ສ.​ເກົາຫລີ ກັບ​ນະ​ໂຍບາຍ​ດີໆ​ສຳລັບ​ແຮງ​ງານ​ຕ່າງ ປະ​ເທດ

- 14 2 - ສ.​ເກົາຫລີ ກັບ​ນະ​ໂຍບາຍ​ດີໆ​ສຳລັບ​ແຮງ​ງານ​ຕ່າງ ປະ​ເທດ
- Untitled design - ສ.​ເກົາຫລີ ກັບ​ນະ​ໂຍບາຍ​ດີໆ​ສຳລັບ​ແຮງ​ງານ​ຕ່າງ ປະ​ເທດ

     ສ.​ເກົາຫລີ ​ແມ່ນ​ໜຶ່ງ​ໃນ​ບັນດາ​ເປົ້າໝາຍ​ສຳຄັນ​ສຳລັບຕະຫລາດ​ແຮງ​ງານ​ລາວ​ໃນ​ອະນາຄົດ ​ເພາະ​ປະ​ເທດ​ນີ້​ມີ​ຄວາມ​ຕ້ອງການ​ແຮງ​ງານ​ທີ່​ວ່າ​ຢ່າງ​ຫລວງຫລາຍ ​ເພື່ອ​ສະໜອງ​ໃຫ້​ແກ່​ໂຮ​ງຈັກ​ໂຮງງານ ລວມທັງ​ແຮງ​ງານ​ທີ່​ເຮັດ​ວຽກ​ຮັບ​ໃຊ້​ໃນ​ຄົວ​ເຮືອນ. ສ.​ເກົາຫລີ ມີ​ສະພາບ​ບໍ່​ແຕກ​ຕ່າງ​ຈາກ​ຫລາຍ​ປະ​ເທດ​ອຸດສາຫະກຳ​ກ້າວໜ້າ ນັ້ນຄື​ເລື່ອງ​ຂາດ​ແຄນ​ແຮງ​ງານ ຍ້ອນ​ສັງຄົມ “ຜູ້​ເຖົ້າ” ລົ້ນ​​ເມືອງ, ​ແຕ່​ອັດຕາ​ການ​ເກີດ​ພັດ​ຫລຸດ​ໜ້ອຍ​ຖອຍ​ລົງ. ​ເພື່ອ​ແກ້​ໄຂ​ບັນຫາ​ຂາດ​​ແຄນ​ແຮງ​ງານ​ນີ້, ສ.​ເກົາຫລີ ​ໄດ້​ມີ​ນະ​ໂຍບາຍ​ດີໆ​ຫລາຍ​ຢ່າງ​ເປັນ​ແຕ່ລະ​ໄລຍະ ​ເພື່ອ​ດຶງ​ດູດ​ເອົາ​ແຮງ​ງານ​ຕ່າງປະ​ເທດ. ຫລ້າ​ສຸດ ກໍ​ມີ​ຂ່າວ​ໜຶ່ງ​ທີ່​ໃຫ້​ຮູ້​ວ່າ: ປະ​ເທດ​ນີ້​ໄດ້​ຮັບຮອງ​ເອົາ​ກົດໝາຍ​ແຮງ​ງານ​ສະບັບ​ປັບປຸງ​ທີ່​ໄດ້​ກຳນົດ​ນະ​ໂຍບາຍ​ຫລາຍ​ຢ່າງ​ສຳລັບ​ແຮງ​ງານ​ຕ່າງປະ​ເທດ​ທີ່​ລັກລອບ​ເຂົ້າ​ໄປ​ເຮັດ​ວຽກ​ຢູ່​ປະ​ເທດ​ແບບ​ຜິດ​ກົດໝາຍ. ນອກຈາກ​ນັ້ນ ຍັງ​ມີ​ນະ​ໂຍບ​າຍຍົກ​ໂທດ​ໃຫ້​ບັນດາ​ອຸດສາຫະກຳ​ທັງ​ຂະໜາດ​ໃຫຍ່ ​ແລະ ນ້ອຍ​ທີ່​ຈ້າງ​ແຮງ​ງານ​ຜິດ​ກົດໝາຍ​ຈາກ​ຕ່າງປະ​ເທດ, ​ແຕ່​ເຕັມ​ໃຈ ​ແລະ ສະໝັກ​ໃຈ​ແຈ້ງ​ໃຫ້​ທາງ​ການ​ຊາບ​ໂດຍ​ດີ ກ່ຽວ​ກັບ​ບັນຫາ​ດັ່ງກ່າວ.

       ບາງ​ລາຍ​ລະອຽດ​ຂອງ​ກົດໝາຍ​ແຮງ​ງານ​ສະບັບ​ປັບປຸງຂອງ ສ.​ເກົາຫລີ ມີ​ດັ່ງ​ນີ້: ກົດໝາຍ​ໄດ້​ກຳນົດ​ໃຫ້​ແຮງ​ງານ​ຕ່າງປະ​ເທດ​ທັງ​ໝົດ​ທີ່​ເຄື່ອນ​ໄຫວ​ອອກ​ແຮງ​ງານ​ຢູ່ ສ.​ເກົາຫລີ ​ແບບ​ຜິດ​ກົດໝາຍ ຫລື ຢູ່​ກາຍ​ກຳນົດ​ອາຍຸ​ຂອງ​ວີ​ຊາ ຮີບ​ຮ້ອນ​ລາຍ​ງານ​ຕົນ​ຕໍ່​ທາງ​ການ ​ເພື່ອ​ກັບ​ຄືນ​ປະ​ເທດ ​ໂດຍ​ທີ່​ທາງ​ການ ສ.​ເກົາຫລີ ຈະ​ບໍ່​ປັບ​ໄໝ​ ຕ່າງ​ກັບ​ກົດໝາຍ​ແຮງ​ງານ​ສະບັບ​ເກົ່າ​ທີ່​ທັງ​ປັບ​ໄໝ ​ແລະ ທັງ​ກັກ​ຂັງ​ແຮງ​ງານ​ທີ່​ອອກ​ແຮງ​ງານ​ຢ່າງ​ຜິດ​ກົດໝາຍ ​ແລະ ຢູ່​ກາຍ​ກຳນົດ​ວີ​ຊາ. ​ແຮງ​ງານ​ຜິດ​ກົດໝາຍ​ທີ່​ເຂົ້າລາຍ​ງານ​ຕົວ ​ແລະ ກັບ​ຄືນ​ປະ​ເທດ​ຕາມ​ກຳນົດ​ນັ້ນຈະ​ມີ​ສິດ​ກັບ​ຄືນ​ເຂົ້າ​ໄປ​ອອກ​ແຮງ​ງານ​ຢູ່ ສ.​ເກົາຫລີ ​ໄດ້​ຕາມ​ເດີມ, ສ່ວນ​ກົດໝາຍ​ສະບັບ​ເກົ່າ​ນັ້ນ ນອກຈາກ​ປັບ​ໄໝ​ເປັນ​ເງິນ​ຈຳນວນ 20 ລ້ານ​ວອນ/ຄົນ (ປະມານ 140 ລ້ານ​ກີບ) ສຳລັບ​ຜູ້​ຢູ່​ເກີນ​ກຳນົດ​ວີ​ຊາ​ແຕ່ 3 ປີ​ຂຶ້ນ​ໄປ ຍັງ​ຕັດສິດ​ກັບ​ຄືນ​ໄປ​ເຮັດ​ວຽກ​ຢູ່​ ສ.​ເກົາຫລີ ອີກ.

ນອກຈາກ​ມີ​ການ​ຜ່ອນຜັນ​ດ້ານ​ລະບຽບການ​ຕໍ່​ແຮງ​ງານ​ຜິດ​ກົດໝາຍ​ຈາກ​ຕ່າງປະ​ເທດ​ແລ້ວ, ກົດໝາຍ​ແຮງ​ງານ​ສະບັບ​ປັບປຸງ​ຍັງ​ໄດ້​ກຳນົດ​ນະ​ໂຍບາຍ​ທີ່​ນິ້ມນວນ​ຊວນ​ໃຫ້​ມີ​ກຳລັງ​ໃຈ​ສຳລັບ​ບັນດາ​ອຸດສາຫະກຳ​ ທັງ​ຂະໜາດ​ໃຫຍ່ ​ແລະ ນ້ອຍ ຄື​ຖ້າ​ອຸດສາຫະກຳ​ໃດ​ໄດ້​ຈ້າງ​ແຮງ​ງານ​ຜິດ​ກົດໝາຍ​ຈາກ​ຕ່າງປະ​ເທດ ​ແຕ່​ສະໝັກ​ໃຈ​ແຈ້ງ​ໃຫ້​ທາງ​ການ​ຊາບ​ກ່ຽວ​ກັບ​ການ​ກະທຳ​ຜິດ​ຂອງ​ຕົນ​ແລ້ວ ​ແມ່ນ​ຈະ​ບໍ່​ຖືກ​ປັບ​ໄໝ​ຄື​ເມື່ອ​ກ່ອນ. ຄັກ​ໄປ​ກວ່າ​ນັ້ນ ກໍ​ຄື​ວ່າ​ບັນດາ​ອຸດສາຫະກຳ​ທີ່​ມີ​ຄວາມ​ຈິງ​ໃຈ​ເຫລົ່າ​ນີ້​ຍັງ​ຈະ​ສາມາດ​ຈ້າງ​ແຮງ​ງານ​ຕ່າງປະ​ເທດ​ທີ່​ຖືກຕ້ອງ​ຕາມ​ກົດໝາຍ​ໄດ້​ເປັນ​ໄລຍະ​ສະ​ເພາະ ​ເພື່ອ​ດຳ​ເນີນ​ທຸລະ​ກິດ​ຂອງ​ພວກ​ຕົນ​ຕາມ​ປົກກະຕິ. ຖ້າ​ເປັນ​ກົດໝາຍ​ສະບັບ​ເກົ່າ, ອຸດສາຫະກຳ​ທີ່​ມີ​ຄວາມ​ຜິດ​ແບບ​ນີ້​ຕ້ອງ​ຜະ​ເຊີນ​ກັບ​ໄຟ​ແດງ​ແນ່ນອນ. (ບົດ​ນີ້​ອີງ​ໃສ່​ຂໍ້​ມູນ​ໜັງສືພິມ ຜູ້​ແທນ​ປະຊາຊົນ ສະບັບ 639 ອາທິດ​ຂ້ອນ​ທ້າຍ​ເດືອນ​ທັນວາ 2019).

- Wave100S AD to Website 2020 0 - ສ.​ເກົາຫລີ ກັບ​ນະ​ໂຍບາຍ​ດີໆ​ສຳລັບ​ແຮງ​ງານ​ຕ່າງ ປະ​ເທດ
- WhatsApp Image 2020 05 27 at 5 - ສ.​ເກົາຫລີ ກັບ​ນະ​ໂຍບາຍ​ດີໆ​ສຳລັບ​ແຮງ​ງານ​ຕ່າງ ປະ​ເທດ
- WhatsApp Image 2020 05 27 at 5 - ສ.​ເກົາຫລີ ກັບ​ນະ​ໂຍບາຍ​ດີໆ​ສຳລັບ​ແຮງ​ງານ​ຕ່າງ ປະ​ເທດ
error: Alert: ເນື້ອຫາຂ່າວມີລິຂະສິດ !!