ອັກຄີໄພຢູ່ລາວຍັງມີທ່າອ່ຽງເພີ່ມຂຶ້ນ

- 54 - ອັກຄີໄພຢູ່ລາວຍັງມີທ່າອ່ຽງເພີ່ມຂຶ້ນ
- Untitled design - ອັກຄີໄພຢູ່ລາວຍັງມີທ່າອ່ຽງເພີ່ມຂຶ້ນ

      ໃນປີ 2019 ຜ່ານມາ, ມີຜູ້ເສຍຊີວິດ 7 ຄົນ ແລະ ບາດເຈັບອີກ 2 ຄົນ ຈາກອັກຄີໄພທີ່ເກີດຂຶ້ນຢູ່ລາວ 227 ຄັ້ງ. ນອກຈາກນີ້ ຍັງມີເຮືອນເສຍຫາຍ 276 ຫລັງ, ຕະຫລາດ 1 ແຫ່ງ, ສາງເຄື່ອງ 11 ຫລັງ, ຫໍພັກ 2 ຫລັງ, ລົດສະແຕັກນ້ຳມັນ 1 ຄັນ ແລະ ອື່ນໆ ສ້າງຄວາມເສຍຫາຍທັງໝົດເກືອບ 90 ຕື້ກີບ.

       ອັກຄີໄພທີ່ເກີດຂຶ້ນດັ່ງກ່າວ​ຖ້າສົມທຽບໃສ່ປີ 2018 ເພີ່ມຂຶ້ນເກືອບ 50 ຄັ້ງ ​ແລະ ມີຜູ້ເສຍຊີວິດເພີ່ມຂຶ້ນ 1 ຄົນ, ມູນຄ່າເສຍຫາຍເພີ່ມຂຶ້ນ 50 ຕື້ກວ່າກີບ. ອັກຄີໄພເກີດຂຶ້ນຫລາຍກວ່າໝູ່ແມ່ນຢູ່ນະຄອນຫລວງວຽງຈັນ 78 ຄັ້ງ, ຮອງລົງມາແມ່ນແຂວງສະຫວັນນະເຂດ 30 ຄັ້ງ ແລະ ແຂວງຈໍາປາສັກ 19 ຄັ້ງ; ສ່ວນແຂວງທີ່ບໍ່ມີອັກຄີໄພເກີດຂຶ້ນແມ່ນແຂວງໄຊສົມບູນ. ສໍາລັບອັກຄີໄພທີ່ສ້າງຄວາມເສຍຫາຍຫລາຍກວ່າໝູ່ແມ່ນເຫດໄຟໄໝ້ຕະຫລາດປາກຊັນ ແຂວງບໍລິຄໍາໄຊ ຍ້ອນໄຟຟ້າລັດວົງຈອນ ໃນວັນທີ 23 ຕຸລາ 2019 ສ້າງຄວາມເສຍຫາຍສູງເຖິງ 39 ຕື້ກວ່າກີບ.

    ທ່ານ ພັນເອກ ຄົມ ອິນທະລາດ ຫົວໜ້າກົມສະກັດກັ້ນ ແລະ ຕ້ານອັກຄີໄພນະຄອນຫລວງວຽງຈັນ ໃຫ້ສໍາພາດວ່າ: ຈໍານວນອັກຄີໄພທີ່ເກີດຂຶ້ນທັງໝົດໃນປີ 2019 ຜ່ານມາ ແມ່ນມີສາເຫດມາຈາກໄຟຟ້າລັດວົງຈອນ 82 ຄັ້ງ, ຈາກຄວາມຂາດສະຕິ 79 ຄັ້ງ (ເຊັ່ນ: ໄຕ້ທູບທຽນບູຊາ 27 ຄັ້ງ, ດັງໄຟແຕ່ງກິນ 28 ຄັ້ງ ແລະ ຈູດຂີ້ເຫຍື່ອລາມໃສ່ 24 ຄັ້ງເປັນຕົ້ນ), ສ່ວນທີ່ເຫລືອແມ່ນຍັງຢູ່ໃນຂັ້ນຕອນສືບສວນ-ສອບສວນ 50 ຄັ້ງ, ຄົນຈູດ 13 ຄັ້ງ ແລະ ບໍ່ຮູ້ສາເຫດ ອີກ 3 ຄັ້ງ.

     ໃນໄລຍະຜ່ານມາ, ເຖິງວ່າເຈົ້າໜ້າທີ່ກ່ຽວຂ້ອງໄດ້ເອົາໃຈໃສ່ລົງໂຄສະນາເຜີຍແຜ່ກ່ຽວກັບກົດໝາຍ ​ແລະ ລະບຽບ​ການ​ຕ່າງໆວ່າດ້ວຍການສະກັດກັ້ນ ແລະ ຕ້ານອັກຄີໄພໃຫ້ສັງຄົມຮັບຮູ້ຢ່າງຕໍ່ເນື່ອງ, ພ້ອມທັງໄດ້ອອກແຈ້ງການ, ລົງກວດກາ ແລະ ໃຫ້ການແນະນໍາຢູ່ແຕ່ລະທ້ອງຖິ່ນຕ່າງໆ, ແຕ່ຄົນຈໍານວນບໍ່ໜ້ອຍຍັງຖືເບົາຕໍ່ວຽກນີ້ ແລະ ຍັງບໍ່ໃຫ້ການຮ່ວມມືກັບເຈົ້າໜ້າທີ່ກ່ຽວຂ້ອງດີເທົ່າທີ່ຄວນ ຈຶ່ງເຮັດໃຫ້ເກີດອັກຄີໄພຂຶ້ນຢ່າງຕໍ່ເນື່ອງຕະຫລອດມາ.

- Wave100S AD to Website 2020 0 - ອັກຄີໄພຢູ່ລາວຍັງມີທ່າອ່ຽງເພີ່ມຂຶ້ນ

        ສໍາລັບອັກຄີໄພທີ່ເກີດຂຶ້ນຢູ່ແຕ່ລະແຂວງໃນປີ 2019 ມີດັ່ງນີ້: ນະຄອນຫລວງວຽງຈັນ 78 ຄັ້ງ, ແຂວງສະຫວັນນະເຂດ 30 ຄັ້ງ, ຈໍາປາສັກ 19 ຄັ້ງ, ຊຽງຂວາງ 15 ຄັ້ງ, ບໍລິຄໍາໄຊ 13 ຄັ້ງ, ຄໍາມ່ວນ 12 ຄັ້ງ, ໄຊຍະບູລີ 10 ຄັ້ງ, ຜົ້ງສາລີ 7 ຄັ້ງ, ຫລວງນໍ້າທາ 7 ຄັ້ງ, ບໍ່ແກ້ວ 6 ຄັ້ງ, ອຸດົມໄຊ 5 ຄັ້ງ, ຫົວພັນ 5 ຄັ້ງ, ຫລວງພະບາງ 5 ຄັ້ງ, ສາລະວັນ 4 ຄັ້ງ, ອັດຕະປື 4 ຄັ້ງ, ເຊກອງ 4 ຄັ້ງ ແລະ ແຂວງວຽງຈັນ 3 ຄັ້ງ. ສ່ວນຈຳນວນຜູ້ເສຍຊີວິດທັງໝົດແມ່ນ 7 ຄົນ, ໃນນີ້ເສຍຊີວິດຢູ່ແຂວງຫລວງພະບາງ 4 ຄົນ, ແຂວງສະຫວັນນະເຂດ 2 ຄົນ ແລະ ແຂວງຄໍາມ່ວນ 1 ຄົນ.

- WhatsApp Image 2020 05 27 at 5 - ອັກຄີໄພຢູ່ລາວຍັງມີທ່າອ່ຽງເພີ່ມຂຶ້ນ
- WhatsApp Image 2020 05 27 at 5 - ອັກຄີໄພຢູ່ລາວຍັງມີທ່າອ່ຽງເພີ່ມຂຶ້ນ
error: Alert: ເນື້ອຫາຂ່າວມີລິຂະສິດ !!