ຂາຍ​ປະ​ເວ​ນີ​ແມ່ນ​ເຄືອ​ຂ່າຍ​ການ​ຄ້າ​ມະນຸດ

- Lpn 111 - ຂາຍ​ປະ​ເວ​ນີ​ແມ່ນ​ເຄືອ​ຂ່າຍ​ການ​ຄ້າ​ມະນຸດ
- Untitled design - ຂາຍ​ປະ​ເວ​ນີ​ແມ່ນ​ເຄືອ​ຂ່າຍ​ການ​ຄ້າ​ມະນຸດ

ທິດ​ກໍ່າ:

      ​ແຫ​ລ່ງຂ່າວ​ຈາກ​ສື່​ອອນ​ລາຍ​ປະຈຳ​ວັນ​ແຈ້ງວ່າ: ທາງ​ພະ​ແນ​ກຕ້ານ​ການ​ຄ້າ​ມະນຸດ ກໍ​ຄື​ຫ້ອງ​ຕຳຫລວດ​ ກອງ​ບັນຊາ​ການ​ປ້ອງ​ກັນ​ຄວາມ​ສະຫງົບ​ນະ ຄອນ​ຫລວງ ​ໄດ້​ກວດ​ພົບ​ເຫັນ​ຜູ້​ຂາຍ​ປະ​ເວ​ນີ​ເຖິງ 554 ຄົນ. ຈາກ​ຕົວ​ເລກ​ທີ່​ວ່າ​ນີ້ ອາດ​ມີ​ແຕ່​ບາງ​ຈຸດ​ບາງ​ບ່ອນ​ທີ່​ເຫັນ​ວ່າ​ມີ​ຄວາມ​ສ່ຽງ ​ແລະ ມີ​ຄວາມ​ສັບສົນ​ສູງ, ​ແຕ່​ຖ້າ​ຫາກ​ມີ​ການ​ກວດກາ​ຢ່າງ​ລະອຽດ​ຖີ່​ຖ້ວນ​ຈິງ​ຈັງ ຕົວ​ເລກ​ອາດ​ເພີ່ມ​ຂຶ້ນ​ຫລາຍກວ່າ​ນີ້. ​ເວົ້າສະ​ເພາະ​ແຕ່​ຢູ່​ໃນ​ຂອບ​ເຂດ​ນະຄອນຫລວງ​ວຽງ​ຈັນ ນັບ​ແຕ່​ຮ້ານ​ໄຟ​ຫຍິບ​ແຍບ, ຮ້ານ​ຄາ​ລາ​ໂອ​ເກະ, ຮ້ານ​ກິນ​ດື່ມ, ​ໂຮງ​ແຮມ​ທີ່​ມີ​ສູນ​ບັນ​ເທີ​ງບາງ​ບ່ອນ​ເຫັນ​ປານ​ໝູ່​ມົດ​ໝູ່​ປວກ​ມີ​ຜູ້​ຕຸ້ຍຜູ້​ຈ່ອຍ, ຜູ້​ຂີ້ຮ້າຍ​ຜູ້​ງາມ, ມີ​ຜູ້​ສູງ​ຜູ້​ຕໍ່າ, ຜູ້​ດຳ​ຜູ້​ຂາວ ສຸດ​ແລ້ວ​ແຕ່​ຄວາມ​ປະ​ເອີ​ບພໍ​ໃຈ. ນີ້​ຄື​ຄວາມ​ເປັນ​ຈິງ​ໃນ​ການ​ຂາຍ​ປະ​ເວ​ນີ​ໃນ​ເງື່ອນ​ໄຂ​ປະ​ເທດ​ທີ່​ພວມ​ມີ​ການ​ພັດທະນາ ​ເຊິ່ງມີ​ທັງ​ອັນ​ດີ ​ແລະ ສິ່ງ​ຫຍໍ້​ທໍ້​ໃນ​ສັງຄົມ.

      ​ແນວ​ໃດ​ກໍ​ຕາມ, ສຳລັບ​ປະ​ເທດ​ເຮົາ​ແມ່ນ​ຖື​ວ່າການ​ຂາຍ​ປະ​ເວ​ນີ​ເປັນ​ສິ່ງ​ທີ່​ຜິດ​ກົດໝາຍ, ຜິດ​ຈັນຍາທຳ, ຜິດ​ຮີດຄອງ​ປະ​ເພນີ​ຂອງ​ຊາດ​ລາວ​ເຮົາ ​ແລະ ຍັງ​ຖື​ວ່າ​ມັນ​ນອນຢູ່ໃນເຄືອຂ່າຍການຄ້າມະນຸດທີ່ປະເທດເຮົາໄດ້ເຂົ້າຮ່ວມເປັນພາ ຄີກ່ຽວກັບການຕ້ານການຄ້າມະນຸດ. ເພາະສະນັ້ນ ທາງການເຮົາຈຶ່ງໄດ້ເລັ່ງກວດ ກາ ແລະ ຕ້ານການຄ້າປະເວນີໃຫ້ຫລຸດໜ້ອຍຖອຍລົງເທື່ອລະກ້າວ. ເພື່ອເປັນ ການສະກັດກັ້ນ ແລະ ຕ້ານບັນຫາດັ່ງກ່າວ ທາງກອງບັນຊາການປ້ອງກັນ ຄວາມສະຫງົບນະຄອນຫລວງ ໄດ້ວາງຄາດໝາຍບັນດາໜ້າວຽກທີ່ຕ້ອງໄດ້ເຮັດ ຄື: ອັນທີໜຶ່ງ ແມ່ນສຸມໃສ່ເກັບ​ກຳ​ສະຖິຕິ​ເປົ້າໝາຍ​ຜູ້​ທີ່​ຄ້າ​ມະນຸດ, ຂາຍ​ປະ​ເວ​ນີ ​ແລະ ບັນຫາ​ອາດຊະຍາ​ກຳ​ອື່ນໆ. ສອງ​ ​ໂຄສະນາ​ປູກ​ຈິດ​ສຳນຶກ​ໃຫ້​ປະຊາຊົນ​ບັນດາ​ເຜົ່າ, ບັນດາ​ຊັ້ນຄົນ​ໃຫ້​ປະຕິບັດ​ລະບຽບ​ກົດໝາຍ ​ແລະ ​ໃຫ້​ເຫັນ​ໄດ້ຜົນ​ຮ້າຍ​ຂອງ​ການ​ຄ້າ​ມະນຸດ, ສາມ ​ດຳ​ເນີນ​ຄະດີ​ຕໍ່​ຜູ້​ທີ່​ລະ​ເມີດ​ຕາມ​ກົດໝາຍ ​ແລະ ປົກ​ປ້ອງ​ຜູ້​ຖືກ​ເຄາະ​ຮ້າຍ. ສີ່ ​ແກ້​ໄຂຄະດີ​ຕໍ່​ບັນດາ​ເປົ້າໝາຍ​ທີ່​ມີ​ໃນ​ນະຄອນ ຫລວງ​ວຽງ​ຈັນ​ໃຫ້​ສອດຄ່ອງ​ກັບ​ກົດໝາຍ ​ແລະ ຕາມ​ຄວາມ​ສາມາດ​ຕົວ​ຈິງ. ຫ້າ ກວດກາ​ຕິດຕາມ​ຄົນ​ເຂົ້າອອກ​ຕາມ​ດ່ານ​ສາກົນ ​ແລະ ທ້ອງ​ຖິ່ນ​ຕ່າງໆ​ໃນ​ຂອບ​ເຂດ​ນະຄອນຫລວງ​ວຽງ​ຈັນ. ຫົກ ປະສານ​ສົມທົບ​ກັບ​ພາກສ່ວນ​ກ່ຽວຂ້ອງ ​ເພື່ອ​ຊ່ວຍ​ເຫລືອ​ຜູ້​ປະສົບ​ເຄາະ​ຮ້າຍ​ໃຫ້​ທັນ​ເວລາ ​ແລະ ມີ​ຄວາມ​ປອດ​ໄພ. ​ເຈັດ ສຶກສາ​ອົບຮົມ​ຕໍ່​ຜູ້​ທີ່​ມີ​ຄວາມ​ສ່ຽງ​ໃຫ້​ຮັບ​ຮູ້ ​ແລະ ​ເຂົ້າ​ໃຈ​ເຖິງ​ຜົນ​ຮ້າຍ​ຂອງ​ການ​ຄ້າ​ມະນຸດ ​ແລະ ຄ້າ​ປະ​ເວ​ນີ.

      ດັ່ງ​ພວກ​ເຮົາ​ຮັບ​ຮູ້​ນຳ​ກັນ​ແລ້ວ​ວ່າ: ບັນຫາ​ການ​ຄ້າ​ມະນຸດ ​ແລະ ຂາຍ​ປະ​ເວ​ນີ​ເປັນ​ປາກົດການ​ຫຍໍ້​ທໍ້​ອັນ​ໜຶ່ງ​ຂອງ​ສັງຄົມ​ທີ່​ເປັນ​ອັນຕະລາຍ ​ແລະ ພົວພັນ​ເຖິງ​ຄວາມ​ສະຫງົບ​ສຸກ​ຂອງ​ບ້ານ​ເມືອງ. ຖ້າ​ພວກ​ເຮົາ​ບໍ່​ພ້ອມ​ກັນ​ຕ້ານ ​ແລະ ສະກັດ​ກັ້ນຢ່າງ​ເຖິງ​ຖອງ​ແມ່ນ​ຈະ​ມີ​ຜົນ​ກະທົບ​ຕໍ່​ເສດຖະກິດ-ສັງຄົມ​ຂອງ​ປະ​ເທດ. ນອກຈາກ​ນັ້ນ ກໍ​ພົວພັນ​ເຖິງ​ຄວາມ​ເປັນ​ມະນຸດສະທຳ ​ແລະ ສິດທິ​ມະນຸດ. ສຳລັບ​ໃນ​ປີ 2019 ຜ່ານ​ມາ, ພະ​ແນ​ກການ​ກ່ຽວຂ້ອງ​ກໍ​ໄດ້​ເຮັດ​ໜ້າ​ທີ່​ຂອງ​ຕົນ​ໄດ້​ດີ​ສົມຄວນ ​ເປັນຕົ້ນສາມາດ​ເກັບ​ກຳ​ສະຖິຕິ​ໃນ​ຈຳນວນ​ໂຮງ​ແຮມ 250 ​ແຫ່ງ ​ແມ່ນ​ມີ​ການ​ຄ້າ​ປະ​ເວ​ນີ​ເຖິງ 18 ​ແຫ່ງ, ຮ້ານ​ເສີມ​ສວຍ​ຈຳນວນ 888 ​ແຫ່ງ​ມີ​ການ​ຄ້າຂາຍ​ປະ​ເວ​ນີ 2 ​ແຫ່ງ, ​ເຮືອນ​ພັກ 262 ຫລັງ​ມີ 2 ຫລັງ​ຄ້າ​ປະ​ເວ​ນີ, ຮ້ານ​ອາຫານ-ຮ້ານ​ກິນ​ດື່ມ​ຈຳນວນ 918 ຮ້ານ​ມີ 84 ຮ້ານ​ຄ້າຂາຍ​ປະ​ເວ​ນີ, ຮ້ານ​ຄາ​ລາ​ໂອ​ເກະ 107 ຮ້ານ​ມີ 3 ຮ້ານ​ຄ້າ​ປະ​ເວ​ນີ ​ແລະ ນອກຈາກ​ນັ້ນ ກໍ​ຍັງ​ມີ​ພື້ນທີ່​ສັບສົນ​ມີ​ຄວາມ​ສ່ຽງ​ເຖິງ 11 ຈຸດ. ​ໄປ​ຄຽງ​ຄູ່​ກັນນັ້ນ ຍັງ​ໄດ້​ນຳ​ຕົວ​ຜູ້​ຄ້າຂາຍ​ປະ​ເວ​ນີມາ​ສຶກສາ​ອົບຮົມ ​ແລະ ​ເຮັດ​ບົດ​ບັນທຶກ​ໃຫ້​ພາກັນ​ປະລະ​ອາຊີບ​ນີ້​ເຖິງ 554 ຄົນ.

- Wave100S AD to Website 2020 0 - ຂາຍ​ປະ​ເວ​ນີ​ແມ່ນ​ເຄືອ​ຂ່າຍ​ການ​ຄ້າ​ມະນຸດ

      ນັບ​ແຕ່​ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ໄດ້​ເປີດ​ປະຕູ​ສູ່​​ໂລກ​ພາຍ​ນອກ​ໃນ​ເງື່ອນ​ໄຂ​ໂລກ​ພວມ​ມີ​ການ​ປ່ຽນ​ໄປ​ຢ່າງ​ໄວວາ​ຕາມ​ກະ​ແສ​ໂລກາ​ພິວັດ​ ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ກໍ​ມີ​ຫລາຍ​ອັນ​ຕາ​ມມາ ທັງ​ອັນ​ດີ ​ແລະ ອັນ​ຮ້າຍ ​ໃນ​ນີ້​ກໍ​ມີ​ອັນ​ດີ ​ແລະ ຕັ້ງໜ້າ ຄື​ປະ​ເທດ​ຊາດ​ມີ​ການ​ສ້າງສາ​ພັດທະນາ, ມີ​ຄວາມ​ຈະ​ເລີ​ນຮຸ່ງ​ເຮືອງ​ໄປ​ຕິກໆ. ສ່ວນ​ອັນ​ບໍ່​ດີ​ຫລ້າຫລັງ​ທີ່​ມາ​ກົດ​ໜ່ວງ​ຖ່ວງ​ດຶງ​ກໍ​ມີ​ຫລາຍ​ດ້ານ ​ເຊິ່ງ​ໃນ​ປາກົດການ​ດັ່ງກ່າວ​ກໍ​ແມ່ນ​ການ​ຄ້າ​ມະນຸດ, ການ​ຂາຍ​ປະ​ເວ​ນີທີ່​ຜິດ​ກັບ​ກົດໝາຍ, ຈັນຍາທຳ​ຂອງ​ຊາດ ​ແລະ ຜິດ​ກັບ​ສິດທິ​ມະນຸດ​ທີ່​ຄົນ​ທັງ​ໂລກ​ພາກັນ​ຕ້ານ ​ແລະ ສະກັດ​ກັ້ນ ​ເພື່ອ​ບໍ່​ໃຫ້​ແຜ່​ລາມ​ເໝືອນ​ດັ່ງ​ພະຍາດ​ສາຍ​ພັນ​ໃໝ່​ໂຄ​ໂຣນາ​ທີ່​ພວມ​ລະບາດ​ສະ​ເທືອ​ນ​ໂລກ.

- WhatsApp Image 2020 05 27 at 5 - ຂາຍ​ປະ​ເວ​ນີ​ແມ່ນ​ເຄືອ​ຂ່າຍ​ການ​ຄ້າ​ມະນຸດ
- WhatsApp Image 2020 05 27 at 5 - ຂາຍ​ປະ​ເວ​ນີ​ແມ່ນ​ເຄືອ​ຂ່າຍ​ການ​ຄ້າ​ມະນຸດ
error: Alert: ເນື້ອຫາຂ່າວມີລິຂະສິດ !!