອງກົດໝາຍ.

(8). ໃນເດືອນ ຕຸລາ, ເຈົ້າ​ໜ້າ​ທີ່​ຕໍາຫລວດ​ກວດ​ຄົນ​ເຂົ້າ-ອອກ​ເມືອງ​ປະ​ຈໍາ​ສະໜາມ​ບີນສາກົນ​ວັດ​ໄຕ​ນະຄອນຫລວງ​ວຽງ​ຈັນ​ຈັບ​ຕົວ​,​ ໄດ້ຈັບຕົວ ນາງ ບູ​ແອ ຍູຊາດ ​ເຊ​ຊ່າ ອາຍຸ 66 ປີສັນຊາດ​ຝຣັ່ງ ຢູ່​ບ້ານ​ລີ​ເລ, ​ເມືອງ​ບາ​ຣິນ ​ແຂວງ​ອາຊາ​ດ ປະ​ເທດ​ຝຣັ່ງ ​ແລະ ປັດຈຸບັນຜູ້ກ່ຽວອາ​​ໄສ​ຢູ່​​ແຂວງແຟງ ເຟີດປະ​ເທດ​ເຢຍລະ​ມັນ, ຫລັງ​ຈາກກວດ​ພົບ​ເຫັນ​ຜູ້ກ່ຽວ​ໄດ້ລັກລອບ​ເອົາ​ຢາ​ເສບ​ຕິດ​ປະ​ເພ​ດຢາ​ໄອ​ນໍ້າໜັກ 2,1 ກິ​ໂລ​ເພື່ອ​ຈະ​ເດີນທາງ​ອອກໄປ​ປະ​ເທດ​ຍີ​ປຸ່ນ​. ຈາກ​ນັ້ນ ​​ເຈົ້າ​ໜ້າ​ທີ່ ຕມ ສະໜາມ​ບີນດັ່ງກ່າວ ໄດ້​ສົ່ງຜູ້ກ່ຽວ​ໃຫ້​ເຈົ້າ​ໜ້າ​ທີ່​ສະກັດ​ກັ້ນ ​ແລະ ຕ້ານຢາ​ເສບ​ຕິດ ​ເອົາ​ຕົວ​ໄປ​ສືບ​ສວນ-ສອບ​ສວນ ແລະ ດຳເນີນຄະດີຕາມລະບຽບກົດໝາຍ.

(9). ໃນ​ວັນ​ທີ 12 ຕຸລາ​, ກໍາລັງ​ເຈົ້າ​ໜ້າ​ທີ່​ ປກສ ແຂວງ ຫົວພັນ, ສາມາດ​ຈັບ​ຂະ​ບວນການ​ຄ້າຂາຍ​ຢາ​ເສບ​ຕິດ​ລາຍ​ໃຫຍ່​ໄດ້​ຄື:​ ທ້າວ ລາ​ຈິ​ປາວ (ຖາ​ຍທໍ) ອາຍຸ 27 ປີ, ທ້າວ ຫລ້າ​ເຮີ ອາຍຸ 25 ປີ​ທັງ​ສອງ​ຢູ່​ບ້ານ​ຊົງ​ຈ່າ, ເມືອງ​ນໍ້າ​ບາກ​ແຂວງ​ຫລວງ​ພະ​ບາງ​​ ແລະ ທ້າວ ຕົງ​ຊົວ (ຍົງ​ຢາ) ອາຍຸ 24 ປີ​ຢູ່​ບ້ານ​ຫ້ວຍ​ຫລວງ​, ເມືອງລ​ອງ​ແຂວງ​ຫລວງ​ນໍ້າ​ທາ, ພ້ອມ​ຂອງ​ກາງ​ຢາ​ເສບຕິດ​ປະ​ເພດ​ເຮ​​ໂຣອິນ​ຈໍານວນ 47 ​ແທ່ງ, ລວມມີ​ນໍ້າໜັກ 20,7 ກິ​ໂລ ຊຸກ​ເຊື່ອງ​ໃນ​ລົດ​ກະ​ບະ​ວີ​​ໂກ້, ມີປືນ​ສັ້ນ 1 ກະ​ບອກ, ​ພ້ອມ​ລູກປືນ​ຈຳ​ນວນ​ໜຶ່ງ ​ແລະ ໂທ​ລະ​ສັບ​ມື​ຖື 4 ໜ່ວຍ ​ຈຶ່ງ​ໄດ້​ຢຶດ​ໄວ້​ເປັນ​ຫລັກ​ຖານ ​ເພື່ອ​ດໍາ​ເນີນ​ຄະດີ​ຕາມ​ລະບຽບ​ກົດໝາຍ, ​​​ໂດ​ຍພວກ​ເຂົາຖືກ​ເຈົ້າ​ໜ້າ​ທີ່​ຈັບຕົວ​ໄດ້ໃນ​ຂະນະນັດ​ສົ່ງ​ຢາ​ເສບ​ຕິດ​ດັ່ງກ່າວ​ໃຫ້​ຜູ້​ສັ່ງ​ຊື້​ຢູ່​ເຂດ​ບ້ານ​ລ້ອງ​ກູ້ເມືອງວຽງ​ໄຊ.

(10). ໃນ​ວັນ​ທີ 22 ຕຸລາ ເຈົ້າໜ້າທີ່ ປກສ ເມືອງ ປາກງື່ມ ນະຄອນຫລວງວຽງຈັນ ໄດ້ຈັບຕົວ ທ້າວ ພີ​ມພາ ​​ອາຍຸ 39 ປີ​ອາຊີບ​ຂັບ​ລົດ​ບັນທຸກ, ຢູ່​ບ້ານລາດ​ງອນ, ​ເມືອງ​ແປ​ກ​ແຂວງ​ຊຽງ​ຂວາງ ມາດຳເນີນຄະດີໃນຂໍ້ຫາຄ້າຢາເສບຕິດ ຊຶ່ງຖືກເຈົ້າໜ້າທີ່ຈັບຕົວໄດ້ ຢູ່ບ້ານ​ສົມ​ສະຫວາດ​, ເມືອງ​ປາ​ກງື່ມ ພ້ອມຂອງກາງຢາ​​ໄອນໍ້າໜັກ 786 ກິ​ໂລ ຊຸກ​ເຊື່ອງ​ສັບປົນໃສ່​ໃນ​ແກັດສີນ​ຄ້າປະ​ເພດ​ເຄື່ອງ​ໄຟຟ້າ​ ໃນລົດ​ບັນ​ທຸກໝາຍ​ເລກ​ທະບຽນ ບຂ 9076 ກໍາ​ແພງ​ນະຄອນ ທີ່ຜູ້ກ່ຽວຂັບມາເພື່ອ​ຈະໄປ​ສົ່ງ​ໃຫ້​ຜູ້​ສັ່ງ​ຊື້​ຢູ່​​ແຂວງພາກ​ໃຕ້, ​ແຕ່​ໂຊກ​ບໍ່​​ເຂົ້າ​ຂ້າງ ​ຖືກ​ເຈົ້າ​ໜ້າ​ທີ່​ກວດກາພົບເຫັນ ຈຶ່ງ​ໄດ້​ຢຶດ​ໄວ້​​ເປັນ​ຫລັກ​ຖານ​ເພື່ອ​ດໍາ​ເນີນ​ຄະດີ​ຕາມ​ລະບຽບ​ກົດໝາຍ.

- WhatsApp Image 2020 05 27 at 5 - 10 ຄະດີຢາເສບຕິດລາຍໃຫຍ່ໃນປີ 2019
- WhatsApp Image 2020 05 27 at 5 - 10 ຄະດີຢາເສບຕິດລາຍໃຫຍ່ໃນປີ 2019
error: Alert: ເນື້ອຫາຂ່າວມີລິຂະສິດ !!