ລັດພະຍາຍາມຄຸ້ມຄອງສື່ອອນລາຍໃຫ້ເຂົ້າລະບົບ
ທ່ານ ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ (ປທສ) ໃຫ້ຮູ້ວ່າ: ປັດຈຸບັນ, ກະຊວງຂອງຕົນພວມເລັ່ງປັບປຸງລະບົບການຄຸ້ມຄອງສື່ສັງຄົມອອນລາຍໃຫ້ເຂົ້າສູ່ລະບົບ, ໂດຍການນຳໃຊ້ສູນດາຕາເຊັນເຕີຂອງກະຊວງ ໄປສະນີ, ໂທລະຄົມມະນາຄົມ ແລະ ການສືຶ່ສານ ເພື່ອສ້າງປະໂຫຍດໃຫ້ແກ່ຜູ້ຊົມໃຊ້ຄື: ອຳນວຍຄວາມສະດວກທາງດ້ານສັນຍານໂທລະ ສັບອິນເຕີເນັດໃຫ້ກວມເອົາ 90% ໃນຂອບເຂດທົ່ວປະເທດ, ເປັນຕົ້ນ ໂທລະ ສັບລະບົບ 2G, 3G ແລະ 4G ກວມ 70%, ສຳລັບລະບົບ 4G, ເປັນລະ ບົບອິນເຕີເນັດເທິງມືຖື, ເຊິ່ງລັດຖະບານໄດ້ຮ່ວມມືກັບຕ່າງປະເທດ, ເພື່ອອຳ ນວຍຄວາມສະດວກໃຫ້ຜູ້ຊົມໃຊ້ໄດ້ວ່ອງໄວ, ປະຢັດເວລາ, ໂດຍສະເພາະບັນ ດາສື່ສັງຄົມອອນລາຍຕ່າງໆແມ່ນມີຜົນປະໂຫຍດຫຼາຍຢ່າງເຊັ່ນ: ການໂພດຂາຍສິນຄ້າປະເພດຕ່າງໆລົງ, ເພື່ອໃຫ້ທຸກຄົນຮັບຮູ້ ແລະ ຈັບຈ່ອງສັ່ງຊື້ສິນຄ້າຜ່ານລະບົບມືຖື, ເປັນຕົ້ນ ອາຫານ, ເຄື່ອງດື່ມ, ເຄື່ອງໃຊ້ໃນຊີວິດປະຈຳວັນ ແລະ ໂຄສະນາສິນຄ້າອື່ນໆ.
ຄຽງຄູ່ກັບການອຳນວຍຄວາມສະດວກໃຫ້ກັບຜູ້ຊົມໃຊ້, ຍັງມີບາງກຸ່ມຄົນຈຳນວນໜຶ່ງຊ້ຳພັດນຳໃຊ້ສື່ສັງຄົມອອນລາຍໄປໃນທາງທີ່ບໍ່ຖືກຕ້ອງເຊັ່ນ: ສ້າງເປັນກຸ່ມກ້ອນໃສ່ຮ້າຍປ້າຍສີປະເທດຊາດ, ສ້າງເປັນຂ່າວປອມ, ຕົວະຍົວະຫຼອກລວງຕ່າງໆ, ທີ່ສ້າງຄວາມເສຍຫາຍໃຫ້ປະເທດຊາດ, ກຸ່ມຄົນ, ບຸກຄົນ ແລະ ສ້າງຄວາມແຕກແຍກຄວາມສາມັກຄີໃນສັງຄົມ, ຕໍ່ກັບບັນຫາດັ່ງກ່າວ ກະຊວງ ພວກເຮົາກໍໄດ້ຮ່ວມກັບຂະແໜງການກ່ຽວຂ້ອງ ໄດ້ເອົາໃຈໃສ່ໃນການຄວບຄຸມ ແລະ ແກ້ໄຂ, ປັດຈຸບັນ, ພວກເຮົາກຳລັງອອກມາດຕະການ, ໃນການຄວບຄຸມແບບໃໝ່, ໂດຍໃຫ້ຜູ້ຊົມໃຊ້ລົງທະບຽນຊິມ 3G, ແລ້ວຖ່າຍເອົາໃບໜ້າຂອງເຈົ້າຂອງຊິມຖ່າຍເອົາບັດປະຈຳຕົວ, ນອກນີ້, ໄດ້ລົງໄປເຜີຍແຜ່ຂໍ້ມູນຢູ່ສະຖານທີ່ຕ່າງໆ, ເມື່ອໂພດຮູບ ຫຼື ຂໍ້ຄວາມລົງຄວນຮັບຜິດຊອບທັງໝົດ, ຖ້າວ່າບຸກຄົນໃດຢາກສ້າງເປັນເຟສຂອງຕົນເອງ ແລະ ລົງຂ່າວສານຕ່າງໆຄວນໄປຈົດທະບຽນຢູ່ກົມສື່ມວນຊົນ, ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ສະນັ້ນ, ຮຽກຮ້ອງມາຍັງຜູ້ບໍລິໂພກຂໍ້ມູນຜ່ານສື່ສັງຄົມອອນລາຍຄວາມມີສະຕິ ຈຳແນກຂໍ້ມູນຢ່າງລະອຽດຖີ່ຖ້ວນວ່າ: ຂໍ້ມູນນັ້ນມີຄວາມຈິງຫຼືບໍ່, ຖ້າເປັນໄປໄດ້ເມື່ອກະຊວງ, ສຳນັກງານອົງການຕ່າງໆ, ບຸກຄົນ ຫຼື ນິຕິບຸກຄົນທີ່ໄດ້ຮັບຜົນກະທົບຈາກການໃສ່ຮ້າຍປ້າຍສີ, ຄວນອອກມາແກ້ຂ່າວຜ່ານສື່ທາງການ ເຊັ່ນ: ໜັງສືພິມ, ໂທລະພາບຕ່າງໆ, ເພື່ອໃຫ້ສັງຄົມຮັບຮູ້ ແລະ ເຂົ້າໃຈວ່າ: ຂ່າວດັ່ງກ່າວມີຄວາມຈິງ ຫຼື ບໍ່ມີຄວາມຈິງ.
ກະຊວງໄປສະນີໂທລະຄົມມະນາຄົມ ແລະ ການສື່ສານ ໃຫ້ຮູ້ວ່າ: ໃນປີ 2019, ໄດ້ມີການລົງທະບຽນນຳໃຊ້ໂທລະສັບມືຖືຫລາຍກ່ວາ 8,41 ລ້ານຄົນ, ກວມເອົາ 120%ຂອງຈຳນວນປະຊາກອນທັງໝົດ, ມີຜູ້ໃຊ້ອິນເຕີເນັດ 3,29 ລ້ານຄົນ ກວມເອົາ 47% ຂອງຈຳນວນປະຊາຊກອນທັງໝົດ ແລະ ນຳໃຊ້ສື່ອອນລາຍ 2,7 ລ້ານຄົນ ກວມເອົາ 39% ຂອງຈຳນວນປະຊາຊາກອນທັງໝົດ.
ໄລຍະຜ່ານມາ, ລັດຖະບານ ກໍຄືຂະແໜງການ ກ່ຽວຂ້ອງຕ່າງໆ, ໄດ້ເພີ່ມທະວີ. ການປະສານສົມທົບກັນຢ່າງກົມກຽວ, ເພື່ອຄຸ້ມຄອງການນໍາໃຊ້ ອິນເຕີເນັດ ແລະ ສື່ອອນລາຍ ຕ່າງໆ, ໃຫ້ເກີດປະໂຫຍດສູງສຸດຕໍ ການພັດທະນາ ເສດຖະກິດ-ສັງຄົມຂອງຊາດ, ພ້ອມທັງ ກວດກາ ແລະ ບັງຄັບໃຊ້ລະບຽບກົດໝາຍຕໍ່ຜູ້ກະທໍາຜິດຢ່າງເຂັ້ມງວດ. ສຳລັບການ ຈັດຕັ້ງຕ່າງໆ, ບຸກຄົນ ແລະ ນິຕິບຸກຄົນທີ່ມີຈຸດປະສົງ, ສ້າງຕັ້ງສື່ສິ່ງພິມ ແລະ ສື່ເອເລັກໂຕຣນິກ, ທີ່ມີທັງເວັບໄຊ, ເວັບເພດ ແລະ ສື່ອອນລາຍ ປະເພດຕ່າງໆ, ທີ່ຈະເຄື່ອນໄຫວ ສະໜອງ,ເຜີຍແຜ່, ໂຄສະນາ ຂໍ້ມູນຂ່າວສານ ຕ່າງໆ ຫລື ເອີ້ນວ່າການ ເຄື່ອນໄຫວວຽກງານສື່ມວນຊົນໃຫ້ແກ່ມວນຊົນ ທັງພາຍໃນ ແລະ ຕ່າງປະເທດ ຜ່ານພາຫະນະສື່ມວນຊົນ, ທຸກປະເພດລວມທັງສື່ອອນລາຍທຸກປະເພດຕ້ອງ ໄດ້ຮັບອະນຸຍາດ, ຈາກອົງການຄຸ້ມຄອງສື່ມວນຊົນຈຶ່ງເຄື່ອນໄຫວໄດ້ເຊິ່ງໃນກົດໝາຍ, ວ່າດ້ວຍສື່ມວນຊົນ, ສະບັບ ປັບປຸງປີ 2017, ໄດ້ກຳນົດລະອຽດ ໃນມາດຕາທີ 40 ວ່າ:ບຸກຄົນ, ນິຕິບຸກຄົນ, ການຈັດຕັ້ງ ທີ່ມີຈຸດປະສົງ ສ້າງຕັ້ງອົງການ ສື່ມວນຊົນ ຕ້ອງຍື່ນຄຳຮ້ອງ ແລະ ບົດວິພາກຕໍ່ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ເພື່ອອະນຸຍາດ ໃຫ້ເຄື່ອນໄຫວ ວຽກງານສື່ມວນຊົນ. ຂະນະທີ່ ໃນມາດຕາທີ 59 ຂອງກົດໝາຍສະ ບັບດັ່ງກ່າວ ກໍກຳນົດໄວ້ວ່າ: ບຸກຄົນ, ນິຕິບຸກຄົນ, ການຈັດຕັ້ງ ທີ່ມີຈຸດປະສົງ ສ້າງເວັບໄຊ ຂອງຕົນຕ້ອງ ປະຕິບັດ ຕາມກົດໝາຍ ແລະ ລະບຽບການ ທີ່ກ່ຽວຂ້ອງ. ຂໍ້ມູນຂ່າວສານ ທີ່ລົງເວັບໄຊ ຕ້ອງຖືກຕ້ອງ ຕາມຕົ້ນສະບັບ, ແຈ້ງແຫລ່ງ ຂໍ້ມູນ, ບົ່ງຊື່ຜູ້ຂຽນ, ສື່ຂອງອົງການ ສື່ມວນຊົນ, ເວລາລົງຂໍ້ມູນ ແລະ ເວລາສົ່ງຂໍ້ມູນ ຂ່າວສານດັ່ງກ່າວ. ສ່ວນມາດຕາ ທີ 60 ທີ່ເວົ້າກ່ຽວ ກັບການນຳໃຊ້ ສື່ອອນລາຍ ຂອງອົງການ ສື່ມວນຊົນ ໄດ້ກຳນົດໃນຂໍ້ 2 ວ່າ: ຕ້ອງລົງທະບຽນ ສ່ວນຕົວບຸກຄະລາກອນ ສື່ມວນຊົນ ຫລື ອົງການສື່ມວນຊົນ ນໍາອົງການ ຄຸ້ມຄອງ ສື່ມວນຊົນ ຢ່າງຖືກຕ້ອງ ຕາມກົດໝາຍ ແລະ ລະບຽບການ.
