ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ

ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ - 36 - ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ
ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ - Untitled design - ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ

ທິດ​ກໍ່າ:

      ປີ​ເກົ່າ 2019 ຜ່ານ​ໄປ ປີ​ໃໝ່ 2020 ​ໄດ້​ກ້າວ​ເຂົ້າມາ​ແທນ​ທີ່​ຕາມ​ກົດ​ເກນ​ວັດຕະ​ຈັກ​ຂອງ​ໂລກ. ດັ່ງ​ທີ່​ຮູ້​ກັນ​​ແລ້ວ​ວ່າ: ທຸກ​ສິ່ງ​ທຸກ​ຢ່າງ​ທີ່​ກຳ​ເນີ​ດ​ເກີດ​ມາ​ໃນ​ໂລກ​ນີ້ ບໍ່​ມີ​ອັນ​ໃດ​​ເປັນ​ອຳ​ມະຕະ, ທຸກ​ສິ່ງ​ຢ່າ​ງນັບ​ແຕ່​ໂລກ​ທຳ​ມະ​ຊາດ ​ແລະ ສັງຄົມ​ຂອງ​ຄົນ​ເຮົາ​ກໍ​ລ້ວນ​ແລ້ວ​ແຕ່​ມີ​ການ​ປ່ຽນ​ແປງ​ເປັນ​ອານິຈັງ​ຄື​ຄວາມ​ບໍ່​ທ່ຽງ​ນັ້ນ​ເອງ ​ເພາະສະນັ້ນ ​ໃນ​ເມື່ອ​ເຮົາ​ເກີດ​ມາ​ເປັນ​ມະນຸດ​ທີ່​ຍັງ​ມີ​ຊີວິດ​ຢູ່​ໃນ​ຜືນ​ພິພົບ​ ​ມາຕຸພູມ​ອັນ​ແສນ​ຮັກ ​ແລະ ຫວງ​ແຫນ ຕ້ອງ​ໄດ້​ພາກັນ​ເປັນ​ເຈົ້າຂອງ​ປະ​ເທດ​ຊາດ, ສ້າງ​ຜົນງານ ​ແລະ ຄຸນງາມຄວາມ ດີ​ໄວ້​ໃຫ້​ສັງຄົມ ​ແລະ ປະຊາຊົນ​ຈາລຶກ​ບຸນຄຸນ. ບັນດາ​ຜົນງານ ​ແລະ ຄຸນງາມຄວາມດີ​ທີ່​ພວກ​ເຮົາ​ໄດ້​ສ້າງ​ໄວ້​ນັ້ນ ຕົກ​ນ້ຳບໍ່​ໄຫລ ຕົກ​ໄຟ​ບໍ່​ໄໝ້ ​ແລະ ​ເປັນ​ອານິສົງ​ຍໍໆ​ຍິ່ງໆ​ໃຫ້​ແກ່​ຊາດ​ບ້ານ​ເມືອງ​ດັ່ງ​ວິລະ​ບູລຸດ, ບັນດາ​ທ່ານ​ຜູ້ນຳ ​ແລະ ນັກ​ປະຕິວັດ​ຮຸ້ນ​ຜ້າ​ສອດ​ຕ່ຽວ ​ແລະ ຮຸ້ນ​ກ່ອນໆ​ໄດ້​ສ້າງ​ໄວ້​ໃຫ້​ກັບພວກ​ເຮົາ.

      ຕົກ​ມາ​ເຖິງ​ຍຸກ​ສະ​ໄໝ​ນີ້, ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ຍິ່ງ​ມີ​ການ​ສ້າງສາ​ພັດທະນາ​ໃຫ້​ມີ​ຄວາມ​ຈະ​ເລີ​ນຮຸ່ງ​ເຮືອງ​ໃຫ້​ທຽມ​ທັນ​ກັບ​ນາໆ​ປະ​ເທດ​ທີ່​ພວກ​ເພິ່ນ​ມີ​ຄວາມ​ຈະ​ເລີ​ນ​ແລ້ວ. ​ເວົ້າສະ​ເພາະ​ນັບ​ແຕ່​ປະ​ເທດ​ຊາດ​ຂອງ​ພວກ​ເຮົາ​ໄດ້​ມີ​ການ​ປ່ຽນ​ແປງ​ລະບອບ​ການ​ປົກຄອງ ສະຖາປະນາ​ເປັນ​ປະ​ເທດ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ມາ​ນີ້ ຍິ່ງ​ເຮັດ​ໃຫ້​ມາຕຸ​ພູມ​ກ້າວ​ສູ່​ຍຸກ​ປະຫວັດສາດ​ໜ້າ​ໃໝ່​ຢ່າງ​ກ້າວ​ກະ​ໂດດ​ຂັ້ນ. ຕະຫລອດ​ໄລຍະ 44 ຜ່ານ​ມາ, ພາຍ​ໃຕ້​ການ​ນຳພາ​ຂອງ​ພັກ ​ແລະ ລັດຖະບານ ​ໄດ້​ນຳພາ​ປວງ​ຊົນ​ລາວ​ທັງ​ຊາດ​ພ້ອມ​ກັນ​ສ້າງສາ​ພັດທະນາ​ປະ​ເທດ​ຊາດດ້ວຍ​ຄວາມ​ຕັ້ງຕໍ​ບໍລິສຸດ ​ແລະ ມີ​ຄວາມ​ຮັບຜິດຊອບ​ຕໍ່​ພາລະ​ກຳ​ປະຫວັດສາດ​ຂອງ​ຊາດ, ຂອງ​ພັກ ​ແລະ ຂອງ​ປະຊາຊົນ​ບັນດາ​ເຜົ່າ.

      ສະ​ເພາະ​ໃນ​ປີ 2019 ຜ່ານ​ມາ​ນີ້, ​ເຖິງ​ວ່າ​ຈະ​ມີ​ສະພາບ​ແວດ​ລ້ອມ​ຫລາຍ​ອັນ​ຫລາຍ​ຢ່າງ​ມາ​ກະທົບ ນັບ​ທັງ​ພາຍ​ນອກ ​ແລະ ພາຍ​ໃນ, ​ແຕ່​ພວກ​ເຮົາ​ກໍ​ໄດ້​ຜ່ານ​ຜ່າ​ບັນດາ​ວິ​ກິດ​ຄວາມ​ຫຍຸ້ງຍາກ​ນາໆ​ປະການ​ໄດ້​ເປັນ​ຢ່າງ​ດີ ​ເປັນຕົ້ນດ້ານ​ການ​ເມືອງ​ກໍ​ນັບ​ມື້ໜັກ​ແໜ້ນ​ໝັ້ນຄົງ ​ແລະ ມີ​ສະຖຽນ​ລະ​ພາບ​ຍິ່ງ​ຂຶ້ນ, ບົດບາດ​ຂອງ ສປປ ລາວ ​ໃນ​ເວທີ​ພາກພື້ນ ​ແລະ ສາກົນ​ກໍ​ນັບ​ມື້ສູງ​ເດັ່ນ. ປັດຈຸບັນ ລາວ​ເຮົາ​ມີ​ສາຍ​ພົວພັນ​ທາງ​ການ​ທູດ​ເຖິງ 140 ກວ່າ​ປະ​ເທດ. ນອກ​ນັ້ນ ຍັງ​ໄດ້​ເຊື່ອມ​ໂຍງ​ເຂົ້າຮ່ວມ​ໃນ​ບັນດາ​ອົງການ​ຈັດຕັ້ງພາຄີ​ທີ່​ສຳຄັນ​ຕ່າງໆ​ຂອງ​ສາກົນ​ໃນ​ຫລາຍ​ຂົງ​ເຂດ ນັບ​ທັງ​ຂົງ​ເຂດ​ເສດຖະກິດ ​ແລະ ສັງຄົມ, ວັດທະນະ​ທຳ. ການ​ເຕີບ​ໃຫຍ່ທາງ​ດ້ານ​ເສດຖະກິດ​ໃນ​ປີ 2019 ພວກ​ເຮົາ​ກໍ​ສາມາດ​ບັນລຸ​ໄດ້ 6,4% ຂອງ​ລວມຍອດ​ຜະລິດ​ຕະພັນ​. ຂົງ​ເຂດ​ການ​ສ້າງ​ພື້ນຖານ​ໂຄງ​ລ່າງ​ໃຫ້​ແກ່​ເສດຖະກິດ-ສັງຄົມ, ວັດທະນະທຳ​ກໍ​ພວມ​ດຳ​ເນີນ​ໄປ​ຢ່າງ​ເຄັ່ງຮ້ອນ. ມາ​ຮອດ​ປັດຈຸບັນ​ໄດ້​ມີ​ເຂື່ອນ​ຜະລິດ​ໄຟຟ້າ​ເຖິງ 70 ​ແຫ່ງ​ແລ້ວ, ​ໂຄງການ​ຂະໜາດ​ນ້ອຍ, ຂະໜາດ​ກາງ ​ແລະ ຂະໜາດ​ໃຫຍ່ ນັບ​ແຕ່​ຂັ້ນສູນ​ກາງ​ລົງ​ຮອດ​ທ້ອງ​ຖິ່ນ​ພວມ​ໄດ້​ຮັບ​ການ​ບູລະນະ​ສ້າ​ງສາ. ​ເດັ່ນ​ທີ່​ສຸດ​ຄື​ໂຄງການ​ສ້າງ​ທາງ​ລົດ​ໄຟ ລາວ-ຈີນ, ​ໂຄງການ​ສ້າງ​ຖະໜົນ​ຫົນທາງ, ​ເຂດ​ເສດຖະກິດ​ພິ​ເສດ ​ແລະ ​ເຂດ​ເສດຖະກິດ​ສະ​ເພາະ, ຕຶກ​ຫ້າງ​ຮ້ານ, ສຳນັກງານ​ອົງການ, ​ໂຮງຮຽນ, ​ໂຮງໝໍ, ສະຖານ​ບ້ານ​ເຮືອນ ​ແລະ ການ​ພັດທະນາ​ຊົນນະບົດ​ໄດ້​ເປັນ​ໄປ​ຕາມ​ແຜນ​ພັດທະນາ​ເສດຖະກິດ-ສັງຄົມ​ຂອງ​ປະ​ເທດ, ຊີວິດ​ການ​ເປັນ​ຢູ່​ທາງ​ດ້ານ​ວັດຖຸ ​ແລະ ຈິດ​ໃຈ​ຂອງ​ປະຊາຊົນ​ກໍ​ນັບ​ມື້ມີ​ປັດ​ໄຈ​ອັນ​ໃໝ່​ກ້າວ​ໄປ​ເຖິງ​ໃຫ້​ສາມາດ​ລຶບລ້າງ​ອອກ​ຈາກ​ຄວາມທຸກ​ຍາກ ​ແລະ ດ້ອຍ​ພັດທະນາ​ໃນ​ອະນາຄົດ. ​ໄປ​ຄຽງ​ຄູ່​ກັນນັ້ນ, ທາງ​ດ້ານ​ວັດທະນະທຳ-ສັງຄົມ, ວິ​ຖີ​ຊີວິດ ​ແລະ ຮີດຄອງ​ປະ​ເພນີ​ອັນ​ດີງາມຂອງ​ປະຊາຊົນ​ບັນດາ​ເຜົ່າກໍ​ນັບ​ມື້​ໄດ້​ຮັບ​ການ​ປັບປຸງ ​ແລະ ສົ່ງ​ເສີມ​ໃຫ້​ດີ​ຂຶ້ນ​ເລື້ອຍໆ. ມາ​ຮອດ​ປັດຈຸບັນ ນະຄອນຫລວງພະ​ບາງ, ວັດ​ພູ​ຈຳປາ​ສັກ, ສຽງ​ແຄນ​ລາວ ​ແລະ ທົ່ງ​ໄຫ​ຫີນ ​ໄດ້​ກາຍ​ເປັນມໍລະດົກ​ໂລກ​ໄປ​ແລ້ວ. ນອກຈາກ​ນັ້ນ ສະຖາປັດຕະຍະກຳ, ວັດວາອາ​ຮາມ, ​ແຫ​ລ່ງທຳ​ມະ​ຊາດ, ຮີດຄອງ​ປະ​ເພນີ​ອັດ​ຕະລັກ​ຂອງ​ຊາດ ກໍ​ຄື​ຂອງ​ປະຊາຊົນ​ບັນດາ​ເຜົ່າ​ກໍ​ໄດ້​ຮັບ​ການ​ປັບປຸງ ​ແລະ ສົ່ງ​ເສີມ​ໃຫ້​ກາຍ​ເປັນ​ມໍລະດົກ​ຂອງ​ຊາດ, ຂອງ​ຊົນ​ເຜົ່າ, ສາມາດ​ດຶງ​ດູດ​ໃຫ້​ແຂກ​ຕ່າງ​ດ້າວ​ທ້າວ​ຕ່າງ​ແດນ​ເຂົ້າມາ​ຢ້ຽມ​ຊົມ ​ແລະ ສຶກສາຄົ້ນຄວ້າ​ຢ່າງ​ຫລວງຫລາຍ.

ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ - Wave100S AD to Website 2020 0 - ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ

     ​ໃນ​ປີ 2019 ຜ່ານ​ມາ, ​ເຖິງ​ວ່າ​ພວກ​ເຮົາ​ປະສົບ​ບັນຫາ​ຫລາຍ​ອັນ​ຫລາຍ​ຢ່າງ​ມາ​ກົດ​ໜ່ວງ​ຂົ່ມຂູ່​ເຊັ່ນ: ຖືກ​ນ້ຳຖ້ວມ​ໃນ 2 ​ແຂວງ​ພາກ​ກາງ ​ແລະ 4 ​ແຂວງ​ພາກ​ໃຕ້, ຖືກ​ໄພ​ແຫ້ງ​ແລ້ງ​ຢູ່​ພາກ​ເໜືອ ທັງ​ພາຍຸ​ແຜ່ນດິນ​ໄຫວ​ຢູ່​ພາຍ​ໃນ​ປະ​ເທດ ​ແລະ ບັນຫາ​ເສດຖະກິດ​ຜັນ​ຜວນ​ຈາກ​ພາຍ​ນອກ, ​ແຕ່​ພາຍ​ໃຕ້​ການ​ນຳພາ​ຂອງ​ພັກ ​ແລະ ລັດຖະບານ​ພວກ​ເຮົາ​ກໍສາມາດ​ຜ່ານ​ຜ່າ​ບັນດາ​ວິ​ກິດ​ຕ່າງໆ​ນັ້ນ​ໄດ້​ເປັນ​ຢ່າງ​ດີ.

      ​ເຖິງ​ຢ່າງ​ໃດ​ກໍ​ດີ, ອີງ​ໃສ່​ແນວທາງ ກໍ​ຄື​ແຜນ​ພັດທະນາ​ເສດຖະກິດ-ສັງຄົມ​ຂອງ​ປະ​ເທດ​ທີ່​ພັກ ​ແລະ ລັດຖະບານ​ໄດ້​ວາງ​ອອກ​ໃນ​ປີ 2020 ກໍ​ຄື​ບັນດາ​ໜ້າ​ວຽກ​ຕ່າງໆ​ທີ່​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ​ໄດ້​ຮັບຮອງ ທັງ​ແກ້​ຂອດ​ປາກົດການ​ຫຍໍ້​ທໍ້​ຕ່າງໆ​ທີ່​ຍັງ​ເປັນ​ສິ່ງ​ກົດ​ໜ່ວງ​ຖ່ວງ​ດຶງ​ຄື​ບັນດາ​ທ່ານ​ຜູ້​ແທນ​ໃນ​ກອງ​ປະຊຸມສະພາ​ໄດ້​ສະ​ເໜີ​ໃຫ້​ປາກົດ​ຜົນ​ເປັນ​ຈິງ ພວກ​ເຮົາ​ຕ້ອງ​ພ້ອມ​ກັນ​ບຸກທະລຸ​ໃນ​ປີ 2020 ​ໃຫ້​ເຫັນ​ໝາກຜົນ ​ແລະ ຍິ່ງ​ໃຫຍ່ກວ່າ​ປີ 2019 ທີ່​ຜ່ານ​ມາ. ຢາກ​ໄດ້​ຕາມ​ເປົ້າໝາຍ​ທີ່​ວ່າ​ນີ້ ບັນດາ​ການ​ນຳ​ທຸກຂັ້ນ, ບັນດາ​ສະຫາຍ​ສະມາຊິກ​ພັກ​ຕ້ອງ​ເປັນ​ແບບຢ່າງ​ນຳ​ໜ້າ ທັງ​ນຳພາ​ເຮັດ​ນຳພາ​ໄປ​ໃຫ້​ສົມ​ກັບ​ວ່າ: ພັກ​ຊີ້​ນຳ-ນຳພາ, ລັດ​ຄຸ້ມ​ຄອງ, ປະຊາຊົນ​ເປັນ​ເຈົ້າ ​ໂຮມ​ເຕົ້າ​ເຫງົ້າພະລັງ.

ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ - WhatsApp Image 2020 05 27 at 5 - ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ
ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ - WhatsApp Image 2020 05 27 at 5 - ປີ​ໃໝ່​ໃຫ້​ຍາດ​ເອົາ​ຜົນງານ​ໃໝ່​ຍິ່ງ​ໃຫຍ່​ກວ່າ​ເກົ່າ
error: Alert: ເນື້ອຫາຂ່າວມີລິຂະສິດ !!