ສະຕິ​ຮັກ​ຊາດ​ສະ​ແດງ​ອອກ​ດ້ານ​ພຶດຕິ​ກຳ

- Laos - ສະຕິ​ຮັກ​ຊາດ​ສະ​ແດງ​ອອກ​ດ້ານ​ພຶດຕິ​ກຳ
- Untitled design - ສະຕິ​ຮັກ​ຊາດ​ສະ​ແດງ​ອອກ​ດ້ານ​ພຶດຕິ​ກຳ

     ​ເມື່ອ​ເອີ່ຍ​ເຖິງ​ຄວາມ​ຮັກ​ຊາດ, ຮັກ​ຜືນ​ແ​ຜ່ນດິນ​ອັນ​ແສນ​ຮັກ ​ແລະ ຫວງ​ແຫນ, ບ່ອນ​ຝັງ​ສາຍ​ແຫ່​ແຜ່​ສາຍ​ບື, ບ່ອນ​ພື​ຜ້າອ້ອມ​ປ້ອມ​ຜ້າ​ເຈ່ຍ​ ບໍ່​ມີ​ໃຜ​ທີ່​ກ້າ​ປະຕິ​ເສດ​ໄດ້​ວ່າ​ບໍ່​ຮັກ​ຊາດ, ຮັກ​ບ້ານ​ເກີດ​ເມືອງ​ນອນ​ຂອງ​ຕົນ, ​ແມ້ກະທັ້ງພວກ​ລາວ​ນອກ​ທີ່​ຍັງ​ເປັນ​ປໍ​ລະປັກ​ກັບ ສປປ ລາວ ພວກ​ເຂົາ​ກໍ​ວ່າ​ຍັງ​ຮັກ​ຊາດ​ລາວ, ຮັກ​ຜືນ​ແຜ່ນດິນ​ລາວ ​ແລະ ຍັງ​ສະຫລັກ​ປັກ​ໃຈ​ຫວັງ​ຈະ​ໄດ້​ກັບ​ຄືນ​ມາ​ທັບ​ມ້າງ​ລະບອບ​ການ​ປົກຄອງ​ຂອງ ສປປ ລາວ ​ແລ້ວ​ນຳ​ເອົາລະ​ບອບ​ລາຊາ​ຄືນ​ມາ​ປົກຄອງ​ບ້ານ​ເມືອງ​ທີ່​ພວກ​ເຂົາ​ຍັງ​ມີ​ສັດທາ​ຢູ່, ​ແຕ່​ສິ່ງ​ສຳຄັນ​ຕ້ອງ​ພ້ອມ​ກັນ​ຄິດ​ເບິ່ງ​ວ່າ ພວກ​ເຮົາ​ໄດ້​ເຮັດ​ຫຍັງ​ແດ່ ​ແລະ ມີ​ພັນທະ​ຫຍັງ​ແດ່​ທີ່​ສະ​ແດງ​ໃຫ້​ເຫັນ​ເຖິງ​ສະຕິ​ຮັກ​ຊາດ, ຮັກ​ຜືນ​ແຜ່ນດິນ​ທີ່​ຕົນ​ເອງ​ໄດ້​ເກີດ ​ແລະ ​ເຕີບ​ໃຫຍ່​ໃນ​ດິນ​ແດນ​ມາຕຸພູມ​ທີ່​ພໍ່​ແມ່ລ້ຽງ​ເຮົາ​ມາ​ພາ​ເຮົາ​ໃຫຍ່​ໝົດ​ແກງ​ຫລາຍ​ໝໍ ໝົດ​ເຂົ້າຫລາຍ​ຕິບ.

      ຜ່ານ​ມາ​ບາງ​ຄັ້ງພວກ​ເຮົາ​ອາດ​ເຄີຍ​ເຫັນ, ​ເຄີຍ​ໄດ້​ຍິນ​ແຫ​ລ່ງຂ່າວ​ຄາວ ທັງ​ປະສົບ​ພົບ​ພໍ້​ ນັກ​ທ່ອງ​ທ່ຽວ​ຈາກ​ປະ​ເທດ​ເພື່ອນ​ບ້ານ ​ໂດຍ​ສະ​ເພາະ​ແມ່ນ​ພວກ​ທົວຊາວ​ຈີນ​ເຂົ້າມາ​ທ່ອງ​ທ່ຽວ​ໃນ​ປະ​ເທດ​ເຮົາ ພວກ​ເພິ່ນ​ໄດ້​ນຳ​ເອົາ​ອາຫານ, ​ເອົາ​ເຄື່ອງ​ດື່ມ​ຈາກ​ຈີນ​ມາ​ກິນ​ເອງ ​ແລ້ວຖິ້ມຊະຊາຍ​ທົ່ວທີບ ຜູ້​ທີ່​ອະນາ​ໄມ​ເກັບ​ມ້ຽນ​ກໍ​ແມ່ນ​ຄົນ​ລາວ, ​ເວລາ​ພັກ​ແຮມ​ຄືນ​ກໍ​ຕ້ອງ​ພັກ​ຢູ່​ໂຮງ​ແຮມ​ຂອງ​ຈີນ, ​ເຂົ້າຮ້າ​ນອາຫານ​ຈີນ. ສ່ວນ​ຄົນ​ຫວຽດນາມ​ກໍ​ມີ​ລັກສະນະ​ຄ້າຍຄື​ກັນ ຫລື ຖ້າ​ຫາກ​ແມ່ນ​ຄົນ​ປະ​ເທດ​ອື່ນ​ເຂົາ​ກໍ​ເລັ່ງ​ເຂົ້າພັກ, ກິນ​ຢູ່​ຕາມ​ໂຮງ​ແຮມ, ຮ້ານ​ອາຫານ​ຂອງ​ປະ​ເທດ​ນັ້ນໆ ຖ້າ​ຫາກ​ວ່າ​ມີ​ຢູ່​ໃນ​ບ້ານ​ເຮົາ. ນີ້​ກໍ​ສະ​ແດງ​ໃຫ້​ເຫັນ​ວ່າ ​ເຂົາ​ເຈົ້າມີ​ສະຕິ​ຮັກ​ຊາດ, ມີ​ສະຕິ​ໃນ​ການ​ຊຸກຍູ້​ສົ່ງ​ເສີມ​ຄົນ​ເຂົາ​ເອງ, ​ເສດຖະກິດ​ຂອງ​ບ້ານ​ເຂົາ​ເອງ. ນອກຈາກ​ນັ້ນ​ແລ້ວ ​ເວລາ​ເຂົ້າຮ້ານ​ອາຫານ​ຂອງ​ຫວຽດກໍ​ຈະ​ເຫັນ​ຕຸກ​ນ້ຳປາ​ຫວຽດນາມ, ກະປິ​ຫວຽດນາມ, ​ເຄື່ອງປຸງ​ແຕ່ງ​ຂອງ​ຫວຽດນາມ, ລົດ​ຊາດ​ອາຫານ​ຫວຽດນາມ ຕະຫລອດ​ເຄື່ອງ​ໃຊ້​​ໄມ້​ສອຍ​ໃນ​ເຮືອນຄົວ​ສ່ວນ​ໃຫຍ່​ກໍ​ຈະ​ເອົາ​ມາ​ຈາກ​ຫວຽດນາມ. ​ເວລາ​ເຂົ້າຮ້ານ​ອາຫານ​ຂອງ​ຈີນ​ກໍ​ຍິ່ງ​ເຫັນ​ຜະລິດ​ຕະພັນ​ປຸງ​ແຕ່ງ, ອຸປະກອນ​ຮັບ​ໃຊ້​ ລ້ວນ​ແລ້ວ​ແຕ່​ເປັນ​ຂອງ​ຈີນ​ດ້ວຍ​ກັນ​ທັງ​ນັ້ນ. ທິດ​ກໍ່າ ​ເຄີຍ​ໄດ້​ຮ່ວມ​ວຽກ​ຮ່ວມ​ງານ​ກັບ​ຄົນ​ຈີນ, ຄົນ​ຫວຽດນາມ ຮູ້ ​ແລະ ​ເຫັນ​ເຂົາ​ເຈົ້າມີ​ສະຕິ​ຮັກ​ຊາດ ​ແລະ ມີ​ຄວາມ​ຈົງ​ຮັກ​ພັກດີ​ຕໍ່​ຊາດ​ບ້ານ​ເມືອງ​ເຂົາ​ອີ່ຫລີ. ຍົກ​ຕົວຢ່າງ​ຄື​ຄົນ​ຈີນ​ທີ່​ມີ​ຫາ​ຢູ່​ຫາ​ກິນ ​ແລະ ທຳ​ມາ​ຄ້າຂາຍ​ຢູ່​ບ້ານ​ເຮົາ ຖ້າ​ບໍ່​ຈຳ​ເປັນ​ເຂົາ​ຈະ​ບໍ່​ນຳ​ໃຊ້​ເຄື່ອງ​ໃຊ້​ສອຍ​ຜະລິດ​ຕະພັນ ​ແລະ ກິນ​ອາຫານ​ແບບ​ສະບັບ​ຂອງ​ປະ​ເທດ​ອື່ນ​ເດັດຂາດ. ຖ້າ​ຈະ​ເວົ້າກິໆ​ກີໆ​ກໍ​ເລີ່​ມ​ແຕ່​ໄມ້​ຖູ່, ​ໄມ້​ຈີ້ມ​ແຂ້ວ, ​ແປງ​ສີ​ຟັນ, ຢາ​ສີ​ຟັນ, ນ້ຳຢາ​ລ້າງ​ຈານ, ນ້ຳດື່ມ, ສະ​ບູຝຸ່ນ, ຊາ, ກາ​ເຟ ​ແລະ ອື່ນໆສັບ​ມະ​ປິ ​ເຂົາ​ກໍ​ໃຊ້​ຜະລິດ​ຕະພັນ​ບ້ານ​ເຂົາ​ເອງ. ນີ້​ຄື​ສິ່ງ​ໜຶ່ງ​ທີ່​ບົ່ງ​ບອກ​ຄວາມ​ມັ່ງ​ຄັ່ງ​ຮັ່ງມີ, ຄວາມ​ອຸດົມສົມບູນ, ຄວາມ​ເປັນ​ເອກະລາດ​ທາງ​ດ້ານ​ເສດຖະກິດ​ຂອງ​ປະ​ເທດ. ອັນ​ສຳຄັນ​ກໍ​ແມ່ນ​ເຂົາ​ມີ​ສະຕິ​ຮັກ​ຊາດ, ​ແນວ​ຄິດ​ສົ່ງ​ເສີມ​ຜະລິດ​ຕະພັນ​ບ້ານ​ເຂົາ​ເອງ.

     ​ເມື່ອ​ຕັ້ງ​ໂຈດ​ກັນ​ວ່າ ຜົນ​ປະ​ໂຫຍ​ດດ້ານ​ລາຍ​ຮັບ​ໂດຍ​ກົງ​ແມ່ນ​ໃຜ​ເປັນ​ຜູ້​ໄດ້ ? ຄຳ​ຕອບ​ກໍ​ຄື ​ເຂົາ​ເອງ​ເປັນ​ຜູ້​ໄດ້​ຫລາຍ​ກວ່າ. ​ເບື້ອງພວກ​ເຮົາ​ກໍ​ອາດ​ໄດ້​ພຽງ​ແຕ່​ຄ່າ​ທຳນຽມ​ເກັບ​ພາສີ​ອາກອນ​ລາຍ​ໄດ້ ​ແລະ ຍິ່ງ​ໄປ​ກວ່າ​ນັ້ນ ​ເກັບ​ພາສີ​ໄດ້​ແລ້ວ ​ເງິນ​ອາດ​ຮົ່ວ​ໄຫລ​ຢັ່ງຢາຍ​ເຂົ້າຖົງ​ຢູ່​ຂອດ​ລະຫວ່າງ​ກາງ ​ເພື່ອ​ຈະ​ໄດ້​ເຂົ້າລັດ​ກໍ​ພຽງ​ມະ​ຍິບມະ​ຍ່ອຍ. ດັ່ງ​ສັງຄົມ​ພວມ​ວິຈານ​ເວົ້າວ່າ​ກ່າວ​ຂວັນ​ນິນທາກັນຢູ່ທຸກວັນນີ້. ຈາກບັນຫາທີ່ກ່າວ ພວກເຮົາພ້ອມພາກັນມາວາດພາບ ຕາງສຳຫລວດເບິ່ງວ່າ ມາ​ຮອດ​ປັດຈຸບັນ ຄົນ​ລາວ​ເຮົາ ຫລື​ວ່າ ຢູ່​ບ້ານ​ເຮົາ ​ເຮັດ​ໄດ້​ຫຍັງ​ແດ່ ? ​ມີ​ເຄື່ອງ​ໃຊ້​ໄມ້​ສອຍ​ອັນ​ໃດ​ແດ່​ທີ່​ພວກ​ເຮົາ​ເຮັດ​ໄດ້. ຍົກ​ຕົວຢ່າງຢູ່​ໃນ​ຮ້ານ​ເຝີ​ແຫ່ງ​ໜຶ່ງ ນ້ຳປາ​ກໍ​ນຳ​ເຂົ້າ, ກະປິ​ນຳ​ເຂົ້າ, ນ້ຳຊ໊ອດກໍ​ນຳ​ເຂົ້າ, ສະອິ້ວນຳ​ເຂົ້າ, ​ແຟບນຳ​ເຂົ້າ, ສະບູ​ນ້ຳ​ເຂົ້າ, ​ແປ້ງ​ນົວ​ນຳ​ເຂົ້າ, ຖ້ວຍ​ຈານ, ໝໍ້​ແຫກ​ແຕກ​ກະ​ໂປະ​ນຳ​​ເຂົ້າ, ນ້ຳຢາ​ລ້າງ​ຈານ​ນຳ​ເຂົ້າ, ນົມ​ນຳ​ເຂົ້າ. ສິ່ງ​ທີ່​ບໍ່​ໄດ້​ນຳ​ເຂົ້າກໍ​ອາດ​ແມ່ນ​ຜັກ​ກັບ​ໄມ້​ຖູ່ ຫລື ​ເຜີໆ​ມາ​ປາ​ແດກ​ກໍ​ຕ້ອງ​ໄດ້​ນຳ​ເຂົ້າ, ຍິ່ງ​ໄປ​ກວ່າ​ນັ້ນ ຍາມ​ວັນ​ບຸນ, ວັນພັກ​ເສົາ​ທິດ ຄົນ​ລາວ​ຍັງ​ພາກັນ​ໂຫ່​ໄປ​ທ່ຽວ, ​ໄປ​ກິນ​ໄປ​ດື່ມ​ຢູ່​ຝັ່ງ​ໄທ​ເປັນ​ພັນ​ເປັນ​ໝື່ນ ​ແລ້ວ​ຈະ​ບໍ່​ໃຫ້​ເງິນ​ບາດ​ໄທ, ສິນຄ້າ​ໄທ​ໄດ້​ປຽບ​ເຮົາ​ໄດ້​ຈັ່ງ​ໃດ.

     ​ເວົ້າມາ​ຮອດ​ຈຸດ​ນີ້ ​ເຮົາ​ຈຶ່ງ​ຮູ້​ວ່າ ​ໃນ​ຂົງ​ເຂດ​ການ​ຜະລິດ​ຂະໜາດ​ນ້ອຍ-ຂະໜາດ​ກາງຂອງ​ພວກ​ເຮົາ​ຍັງ​ບໍ່​ທັນ​ເຂັ້ມ​ແຂງ, ມີ​ຮ້ອຍ​ອັນ​ພັນ​ຢ່າງ​ທີ່​ເຮົາ​ບໍ່​ທັນ​ສາມາດ​ກຸ້ມ​ຕົນ​ເອງ​ໄດ້, ອາ​ໄສ​ການ​ກະສິກຳ-ປູກຝັງ​ລ້ຽງສັດ​ກໍ​ຍັງ​ບໍ່​ພຽງພໍ​ຢູ່​ແລ້ວ. ບາງ​ກໍລະນີ​ຍັງ​ມີ​ການ​ລັກລອບ​ນຳ​ເຂົ້າ ຍ້ອນ​ພາກ​ອຸດສາຫະກຳ​ປຸງ​ແຕ່ງ​ບໍ່​ທັນ​ກວ້າງຂວາງ​ຫລາກ​ຫລາຍ ຈຶ່ງ​ມີ​ການ​ນຳ​ເຂົ້າຫລາຍ​ກວ່າ​ສົ່ງ​ອອກ. ສະຫລຸບ​ແລ້ວ ​ເກືອບ​ທຸກ​ຢ່າງ​ໃນ​ເຄື່ອງ​ໃຊ້​ຊີວິດ​ປະຈຳ​ວັນ, ​ເຄື່ອງ​ໃຊ້​ໃນ​ຄົວ​ເຮືອນ ​ໄປ​ຮອດ​ອາຫານ​ສຳ​ເລັດ​ຮູບ, ວັດຖຸ​ອຸປະກອນ​ຕ່າງໆ ລ້ວນ​ແຕ່​ໄດ້​ນຳ​ເຂົ້າຈາກ​ປະ​ເທດ​ເພື່ອນ​ບ້ານ ສຸດ​ທ້າຍ​ມາ​ກໍ​ກາຍ​ເປັນ​ຕະຫລາດຈຳໜ່າຍ​ສິນຄ້າ​ໃຫ້​ປະ​ເທດ​ເພື່ອນ​ບ້ານ​ຢ່າງ​ປະຕິ​ເສດ​ບໍ່​ໄດ້. ​ເມື່ອ​ເປັນ​ດັ່ງ​ວ່າ​ນີ້ ​ເຮັດ​ແນວ​ໃດ​ຈຶ່ງ​ຈະ​ກຸ້ມ​ຕົນ​ເອງ​ເພິ່ງ​ຕົນ​ເອງ​ໄດ້ ​ແລະ ຫລຸດຜ່ອນ​ການ​ນຳ​ເຂົ້າ ? ຄຳ​ຕອບ​ກໍ​ຄື ຕ້ອງ​ມີ​ການ​ຜະລິດ​ຢູ່​ພາຍ​ໃນ​ໃຫ້​ຫລາຍໆ ​ເຫລືອ​ໃຊ້​ເຫລືອ​ຈ່າຍ​ແລ້ວ​ສົ່ງ​ອອກ​ຈຳໜ່າຍ​ໃຫ້​ຕ່າງປະ​ເທດ​ຄື​ເພື່ອນ​ບ້ານ​ເຂົາ.

- Wave100S AD to Website 2020 0 - ສະຕິ​ຮັກ​ຊາດ​ສະ​ແດງ​ອອກ​ດ້ານ​ພຶດຕິ​ກຳ

     ​ເມື່ອ​ເປັນ​ດັ່ງ​ວ່າ​ນີ້ ​ໃນ​ອະນາຄົດ​ຂ້າງ​ໜ້າ ກໍ​ຂໍ​ຝາກ​ຄວາມ​ຫວັງ​ໄວ້​ກັບ​ຄະນະ​ສະ​ເພາະ​ກິດ​ຊຸກຍູ້​ສົ່ງ​ເສີມ​ການ​ຜະລິດ​ຂະໜາດ​ນ້ອຍ ​ແລະ ຂະໜາດ​ກາງ ​ເຊິ່ງ​ເປັນ​ໜຶ່ງ​ໃນ​ໂຄງການ​ບຸກທະລຸ​ຂອງ​ລັດຖະບານ​ໃນ​ປັດຈຸບັນ, ສະ​ເພາະ​ໜ້າ ​ແລະ ຍາວ​ນານ. ຄາດ​ວ່າ​ອີກ​ຫ້າ​ປີ ຫລື ສິບ​ປີ​ຂ້າງ​ໜ້າ ຂໍ​ໃຫ້​ຫລຸດຜ່ອນ​ການ​ນຳ​ເຂົ້າຜະລິດ​ຕະພັນ​ມະ​ຍິບມະ​ຍ່ອຍ​ຕະປິດ​ຕະປີ​ເບັດ​ຕະ​ເລັດ​ກ້າວ​ໄປ​ເຖິງ​ການ​ຜະລິດ​ສິນຄ້າ​ທີ່​ຫລາກ​ຫລາຍ ​ເພື່ອ​ຫລຸດຜ່ອນ​ການ​ນຳ​ເຂົ້າ. ​ໄປ​ຄຽງ​ຄູ່​ກັນນັ້ນ ກໍ​ຕ້ອງ​ໄດ້​ເຊີດ​ຊູ​ສະຕິ​ຮັກ​ຊາດ, ຄວາມ​ເປັນ​ເຈົ້ານັບ​ມື້ສູງ​ເໝືອນ​ດັ່ງ​ເພື່ອ​ນບ້ານ​ເຂົາ, ​ເຮົາ​ວ່າ​ຖ້າ​ເຮັດ​ໄດ້​ ອີກ​ສິບ​ປີ ຫລື ຊາວ​ປີ​ຂ້າງ​ໜ້າ ບໍ່​ວ່າ​ແຕ່​ເງິນ​ກີບ ຢ່າງ​ອື່ນໆ​ກໍ​ຕ້ອງ​ອຸດົມສົມບູນ​ໄປ​ຄຽງ​ຄູ່​ກັນ​ປານ​ປີ່​ກັບ​ຂຸ່ຍ.

- WhatsApp Image 2020 05 27 at 5 - ສະຕິ​ຮັກ​ຊາດ​ສະ​ແດງ​ອອກ​ດ້ານ​ພຶດຕິ​ກຳ
- WhatsApp Image 2020 05 27 at 5 - ສະຕິ​ຮັກ​ຊາດ​ສະ​ແດງ​ອອກ​ດ້ານ​ພຶດຕິ​ກຳ
error: Alert: ເນື້ອຫາຂ່າວມີລິຂະສິດ !!