ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ

ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ - 025 5 - ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ
ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ - Untitled design - ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ

ທິດ​ກໍ່າ:

       ຂ່າວ​ຄາວ​ກ່ຽວ​ກັບຜູ້ຍິງ​ລາວ​ເອົາ​ຜົວ​ຕ່າງ​ຊາດ ​ໂດຍ​ສະ​ເພາະ​ສາວ​ລາວ​ເອົາ​ກັບ​ບ່າວ​ຄົນ​ຈີນ​ແລ້ວ​ພາກັນ​ເດີນທາງ​ໄປ​ປະ​ເທດ​ຈີນປາກົດ​ມີ​ມາ​ຫລາຍ​ປີ​ແລ້ວ. ສະພາບ​ດັ່ງກ່າວ ສ່ວນ​ຫລາຍ​ມີ​ຢູ່​ແຖວ​ພາກ​ເໜືອຄື: ​​ແຂວງ​ອຸດົມ​ໄຊ, ຫລວງ​ນ້ຳທາ ​ແລະ ​ແຂວງ​ອື່ນໆ​ອີກ​ສ່ວນ​ໜຶ່ງ, ​ແຕ່​ສິ່ງ​ທີ່​ໜັກ​ໃຈ ​ແລະ ໜ້າ​ເປັນ​ຫ່ວງ​ນັ້ນ ​ເມື່ອ​ຕົກລົງ​ປົງ​ໃຈ​ເອົາກັນ​ໄປ​ແລ້ວ ຜົວ​ຄົນ​ຈີນ​ໄດ້​ພາ​ຜູ້​ເປັນ​ເມຍ ຫລື​ວ່າ ​ແຟນຮັກ​ຂອງ​ຕົນ​ໄປ​ເມືອງ​ຈີນ​ອ້າງ​ວ່າ​ພາ​ເມືອ​ຢາມ​ບ້ານ​ເກີດ, ​ໄປ​ຢາມພໍ່​ແມ່, ຍາດຕິ​ພີ່ນ້ອງ​ຂອງ​ຜົວ ຫລື ບາງ​ຄົນ​ກໍ​ວ່າ​ໄປ​ຫາ​ເງິນ​ຢູ່​ຈີນ​ມັນ​ສະດວກ​ສະບາຍ​ໄດ້​ເງິນ​ຫລາຍ. ​ແຕ່​ກົງກັນຂ້າມ ​ເມື່ອ​ໄປ​ຮອດ​ຈີນ​ແລ້ວ​ຖືກ​ຕົວະ​ຕົ້ມ, ຂົ່ມຂູ່, ທາລຸນ, ຍິ່ງ​ໄປ​ກວ່າ​ນັ້ນ ບາງ​ຄົນ​ກໍ​ຖືກ​ຂາຍ​ຕົວ, ຫາຍ​ຕົວ​ດ້ວຍ​ວິທີ​ການ ​ແລະ ຮູບ​ການ​ຕ່າງໆ ​ເລີຍ​ຕົກ​ຢູ່​ໃນ​ກະ​ໂທ​ງການ​ຄ້າ​ມະນຸດ​ຢ່າງ​ເຕັມຕົວ. ​ແຫ​ລ່ງຂ່າວ​ນີ້ ພວກ​ເຮົາ​ມັກ​ເຫັນ​ໃນ​ສື່​ອອນ​ລາຍ​ຢ່າງ​ແຜ່​ລາມ​ກວ້າງຂວາງ ​ແລະ ປາກົດ​ວ່າ​ມີ​ຢ່າງ​ລຽນຕິດ.

       ດັ່ງ​ພວກ​ເຮົາ​ຮູ້​ນຳ​ກັນ​ແລ້ວ​ວ່າ: ຈຸດ​ພິ​ເສດ​ຂອງ​ຄົນ​ລາວ​ເຮົາ​ເປັນ​ຄົນ​ສັດ​ຊື່, ການ​ດຳລົງ​ຊີວິດ​ຢູ່​ເຂດ​ຊົນນະບົດ​ຫ່າງ​ໄກ​ສອກຫລີກ​ສ່ວນ​ຫລາຍ​ຍັງ​ຂ້ອນ​ຂ້າງ​ທຸກ​ຍາກ​ລຳບາກ, ການ​ຊອກ​ຢູ່​ຫາ​ກິນ​ຍັງ​ຕິດ​ພັນ​ກັບ​ທຳ​ມະ​ຊາດ, ພື້ນຖານ​ວັດທະນະທຳ​ຮີດຄອງ​ປະ​ເພນີ​ກໍ​ລຽບ​ງ່າຍ​ຊື່​ຕົງ, ມີ​ສິນ​ທຳ​ປະຈຳ​ໃຈ​ ​ໃນ​ເມື່ອ​ພົບ​ເຫັນ​ຄົນ​ຕ່າງ​ດ້າວ​ທ້າວ​ຕ່າງ​ແດນ ກໍ​ມີ​ສັດທາ​ເຫລື້ອມ​ໃສ​ຫລົງ​ໄຫລ​ໄມຕຣີຈິດ​ເຂົ້າ​ໃຈ​ວ່າ​ເຂົາ​ເປັນ​ຄົນ​ດີ​ມີ​ສິນ​ທຳ, ​ເປັນ​ແຂກ​ບ້ານ​ແຂກ​ເມືອງ, ກິນ​ເຂົ້າ​ເຊົາ​ເຮືອນ,​ ​ເຂົາ​ເວົ້າຫຍັງ​ອອກ​ມາ​ກໍ​ເຊື່ອ ​ເພາະ​ຄົນ​ເຮົາ​ສະ​ໄໝ​ນີ້​ຮູ້​ແຕ່​ໜ້າ​ບໍ່​ຮູ້​ໃຈ, ຈາກ​ນັ້ນກໍ​ເລີຍ​ຕົກ​ຫລຸມ​ຮັກ​ມອບ​ກາຍ​ຖະຫວາຍ​ຊີວິດ​ຫວັງ​ສ້າງ​ຄອບຄົວ​ຄື​ບ້ານ​ຄື​ເມືອງ ມີໜ້າ​ມີ​ຕາ​ວ່າ​ເອົາ​ຜົວ​ຕ່າງປະ​ເທດ​ຈະ​​ໄດ້​ພົ້ນຈາກ​ຄວາມທຸກ, ​ແຕ່​ອະນີຈາ ​ເມື່ອ​ປະສົບ​ກັບ​ບັນຫາ, ຮູ້​ເຫັນ​ເຕັມ​ຕາ​ເປັນ​ໄພ​ອັນຕະລາຍ​ມາ​ເຖິງ ຈຶ່ງ​ຮູ້ສຶກ​ກິ່ນ​ແໜງ​ສວາຍ​ເກີນ​ແກ້​ເກີດ​ເປັນ​ທຸກ ຫລື ບາງ​ລາຍ​ກໍ​ເສຍ​ຊີວິດ ​ແລະ ຫາຍ​ສາບ​ສູນ​ໄປ​ຕາມ​ການ​ເວລາ.

ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ - Wave100S AD to Website 2020 0 - ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ

      ​ເວົ້າ​ເຖິງ​ຄົນ​ລາວ​ແຕ່ງງານ​ກັບ​ຄົນ​ຕ່າງປະ​ເທດ​ມັນ​ກໍ​ບໍ່​ສະ​ເພາະ​ແຕ່​ເອົາ​ກັບ​ຄົນ​ຈີນ ຍັງ​ມີ​ຫລາຍ​ປະ​ເທດ​ໃນ​ພາກພື້ນ ​ແລະ ​ໃນ​ໂລກ ​ເປັນຕົ້ນ​ເອົາ​ກັບ​ຄົນ​ຝຣັ່ງ, ອັງກິດ, ອ​າ​ເມ​ລິ​ກາ, ກາ​ນາ​ດາ, ​ເຢຍລະ​ມັນ, ກັບ​ຄົນ​ໄທ, ຄົນ​ຫວຽດນາມ, ກຳປູ​ເຈຍ, ພະມ້າ, ຍີ່ປຸ່ນ, ​ເກົາຫລີ ​ແລະ ປະ​ເທດ​ອື່ນໆ ​ເພາະ​ຍຸກ​ນີ້​​ເບິ່ງ​ຄື​ວ່າຄວາມ​ຮັກ​ມັນ​ໄຮ້​ພົມ​ແດນ​ໄປ​ເສຍ​ແລ້ວ. ສຳຄັນ​ແຕ່​ວ່າ ​ເມື່ອ​ເອົາກັນ​ໄປ​ແລ້ວ ​​ໃຫ້​ຕົນ​ເອງ ​ແລະ ຄອບຄົວ​ມີ​ຄວາມສຸກ, ​ເປັນ​ຄອບຄົວ​ທີ່​ມີ​ຄວາມ​ອົບ​ອຸ່ນ​ໃນ​ສັງຄົມ, ອັນ​ສຳຄັນ​ອີກ​ອັນ​ໜຶ່ງ ຕ້ອງ​ເປັນ​ພົນລະ​ເມືອງ​ດີ, ປະຕິບັດ​ລະບຽບ​ກົດໝາຍ​ຂອງ​ປະ​ເທດ​ນັ້ນໆ​ຢ່າງ​ຖືກຕ້ອງ. ​ໃນ​ສະ​ໄໝ​ນີ້ ​ເປັນ​ຍຸກ​ໂລກາ​ພິວັດ ຄົນ​ລາວ​ເຮົາ​ມີ​ຈຳນວນ​ບໍ່​ໜ້ອຍ ​ໂດຍ​ສະ​ເພາະ​ແມ່ນ​ຜູ້ຍິງ​ມັກ​ເຫີ່​ໄປ​ພົວພັນ, ​ເອາະ​ເຊາະ​ຕິດ​ອ້າຍ​ບ່າວ​ຕ່າງປະ​ເທດ ​ໂດຍ​ທີ່​ພໍ່​ແມ່​ຜູ້​ປົກຄອງ​ບໍ່​ຮັບ​ຮູ້​ນຳ, ບໍ່​ປະຕິບັດ​ຕາມ​ກົດໝາຍ​ບ້ານ​ເມືອງ ຕົກລົງ​ປົງ​ໃຈ​ກັບ​ຊາຍ​ຊູ້​ແລ້ວ​ກໍ​ເປີດ​ອາດ​ຫລາດ​ໄປ​ນຳ​ເຂົາ, ສຸດ​ທ້າຍ​ບາດ​ມີ​ເຫດ​ມາ​ເຖິງ​ຕົນ​ເອງ ກໍ​ປານ​ຕົກ​ໝໍ້​ນາຮົກ, ບາງ​ຄົນ​ຖືກ​ເຕະ, ຖືກ​ຕີ, ຖືກ​ທໍລະມານ​ສັບ​ປະ​ທຸກ ຫລື ຍິ່​ງ​ໄປ​ກວ່າ​ນັ້ນ ບາງ​ລາຍ​ກໍ​ເສຍ​ຊີວິດ, ສູນຫາຍ​ດັ່ງ​ທີ່​ກ່າວ​ມາ​ຂ້າງ​ເທິງ. ນີ້​ລະ​ຄື​ການ​ເອົາ​ຜົວ​ຕາມ​ລຳພັງ ສຸດ​ທ້າຍ​ກໍ​ເລີຍ​ຕົກ​ຢູ່​ໃນ​ເຄືອ​ຂ່າຍ​ການ​ຄ້າ​ມະນຸດ. ​ໃນ​ຍຸກ​ພັດທະນາ​ຄື​ດັ່ງ​ທຸກ​ວັນ​ນີ້ ບັນດາ​ສາວໆ​ທັງຫລາຍ​ຄວນ​ມີ​ສະຕິ​ຮອບ​ຄອບ ​ເພື່ອ​ຄວາມ​ປອດ​ໄພ​ໃນ​ຊີວິດ​ກ່ອນ​ມັດຈຸລາດ​ທີ່​ເປັນ​ຕົນ​ເປັນ​ໂຕ​ມາ​ຂົ່ມ​ເຫັງ​​ເຕັງ​ເມ​ບ ​ເພື່ອ​ຫລອກ​ລໍ້​ສັງ​ເວີຍ​ເອົາ​ຊີວິດ​ອິນ​ຊີ​ຈາກ​ຄວາມ​ຊິ້ນ​ເຄີຍ​ທີ່​ເຫັນ​ແຕ່​ຄວາມ​ຢາກ​ນັ້ນມາ​ເປັນ​ເດີມ​ພັນ.

      ​ເມື່ອ​ຕັ້ງ​ໂຈດ​ກັນ​ວ່າ, ຫົນທາງ​ຫລີກ​ລ້ຽງ​ຈາກ​ການ​ຄ້າ​ມະນຸດ​ວິທີ​ນີ້​ຕ້ອງ​ເຮັດ​ແນວ​ໃດ ? ມັນ​ກໍ​ຂຶ້ນກັບ​ຫລາຍ​ປັດ​ໄຈ ​ແລະ ຫລາຍ​ເງື່ອນ​ໄຂ ​ແຕ່​ອັນຕົ້ນຕໍ​ແມ່ນ​ໃຫ້​ປະຕິບັດ​ຕາມ​ລະບຽບ​ກົດໝາຍ​ຂອງ​ບ້ານ​ເມືອງ, ຕ້ອງ​ຮູ້​ປະຫວັດ​ທີ່​ໄປ​ທີ່​ມາຂອງ​ຄົນ, ການ​ທຳ​ມາ​ຫາ​ກິນ ຕະຫລອດ​ເຖິງ​ວິຊາ​ອາຊີບ​ທີ່​ໝັ້ນຄົງ, ປະຕິບັດ​ຕາມ​ຮີດຄອງ​ປະ​ເພນີ​ຂອງ​ລາວ​ເຮົາ​ຢ່າງ​ຖືກຕ້ອງ, ​ແຕ່ງງານ​ກັບ​ຄົນ​ປະ​ເທດ​ໃດ​ກໍ​ຕ້ອງ​ດຳ​ເນີນ​ຕາມ​ກົດໝາຍ​ຢ່າງ​ເຄັ່ງ​ຂັດ ​ແລະ ຮັບປະກັນ​ຕໍ່​ຄວາມ​ປອດ​ໄພ​ໃນ​ຊີວິດ ​ເພື່ອ​ຄວາມສຸກ, ຄວາມ​ຍືນ​ຍົງ​ຂອງ​ຄອບຄົວ ​ແລະ ພ້ອມ​ກັນ​ສ້າງສາ​ຄອບຄົວ​ໃຫ້​ມີ​ຢູ່​ມີ​ກິນ​ຕາມ​ແນວທາງ​ນະ​ໂຍບາຍ​ຂອງ​ພັກ ​ແລະ ລັດຖະບານ​ເຮົາ. ສິ່ງ​ທີ່​ຫລີກ​ເວັ້ນນັ້ນ ​ເຮົາ​ເອງ​ບໍ່​ຄວນ​ມັກງ່າຍ, ​ເຫັນ​ຄົນລະ​ເອົາ​ເຫັນ​ເງົາ​ລະ​ຄຸບ​ຢ້ານ​ແຕ່​ບໍ່​ໄດ້, ຊ້ຳບໍ່​ໜຳ ຄົນ​ຍຸກ​ນີ້​ອ່ານ​ໄຕ​ກັນ​ໄດ້​ຍາກ, ​ເຫັນ​ເຂົາ​ໂກ້​ເຂົາ​ງາມ, ຫຸ່ນ​ດີ​ສູງ​ຂາວ​ຍາວ​ດົ້ວ ກໍ​ເບັດ​ໃສ່​ອ່ານ​ກິນ​ ສຸດ​ທ້າຍ​ມາ​ກໍ​ຕ້ອງ​ຜິດ​ຫວັງ​ນັ່ງ​ອົມ​ໂປ້ ຫລື ຮ້າຍ​ແຮງ​ກວ່າ​ນັ້ນ ພັດ​ຕົກ​ຢູ່​ໃນ​ວົງ​ລັດສະໝີ​ການ​ຄ້າ​ມະນຸດ​ນັ້ນ​ເອງ.

ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ - WhatsApp Image 2020 05 27 at 5 - ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ
ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ - WhatsApp Image 2020 05 27 at 5 - ຍຸກ​ພັດທະນາ​ການ​ຄ້າ​ມະນຸດ​ແມ່ນ​ໜຶ່ງ​ໃນ​ສິ່ງ​ທ້າ​ທາຍ
error: Alert: ເນື້ອຫາຂ່າວມີລິຂະສິດ !!