ປູກຄົນ-ປູກໄມ້

- advert banner 728 90 728x90 - ປູກຄົນ-ປູກໄມ້

ສະບາຍດີ ​ເພື່ອນ​ຜູ້​ອ່ານ​ທີ່​ຮັກ​ແພງ 2-3 ມື້ມາ​ນີ້ ຫລາຍ​ຄົນ​ກໍ​ຈະ​ໄດ້​ສຸມ​ໃສ່​ເຮັດ​ໜ້າ​ທີ່​ຂອງ​ຜູ້​ເປັນ​ພໍ່​ເປັນ​ແມ່ ຈັດຕັ້ງການສະ​ເຫລີ​ມສະຫລອງ​ວັນ​ບຸນ​ຂອງ​ຜູ້​ເປັນ​ລູກ​ເປັນ​ຫລານ​ດ້ວຍ​ຫລາຍ​ຮູບ​ແບບ, ບາງ​ບ່ອນ​ກໍ​ຈັດ​ໃຫ້​ມີ​ການສະ​ແດງ​ສິລະ​ປະ​ວັນນະຄະດີ​ຂອງ​ບັນດາ​ນ້ອງໆ ​ແລະ ບາງ​ບ່ອນ​ທີ່​ມີ​ເງື່ອນ​ໄຂ​ແດ່​ກໍ​ອາດ​ຈະ​ຈັດຕັ້ງ​ໃຫ້​ເດັກ​ໄດ້​ອອກ​ໄປ​ທ່ຽວ​ຫລິ້ນ​ເບິ່ງ​ສວນສັດ, ​ແຫ​ລ່ງທ່ອງ​ທ່ຽວ​ທາງ​ວັດທະນະທຳ ​ແລະ ປະຫວັດສາດ​ອັນ​ເປັນ​ມູນ​ເຊື້ອຂອງ​ຊາດ ​ເພື່ອ​ເດັກ​ຈະ​ໄດ້​ຮຽນ​ຮູ້​ເຖິງ​ຄຸນຄ່າ​ຕ່າງໆ​ຂອງ​ມັນ ​ແລະ ອື່ນໆ ​ເພື່ອ​ແນ​ໃສ່​ປູກ​ຈິດ​ສຳນຶກ​ທີ່​ດີ​ໃຫ້​ເດັກ​ໄດ້​ພັດທະນາ​ຕົນ​ເອງ​ກາຍ​ເປັນ​ຄົນຮູ້​ຜູ້ດີ​ໃນ​ອະນາຄົດ ​ແລະ ຄຽງ​ຄູ່​ກັນນັ້ນ ກໍ​ແມ່ນ​ການ​ກະກຽມ ​ແລະ ສຸມ​ໃສ່​ຂະ​ບວນປູກ​ໄມ້​ແຫ່ງ​ຊາດ ທີ່​ພັກ ​ແລະ ລັດຖະບານ​ເຮົາ​ໄດ້​ກຳນົດ​ເອົາ​ວັນ​ທີ 1 ມິຖຸນາ​ຂອງ​ທຸກໆ​ປີ ​ເປັນ​ວັນ​ປູກ​ໄມ້​ແຫ່ງ​ຊາດ ​ເພື່ອ​ແນ​ໃສ່​ເພີ່ມ​ການ​ປົກ​ຫຸ້ມ​ຂອງ​ປ່າ​ໄມ້​ໃນ​ປະ​ເທດ​ເຮົາ​ຮອດ​ປີ 2020 ​ໃຫ້​ກວມ​ເອົາ 70% ​ເຊິ່ງຄາດໝາຍ​ນີ້​ກໍ​ບໍ່​ແມ່ນ​ເລື່ອງ​ງ່າຍ​ປານ​ໃດ ຖ້າ​ພວກ​ເຮົາ​ບໍ່​ເຮັດ​ຢ່າງ​ຈິງ​ຈັງ ​ແລະ ​ເຮັດ​ຢ່າງ​ມີ​ປະສິດທິ​ຜົນ​ແທ້​ຈຶ່ງ​ຈະ​ສາມາດ​ໄປ​ເຖິງ​ຈຸດໝາຍ​ດັ່ງກ່າວ​ໄດ້. ກໍ​ດັ່ງ​ຂະ​ແໜງ​ການ​ກ່ຽວຂ້ອງ ​ເພິ່ນ​ໄດ້​ຕີ​ລາຄາ​ວ່າ: ​ເກືອບ 40 ປີຜ່ານມາ, ຂະ​ບວນປູກ​​ໄມ້​ຢູ່​ປະ​ເທດ​ເຮົາ​ແມ່ນ​ເຮັດ​ໄປ​ໄດ້​ດີ ​ແຕ່​ຂອດ​ບົວລະບັດ​ຮັກສາ​ຍັງ​ເຮັດ​ໄດ້​ໜ້ອຍ ອັນ​ເຮັດ​ໃຫ້​ອັດຕາ​ການ​ລອດ​ເຫລືອ​ຂອງ​ຕົ້ນ​ໄມ້​ປູກ​ໃໝ່​ມີ​ປະລິມານ​ໜ້ອຍ ຈຶ່ງ​ເກີດ​ໃຫ້​ມີ​ກໍລະນີ​ປີ​ໃດ​ກໍ​ປູກ​ໃສ່​ແຕ່​ຂຸມ​ເກົ່າ ​ແລະ ​ເພື່ອ​ແກ້​ໄຂ​ສິ່ງ​ຫຍໍ້​ທໍ້​ນີ້ ພວກ​ເຮົາ​ຈະ​ຕ້ອງ​ໄດ້​ເອົາ​ໃຈ​ໃສ່​ສຶກສາຄົ້ນຄວ້າ​ໃຫ້​ລະອຽດ ​ໂດຍ​ສະ​ເພາະ​ຂະ​ແໜງ​ປ່າ​ໄມ້​ຕ້ອງ​ມີ​ການ​ທົດ​ລອງ ​ແລະ ​ແນະນຳ​ໃຫ້​ແຕ່ລະ​ທ້ອງ​ຖິ່ນ​ຮັບ​ຊາບ​ວ່າ: ​ໄມ້​ແຕ່​ລະ​ຊະນິດ​ຄວນ​ປູກ​ຢູ່​ໃນ​ສະພາບ​ແວດ​ລ້ອມ​ແນວ​ໃດ ? ປູກ​ໃສ່​ເຂດ​ໜາວ ຫລື ​ເຂດ​ຮ້ອນ, ​ເຂດ​​ເນີນ​ສູງ ຫລື ​ເຂດ​ທົ່ງພຽງ ​ແລະ ທ້ອງ​ຖິ່ນ​ໃດ​ເໝາະ​ສົມ​ກັບ​ໄມ້​ປະ​ເພດ​ໃດ​ກໍ​ຄວນ​ວາງ​ແຜນ​ເລັ່ງ​ໃສ່​ປູກ​ໄມ້​ຊະນິດ​ດັ່ງກ່າວ​ໃຫ້​ຫລາຍ ​ແລະ ບໍ່​ພຽງ​ແຕ່​ເທົ່າ​ນັ້ນ ​ເມື່ອ​ປູກ​ໄປ​ແລ້ວ​ຕ້ອງ​ແບ່ງ​ຄວາມ​ຮັບຜິດຊອບ​ໃຫ້​ແຕ່​ລະ​ພາກສ່ວນ ຈະ​ແມ່ນ​ບຸກຄົນ ຫລື ນິຕິບຸກຄົນ ຫລື ສຳນັກງານ​ອົງການ​ຕ່າງໆ​ກໍ​ໄດ້ ​ເພື່ອ​ມອບ​ຄວາມ​ຮັບຜິດຊອບ​ໃຫ້​ເຂົາ​ເຈົ້າ​ເປັນ​ຜູ້​ເບິ່ງ​ແຍງ​ບົວລະບັດ​ຮັກສາບໍ່​ໃຫ້​ສັດ ຫລື ສັດ​ຕູ​ພືດ​ອື່ນໆ​ທຳລາຍ ​ເພື່ອ​ເຮັດ​ແນວ​ໃດ​ໃຫ້​ໄມ້​ປູກ​ໃໝ່​ມີ​ອັດຕາ​ຈະ​ເລີ​ນ​ເຕີບ​​ໂຕ​ດີ​ຂຶ້ນ, ພ້ອມ​ນັ້ນກໍ​ຄວນ​ເອົາ​ໃຈ​ໃສ່​ໃນ​ນະ​ໂຍບາຍ​ຍ້ອງຍໍ​ສັນລະ​ເສີນ​ຕໍ່​ບ່ອນ​ໃດ​ເຮົາ​ໄດ້​ດີ ​ແລະ ກົງກັນຂ້າມ ບ່ອນ​ໃດ​ເຮັດ​ບໍ່​ດີ​ກໍ​ຕ້ອງ​ຕຳ​ນິສົ່ງ​ຂ່າວ. ຖ້າ​ຮ້າຍ​ແຮງ​ກໍ​ຕ້ອງ​ປະຕິບັດ​ຕາມ​ລະບຽບ​ກົດໝາຍ ຖ້າ​ເຮັດ​ໄດ້​ແນວ​ນີ້​ກໍ​ຈະ​ເຮັດ​ໃຫ້​ຂະ​ບວນການ​ປູກ​ໄມ້​ຂອງ​ປະ​ເທດ​ເຮົາ​ມີ​ປະສິດທິ​ຜົນ ​ແລະ ບໍ່​ສິ້ນ​ເປືອງ​ວັດຖຸ​ເງິນ​ຄຳ​ຂອງ​ລັດ ດັ່ງ​ປາກົດ​ມີ​ໃນ​ຜ່ານ​ມາ. ປີ​ໃດ​ກໍ​ຂຶ້ນງົບ​ປູກ​ໄມ້​ເປັນ​ຈຳນວນ​ມະຫາສານ ​ແຕ່​ຜົນ​ຂອງ​ມັນ​ກໍ​ຍັງ​ບໍ່​ໄປ​ບໍ່​ມາ.

- lattana 1 - ປູກຄົນ-ປູກໄມ້
- 1 1 - ປູກຄົນ-ປູກໄມ້
error: Content is protected !!