ຄວາມຂັດແຍ້ງຕາເວັນອອກກາງອາດນຳທາງໂລກຢູ່ໃກ້ຂອບເຫວ

- 121212 - ຄວາມຂັດແຍ້ງຕາເວັນອອກກາງອາດນຳທາງໂລກຢູ່ໃກ້ຂອບເຫວ
- Untitled design - ຄວາມຂັດແຍ້ງຕາເວັນອອກກາງອາດນຳທາງໂລກຢູ່ໃກ້ຂອບເຫວ

ໂດຍ: ມຶກບໍ່ແຫ້ງ

ໃນຂະນະທີ່ ຢູ່ເຟື້ອງໂລກໃຕ້ໄດ້ພົບພໍ້ກັບໄຟປ່າຢ່າງຮຸນແຮງ ແຕ່ຢູ່ ເຟື້ອງໂລກເໜືອພັດພົບພໍ້ກັບຄວາມເຄັ່ງຕຶງທາງການເມືອງໂດຍສະເພາະ ຢູ່ຕາເວັນອອກາງທີ່ສ້າງໃຫ້ໂລກຕ້ອງວາດຜະຫວາພາກັນນອນບໍ່ລັບ ຍ້ອນຄວາມກັງວົນທີ່ວ່າຈະເກີດສົງຄາມຄັ້ງໃຫຍ່ ອີກຫຼືບໍ່?

ການໃຊ້ກຳລັງທາງທະຫານຂອງ ສະຫະລັດອາເມລິກາ ຂ້ານາຍພົນ ກັສເຊັມ ໂຊລາເມນີ (Qassem Solameini) ຜູ້ຊົງອິດທິພົນ ນຳເບີ ສອງ ຂອງອີຣານ ເມື່ອວັນທີ 3 ມັງກອນ 2020 ຢູ່ສະໜາມບິນ ແບກແດດ ປະເທດອີຣັກນັ້ນໄດ້ສ້າງຄວາມເຄັ່ງຕຶງຂຶ້ນຢ່າງຮຸນແຮງ, ເຮັດໃຫ້ສາຍພົວ ພັນລະຫວ່າງອີຣານ ແລະ ສະຫະລັດອາເມລິກາຕົກຢູ່ໃນຈຸດຕໍ່າສຸດອີກ ຄັ້ງໃນຮອບຫຼາຍທົດສະວັດທີ່ຜ່ານມາ.

“ການຂ້ານາຍພົນ ກັສເຊັມ ໂຊລາເມນີ ນັ້ນໝາຍເຖິງການຂ້າຄົນ ອີຣານທັງປະເທດ” ປະຊາຊົນທ່ານໜຶ່ງໃຫ້ສຳພາດຕໍ່ສຳນັກຂ່າວອາລ ຈາຊີລະ (Al Jazeera) ໃນຂະນະທີ່ເຂົ້າຮ່ວມຊຸມນຸມການໄວ້ອາໄລ ຕໍ່ການເສຍຊີວິດຂອງນາຍພົນຄົນດັ່ງກ່າວຮ່ວມກັບປະຊາຊົນອີຣານ ຫຼາຍລ້ານຄົນທົ່ວປະເທດເຊິ່ງສະແດງໃຫ້ເຫັນເຖິງຄວາມບໍ່ພໍໃຈຢ່າງຍິ່ງຕໍ່ການ ກະທຳ ຂອງສະຫະລັດ ແລະ ລັດຖະບານ ປະເທດອີຣານ ໄດ້ປະກາດວ່າ: “ຈະແກ້ແຄ້ນໃຫ້ເຖິງທີ່ສຸດ”.

“ຈາກນີ້ໄປ ຜູ້ນຳສະຫະລັດ (ປະທານາທິບໍດີ ໂດນາລ ທຣັມ (Donald Trump)) ແລະ ຜູ້ສະໜັບສະໜູນຈະບໍ່ໄດ້ນອນເປັນສຸກ” ທ່ານ ອາລີ ຄາເມນີ (Ali Khamenei) ຜູ້ນຳສູງສຸດຂອງອີຣານກ່າວ ແລະ ຕໍ່ຈາກນັ້ນ ອີຣານ ໄດ້ຊັກທຸງແດງຂຶ້ນທີ່ເມືອງສັກສິດ ໂຄມ (Qom) ເພື່ອປະກາດວ່າ: “ອີຣານ ພ້ອມທີ່ຈະເຮັດສົງຄາມ”.

ພາຍຫຼັງການເສຍຊີວິດຂອງນາຍພົນ ກັສເຊັມ ໂຊລາເມນີ, ປະທານາ ທິບໍດີ ໂດນາລ ທຣັມ ໄດ້ອອກມາກ່າວວ່າ: “ການຂ້ານາຍພົນຂອງອີຣານ ນັ້ນ ເພື່ອຢຸດຕິສົງຄາມແຕ່ບໍ່ແມ່ນເພື່ອເລີ່ມຕົ້ນສົງຄາມ”, ຕໍ່ຈາກນັ້ນ ຜູ້ນຳ ສະຫະລັດຍັງກ່າວຕື່ມວ່າ: “ຖ້າອີຣານທຳລາຍທີ່ຕັ້ງຖານທັບຂອງ ສະຫະລັດອາເມລິກາຢູ່ປະເທດອີຣັກ ເມື່ອໃດສະຫະລັດຈະສົ່ງຍຸດໂທ ປະກອນທີ່ໃໝ່ອ່ຽມ ແລະ ສວຍງາມຂອງຕົນເຊິ່ງມີມູນຄ່າສູງເຖິງ 2 ພັນຕື້ໂດລາ ສະຫະລັດໄປທັນທີ”.

ຮ້າຍແຮງໄປກວ່ານັ້ນຜູ້ນຳສະຫະລັດຍັງຂູ່ວ່າຈະທຳລາຍສະຖານ ທີ່ວັດທະນະທຳທີ່ສຳຄັນທາງປະຫວັດສາດຂອງອີຣານຕື່ມອີກ ເຊິ່ງເປັນສິ່ງທີ່ປະຊາຄົມໂລກກ່າວໂຈມຕີ ແລະ ປະນາມຢ່າງໜັກໜ່ວງ ຕໍ່ຄຳ ນາບຂູ່ດັ່ງກ່າວເພາະເປັນ “ອະຊາກຳສົງຄາມ” ແລະ “ມີແຕ່ກຸ່ມພວກກໍ່ ການຮ້າຍທີ່ຈະເຮັດແບບນັ້ນ”.

- Wave100S AD to Website 2020 0 - ຄວາມຂັດແຍ້ງຕາເວັນອອກກາງອາດນຳທາງໂລກຢູ່ໃກ້ຂອບເຫວ

ປະຊາຄົມໂລກ ຍາມໃດກໍຢືນຄຽງຂ້າງສັນຕິພາບ, ຜູ້ນຳ ສປ ຈີນ, ຣັດເຊຍ ຮວມເຖິງ ຝຣັ່ງ ຕ່າງກໍເຫັນພ້ອມກັນວ່າ “ການໃຊ້ກຳລັງທາງ ທະຫານຂອງສະຫະລັດອາເມລິກາເປັນການຜິດກົດສາກົນຢ່າງຮຸນແຮງ”

ພາຍໃນ ລັດຖະບານ ສະຫະລັດອາເມລິກາເອງ ກໍມີພາກສ່ວນທີ່ບໍ່ເຫັນ ດີຕໍ່ການກະທຳດັ່ງກ່າວ, ທ່ານ ຊັກ ຊູເມີ (Chuck Schumer) ສະມາຊິກສະພາຂອງສະຫະລັດກ່າວວ່າ: “ປະທານາທິບໍດີ ໂດນາລ ທຣັມ ໃຫ້ຄຳໝັ້ນສັນຍາວ່າ ຈະເອົາສະຫະລັດອາເມລິກາ ອອກຈາກສົງຄາມທີ່ບໍ່ ມີມື້ສິນສຸດຢູ່ຕາເວັນອອກກາງແຕ່ການກະທຳຂອງປາທານາທິບໍດີນັ້ນ ເບິ່ງຄືວ່າ ຍິ່ງເພີ່ມຄວາມສ່ຽງແກ່ລາກພວກເຮົາເຂົ້າໄປຫາສົງຄາມດັ່ງ ກ່າວ”

ໃນຂະນະທີ ທ່ານ ຈາວາດ ຊາຣິບ (Javad Zarif) ລັດຖະມົນຕີ ກະຊວງການຕ່າງປະເທດຂອງ ອີຣານ ກ່າວປະນາມຜູ້ນຳ ສະຫະລັດຜ່ານສຳນັກຂ່າວ ຊີເອັນເອັນ (CNN) ຂອງສະຫະລັດ ອາເມລິກາວ່າ “ປະທານາທິບໍດີ ໂດນາລ ທຣັມ ບໍ່ນັບຖືຕໍ່ກົດໝາຍສາກົນ, ການກະທຳຂອງທ່ານນັ້ນ ເຮັດໃຫ້ຄົນ ອາເມລິກາ ຮູ້ສຶກບໍ່ປອດໄພ, ເຮັດໃຫ້ ອາເມລິກາເບິ່ງຂີ້ຮ້າຍຕື່ມອີກ”, ທ່ານກ່າວຕື່ມວ່າ “ຜູ້ນຳສະຫະລັດ ຄວນສຳນຶກຜິດ ແລະ ຂໍໂທດຕໍ່ການກະທຳຄັ້ງນີ້ ແລະ ບໍ່ຄວນກະທຳທີ່ຜິດ ພາດຊໍ້າຊ້ອນອີກ”.

ທ່ານ ເຈັງ ຊວງ (Geng Shuang) ໂຄສົກການຕ່າງປະເທດຂອງ ສປ ຈີນ ກ່າວວັນທີ 7 ມັງກອນ 2020 ວ່າ: “ສປ ຈີນ ມີຄວາມກັງວົນ ຢ່າງຍິ່ງຕໍ່ສະຖານະການຢູ່ຕາເວັນອອກກາງ, ການສ້າງສັນຕິພາບ ແລະ ສະເຖຍລະພາບຂອງຂົງເຂດດັ່ງກ່າວມີຄວາມຈຳເປັນຕໍ່ໂລກ, ພວກເຮົາຂໍ ຮ້ອງໃຫ້ສະຫະລັດອາເມລິກາບໍ່ຄວນເຮັດຜິດກົດທາງການທະຫານ, ຂໍໃຫ້ທຸກຝ່າຍມີຄວາມອົດກັ້ນ ແລະຫັນໜ້າສູ່ການເຈລະຈາ ດ້ວຍສັນຕິວິທີ”.

ເຊັ່ນດຽວກັບ ທ່ານແອນໂຕນິໂນ ກູເຕີເຣສ໌ (Antonino Guterres) ເລຂາທິການໃຫຍ່ອົງການສະຫະປະຊາຊາດ (UN) ກ່າວວ່າ “ຈົ່ງຢຸດການເພີ່ມທະວີຄວາມຮຸນແຮງ, ອົດກັ້ນໃຫ້ເຖິງທີ່ສຸດ, ເລີ່ມການ ເຈລະຈາ, ສືບຕໍ່ການຮ່ວມມືສາກົນ, ຈົ່ງຢ່າລືມວ່າຄວາມໂຫດຮ້າຍທີ່ສຸດ ທີ່ມະນຸດພົບພໍ້ຜ່ານມາແມ່ນສົງຄາມ, ປະຊາຊົນຄົນທຳມະດາຈະກະທົບໜັກ ທີ່ສຸດ, ສະນັ້ນ ມັນເປັນໜ້າທີ່ຂອງພວກເຮົາທີ່ຈະຕ້ອງຫຼີກລ່ຽງສົງຄາມ”.

- WhatsApp Image 2020 05 27 at 5 - ຄວາມຂັດແຍ້ງຕາເວັນອອກກາງອາດນຳທາງໂລກຢູ່ໃກ້ຂອບເຫວ
- WhatsApp Image 2020 05 27 at 5 - ຄວາມຂັດແຍ້ງຕາເວັນອອກກາງອາດນຳທາງໂລກຢູ່ໃກ້ຂອບເຫວ
error: Alert: ເນື້ອຫາຂ່າວມີລິຂະສິດ !!