​ເຕັກນິກ​ການ​ປະສົມ​ພັນ​ທຽມ​ປາດຸກ

​ເຕັກນິກ​ການ​ປະສົມ​ພັນ​ທຽມ​ປາດຸກ - Padouk - ​ເຕັກນິກ​ການ​ປະສົມ​ພັນ​ທຽມ​ປາດຸກ
​ເຕັກນິກ​ການ​ປະສົມ​ພັນ​ທຽມ​ປາດຸກ - Untitled design - ​ເຕັກນິກ​ການ​ປະສົມ​ພັນ​ທຽມ​ປາດຸກ

     ປາດຸກ​ພັນ ​ແມ່ນປາ​ຊະນິດ​ໜຶ່ງ​ທີ່​ມີ​ຄວາມ​ສຳຄັນ​ຕໍ່​ການ​ສ້າງ​ເສດຖະກິດ​ຄອບຄົວ ​ແລະ ສາມາດ​ປະກອບ​ເປັນ​ອາຊີບ​ສຳຮອງ​ໄດ້ ​ເພາະວ່າ​ການ​ລ້ຽງ​ປາດຸກ​ພັນ​ບໍ່​ສິ້ນ​ເປືອງ​ເນື້ອທີ່​ຫລາຍ ​ເໝາະ​ສຳລັບ​ຜູ້​ທີ່​ບໍ່​ມີ​ເນື້ອທີ່​ກວ້າງຂວາງ ສາມາດ​ລ້ຽງ​ໃສ່​ອ່າງ, ລ້ຽງ​ໃສ່​ຖັງ, ລ້ຽງ​ໃສ່​ໜອງ​ຂະໜາດ​ນ້ອຍ, ລ້ຽງ​ໃສ່​ກະຊັງ ​ແລະ ລ້ຽງ​ໃສ່​ບ່ອນ​ອື່ນໆ​ອີກ. ​ແຕ່​ການ​ຜະລິດ​ລູກ​ປາດຸກ​ພັນ​ກໍ​ຍັງ​ມີ​ຫລາຍ​ຄອບຄົວ​ບໍ່​ທັນ​ໄດ້​ຮັບ​ຜົນ​ດີ​ເທົ່າ​ທີ່​ຄວນ. ສະນັ້ນ ການ​ຜະລິດ​ລູກ​ປາດຸກ​ພັນ​ແມ່ນ​ມີ​ຄວາມ​ຈຳ​ເປັນ​ຫລາຍ. ຕາມທຳ​ມະ​ຊາດ​ແລ້ວ ປາດຸກ​ພັນ​ຈະ​ເຂົ້າສູ່​ໄວ​ສືບ​ພັນ​ໄດ້​ກໍ​ຕໍ່​ເມື່ອ​ມີ​ອາຍຸ​ໄດ້ 7-8 ​ເດືອນ​ຂຶ້ນ​ໄປ ​ໂດຍ​ຈະ​ເລີ່​ມວາງ​ໄຂ່​ໃນຕົ້ນລະດູຝົນ ​ເຊິ່ງວິທີ​ຜະລິດ​ລູກ​ປາດຸກ​ພັນ​ທີ່​ໄດ້​ຮັບ​ຜົນ​ດີ​ແມ່ນ​ການ​ປະສົມ​ພັນ​ທຽມ.

ການ​ປະສົມ​ພັນ​ທຽມ​ນີ້​ແມ່ນ​ມີ​ຄວາມ​ສຳຄັນ​ຫລາຍ​ໃນ​ການ​ຄັດ​ເລືອກ​ພໍ່​ແມ່​ພັນ​ມາ​ປະສົມ​ພັນ ​ເພາະວ່າ​ຕ້ອງ​ຄັດ​ເລືອກ​ໃຫ້​ໄດ້​ປາ​ແມ່​ພັນ​ທີ່​ມີ​ໄຂ່​ແກ່ ​ແລະ ພໍ່​ພັນ​ທີ່​ມີນ້ຳ​ເຊື້ອດີພ້ອມ​ປະສົມ​ພັນ​ໄດ້​ເຊັ່ນ: ປາ​ແມ່​ພັນ​ທີ່​ມີ​ໄຂ່​ແກ່​ດີ​ທ້ອງ​ຈະ​ໃຫຍ່​ເບັງ, ອ່ອນ, ມີ​ໜັງ​ທ້ອງ​ບາງໆ ​ເມື່ອ​ຫງາຍ​ທ້ອງຂຶ້ນຈະ​ເຫັນ​ອະ​ໄວ​ຍະ​ວະ​ເພດ​ຕຶ່ງ​ຂຶ້ນມີ​ສີ​ແດງ​ອົມ​ຊົມ​ພູ, ບາງ​ຄັ້ງຫາກ​ຈັບ​ແຮງ​ເກີນ​ໄປ​ຈະ​ມີ​ໄຂ່​ໄຫລ​ອອກ​ມາ ສີ​ຂອງ​ໄຂ່​ຈະ​ເປັນ​ສີນ້ຳຕານ​ອົມ​ສີຂຽວ​ແກ່, ສ່ວນ​ປາ​ຜູ້​ພໍ່​ພັນ​ຈະ​ມີ​ລັກສະນະ​ແຂງ​ແຮງ, ສົມບູນ​ລຳ​ຕົວ​ຮຽວ, ອະ​ໄວ​ຍະວະເພດຈະພົ້ນເດັ່ນຂ້ອນຂ້າງຕຶ່ງຂຶ້ນ, ເມື່ອຄັດ ເລືອກປາພໍ່ແມ່ພັນສົມບູນແລ້ວ ຂັ້ນຕອນຕໍ່ໄປແມ່ນການກະກຽມຢາຮໍໂມນ ເພື່ອກະຕຸ້ນຢາຊີນນາແຝກ (ເປັນຢາກະຕຸ້ນການວາງໄຂ່, ຢາມູຕິລຽມເປັນຢາ ຫ້າມ ຫລື ຢັບຢັ້ງ) ໃຫ້ໄຂ່ປາສຸກພ້ອມກັນ.

      ອຸປະກອນ: ຊີແລງສັກຢາຂະໜາດ 1cc, ຂົນ​ໄກ່, ຄົກ​ບົດ​ຢາ, ຊາມ ​ແລະ ຜ້າ​ສະອາດ.

      ຂັ້ນຕອນ​ກະກຽມ​ຢາ: ນຳ​ເອົາ​ຢາ​ຊີ​ນນາ​​ແຝກ​ປະສົມ​ກັບ​ຢາ​ໂມ​ເຕລຽມ ​ໃຫ້​ຄຳນວນ​ເຖິງ​ນ້ຳໜັກ​ຂອງ​ປາ, ການ​ສັກ​ແມ່ນສັກ​ຄັ້ງດຽວ​ໃນ​ລະດັບ​ຄວາມ​ເຂັ້ມ​ຂຸ້ນ​ຂອງ​ຢາ 10-30 ​ໄມ​ໂຄຣກຣາມ ປະສົມ​ກັບ​ຢາ​ໂມ​ຕິ​ລຽນ​ເຄິ່ງ​ເມັດ​ໃນ​ລະດັບ​ຄວາມ​ເຂັ້ມຂຸ້ນ​ຂອງ​ຢາ 5 ມິນ​ລີກຣາມ/ນ້ຳໜັກ​ປາ​ແມ່ 1 ກິ​ໂລກຣາມ, ຫລັງ​ຈາກ​ສັກ​ຢາ​ຮໍ​ໂມນ​ແລ້ວ ປະມານ 10 ຊົ່ວ​ໂມງ ກໍ​ສາມາດ​ຮີດ​ໄຂ່​ໄດ້​ໂລດ. ສຳລັບ​ປາດຸກ​ພໍ່​ພັນ​ຕ້ອງ​ໄດ້​ສັກ​ຢາ​ຮໍ​​ໂມນ ​ເພື່ອ​ກະ​ຕຸ້ນ​ໃຫ້​ມີນ້ຳ​ເຊື້ອຫລາຍ​ຂຶ້ນ ​ໂດຍ​ການ​ສັກ​ຮໍ​ໂມນ​ຄັ້ງດຽວ​ໃນ​ລະດັບ​ຄວາມ​ເຂັ້ມຂຸ້ນ 5 ​ໄມ​ໂຄຣກຣາມ ປະສົມ​ກັບ​ຢາ​ໂມ​ຕີ​ລຽມ​ເຄິ່ງ​ເມັດ​ຕໍ່​ນ້ຳໜັກ​ປາ​ຜູ້ 1 ກິ​ໂລກຣາມ ສັກ​ກ່ອນ​ການ​ຮີດ​ໄຂ່​ປະສົມ​ນ້ຳ​ເຊື້ອ 9-10 ຊົ່ວ​ໂມງ ທຸກ​ຄັ້ງຢາ​ໂມ​ຕີ​ລຽມຕ້ອງ​ບົດ​ລະອຽດ​ດີ​ແລ້ວ​ເຈືອ​ຈາງ​ກັບ​ນ້ຳກັ່ນ 2cc. ຈາກ​ນັ້ນ ຈຶ່ງ​ນຳ​ໄປ​ປະສົມ​ກັບ​ນ້ຳຢາ​ຊີ​ນນາ​ແຝກ ​ແລ້ວ​ສັ່ນ​ໃຫ້​ຢາ​ລະລາຍ​ລະອຽດ​ດີ​ກ່ອນ ຈຶ່ງ​ນຳ​ໄປ​ສັກ​ໃຫ້​ປາດຸກ​ພໍ່​ພັນ​ທີ່​ກະກຽມ​ໄວ້.

      ວິທີ​ສັກ​ຢາ​ຮໍ​ໂມນ: ການ​ສັກ​ຢາ​ຮໍ​ໂມນ​ໃຫ້​ພໍ່​ແມ່​ພັນ​ປາດຸກ ຄວນ​ສັກ​ໃສ່​ບ່ອນ​ທີ່​ເໝາະ​ສົມ​ຄື: ບໍລິ​ເວນ​ກ້າມ​ຊີ້ນ​ໃຕ້ຄີ​ຫລັງ, ບໍລິ​ເວນ​ເສັ້ນຂ້າງ​ຂອງ​ລຳ​ຕົວ, ​ໃຊ້​ເຂັມ​ຂະໜາດ​ເບີ 22, 24 ສັກ​ອ່ຽງມຸມ 30 ອົງສາ ​ໄປ​ທາງ​ດ້ານ​ຫົວ​ຂອງ​ປາ ປັກ​ເຂັມ​ລົງ​ເລິກ​ປະມານ 1 ນິ້ວ ​ແລ້ວ​ຄ່ອຍໆ​ສີດ​ຢາ​ຮໍ​ໂມນ​ເຂົ້າ​ໄປ​ຕາມ​ທີ່​ກຳນົດ​ໄວ້ ​ແລ້ວ​ຈຶ່ງ​ເອົາ​ປາຍ​ນິ້ວມື​ຂົ່ມ​ບ່ອນ​ສັກ​ຢານັ້ນ ພ້ອມ​ທັງ​ຖອດ​ເຂັມ​ອອກ. ຈາກ​ນັ້ນຈຶ່ງ​ນຳ​ປາ​ພໍ່​ແມ່​ພັນ​ໄປ​ແຍກ​ກັນ​ຂັງ​ໄວ້.

​ເຕັກນິກ​ການ​ປະສົມ​ພັນ​ທຽມ​ປາດຸກ - Wave100S AD to Website 2020 0 - ​ເຕັກນິກ​ການ​ປະສົມ​ພັນ​ທຽມ​ປາດຸກ

       ວິທີ​ການ​ຮີດ​ໄຂ່​ປະສົມ​ກັບ​ນ້ຳ​ເຊື້ອ: ​ເມື່ອ​ເຖິງ​ເວລາ​ທີ່​ກຳນົດ​ໄວ້​ແລ້ວ ກໍ​ຕ້ອງ​ທຳ​ການ​ຮີດ​ໄຂ່​ປະສົມ​ກັບ​ນ້ຳ​ເຊື້ອ, ການ​ຮີດ​ໄຂ່​ຄວນ​ຮີດ​ໃສ່​ຖ້ວຍ ຫລື ຊາມ​ຂະໜາດ​ພໍດີ ກ່ອນ​ຈະ​ຮີດ​ໄຂ່​ຕ້ອງ​ຜ່າຕັດ​ເອົາ​ແອ້​ນ້ຳ​ເຊື້ອຂອງ​ປາ​ພໍ່​ພັນ​ກ່ອນ ​ໂດຍ​ເອົາ​ມີດ​ປາດ​ສ່ວນ​ທ້ອງ​ແລ້ວ​ເອົາ​ນິ້ວມື​ໄງ້​​ແອ້​ນ້ຳ​ເຊື້ອອອກ​ມາ​ປະ​ໄວ້ ຈາກ​ນັ້ນຈຶ່ງ​ຮີດ​ໄຂ່. ພ້ອມ​ກັນນັ້ນ ກໍ​ຕັດ​ເອົາ​ແອ້​ນ້ຳ​ເຊື້ອມາ​ບີບ​ໃຫ້​ນ້ຳ​ເຊື້ອຍ້ອຍ​ລົງ​ໃສ່​ຖ້ວຍ​ໄຂ່ ​ແລ້ວ​ຄົນ​ດ້ວຍ​ປີກ​ໄກ່ ຄົນ​ໃຫ້​ທົ່ວ​ພ້ອມ​ທັງ​ຖອກ​ນ້ຳສະອາດ​ທີ່​ປະສົມ​ກັບ​ເກືອ 0,7% ລົງ​ໃສ່​ພ້ອມ. ຈາກ​ນັ້ນກໍ​ລ້າງ​ຖ້ວຍ​ດ້ວຍ​ນ້ຳສະອາດ 1-2 ຄັ້ງ ​ເພື່ອ​ໃຫ້​ສິ່ງ​ເສດ​ເຫລືອ​ໄຫລ​ອອກ ​ແລ້ວ​ຈຶ່ງ​ນຳ​ໄຂ່​ໄປ​ຝັກ. ​ໃຫ້​ນຳ​ໄຂ່​ທີ່​ປະສົມ​ກັບ​ນ້ຳ​ເຊື້ອ​ແລ້ວນັ້ນມາ​ໂຮຍ​ຢາຍ​ບາງໆ​ໃສ່​ດາງ​ສີຟ້າ​ທີ່​ວາງ​ໄວ້​ໃນ​ອ່າງ​ໃຫ້​ຢູ່​ໃນ​ລະດັບ​ຫ່າງ​ຈາກ​ພື້ນອ່າງ​ປະມານ 5-10 ຊັງ​ຕີ​ແມັດ ​ໄຂ່​ປາດຸກ​ເປັນ​ໄຂ່​ຈົມ ​ແລະ ​ໄຂ່​ຕິດ. ສະນັ້ນ ຫລັງ​ຈາກ​ໂຮຍ​ໄຂ່​ແລ້ວ​ກໍ​ປ່ຽນ​ນ້ຳທັນທີ ​ເພື່ອ​ລ້າງ​ໄຂມັນ ​ແລະ ສິ່ງ​ເສດ​ເຫລືອ​ຈາກ​ໄຂ່​ອອກ​ໄປ ​ແລ້ວ​ຕື່ມ​ນ້ຳ​ໃໝ່​ເຂົ້າມາ​ແທນ. ການ​ຟັກ​ໄຂ່​ປາດຸກ​ພັນ ​ໃຊ້​ເວລາ 21-26 ຊົ່ວ​ໂມງ​ໃນ​ລະດັບ​ອຸນຫະພູມ​ນ້ຳ 28-31 ອົງສາ.

       ຂໍ້​ຄວນ​ລະວັງ: ​ໃນ​ເວລາ​ຟັກ​ໄຂ່ ບໍ່​ຄວນ​ລົບ​ກວນ​ໄຂ່, ບໍ່​ໃຫ້​ໄຂ່​ຖືກ​ແສງ​ແດດ ຫລື ຖືກ​ນ້ຳຝົນ.

​ເຕັກນິກ​ການ​ປະສົມ​ພັນ​ທຽມ​ປາດຸກ - WhatsApp Image 2020 05 27 at 5 - ​ເຕັກນິກ​ການ​ປະສົມ​ພັນ​ທຽມ​ປາດຸກ
​ເຕັກນິກ​ການ​ປະສົມ​ພັນ​ທຽມ​ປາດຸກ - WhatsApp Image 2020 05 27 at 5 - ​ເຕັກນິກ​ການ​ປະສົມ​ພັນ​ທຽມ​ປາດຸກ
error: Alert: ເນື້ອຫາຂ່າວມີລິຂະສິດ !!