ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ

ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ - 96 - ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ
ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ - Untitled design - ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ

ທິດ​ກໍ່າ:

      ​ໃນ​ວັນ​ທີ 28 ​ເດືອນ​ກໍລະກົດ 1959 ​ເປັນມື້ທີ່​ລັດຖະບານ ຜຸຍ ຊະນະ​ນິກອນ ຈັບ​ຜູ້ນຳ​​ແນວ​ລາວ​ຮັກ​ຊາດ​ເຂົ້າຄຸກ ​ເຊິ່ງ​ເອົາ​ໄປ​ຂັງ​ຢູ່​ຄອກ​ມ້າ​ເກົ່າ​ທີ່​ຖືກ​ດັດ​ແປງ​ມາ​ເປັນ​ຄຸກ ຢູ່​ທີ່​ຄ້າຍ​ໂພນ​ເຄັງ ກະຊວງ​ປ້ອງ​ກັນ​ປະ​ເທດ​ໃນ​ປັດຈຸບັນ. ບັນດາ​ຜູ້ນຳ​ທີ່​ຖືກ​ຈັບ​ທັງ​ໝົດ​ມີ​ຢູ່ 16 ທ່ານ​ດ້ວຍ​ກັນ ​ໃນ​ນີ້​ຜູ້​ສຳຄັນ​ກໍ​ມີ ທ່ານ ປະທານ ສຸພາ​ນຸວົງ, ທ່ານ ໜູ​ຮັກ ພູມ​ສະຫວັນ, ທ່ານ ພູມີ ວົງ​ວິຈິດ, ທ່ານ ສີ​ທົນ ກົມມະ​ດຳ, ທ່ານ ສິງກະ​ໂປ ສີ​ໂຄດ​ຈຸນ​ລະ​ມະນີ ​ແລະ ຜູ້ນຳ​ອື່ນໆ. ອັນ​ສາ​ເຫດ​ກໍ​ຍ້ອນ​ວ່າ ​ໃນ​ປີ 1957 ​ໄດ້​ມີ​ການ​ລວມລາວ​ເພື່ອ​ສ້າງ​ຄວາມ​ຖືກຕ້ອງ​ປອງ​ດອງ​ຊາດ, ປະຕິບັດ​ຕາມ​ສັນຍາ​ເຊີ​ແນວ​ປີ 1954 ​ແລະ ສັນຍາ​ວຽງ​ຈັນ​ປີ 1957. ການ​ລວມລາວ​ໃນ​ຄັ້ງນີ້​ແມ່ນ​ມີ​ການ​ເລືອກ​ຕັ້ງຢ່າງ​ຄັ​ກ​ແນ່ ພັກ​ຂອງ​ແນວ​ລາວ​ຮັກ​ຊາດ ​ແລະ ຝ່າຍ​ເປັນກາງ​ທີ່​ສະໜັບ​ສະ​ນູນ​ໄດ້ 13 ທີ່​ນັ່ງ​ໃນ​ຈຳນວນ​ຜູ້​​ແທນ​ທັງ​ໝົດ 20 ທ່ານ ​ໂດຍ​ແມ່ນ​ທ່ານ ສຸວັນ ນະ​ພູມ​ມາ ​ເປັນ​ນາຍົກລັດຖະມົນຕີ, ​ແຕ່​ລັດຖະບານ​ປະສົມ​ທີ່​ມີ​ການ​ເລືອກ​ຕັ້ງມີ​ອາຍຸ​ພຽງ​ປີ​ດຽວ​ກໍ​ຖືກ​ລົ້ມສະຫລາຍ ຍ້ອນ​ທ່ານ ຜຸຍ ຊະນະ​ນິກອນ ​ເຮັດ​ລັດຖະປະຫານ​ໂຄ້ນ​ລົ້ມ ​ໂດຍ​ມີ​ອາ​ເມ​ລິ​ກາ​ເປັນ​ຜູ້​ຢູ່​ເບື້ອງຫລັງ.

     ​ເມື່ອ​ທ່ານ ຜຸຍ ຊະນະ​ນິກອນ ​ໄດ້​ເຮັດ​ລັດຖະປະຫານ​ໂຄ້ນ​ລົ້ມລັດຖະບານ​ປະສົມ​ແລ້ວ ກໍ​ປະກາດ​ຕົນ​ເອງ​ເປັນ​ນາຍົກລັດຖະມົນຕີ ​ແລ້ວ​ວາງ​ນະ​ໂຍບາຍ​ປາບ​ປາມ​ກອມ​ມູນິດ ສັ່ງ​ຈັບ​ຜູ້ນຳ​ແນວ​ລາວ​ຮັກ​ຊາດ​ເຂົ້າຄຸກ​ເຖິງ 16 ທ່ານ. ຕໍ່ໜ້າ​ສະພາບ​ການ​ອັນ​ເປັນ​ໜ້າ​ສິ້ວໜ້າ​ຂວານ​ນັ້ນ, ທາງ​ຄະນະ​ນຳ​ສູນ​ກາງ​ແນວ​ລາວ​ຮັກ​ຊາດ​ອັນ​ມີ​ປະທານ ​ໄກສອນ ພົມວິຫານ ​ເປັນ​ແກນ​ນຳ ​ໄດ້​ວາງ​ແຜນ​ເອົາ​ຜູ້ນຳ​ອອກ​ຈາກ​ຄຸກ​ສອງ​ວິທີ​ຄື: ອັນ​ທີ​ໜຶ່ງ ​ໃຊ້​ກຳລັງ​ກອງ​ຕີ​ພິ​ເສດ (Commando) ມາ​ຈູ່​ໂຈມ​ເອົາ​ໃນ​ເວລາ​ພວກ​ສັດຕູ​ເຜີ, ສ່ວນ​ປະ​ເດັນ​ອັນ​ທີ​ສອງ​ແມ່ນ​ວິທີ​ຕຶກ​ເບັດ​ສາຍ​ແລບ ​ໂດຍ​ໃຊ້​ວິທີ​ຂົນຂວາ​ຍພວກ​ສາລະວັດ​ທະຫານ​ທີ່​ເຝົ້າຍາມ​ຄຸກ​ໃຫ້​ເປັນ​ໃຈ​ແລ້ວ​ພາກັນ​ໂຕນ​ໜີ. ​ແຜນການ​ແຫກ​ຄຸກ​ໄດ້​ເລືອກ​ເອົາ​ວິທີ​​ທີ​ສອງ ​ເພາະ​ຈະ​ຮັບປະກັນ​ຕໍ່​ຄວາມ​ປອດ​ໄພ​ຫລາຍ​ກວ່າ.

     ຜ່ານ​ການ​ດຳລົງ​ຊີວິດ​ຢູ່​ໃນ​ຄຸກ​ເປັນ​ເວລາ 10 ​ເດືອນ, ບັນດາ​ຜູ້ນຳ​ເຮົາ​ຈຳນວນ 16 ທ່ານ ພ້ອມ​ດ້ວຍ​ສາລະວັດ​ອີກ 8 ຄົນ​ທີ່​ຮູ້​ເຫັນ​ເປັນ​ໃຈ​ກໍ​ສາມາດ​ໂຕນ​ອອກ​ຈາກ​ຄຸກ​ໄດ້​ຢ່າງ​ມະຫັດສະຈັນ. ​ແຜນການ​ໂຕນ​ຄຸກ​ໃນ​ຄັ້ງນີ້​ແມ່ນ​ພາຍ​ໃຕ້​ການ​ຊີ້​ນຳ-ນຳພາ​ຂອງ​ສູນ​ກາງ​ແນວ​ລາວ​ຮັກ​ຊາດ ​ແລະ ການ​ປະຕິບັດ​ການ​ທາງ​ທະຫານ​ຂອງ​ກອງທັບ​ປົດ​ປ່ອຍປະ​ຊາ​ຊົນ​ລາວ ​ໂດຍ​ມີ​ປະທານ ​ໄກສອນ ພົມວິຫານ ​ເປັນ​ແກນ​ນຳ ພ້ອມ​ເຫລົ່າ​ທະຫານ​ກອງ​ຕີ​ພິ​ເສດ, ມີ​ສາລະວັດ​ທະຫານ​ທີ່​ບອກ​ໄດ້​ໃຊ້​ຟັງ​ຂອງ ຜຸຍ ຊະນະ​ນິກອນ ​ເອງ ​ແລະ ກຳລັງ​ສູ້​ຮົບ​ທີ່​ກຽມພ້ອມ​ປະຈັນບານ​ໃນ​ກໍລະນີ​ເສຍ​ລັບ ຫລື ຖືກ​ສັດຕູ​ຈັບ​ໄດ້​ໄລ່​ທັນ. ​ໃນ​ຄືນ​ຂ້ອນ​ແຈ້ງ​ແຫ່ງ​ມື້​ໂຕນ​ຄຸກ ທ່ານ ຊຽງ​ໂສມ ກຸນ​ລະ​ວົງ ນັກ​ເຄື່ອນ​ໄຫວ​ໃຕ້​ດິນ​ກອງ​ຕີ​ພິ​ເສດຂັ້ນ​ເທບ ​ໄດ້​ເຂົ້າມາ​ຢູ່​ໃນ​ຄຸກ ​ເພື່ອ​ກະກຽມ, ພ້ອມ​ພາກັນ​ເບີກ​ເຄື່ອງ​ແບບ​ສາລະວັດ​ທະຫານ, ​ເບີກ​ອາວຸດ​ຍຸດ​ໂທ​ຄົບ​ມື​ກ່ອນ​ຈະ​ອຳ​ລາ​ບາຍ​ບ່າຍ​ຄຸກ​ໂພນ​ເຄັງ​ໄປ​ດ້ວຍ​ບັນຍາກາດ​ອັນ​ເຄັ່ງຮ້ອນ, ຂ້ຽວຂາດ​ລຸຍ​ຂ້າມ​ນ້ຳຮ່ອງ​ໄກ່​ແກ້ວ, ຜ່ານ​ທົ່ງ​ນາ​ບ້ານ​ໂພນ​ຕ້ອງ ​ເບັດ​ໃສ່​ໜອງ​ທາ, ໜອງ​ບຶກ, ດົງ​ຫລວງ, ນາ​ຍາງ, ດ່ານ​ຊີ​ດ່ານ​ສູງ​ດ້ວຍ​ຄວາມ​ອົງອາດ​ກ້າຫານ ​ແລະ ມີ​ຄວາມ​ປອດ​ໄພ​ທຸກ​ຢ່າງ.

ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ - Wave100S AD to Website 2020 0 - ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ

     ພໍ​ຮຸ່ງ​ເຊົ້າມາ, ພາບ​ທີ່​ຍັງ​ຄົງ​ໃຫ້​ເຫັນ​ກໍ​ມີ​ແຕ່​ຄຸກ​ເປົ່າ ພ້ອມ​ຫາງ​ສຽງ​ໂຄສະນາ​ປ່າວ​ຂ່າວ​ອຶກ​ກະ​ທຶກ​ຄຶກ​ໂຄມ ບາງ​ຄົນ​ກໍ​ວ່າ​ໜີ​ໄປ​ທາງ​ໃຕ້, ບາງ​ຫາງ​ສຽງ​ພັດ​ວ່າ​ໄປ​ທາງ​ເໜືອ. ຜູ້​ສັນທັດ​ໃນ​ເລື່ອງ​ໝັດ​ມວຍ​ກໍ​ວ່າ​ເປັນ​ຍ້ອນ​ລຸງ​ສິງກະ​ໂປ​ມີ​ມວຍ​ເກັ່ງ​ຈຶ່ງ​ສາມາດ​ໂຕນ​ຄຸກ​ໄປ​ໄດ້. ສ່ວນ​ຜູ້​ສັນທັດ​ໃນ​ເລື່ອງ​ເຄື່ອງ​ລາງ​ຂອງ​ຂັງ​ກໍ​ວ່າ​ເປັນ​ຍ້ອນ​ລຸງ​ສີທົນ ກົມມະ​ດຳ ມີ​ວິຊາ​ອາຄົມ​ເປັນ​ຍອດ, ມີ​ຮອດ​ມົນ​ສະ​ເດາະ​ກຸນ​ແຈ, ທັງ​ຍິງ​ບໍ່​ເຂົ້າສັບ​ບໍ່​ແຕກ ສາມາດ​ເລືອ​ມຕາ​ກຸ້ມ​ໄດ້​ເປັນ​ກອງຮ້ອຍ​ກອງພັນ​ ສັບ​ມະ​ປິ​ແຕ່​ຜູ້​ຈະ​ເວົ້າ, ​ແຕ່​ສິ່ງ​ຕັດສິນ​ຊີ້​ຂາດ​ທີ່​ແທ້​ຈິງ ຄື​ຄວາມ​ສະຫລາດ, ມີ​ໄຫວ​ພິບ, ຍຸດ​ທະ​ສາດ, ຍຸດທະວິທີ, ສິລະ​ປະຍຸດ​ຂອງ​ກອງ​ກຳລັງ​ທະຫານ​ແນວ​ລາວ​ຮັກ​ຊາດ ​ໂດຍ​ສະ​ເພາະ​ແມ່ນ​ກອງ​ຕີ​ພິ​ເສດ​ຂອງ​ກອງທັບ​ປົດ​ປ່ອຍປະ​ຊາ​ຊົນ​ລາວ. ​ໃນມື້ນັ້ນ ກຳລັງ​ທະຫານ​ຂອງ​ຝ່າຍ​ວຽງ​ຈັນ​ໄດ້​ໃຊ້​ລົດ ​ແລະ ທະຫານ​ຫລາຍ​ກອງຮ້ອຍ, ກອງພັນ​ຕິດຕາມ​ໄຕ່​ນຳ​ຕາມ​ເສັ້ນທາງ​ຕ່າງໆ ນັບ​ທັງ​ໃຊ້​ຍົນ​ເວີ່ນ​ສອດ​ແນມ ​ເພື່ອ​ຊອກ​ຫາ​ໄລ່​ລ່າ​ຢ່າງ​ໃກ້ຊິດ ​ແຕ່​ສຸດ​ທ້າຍ​ກໍ​ໝົດ​ຄວາມ​ຫວັງ​ບໍ່​ເຫັນ​ຮອດ​ກິ່ນ​ອາຍ. ນີ້​ຄື​ເຫດການ ​ແລະ ສິ່ງ​ທ້າ​ທາຍ​ລະຫວ່າງ​ສອງ​ອິດ​ທິກຳລັງ​ທີ່​ມີ​ຄວາມ​ຂັດ​ແຍ່ງ​ກັນ​ລະຫວ່າງ​ສິນ​ທຳ​ກັບ​ອະທຳ​ໃນ​ຍຸກ​ສົງຄາມ​ເຢັນ. ມາ​ຮອດ​ປັດຈຸບັນ ​ເຫດການ​ໂຕນ​ຄຸກ​ຢ່າງ​ມະຫັດສະຈັນ​ຂອງ​ກຳລັງ​ແນວ​ລາວ​ຮັກ​ຊາດ​ຍັງ​ຈາລຶກ​ໄວ້​ໃນ​ປະ​ຫວັດ​ສາດ​ຂອງ​ຊາດ​ລາວ ​ແລະ ກອງທັບ​ປະຊາຊົນ​ລາວ​ທີ່​ພິສູດ​ໃຫ້​ເຫັນ​ເຖິງ​ຄວາມ​ສາມາດ​ຂອງ​ກອງ​ຕີ​ພິ​ເສດ ​ແລະ ຍັງ​ພິສູດ​ໃຫ້​ເຫັນ​ຜູ້​ຊະນະ​ຜູ້​ແພ້​ໃນ​ຂະ​ບວນການ​ຕໍ່ສູ້ ​ເພື່ອ​ປົດ​ປ່ອຍປະ​ເທດ​ຊາດ​ອອກ​ຈາກ​ການ​ຮຸກ​ຮານ​ຂອງ​ສັດຕູ​ໄດ້​ຢ່າງ​ຊິ້ນ​ເຊີງ. ມາ​ຮອດ​ປີ 2020 ນີ້ ອາຍຸ​ຂອງ​ກອງ​ຕີ​ພິ​ເສດ​ກອງທັບ​ປົດ​ປ່ອຍປະ​ຊາ​ຊົນ​ລາວ​ກໍ​ມີ​ອາຍຸ​ໄດ້ 65 ປີ​ແລ້ວ ຂໍ​ໃຫ້​ນັກຮົບ​ກອງ​ຕີ​ພິ​ເສດ​ທຸກ​ສະຫາຍ​ທຸກ​ຄົນ​ຈົ່ງ​ແຫລມ​ເໝືອນ​ດັ່ງ​ຄົມ​ພ້າ, ກ້າ​ດັ່ງ​ຕາ​ເວັນ, ທັນ​ສະ​ໄໝ​ໄຮ້​ທຽມ​ທານ​​ໃນ​ຍຸກ​ໃໝ່​ທັນ​ສະ​​ໄໝນີ້.

ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ - WhatsApp Image 2020 05 27 at 5 - ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ
ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ - WhatsApp Image 2020 05 27 at 5 - ກອງທັບ​ປະຊາຊົນ​ລາວ​ກັບ​ແຜນການ​ໂຕນ​ຄຸກ
error: Alert: ເນື້ອຫາຂ່າວມີລິຂະສິດ !!