ພະນັກງານ​ຍຸກ​ໃໝ່​ຕ້ອງ​ເຮັດ​ໄດ້​ຫລາຍ​ວຽກ

ທິດ​ກໍ່າ:

      ​ແນວທາງ​ແຜນ​ນະ​ໂຍບາຍ​ຂອງ​ພັກ ​ແລະ ລັດຖະບານ​ເຮົາ ກໍ​ຄື​ໃນ​ມະຕິ​ຕ່າງໆ ​ໂດຍ​ສະ​ເພາະ​ແມ່ນ​ມະຕິ​ຄັ້ງທີ IX ​ແລະ X ຂອງ​ພັກ​​ໄດ້​ກຳນົດ​ແຈ້ງວ່າ: ການ​ສ້າງສາ​ພັດທະນາ​ປະ​ເທດ​ຊາດ​ຕ້ອງ​ຫັນ​ສູ່​ເປັນ​ທັນ​ສະ​ໄໝ. ກໍໝາຍ​ຄວາມ​ວ່າ: ຍຸກ​ນີ້​ເປັນ​ຍຸກ​ອຸດສາຫະກຳ 4.0 ​ໄປ​ແລ້ວ ທຸກ​ສິ່ງ​ຢ່າງ​ບໍ່​ວ່າ​ແຕ່​ຄົນ ນັບ​ທັງ​ຂອດ​ການ​ຜະລິດ ຫລື ການ​ອອກ​ແຮງ​ງານ​ຂອງ​ຄົນ​ເຮົາ​ກໍ​ລ້ວນ​ແລ້ວ​ແຕ່​ນຳ​ໃຊ້​ເຕັກ​ໂນ​ໂລ​ຊີ​ອັນ​ທັນ​ສະ​ໄໝ​ເຂົ້າ​ໃນ​ການ​ບໍລິຫານ​ທີ່​ມີ​ປະສິດທິ ພາບ ​ແລະ ຄຸນ​ນະພາ​ບ. ອີກ​ປະການ​ໜຶ່ງ ການ​ຫັນ​ເອົາ​ພະນັກງານ​ເຮັດ​ໄດ້​ຫລາຍ​ວຽກ​ນັ້ນ​ເປັນ​ການ​ປະຕິບັດ​ນະ​ໂຍບາຍ​ແຫ່ງ​ຊາດ ທັງ​ຫລຸດຜ່ອນ​ການ​ໃຊ້​ຈ່າຍ​ບໍລິຫານ, ປະຢັດ​ເວລາ, ປະຢັດ​ຄົນ ​ແລະ ປະຢັດ​ວັດຖຸ ​ເຊິ່ງ​ໂດຍ​ລວມ​ເອີ້ນ​ວ່າ: ປະຢັດ​ຄວາມ​ຊິ້ນ​ເປືອງ​ຕ່າງໆ​ນັ້ນ​ເອງ.

      ກ່ອນ​ໜ້າ​ນີ້​ຊາວ-ສາມ​ສິບ​ປີ ການ​ບໍລິຫານ​ວຽກ ​ໂດຍ​ສະ​ເພາະ​ໃນ​ກົງຈັກ​ບໍລິຫານ​ລັດ ພວກ​ເຮົາ​ມີ​ການ​ເກື້ອກູນກັນ​ຫລາຍ. ຕົວຢ່າງ​ພຽງ​ວຽກ​ເລຂານຸການ​ກໍ​ມີ​ຫລາຍ​ຄົນ​ບິ​​ແບ່ງ​ກັນ​ເຮັດ, ຜູ້​ໜຶ່ງ​ເປັນ​ຜູ້​ລໍຖ້າ​ເອົາ​ເອກະສານ​ໄປ​ເຊັນ​ນຳ​ຫົວໜ້າ, ຜູ້​ໜຶ່ງ​ລໍຖ້າ​ຈ້ຳກາ​ປະ​ທັບ, ຜູ້​ໜຶ່ງ​ລໍຖ້າ​ຈົດ​ທະບຽນ​ເອກະສານ​ຂາ​ເຂົ້າ-ຂາ​ອອກ, ຜູ້​ໜຶ່ງ​ເປັນ​ຜູ້​ສຳ​ເນົາ​ເອກະສານ ​ແລະ ອີກ​ຜູ້​ໜຶ່ງ​ເປັນ​ຜູ້​ເຮັດ​ໜ້າ​ທີ່​ປະຊາສຳພັນ ​ໃຜ​ມີ​ຈຸດປະສົງ​ຕ້ອງການ​ເຂົ້າພົບ​ຫົວໜ້າ​ຕ້ອງ​ໄດ້​ຜ່ານ​ຜູ້ນັ້ນກ່ອນ ຫລື ​ເຜີໆ​ມາ ​ເວລາ​ວຽກ​ດ່ວນ​ມາ​ຮອດ​ພັດ​ຍັງ​ຄາ​ເອົາ​ລູກ​ກິນ​ນົມ​ ອວ່າຍ​ພຸ້ນ​ອວ່າຍ​ພີ້​ລູກ​ພັດ​ໄຫ້​ແອ່ວ. ການ​ບໍລິຫານ​ວຽກ​ເກື້ອກູນ​ແບບ​ນີ້ ທິດ​ກໍ່າ ​ເຄີຍ​ເຫັນ ​ແລະ ​ເຄີຍ​ໄດ້​ຜ່ານ​ມາ​ແລ້ວ ​ແລະ ຍັງ​ບໍ່​ທັນ​ກ່າວ​ເຖິງ​ເວລາ​ຜູ້​ໜຶ່ງ​ຂາດ​ສຸກ​ເສີນ​ແມ່ນ​ຫຍຸ້ງ​ປານ​ເຈັກ​ຂາຍ​ລວດ.

      ນັບ​ແຕ່​ປະ​ເທດ​ຊາດ​​ເຮົາ​ໄດ້​ເປີດ​ກວ້າງ​ຕໍ່​ພາຍ​ນອກ ນັບ​ແຕ່​ປີ 1987 ​ເປັນຕົ້ນມາ ກໍ​ເຫັນ​ວ່າ​ມີ​ຫລາ​ຍອັນ​ຫລາຍ​ຢ່າງ​ເລີ່​ມມີ​ການ​ປ່ຽນ​ແປງ ບໍ່​ວ່າ​ທາງ​ດ້ານ​ເສດຖະກິດ ​ແລະ ສັງຄົມ ອາດ​ເວົ້າ​ໄດ້​ວ່າ​ຈາກ​ຫລັງ​ມື​ເປັນ​ໜ້າ​ມື​ທີ່​ຂາວ​ສະອາດ ​ແລະ ​ໃສ​ແຈ້ງ ​ແລະ ​ເດີນ​ໜ້າ​ໄປ​ຕິກໆ ຈົນ​ມາ​ຮອດ​ມະຕິ​ຄັ້ງທີ IX ພັກ ​ແລະ ລັດຖະບານ​ເຮົາ​ໄດ້​ເລັ່ງບຸກທະລຸ​ໃນ​ການ​ສ້າງສາ​ພັດທະນາ​ປະ​ເທດຊາດ​ໃຫ້​ໄປ​ທັນ​ໝູ່​ ສົມທົບ​ກັບ​ການ​ເຊື່ອມ​ໂຍງ​ກັບ​ພາກພື້ນ ​ແລະ ສາກົນ ດ້ວຍ​ການ​ເຂົ້າຮ່ວມ​ເປັນ​ພາຄີ​ໃນ​ຫລາຍ​ອົງ​ກອນ​ທີ່​ກ້າວໜ້າ ​ແລະ ສອດຄ່ອງ​ກັບ​ຍຸກ​ສະ​ໄໝ. ດັ່ງ​ພວກ​ເຮົາ​ຮັບ​ຮູ້​ນຳ​ກັນ​ແລ້ວ​ວ່າ: ການ​ເລັ່ງບຸກທະລຸ​ຂອງ​ພັກ ​ແລະ ລັດຖະບານ​ເຮົາ​ມີ 4 ​ເປົ້າໝາຍຕົ້ນຕໍ​ຄື: ໜຶ່ງ​ແມ່ນ​ແກ້​ໄຂ​ດ້ານ​ບໍລິຫານ​ເກື້ອກູນ; ສອງ​ແມ່ນ​ຈິນຕະນາການ​ແບບ​ເກົ່າ​ແກ່, ​ແນວ​ຄິດ​ຄັບ​ແຄບ​ເຫັນ​ແຕ່​ອັນ​ເກົ່າ​ບໍ່​ເຫັນ​ອັນ​ໃໝ່, ບໍ່​ເບິ່ງ​ກວ້າງ​ມອງ​ໄກ; ສາມ​ແມ່ນ​ດ້ານ​ການ​ສ້າງ​ຊັບພະຍາ ກອນ​ມະນຸດ​ໃຫ້​ເປັນຄົນ​ດີ​ມີ​ຄຸນ​ນະພາ​ບ, ມີ​ຄວາມ​ຊື່ສັດ​ຕໍ່​ປະ​ເທດ​ຊາດ​ບ້ານ​ເມືອງ; ສີ່​ແມ່ນ​ບຸກທະລຸ​ດ້ານ​ການ​ລຶບລ້າງ​ອອກ​ຈາກ​ຄວາມທຸກ​ຍາກ ​ແລະ ດ້ອຍ​ພັດທະນາ​ ຈົນ​ເຖິງ​ຂັ້ນກຳນົດ​ແຈ້ງວ່າ: ປີ 2020 ຕ້ອງ​ລຶບລ້າງ​ໃຫ້​ໄດ້​ຕໍ່​ຄວາມທຸກ​ຍາກ ​ແລະ ດ້ອຍ​ພັດທະນາ​ຂອງ​ປະ​ເທດ, ​ແຕ່​ສຸດ​ທ້າຍ​ມາ​ຮອດ​ປັດຈຸບັນ​ນີ້​ກໍ​ຍັງ​ບໍ່​ທັນ​ສາມາດ​ເຮັດ​ຕາມ​ຄວາມ​ຄາດ​ຫວັງ​ໄດ້ ອັນ​ມີ​ປັດ​ໄຈ ​ແລະ ຫລາຍ​ສາ​ເຫດ ຍ້ອນ​ຄວາມ​ຊິນ​ເຄີຍ​ປະ​ອັນ​ເກົ່າ​ບໍ່​ໄດ້​ ຄື​ແບບ​ແຜນ​ວິທີ​ເຮັດ​ວຽກ​ຍັງ​ຕິດຫ້ອຍ​ອັນ​ເກົ່າ, ຊ້ຳບໍ່​ໜຳ ​ເກີດ​ປາກົດການ​ຫຍໍ້​ທໍ້​ຫລາຍ​ຢ່າງ​ມາ​ກົດ​ໜ່ວງ​ຄວາມ​ຈະ​ເລີ​ນຂອງ​ຊາດ​ ຈົນ​ມາ​ຮອດ​ຍຸກ​ນີ້​ກໍ​ຍັງ​ເປັນ​ຊ້ຳ​ເຮື້ອ​ແກ້​ໄຂ​ບໍ່​ທັນ​ຕົກ​ຄື: ການ​ສໍ້​ລາດ​ບັງ​ຫລວງ, ຢາ​ເສບ​ຕິດ, ສັງຄົມ​ຫລິ້ນກິນ​ຟຸມ​ເຟືອຍ, ຂີ້ລັກ​ງັດ​ແງະ, ປຸ້ນ​ຈີ້, ຄ້າ​ມະນຸດ, ຄ້າ​ປະ​ເວ​ນີ​ໃນ​ຫລາຍ​ຮູບ​ແບບ. ບັນດາ​ປາກົດການ​ທີ່​ກ່າວ​ມາ​ນີ້​ແມ່ນ​ລ້ວນ​ແລ້ວ​ແຕ່​ເກີດ​ມາ​ຈາກ​ອັນ​ເກົ່າ​ທີ່​ພວກ​ເຮົາ​ພາກັນ​ປ່ຽນ​ໄດ້​ຍາກ. ປາກົດການ​ເຫລົ່າ​ນີ້​ຍັງ​ບໍ່​ທັນ​ໄດ້​ກ່າວ​ເຖິງ​ຂອດ​ປະຕູ​ດຽວ, ຂອດ​ການ​ເກັບ​ລາຍ​ຮັບ​ບໍ່​ໄດ້​ຕາມ​ເປົ້າ, ຂອດ​ພະນັກງານ​ຂອງ​ລັດ​ສວຍ​ໃຊ້​ໜ້າ​ທີ່​ຕຳ​ແໜ່​ງ​ໃນ​ການ​ໂກງ​ກິນ​ບ້ານ​ກິນ​ເມືອງ ​ແລະ ອື່ນໆ.

      ​ແນວ​ໃດ​ກໍ​ຕາມ, ພໍ​ຕົກ​ມາ​ເຖິງ​ຍຸກ​ນີ້ ພວກ​ເຮົາ​ຕ້ອງ​ໄດ້​ພ້ອມ​ກັນ​ສຳນຶກ ​ແລະ ປ່ຽນ​ແປງ​ໄດ້​ແລ້ວ ​ແລະ ກໍ​ຍັງ​ເຫັນ​ວ່າ 4 ບຸກທະລຸ​ຂອງ​ພັກ​ໃນ​ມະຕິ IX ຍັງ​ເປັນ​ຕຳລາ​ທີ່​ອຳ​ມະຕະ. ຂໍ​ຊົມ​ເຊີຍ​ລັດຖະບານ​ຊຸດ​ປັດຈຸບັນ​ທີ່​ໄດ້​ຕັດສິນ​ໃຈ​ເຮັດ ​ແລະ ​ແກ້​ຂອດ​ຕ່າງໆ​ທີ່​ຍັງ​ກົດ​ໜ່ວງ​ຄວາມ​ຈະ​ເລີ​ນຂອງ​ຊາດ ​ເຊິ່ງໜຶ່ງ​ໃນ​ພາລະກິດ​ນັ້ນກໍ​ຄື​ດັດສົມ​ພະນັກງານ​ຂອງ​ລັດ​ຕ້ອງ​ເຮັດ​ໄດ້​ຫລາຍ​ວຽກ, ຍິ່ງ​ໄປ​ກວ່າ​ນັ້ນ ພະນັກງານ​ລັດ​ຕ້ອງ​ມີ​ຄວາມ​ຮູ້​ຄວາມ​ສາມາດ​ສູງ, ມີ​ຄຸນສົມບັດ, ສັດ​ຊື່ ​ແລະ ​ເປັນ​ແບບຢ່າງ​ທີ່​ດີ. ອົງ​ກອນ​ຂອງ​ພັກ ​ແລະ ສະມາຊິກ​ພັກ​ຕ້ອງ​ເປັນ​ແກນ​ນຳ, ​ເປັນ​ແບບຢ່າງ​ໃນ​ການ​ນຳພາ, ຄຸ້ມ​ຄອງ​ອົງ​ກອນ​ຂອງ​ຕົນ​ໃຫ້​ມີ​ຄວາມ​ສະຫງົບ, ​ເຂັ້ມ​ແຂງ, ປອດ​ໃສ​ຂາວ​ສະອາດ. ຖ້າ​ອົງຄະ​ນະ​ພັກ​ຢູ່​ບ່ອນ​ໃດ, ສະມາຊິກ​ພັກ​ສະຫາຍ​ໃດພາ​ໝູ່​ເພ​ຂ້ຽວ​ປ່ຽນ​ແປງ ​ແລະ ປັບປຸງ​ຊັບ​ຊ້ອນ ​ເພາະ​ໄລຍະ​ນີ້​ພວມ​ຢູ່​ໃນ​ທ່າມກາງ​ກອງ​ປະຊຸມ​ໃຫຍ່​ສາມ​ຂັ້ນຂອງ​ພັກ, ຖ້າ​ບໍ່​ດັ່ງນັ້ນ ຜູ້​ທີ່​ມີ​ບັນຫາ​ພາ​ເພ​ມັນ​ກໍ​ຈະ​ມີ​ໂອກາດ​ກິນ​ບ້ານ​ກິນ​ເມືອງ​ຕໍ່​ໄປ ຢ່າ​ໃຫ້​ເສຍ​ພາບ​ພົດ​ບົດບາດ​ຂອງ​ພັກ​ຍ້ອນ​ຄົນ​ພໍ​ມະ​ຍ່ອມ​ມະ​ແຍ່ມນັ້ນ.

error: Alert: Content is protected !!