ທ່ອງທ່ຽວອິນເດຍຖືກກະທົບຈາກການປະທ້ວງກົດໝາຍສັນຊາດ
ການທ່ອງທ່ຽວອິນເດຍໄດ້ຮັບຜົນກະທົບຈາກການປະທ້ວງໃນຫລາຍພື້ນທີ່ຕໍ່ຕ້ານກົດໝາຍສັນຊາດສະບັບແກ້ໄຂທີ່ໃຫ້ຜູ້ອົບພະຍົບກຸ່ມນ້ອຍໄດ້ສັນຊາດອິນເດຍງ່າຍຂຶ້ນ ເພາະມີຢ່າງໜ້ອຍ 7 ປະເທດອອກຄຳເຕືອນການເດີນທາງມາອິນເດຍແລ້ວ.
ການປະທ້ວງທີ່ເກີດຂຶ້ນນັບແຕ່ກົດໝາຍນີ້ຍັງເປັນຮ່າງກົດໝາຍ ຈົນສະພາຜ່ານຄວາມເຫັນພ້ອມໃນຕົ້ນເດືອນທັນວານີ້ ເຮັດໃຫ້ມີຜູ້ເສຍຊີວິດແລ້ວ 25 ຄົນ. ລັດອຸຕະປະເທດ ທາງຕອນເໜືອເປັນຈຸດທີ່ມີການປະທ້ວງຮຸນແຮງທີ່ສຸດ ແລະ ເປັນທີ່ຕັ້ງຂອງທັດມາຮາ ແຫລ່ງທ່ອງທ່ຽວຊື່ດັງຂອງປະເທດ. ທາງການອິນເດຍຄາດຄະເນວ່າ: ປະມານສອງອາທິດຜ່ານມານີ້ ມີນັກທ່ອງທ່ຽວທັງໃນ ແລະ ຕ່າງປະເທດຍົກເລີກ ຫລື ເລື່ອນການມາເບິ່ງອະນຸສອນສະຖານຫິນອ່ອນແຫ່ງນີ້ແລ້ວ 200.000 ຄົນ, ຕຳຫລວດທ່ອງທ່ຽວໃກ້ທັດມາຮາເປີດເຜີຍວ່າ: ເດືອນທັນວາປີນີ້ມີຄົນມາທ່ຽວຫລຸດລົງເຖິງ 60% ທຽບໃສ່ເດືອນທັນວາປີກ່ອນ, ນັກທ່ອງທ່ຽວຊາວອິນເດຍ ແລະ ຕ່າງປະເທດໂທລະສັບມາສອບຖາມສະຖາ ນະການ. ຕຳຫລວດຮັບຮອງວ່າປອດໄພ, ແຕ່ຫລາຍຄົນຍັງບໍ່ກ້າມາ. ໂຮງແຮມຫລູ ແລະ ທີ່ພັກທຳມະດາອ້ອມຮອບທັດມາຮາຕ່າງຈົ່ມເປັນສຽງດຽວກັນວ່າ: ລູກຄ້າຍົກເລີກການຈອງໃນນາທີສຸດທ້າຍ ທັງທີ່ເປັນລະດູທ່ອງທ່ຽວ ທຳລາຍບັນຍາກາດທາງທຸລະກິດທີ່ຊຸດໂຊມຢູ່ແລ້ວ ເພາະເສດຖະກິດຂະຫຍາຍຕົວຫລຸດລົງເຫລືອ 4,5% ຕໍ່າທີ່ສຸດໃນຮອບກວ່າ 6 ປີ.
ທັດມາຮາຕັ້ງຢູ່ເມືອງອັກຣາ ມີຄົນໄປທ່ຽວປີລະກວ່າ 6,5 ລ້ານຄົນ ມີລາຍໄດ້ຈາກຄ່າຜ່ານປະຕູປີລະເກືອບ 14 ລ້ານໂດລາສະຫະລັດ ເພາະນັກທ່ອງທ່ຽວຕ່າງປະເທດຕ້ອງຈ່າຍຄ່າເຂົ້າຄົນລະ 1.100 ຣູປີ. ປະທານມູນນິທິພັດທະນາການທ່ອງທ່ຽວອັກຣາທີ່ເບິ່ງແຍງບໍລິສັດນຳທ່ຽວ, ໂຮງແຮມ ແລະ ໄກ້ກວ່າ 250 ຄົນ ເປີດເຜີຍວ່າ: ການທີ່ທາງການຕັດການເຊື່ອມຕໍ່ອິນເຕີເນັດໃນເມືອງນີ້ ເພື່ອຢຸດການກໍ່ຄວາມບໍ່ສະຫງົບ ສົ່ງຜົນໃຫ້ການທ່ອງທ່ຽວ ແລະ ການເດີນທາງໃນເມືອງນີ້ຫລຸດລົງ 50-60%, ສ່ວນຢູ່ລັດອຳສຳ ເຊິ່ງມີການປະທ້ວງໜັກເຊັ່ນກັນ ປະທານບໍລິສັດການພັດທະນາທ່ອງທ່ຽວອຳສຳເປີດເຜີຍວ່າ: ປົກກະຕິແລ້ວເດືອນນີ້ຈະມີນັກທ່ອງທ່ຽວສະເລ່ຍ 500.000 ຄົນ, ແຕ່ການປະທ້ວງ ແລະ ການທີ່ຫລາຍປະເທດອອກຄຳເຕືອນການເດີນທາງ ເຮັດໃຫ້ຕົວເລກຫລຸດລົງເຖິງ 90% ປະເທດທີ່ເຕືອນພົນລະເມືອງໃຫ້ຫລີກເວັ້ນ ຫລື ໃຊ້ຄວາມລະມັດລະວັງໃນການມາອິນເດຍໄດ້ແກ່ ອາເມລິກາ, ອັງກິດ, ຣັດເຊຍ, ອິດສະລາແອນ, ການາດາ, ສິງກະໂປ ແລະ ໄຕ້ຫວັນ.
