​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ

​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ - 22 - ​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ
​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ - Untitled design - ​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ

  #ລູກ​ເມືອງ​ພວນ

      ສະບາຍດີ ​ເພື່ອນ​ຜູ້​ອ່ານ​ທີ່​ຮັກ​ແພງ, ​ເມື່ອ​ເວົ້າ​ເຖິງ​ການ​ສຶກສາລາ​ວບໍ່​ທັນ​ມີ​ຄຸນ​ນະພາ​ບ​ເທົ່າ​ທີ່​ຄວນ ອັນ​ເນື່ອງ​ມາ​ຈາກ​ຫລາຍ​ສາ​ເຫດ, ໜຶ່ງ​ໃນ​ສາ​ເຫດ​ຕົ້ນຕໍ​ຕາມ​ຜູ້​ຂຽນ​ວ່າ: ​ແມ່ນ​ຍ້ອນ​ຄຸນ​ນະພາ​ບຂອງ​ຄູ​ບໍ່​ທັນ​ໄດ້​ມາດຕະຖານ. ຖ້າ​ຖາມ​ຕໍ່​ວ່າ ຍ້ອນ​ຫຍັງ​ຄູ​ຈຶ່ງ​ບໍ່​ທັນ​ໄດ້​ມາດຕະຖານ ? ຄຳ​ຕອບ​ກໍ​ຄື ຍ້ອນ​ລະດັບ​ຄວາມ​ຮູ້​ວິຊາ​ສະ​ເພາະ​ຂອງ​ຄູ​ບໍ່​ທັນ​ສູງ ​ແລະ ​ເປັນ​ຫຍັງ​ຈຶ່ງ​ບໍ່​ສູງ ຄຳ​ຕອບ​ກໍ​ຄື: ຍ້ອນ​ລະບົບ​ການ​ສຶກສານັ້ນ​ເອງ. ຜູ້​ຂຽນ​ຢູ່​ໃນ​ວົງ​ການ​ສຶກສາມາ​ດົນ ​ແລະ ກໍ​ຜ່ານ​ການ​ສິດສອນ​ເປັນ​ເວລາ​ຫລາຍ​ປີ ​ແຕ່​ເຫັນ​ວ່າ​ນັບ​ແຕ່​ປະ​ເທດ​ຊາດ​ໄດ້​ຮັບ​ການ​ປົດ​ປ່ອຍ​ເປັນຕົ້ນມາ ​ໄດ້​ມີ​ການ​ປະຕິ​ຮູບ​ການ​ສຶກສາ​ເຖິງ 3 ຄັ້ງ​ແລ້ວ: ຄັ້ງທີ​ໜຶ່ງ​ແມ່ນ​ລະບົບ​ການ​ສຶກສາ ພາຍຫລັງ​ປະ​ເທດ​ຊາດ​ໄດ້​ຮັບ​ການ​ປົດ​ປ່ອຍ ​ແຕ່​ປີ 1975-2006, ຄັ້ງທີ​ສອງ​ແຕ່ 2005-2010 ​ແລະ ຄັ້ງທີ​ສາມ​ແຕ່ 2011-2015 ​ແລະ ​ເດືອນ​ມິຖຸນາ 2019 ຜ່ານ​ມາ ກໍ​ມີ​ການ​ປະຕິ​ຮູບ​ລະບົບ​ການ​ສຶກສາ​ຊັ້ນປະຖົມ​ສຶກສາຄັ້ງ​ໃຫຍ່ ​ໂດຍ​ການ​ຊ່ວຍ​ເຫລືອ​ຂອງ​ສະຫະລັດ​ອາ​ເມ​ລິ​ກາ ​ແລະ ອົດສະຕຣາລີ. ການ​ປະຕິ​ຮູບ​ແຕ່ລະຄັ້ງນັ້ນ ​ໂດຍ​ລວມ​ແລ້ວ​ແມ່ນ​ວາງ​ນະ​ໂຍບາຍ​ລວມໆ​ວ່າ: ຖື​ເອົາ​ວຽກ​ງານ​ການ​ສຶກສາ​ເປັນ​ບູລິ​ມະ​ສິດ​ໄປ​ກ່ອນ​ຂະ​ແໜງ​ການ​ອື່ນ ​ເພື່ອ​ສ້າງ​ບຸກຄະລາ​ກອນ​ທີ່​ມີ​ຄຸນ​ນະພາ​ບ, ຮອງ​ຮັບ​ໃຫ້​ແກ່​ການ​ສ້າງສາ​ພັດທະນາ​ປະ​ເທດ​ຊາດ​ໃນ​ໄລຍະ​ໃໝ່, ​ເຮັດ​ໃຫ້ການ​ສຶກສາມີ​ຄຸນ​ນະພາ​ບສູງ​ຂຶ້ນ​ເທື່ອ​ລະ​ກ້າວ, ​ໃນ​ນັ້ນ ຕົ້ນຕໍ​ແມ່ນ​ເນັ້ນ​ໃສ່​ການ​ສ້າງ​ບຸກຄະລາ​ກອນ​ໃຫ້​ມີ​ຄວາມ​ຮູ້​ຄວາມ​ສາມາດ, ມີ​ຄຸນສົມບັດ​ສິນ​ທຳ​ປະຕິວັດ, ມີ​ຈິດ​ໃຈ​ຮັບ​ໃຊ້​ຊາດ, ຮັບ​ໃຊ້​ປະຊາຊົນ.

ດັ່ງ​ທ່ານ​ນາຍົກ ທອງ​ລຸນ ສີ​ສຸ​ລິດ ມີ​ຄຳ​ເຫັນ​ໃນ​ກອງ​ປະຊຸມ​ສະ​ໄໝ​ສາມັນ​ຄົບ​ຄະນະ ຄັ້ງທີ 8 ຂອງ​ຄະນະ​ກຳມາ​ທິການ​ແຫ່ງ​ຊາດ ​ເພື່ອ​ການ​ພັດທະນາ​ຊັບພະຍາກອນ​ມະນຸດ ປະຈຳ​ປີ 2019 ​ໃນ​ວັນ​ທີ 20 ມັງກອນ​ຜ່ານ​ມາ​ນີ້ ທ່ານ​ເນັ້ນຄະນະ​ກຳມະການ​ດັ່ງກ່າວ​ວ່າ: “​ໃຫ້​ປະຕິ​ຮູບ​ການ​ສຶກສາ​ຄືນ​ໃໝ່​ຕື່ມ​ອີກ ​ເພື່ອ​ຮອງ​ຮັບ​ກັບ​ການ​ປ່ຽນ​ແປງ ​ໂດຍ​ສະ​ເພາະ​ວຽກ​ງານ​ການ​ສຶກສາ​ຂອງ​ຄູ​ຜູ້​ທີ່​ຈະ​ນຳພາ​ການ​ປັບ​ປ່ຽນ​ການ​ສຶກສາ​ຂອງ​ລາວ​ໃນ​ຍຸກ​ສະ​ໄໝ​ໃໝ່​ທີ່​ມີ​ການ​ປ່ຽນ​ແປງ​ຢ່າງ​ຫລວງຫລາຍ ​ແລະ ວ່ອງ​ໄວ, ​ໃນ​ນັ້ນ ສິ່ງ​ສຳຄັນ​ທີ່​ສຸດ​ຕ້ອງ​ສຶກສາ​ອົບຮົມ​ໃຫ້​ຊັບພະຍາກອນ​ມະນຸດ​ມີ​ແນວ​ຄິດ​ຮັກ​ຊາດ, ສືບ​ທອດ​ມູນ​ເຊື້ອອັນ​ພິລະ​ອາດ​ຫານ​ຂອງ​ບັນພະ​ບູລຸດ​ເຮົາ​ໃນ​ແຕ່​ລະ​ຍຸກ​ແຕ່​ລະສະ​ໄໝ​ໃຫ້​ໜັກ​ແໜ້ນ, ​ເຂັ້ມ​ແຂງ, ​ເປັນ​ເຈົ້າຕົນ​ເອງ, ​ເປັນ​ເຈົ້າຂອງ​ປະ​ເທດ​ຊາດ, ອຸທິດ​ຕົນ​ເພື່ອ​ພັດທະນາ​ປະ​ເທດ​ຊາດ​ໃຫ້​ຈະ​ເລີ​ນກ້າວໜ້າ​ເທົ່າ​ທຽມ​ກັບ​ບັນດາ​ປະ​ເທດ​ພາກພື້ນ ​ແລະ ສາກົນ…” ​ແລະ ມີ​ການ​ປັບປຸງ​ຫລັກສູດ​ການ​ຮຽນ-ການ​ສອນ​ຢ່າງ​ຕໍ່​ເນື່ອງ ​ເພື່ອ​ຫວັງ​ໃຫ້​ທຽບ​ເທົ່າ​ກັບ​ພາກພື້ນ ​ແລະ ສາກົນ, ​ແຕ່​ທັງ​ໝົດ​ການ​ປັບປຸງ​​ໂຄງການ​ຫລັກສູດ​ນັ້ນລ້ວນ​ແຕ່​ໄດ້​ເຊື້ອ​ເຊີນ​ເອົາ​ຊ່ຽວຊານ​ຕ່າງປະ​ເທດ​ມາ​ຊ່ວຍ ​ເຊິ່ງການ​ປະຕິ​ຮູບ​ຫລັກສູດ​ການ​ຮຽນ-ການ​ສອນ​ນັ້ນສ່ວນ​ໃຫຍ່​ເບິ່ງ​ຄື​ວ່າ​ແທດ​ເໝາະ​ກັບ​ສະພາບ​ແວດ​ລ້ອມ ​ແລະ ຄວາມ​ເປັນ​ຈິງ​ຂອງ​ລາວ ຫລື ​ເວົ້າຢ່າງ​ໜຶ່ງ​ກໍ​ໝາຍ​ຄວາມ​ວ່າ: ຫລັກສູດ​ແລ່ນນຳ​ຕ່າງປະ​ເທດ ​ໂດຍ​ສະ​ເພາະ​ແມ່ນ​ຫລັກສູດ​ການ​ຮຽນ-ການ​ສອນ​ຂອງ​ໄທ. ການ​ອອກ​ແບບ​ການ​ຮຽນ-ການ​ສອນ​ນັ້ນຢູ່​ເໜືອ​ຄວາມ​ອາດ​ສາມາດ​ທີ່​ຄູ​ລາວ​ຈະ​ເຮັດ​ໄດ້, ການ​ປັບປຸງ​ແບບ​ແຜນ​ວິທີ​ສິດສອນ​ກໍ​ລ້ວນ​ແຕ່​ນຳ​ເອົາ​ບົດຮຽນ​ຂອງ​ຕ່າງປະ​ເທດ​ມາ​ນຳ​ໃຊ້​ຢູ່​ບ້ານ​ເຮົາ ​ໂດຍ​ຄົນ​ລາວ​ບໍ່​ທັນ​ມີ​ເງື່ອນ​ໄຂ​ເຮັດ​ໄດ້​ເຖິງ​ຂະໜາດ​ນັ້ນ​ເຊັ່ນ: ການ​ສິດສອນ​ແບບ​ດາວ 5​ ​ແຈ, ​ໃນ​ນັ້ນ ມີ​ແຈ​ທີ່​ເອີ້ນ​ວ່າ​ກະກຽມ ສື່​ການ​ສອນ ​ແລະ ສິ່ງ​ກິດຈະການ​ຕ່າງໆ, ​ເຄື່ອງ​​ໄມ້​ເຄື່ອງມື​ໃຫ້​ແກ່​ການ​ສິດສອນ​ນັ້ນ ມີ​ບາງ​ບົດ​ສອນ​ອາດ​ຈະ​ປະຕິບັດ​ບໍ່​ໄດ້​ເລີຍ, ການ​ສິດສອນ​ແບບ​ຫ້ອງ​ຄວບ​ແມ່ນ​ຖືກຕ້ອງ​ກັບ​ສະພາບ​ຄວາມ​ເປັນ​ຈິງ​ໃນ​ການ​ຂາດ​ເຂີນ​ຄູ​ສອນ​ໃນ​ແຕ່​ລະຊັ້ນຮຽນ​ຢູ່​ແຕ່ລະ​ທ້ອງ​ຖິ່ນ, ​ແຕ່​ລະດັບ​ຄູ​ລາວ​ເຮົາ​ບໍ່​ທັນ​ມີ​ຄວາມ​ສາມາດທີ່​ຈະ​ເຮັດ​ໄດ້​ເຖິງ​ຂະໜາດ​ນັ້ນ, ການ​ສິດສອນ​ແບບ​ເອົາ​ນັກຮຽນ​ເປັນ​ໃຈກາງ​ແມ່ນ​ຖືກຕ້ອງ​ແລ້ວ, ​ແຕ່​ເມື່ອ​ຢາກ​ເຮັດ​ໄດ້​ຄື​ແນວ​ນັ້ນ ຄູ​ຈະ​ຕ້ອງ​ມີ​ການ​ແຕ່ງ​ບົດ​ສອນ​ຢ່າງ​ລະອຽດ, ກະກຽມ​ຫລາຍ​ກິດຈະກຳ, ຫລາຍ​ເຄື່ອງ​ໄມ້​ເຄື່ອງມື, ອຸປະກອນ​ປະຈັກ​ຕາ​ໃຫ້​ນັກຮຽນ​ໄດ້​ຮູ້​ໄດ້​ເຫັນ, ​ໄດ້​ຈັບບາຍ​ສຳຜັດ ​ໂດຍ​ສະ​ເພາະ​ແມ່ນ​ສື່​ການ​ຮຽນ-ການ​ສອນ​ທີ່​ເປັນ​ເຕັກ​ໂນ​ໂລ​ຊີ​ທີ່​ທັນ​ສະ​ໄໝ ​ເຊິ່ງ​ເຮົາ​ບໍ່​ທັນ​ມີ​ຄວາມ​ພ້ອມ ​ແລະ ລະດັບ​ຄູ​ລາວ​ບໍ່​ທັນ​ເຖິງ. ຖ້າ​ຖາມ​ວ່າ​ສິ່ງ​ເຫລົ່ານັ້ນຄູ​ລາວ​ເຮັດ​ໄດ້​ບໍ່ ? ຈະ​ຕອບ​ວ່າ ​ເຮັດ​ໄດ້ ຖ້າ​ເຮັດ​ເພື່ອ​ເຮັດ ​ໂດຍ​ບໍ່​ຄຳ​ນຶງ​ເຖິງ​ຄຸນ​ນະພາ​ບ, ​ແຕ່​ຖ້າ​ເຮັດ​ໃຫ້​ໄດ້​ຄຸນ​ນະພາ​ບຄື​ເພິ່ນ​ແມ່ນ​ເຮັດ​ໄດ້​ຍາກ. ທັງ​ໝົດ​ນີ້​ລ້ວນ​ແຕ່​ແມ່ນ​ບົດຮຽນ​ການ​ສິດສອນ “​ແບບ​ໃໝ່” ວ່າ​ຊັ້ນ, ​ແຕ່​ທັງ​ໝົດ​ນັ້ນລ້ວນ​ແຕ່​ຢູ່​ເທິງ​ດາວ ​ແມ່ນ​ຄວາມ​ໄຝ່ຝັນ​ທີ່​ຫ່າງ​ເຫີ​ນຈາກ​ຄວາມ​ເປັນ​ຈິງ ​ເຊິ່ງທັງ​ໝົດ​ນັ້ນບໍ່​ໝາຍ​ຄວາມ​ວ່າ​ບໍ່​ຖືກຕ້ອງ, ບໍ່​ດີ ພຽງ​ແຕ່​ວ່າ​ບໍ່​ທັນ​ສອດຄ່ອງ​ກັບ​ສະພາບ​ຄວາມ​ເປັນ​ຈິງ​ຂອງ​ບ້ານ​ເຮົາ​ເທົ່າ​ນັ້ນ. ລອງຖາມ​ເບິ່ງ​ວ່າ ວິທີ​ສິດສອນ​ແບບ​ໃໝ່​ນັ້ນ ​ເຄີຍ​ປະ​ເມີນ​ເບິ່ງ​ແລ້ວ​ບໍ່ ? ມ​າ​ເຖິງ​ປັດຈຸບັນ​ໄດ້ຜົນ​ສໍ່າ​ໃດ ? ຄຸນນະພາ​ບການ​ຮຽນ-ການ​ສອນ​ສູງ​ສໍ່າ​ໃດ​ແລ້ວ ​ແລະ ປັດຈຸບັນ​ບັນດາ​ໂຮງຮຽນ​ໃນ​ລາວ​ຍັງ​ນຳ​ໃຊ້ ຫລື ບໍ່ ? ​ແລະ ມີຜົນສຳ​ເລັດ​ແນວ​ໃດ ? ພາຍຫລັງ​ມີ​ການ​ຂຶ້ນ​ເງິນ​ເດືອນ​ໃຫ້​ຄູ, ທຸ້ມການ​ລົງທຶນ​ໃຫ້​ຂະ​ແໜງ​ການ​ສຶກສາ​ຫລາຍ​ກວ່າ​ຂະ​ແໜງ​ການ​ອື່ນ​ແລ້ວ ຄວາມ​ກະຕືລືລົ້ນ, ຄວາມ​ຮັບຜິດຊອບ​ຕໍ່ໜ້າ​ທີ່​ການ​ເມືອງ​ຂອງ​ຕົນ ​ແລະ ຄວາມ​ທຸ້ມ​ເທ​ຂອງ​ຄູ​ຫລາຍ​ໜ້ອຍ​ພຽງ​ໃດ ? ຄຸນ​ນະພາ​ບການ​ສອນ​ດີ​ຂຶ້ນ ຫລື ບໍ່ ? ​ເຖິງ​ແມ່ນ​ມີ​ການ​ປັບປຸງ​ຫລັກສູດ​ການ​ຮຽນ-ການ​ສອນ​ຢ່າງ​ເນື່ອງນິດ​ລຽນຕິດ​ກໍ​ຕາມ, ​ແຕ່​ປານ​ນັ້ນຄຸນ​ນະພາ​ບການ​ສຶກສາ​ຂອງ​ລາວ​ກໍ​ຍັງ​ບໍ່​ສາມາດ​ທຽບ​ເທົ່າ​ກັບ​ພາກພື້ນ​ໄດ້. ບັນຫາ​ຕັ້ງຂຶ້ນວ່າ: ທິດ​ທາງ​ການ​ປັບປຸງ ​ແລະ ການ​ປະຕິ​ຮູບ​ການ​ສຶກສາ​ຂອງ​ພວກ​ເຮົາ​ໄປ​ຖືກ​ທິດ​ແລ້ວ​ບໍ ​ແລະ ສອດຄ່ອງ​ກັບ​ສະພາບ​ຄວາມ​ເປັນ​ຈິງ​ຂອງ​ລາວ​ແລ້ວ ຫລື ບໍ່ ? ​ເປັນ​ຫຍັງ​ຄຸນ​ນະພາ​ບການ​ສຶກສາ​ຈຶ່ງ​ບໍ່​ສາມາດ​ທຽບ​ທັນ​ກັບ​ພາກພື້ນ​ໄດ້ ?.

      ຈາກ​ດ້ານ​ທີ​ໜຶ່ງ​ນັ້ນ ມັນ​ໄດ້​ກາຍ​ເປັນ​ຜົນ​ພວງ​ໃສ່​ດ້ານ​ທີ​ສອງ ນັ້ນກໍ​ຄື ຄູ​ບໍ່​ສາມາດ​ນຳ​ໃຊ້​ຫລັກສູດ​ນັ້ນ​ໄດ້ ​ເພາະ​ມັນ​ເໜືອ​ຄວາມ​ສາມາດ​ທີ່​ຄູ​ຈະ​ຮັບ​ເອົາ​ໄດ້ ​ໂດຍ​ຜ່ານ​ການ​ຝຶກ​ອົບຮົມ​ພຽງ​ແຕ່ 2-3 ວັນ ຫລື 1 ອາທິດ​ເທົ່າ​ນັ້ນ, ​ແຕ່​ຄວາມ​ຮູ້​ວິຊາ​ສະ​ເພາະ​ຂອງ​ຄູ​ບໍ່​ໄດ້​ຮັບ​ການ​ຍົກ​ລະດັບ​ຈັກ​ເທື່ອ​ເລີຍ​ກໍ​ມີ. ຍົກ​ຕົວຢ່າງ​ຄື: ມີ​ບາງ​ຄົນ​ຮຽນ​ຈົບ​ຈາກ ມສຄ (ມະຫາວິທະຍາ​ໄລ​ດົງ​ໂດກ) ອອກ​ໄປ​ສອນ​ໄດ້​ຕັ້ງ 20-30 ປີ ​ແລ້ວ​ກໍ​ບໍ່​ເຄີຍ​ໄດ້​ຮັບ​ການ​ຍົກ​ລະດັບ​ຈັກ​ເທື່ອ​ເລີຍ. ສະນັ້ນ ຈຶ່ງ​ຈຳ​ເປັນ​ຕ້ອງ​ໄດ້​ເອົາ​ຄວາມ​ຮູ້​ເກົ່າໆ​ທີ່​ຕົນ​ຮຽນ​ມາ​ແຕ່​ດົນ​ນັ້ນມາ​ສອນ​ຈົນ​ເທົ່າ​ທຸກ​ມື້ນີ້, ​ເຖິງ​ແມ່ນ​ໄດ້​ມີ​ຕຳລາ​ໃໝ່ ​ແຕ່​ກໍ​ບໍ່​ໄດ້​ຜ່ານ​ການ​ຝຶກ​ອົບຮົມ. ສະນັ້ນ ​ເວລາ​ຂຶ້ນຫ້ອງ​ສອນ ນາຍຄູ​ຈຶ່ງ​ອາ​ໄສ​ແຕ່​ອ່ານ​ໃຫ້​ນັກຮຽນ​ຈົດ​ກ່າຍ​ເປັນຕົ້ນຕໍ ຫລື ບອກ​ໃຫ້​ນັກຮຽນ​ກ່າຍ​ບົດຮຽນ​ໃສ່​ປຶ້ມຂຽນ​ຂອງ​ຕົນ​ເອົາ​​ເອງ ​ເພື່ອ​ກວດ​ເອົາ​ຄະ​ແນນ.

     ດ້ານ​ທີ​ສອງ ​ເຫັນ​ວ່າ​ຫລັກສູດ​ການ​ຮຽນ​ປັດຈຸບັນ​ຍັງ​ເປັນ​ພຽງ​ທິດ​ສະ​ດີ​ເປັນຕົ້ນຕໍ ​ໂດຍ​ປາສະຈາກ​ພາກ​ປະຕິບັດ​ຕົວ​ຈິງ. ​ເວົ້າ​ເຖິງ​ບ່ອນ​ນີ້​ແມ່ນ​ມີ​ຄວາມ​ສຳຄັນ​ຫລາຍ​ໃນ​ຫລັກສູດ​ການ​ຮຽນ​-ການ​ສອນ. ຈາກ​ບ່ອນ​ວ່າ​ຮຽນ​ທິດ​ສະ​ດີ​ເປັນຕົ້ນຕໍ​ຈຶ່ງ​ຮູ້​ແຕ່​ເວົ້າ ​ແຕ່​ເຮັດ​ຕົວ​ຈິງ​ບໍ່​ເປັນ​ເຊັ່ນ: ສອນ​ເຕັກນິກ​ໃນ​ການ​ປູກ​ຜັກ​ກໍ​ໄດ້​ແຕ່​ແນະນຳ​ໃຫ້​ຮູ້​ວິທີ​ເລືອກ​ແນວ​ພັນ, ການ​ຂຸດ​ໜານ​ແປງ​ໜານ, ຂະໜາດ​ກວ້າງຍາວ​ສູງ​ຂອງ​ໜານ, ວິທີ​ການ​ຫວ່ານ​ແກ່ນ, ວິທີ​ກ້າ ​ແລະ ບົງ​ເບ້ຍ​ເທົ່າ​ນັ້ນ ​ແຕ່​ບໍ່​ໄດ້​ນຳພາ​ໃຫ້​ນັກຮຽນ​ເຮັດ​ຕົວ​ຈິງ ​ເຊິ່ງ​ແຕກ​ຕ່າງ​ກັບ​ຜູ້​ຂ້າ​ຮຽນ​ໃນ​ສະ​ໄໝ​ສົງຄາມ​ຮຸກ​ຮານ​ຂອງ​ຈັກກະພັດ ​ເຖິງ​ແມ່ນ​ຈະ​ຮຽນ​ຢູ່​ໃນ​ຖ້ຳ​ໃນ​ຮູ ​ແລະ ມີ​ຄວາມທຸກ​ຍາກ​ຂາດ​ເຂີນ​ທຸກ​ຢ່າງ ​ແຕ່​ປານ​ນັ້ນການ​ຮຽນ-ການ​ສອນ​ຍັງ​ໄດ້​ຕິດ​ພັນ​ກັບ​ການ​ເຮັດ​ຕົວ​ຈິງ​ພາຍຫລັງ​ຮຽນ​ທິດ​ສະ​ດີ. ຕົວຢ່າງ: ຮຽນ​ວິທີ​ປູກ​ຜັກກາດ​ກໍ​ຕ້ອງ​ປູກ​ຜັກກາດ​ຕົວ​ຈິງ ຈົນ​ໄດ້ກິນ​ໄດ້​ຂາຍ, ຮຽນ​ວິທີ​ຕີ​ພ້າ ນາຍຄູ​ກໍ​ເອົາ​ເຫລັກ​ມາ​ນຳພາ​ນັກຮຽນ​ຕີ​ພ້າ​ຕົວ​ຈິງ​ຈົນ​ໄດ້​ໃຊ້​ໄດ້​ຟັນ, ຮຽນ​ວິທີ​ເຮັດ​ແປ້ນ​ມ້າ​ນັ່ງ​ຮຽນ​ຈາກ​ນັ້ນກໍ​ເຮັດ​ຕົວ​ຈິງ​ຈົນ​ມີ​ຕັ່ງ​ນັ່ງ​ຮຽນ.

      ສິ່ງ​ດີໆ​ ຫລັກສູດ​ການ​ຮຽນ-ການ​ສອນ​ດີໆ​ດັ່ງກ່າວ ດຽວ​ນີ້​ບໍ່​ຮູ້​ວ່າ​ຫາຍ​ໄປ​ໃສ​ໝົດ​ແລ້ວ ທັງໆ​ທີ່​ປັດຈຸບັນ​ມີ​ເງື່ອນ​ໄຂ​ລື່ນ​ສະ​ໄໝ​ສົງຄາມ ຢູ່​ປ່າ​ຢູ່​ດົງ​ຕັ້ງຫລາຍ​ພັນ​ເທົ່າ ​ແຕ່​ເປັນ​ຫຍັງ​ເຮັດ​ບໍ່​ໄດ້ ? ​ແລະ ສະ​ໄໝ​ນັ້ນ​ເປັນ​ຫຍັງ​ເຮັດ​ໄດ້ ? ຍ້ອນ​ຫຍັງ​ກັນ​ແທ້ ?.

     ຖ້າ​ເວົ້າ​ເຖິງ​ຫລັກສູດ​ການ​ຮຽນ-ການ​ສອນ​ຊັ້ນປະຖົມ​ກໍ​ມີ​ຫັດ​ຂຽນ​ງາມ, ຂຽນ​ທວາຍ, ນາຍຄູ​ຕ້ອງ​ຈັບ​ມື​ນັກຮຽນ​ແຕ້ມ​ຕົວ​ໜັງສື​ແຕ່​ລະ​ຕົວ ​ເພື່ອ​ຂຽນ​ໃຫ້​ງາມ, ຂຽນ​ໃຫ້​ຖືກ​ກັບ​ຫລັກ​ໄວຍາກອນ. ສິ່ງ​ເຫລົ່ານັ້ນ​ເປັນ​ຫຍັງ​ໃນ​ຫລັກສູດ​ການ​ຮຽນ-ການ​ສອນ​ຢູ່​ຊັ້ນປະຖົມ​ຈຶ່ງ​ບໍ່​ມີ​ອີກ ? ປັດຈຸບັນ​ສັງ​ເກດ​ເຫັນ​ວ່າ​ນັກຮຽນ​ສ່ວນ​ຫລາຍ​ແມ່ນ​ຂຽນ​ໜັງສື​ຂີ້ຮ້າຍ​ຫລາຍ ​ແລະ ຂຽນ​ຜິດ​ຫລາຍ ບໍ່​ຖືກ​ກັບ​ຫລັກ​ໄວຍາກອນ, ບໍ່​ຖືກ​ພາສາ​ລາວ. ມີ​ນັກຮຽນ​ຈຳນວນ​ໜຶ່ງ​ຮຽນ​ຈົບມໍປາຍ​ແລ້ວ​ຫານ​ເລກ 2 ​ໂຕ​ບໍ່​ໄດ້, ອ່ານໜັງສື​ພິມ​ບໍ່​ຂອດ. ນີ້​ແຫລະ​ຄື​ຄຸນ​ນະພາ​ບຂອງ​ການ​ສຶກສາ​ໃນ​ປັດຈຸບັນ.

​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ - Wave100S AD to Website 2020 0 - ​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ

      ​ໂດຍ​ຢູ່​ໃນ​ວົງ​ການ​ສຶກສາມາ​ດົນ ​ແລະ ສິດສອນ​ມາ​ຫລາຍ​ປີ ຂໍ​ສະ​ເໜີ​ວ່າ: ທິດ​ທາງ​ການ​ປະຕິ​ຮູບ ​ແລະ ປັບປຸງ​ລະບົບ​ການ​ສຶກສາ​ຕ້ອງ​ປະຕິບັດ​ຕາມ​ທິດ​ທາງ​ແບບ​ນີ້:

     1. ສ້າງ​ຄົນ​ພົນລະ​ເມືອງ​ລາວ​ໃຫ້​ມີນ້ຳ​ໃຈ​ຮັກ​ຊາດ, ຮັບ​ໃຊ້​ປະຊາຊົນ​ຢ່າງ​ແທ້​ຈິງ. ຕໍ່​ບັນຫາ​ນີ້ ຖ້າ​ຢາກ​ໃຫ້​ຄົນ​ລາວ​ເກີດ​ຄວາມ​ຮັກ​ຊາດ, ຮັກ​ບ້ານ​ເກີດ​ເມືອງ​ນອນ​ຢ່າງ​ແທ້​ຈິງ ພວກ​ເຮົາ​ຄວນ​ໃຫ້​ນັກຮຽນ​ໄດ້​ເຂົ້າ​ເຖິງ​ປະຫວັດສາດ​ການ​ກຳ​ເນີ​ດຊາດ​ລາວ, ການ​ຕໍ່ສູ້​ຕີ​ສັດຕູ​ຜູ້​ຮຸກ​ຮານ​ລາວ​ໃນ​ປະຫວັດສາດ​ໃຫ້​ເລິກ​ເຊິ່ງ​ເຖິງ​ຖອງ, ​ໃຫ້​ຖື​ເອົາ​ວິຊາ​ປະຫວັດສາດ​ເປັນ​ບູລິ​ມະ​ສິດ​ໃນ​ການ​ສຶກສາ​ຄວາມ​ຮັກ​ຊາດ, ຄວາມ​ເປັນ​ຊາດ ​ແລະ ສະຕິຊາດ​ຂອງ​ຄົນ​ລາວ ຄົນ​ລາວ​ຈຶ່ງ​ຈະ​ກາຍ​ເປັນ​ຊາດ​ນິຍົມ ດັ່ງ​ຈີນ, ຫວຽດນາມ, ​ໄທ, ສ.​ເກົາຫລີ. ການ​ເປັນ​ຊາດ​ນິຍົມ​ແມ່ນ​ການສະ​ແດງ​ໃຫ້​ເຫັນ​ຄວາມ​ຮັກ​ຊາດ​ທີ່​ສູງ​ສົ່ງ​ຂອງ​ຄົນ​ພາຍ​ໃນ​ຊາດ.

     2. ການ​ປະຕິ​ຮູບ​ການ​ສຶກສາ, ​ໃນ​ນັ້ນ ມີ​ການ​ປັບປຸງ​ປົວ​ແປງ​ຫລັກສູດ​ການ​ຮຽນ-ການ​ສອນ. ຫລັກສູດ​ການ​ຮຽນ-ການ​ສອນ​ດັ່ງ​ກ່າວ​ຕ້ອງ​ແທດ​ເໝາະ, ສອດຄ່ອງ​ກັບ​ສະພາບ​ແວດ​ລ້ອມ​ຄວາມ​ເປັນ​ຈິງ​ທາງ​ດ້ານ​ສັງຄົມ, ທຳ​ມະ​ຊາດ ​ແລະ ຄວາມ​ກ້າວໜ້າ​ທາງ​ດ້ານ​ເຕັກ​ໂນ​ໂລ​ຊີ, ວິທະຍາສາດ ​ແລະ ຄວາມ​ອາດ​ສາມາດ​ຂອງ​ຄູ​ລາວ.

      3. ຫລັກສູດ​ການ​ຮຽນ-ການ​ສອນ​ຕ້ອງ​ຕິດ​ພັນ​ກັບ​ກິດຈະກຳ​ຕົວ​ຈິງ ຫລື ​ເວົ້າຢ່າງ​ໜຶ່ງ​ກໍ​ໝາຍ​ຄວາມ​ວ່າ: ທິດ​ສະ​ດີ​ຕ້ອງ​ໄປ​ຄຽງ​ຄູ່​ກັບ​ເຮັດ​ຕົວ​ຈິງ.

     4. ຍົກ​ລະດັບ​ຄວາມ​ຮູ້​ວິຊາ​ສະ​ເພາະ​ຂອງ​ຄູ​ໃຫ້​ສູງ​ຂຶ້ນຢ່າງ​ບໍ່​ຢຸດ​ຢັ້ງ, ​ໃຫ້​ທັນ​ກັບ​ການ​ປ່ຽນ​ແປງ​ຄວາມ​ກ້າວໜ້າ​ທາງ​ວິທະຍາສາດ​ໃນ​ໄລຍະ​ໃໝ່.

​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ - WhatsApp Image 2020 05 27 at 5 - ​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ
​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ - WhatsApp Image 2020 05 27 at 5 - ​ເປັນ​ຫ່ວງ​ນຳ​ການ​ສຶກສາລາ​ວທີ່​ບໍ່​ທັນ​ມີ​ຄຸນ​ນະພາ​ບທຽບ​ເທົ່າ​ກັບ​ພາກພື້ນ
error: Alert: ເນື້ອຫາຂ່າວມີລິຂະສິດ !!