​ໂຣກລະບາດ​ມັນ​ເກີດ​ຈາກ​ສະພາວະ​ແວດ​ລ້ອມ

- b8a0ac71 0f0d 4953 a625 efc24497d0b5 - ​ໂຣກລະບາດ​ມັນ​ເກີດ​ຈາກ​ສະພາວະ​ແວດ​ລ້ອມ
- Untitled design - ​ໂຣກລະບາດ​ມັນ​ເກີດ​ຈາກ​ສະພາວະ​ແວດ​ລ້ອມ

ທິດ​ກໍ່າ:

      ມະ​ຫັນ​ຕະ​ໄພ​ອັນ​ເກີດ​ຈາກ​ພະຍາດ​ສາຍ​ພັນ​ໃໝ່​ເອີ້ນ​ວ່າ: ​ເຊື້ອ​ໄວຣັສ​ໂຄ​ໂຣນາ ທີ່​ພວມ​ສັງຫານ​ຄົນຢູ່ເມືອງອູ່ຮັນປະເທດຈີນຕາຍໄປແລ້ວ 200 ກວ່າສົບ ແລະ ຍັງບໍ່ຮູ້ວ່າຈະເພີ່ມຂຶ້ນເປັນເທົ່າໃດກວ່າຈະຢັບຢັ້ງ ຫລື ປາບມັນລົງໄດ້ຢ່າງສິ້ນເຊີງ. ໃນວັນທີ 29 ມັງກອນຜ່ານມາ ໄດ້ມີຂ່າວຜ່ານສື່ອອນລາຍວ່າມີຜູ້​ໜຶ່ງສາມາດປິ່ນປົວໃຫ້ຫາຍຂາດຈາກພະ ຍາດດັ່ງກ່າວນີ້ໄດ້ເປັນລາຍທຳອິດ ແລະ ຫລ້າສຸດກໍມີແຫລ່ງຂ່າວຜ່ານສື່ ອອນລາຍຕື່ມ​ອີກ​ວ່າ: ມາ​ຮອດ​ປັດຈຸບັນ​ສາມາດ​ຄົ້ນພົບ​ຢາ​ວັກ​ແຊັງ​ປິ່ນປົວ ຫລື ຢັບຢັ້ງ​ໄວຣັສ​ໂຄ​ໂຣນາ​ໄດ້​ແລ້ວ. ​ເມື່ອ​ເປັນ​ດັ່ງ​ວ່າ​ນີ້ ຄວາມ​ຫວັງ​ຂອງ​ຜູ້​ທີ່​ກຳລັງ​ເຈັບ​ເປັນ ​ແລະ ຜູ້​ທີ່​​ບໍ່​ທັນ​ຕິດ​ເຊື້ອ​ໄວຣັສດັ່ງ ກ່າວ​ກໍ​ຍັງ​ພໍ​ມີ​ຄວາມ​ຫວັງ​ຕໍ່​ອະນາຄົດ​ ສາມາດ​ຕໍ່​ຍອດ​ເອົາ​ຊີວິດ​ອິນ​ຊີ​ໄປ​ອີກ​ໃນ​ບົນ​ໂລກ​ວາຕະ​ສົງສານ​ທີ່​ພວມ​ປ່ຽນ​ແປງ​ໄປ​ຢ່າງ​ສັບສົນ​ອົນ​ທະ​ການ​ໃນ​ແຕ່ລະ​ໄລຍະ.

      ​ແນວ​ໃດ​ກໍ​ຕາມ, ​ໃນ​ເມື່ອ​ພວກ​ເຮົາ​ສາມາດ​ປາບ​ພະຍາດ​ນີ້​ລົງ​ໄດ້​ແລ້ວ ​ໃນ​ອະນາຄົດ​ຕໍ່ໜ້າ​ອີກ​ຈັກ​ເດືອນ, ຈັກ​ປີ​ຈະ​ມີ​ເຊື້ອ​ໂຣກຊະນິດ​ໃໝ່​ມາ​ເປັນ​ມັດຈຸລາດ​ຂ້າ​ຄົນ​ຕື່ມ​ອີກ ​ເພາະວ່າ​ໃນ​ໄລຍະ​ຜ່ານ​ມານັ້ນ ​ໄດ້​ເກີດ​ມີ​ເຊື້ອ​ໂຣກຊະ ນິດ​ຕ່າງໆ​ໄດ້​ສັງ​ເວີຍ​ຊີວິດ​ອິນ​ຊີ​ຄົນ​ເຮົາ​ມາ​ຫລາຍໝື່ນ​ຫລາຍ​ແສນ​ຄົນ​ແລ້ວ​ເຊັ່ນ: ພະຍາດ​ອີ​ໂບລາ​ຂ້າ​ຄົນ​ຕາຍ​ເຖິງ 13.562 ຄົນ, ພະຍາດ​ລະບົບ​ຫາຍ​ໃຈ​ຕາ​ເວັນ​ອອກ​ກາງ (​ເມີ​ສ໌ MERS) ຂ້າ​ໄປ​ແລ້ວ 858 ຄົນ, ພະຍາດ​ອັກ​ເສບ​ສະໝອງ​ນີປາ (NIPAh) ຕາຍ 398 ຄົນ, ພະຍາດ​ລະບົບ​ຫາຍ​ໃຈ​ກະທັນ​ຫັນ​ຮຸນ​ແຮງ (ຊາຣ໌ SARS) ​ໄດ້​ສັງຫານ 774 ຄົນ ​ແລະ ຈາກ​ເຊື້ອ​ໄວຣັສ​ໂຄ​ໂຣນາ​ກໍ​ຕາຍ​ໄປ​ແລ້ວ​ເຖິງ 300 ກວ່າ​ຄົນ. ​ເມື່ອ​ສັງ​ລວມ​ແລ້ວ​ກໍ​ປະມານ​ເກືອບ 2 ໝື່ນ​ຄົນ. ຕາມ​ການຄົ້ນຄວ້າ​ນັກວິທະຍາສາດ, ທ່ານ​ໝໍຜູ້​ຊ່ຽວຊານ​ທັງຫລາຍ​ກໍ​ວ່າ: ສາ​ເຫດ​ອັນ​ເປັນ​ທີ່​ມາ​ຂອງ​ເຊື້ອ​ໄວຣັສ​ໂຄ​ໂຣນາ​ແມ່ນ​ມາ​ຈາກ​ໂຕ​ເຈຍ​ເປັນຕົ້ນ​ເຫດ ​ເພາະວ່າ​ຢູ່​ເມືອງ​ອູ່​ຮັນ​ມີ​ໂຕ​ເຈຍ​ຫລາຍ ​ແລະ ຊາວ​ເມືອງ​ອູ່​ຮັນ​ກໍ​ມັກ​ເອົາ​ໂຕ​ເຈຍ​ມາ​ປຸງ​ແຕ່ງ​ເປັນ​ອາຫານ​ຊະນິດ​ຕ່າງໆ ​ເກືອບ​ວ່າ​ເປັນ​ປະ​ເພນີ​ຍອດ​ນິຍົມ.

      ​ແນວ​ໃດ​ກໍ​ດີ, ຕາມ​ເຮົາ​ຄິດ ຖ້​າ​ໂຕ​ເຈຍ​ເປັນຕົ້ນ​ເຫດ​ແທ້ໆ ຂັ້ນຕໍ່​ໄປ​ຄົນ​ທັງຫລາຍ​ກໍ​ອາດ​ຈະ​ຫລຸດຜ່ອນ​ກິນ​ໂຕ​ເຈຍ, ພົນລະ​ເມືອງ​ເຈຍ​ກໍ​ອາດ​ຈະ​ເພີ່ມ​ຂຶ້ນ ​ແລະ ອີກ​ປະການ​ໜຶ່ງ ພົນລະ​ເມືອງ​ເຈຍ​ທັງຫລາຍ​ກໍ​ອາດ​ຈະ​ບໍ່​ຖືກ​ບຸກລຸກ​ຮາວີ​ຈາກ​ເງື່ອມມື​ຂອງ​ພວກ​ມະນຸດ​ຄື​ດັ່ງ​ທຸກ​ວັນ​ນີ້. ​ເວົ້າ​ເຖິງ​ຄົນ​ມັກ​ກິນ​ໂຕ​ເຈຍ​ກໍ​ບໍ່​ສະ​ເພາະ​ແຕ່​ຊາວ​ຈີນ, ຊາວ​ລາວ​ເຮົາ​ກໍ​ມັກ​ກິນ​ເໝືອນ​ກັນ, ສະ​ເພາະ​ຢູ່​ລາວ​ເຮົາ​ທັງ​ຊອກ​ຫາ​ຍາກ​ລາຄາ​ກໍ​ແພງ. ​ໃນ​ສະ​ໄໝ​ນີ້ ຄົນ​ລາວ​ບາງ​ຄົນ​ໄດ້​ກິນ​ໝົກ​ເຈຍ​ຖື​ວ່າ​ໂຊກ​ດີ ທັງ​ເປັນ​ອາຫານ​ຍອດ​ນິຍົມ​ອີກ​ດ້ວຍ. ​ເວົ້າ​ເຖິງ​ການ​ເກີດ​ໂຣກລະບາດ ຫລືວ່າ ການ​ເປັນ​ພະຍາດ​ບາດ​ເຍົາ​ຂອງ​ຄົນ​ເຮົາ​ສະ​ໄໝ​ນີ້​ມັນ​ມີ​ທີ່​ໄປ​ທີ່​ມາ​ຫລາຍ​ອັນ​ພັນ​ຢ່າງ ​ແຕ່​ອັນ​ທີ່​ແນ່​ແທ້​ມັນ​ກໍ​ເກີດ​ມາ​ຈາກ​ສະພາບ​ແວດ​ລ້ອມ​ອ້ອມ​ຕົວ​ເຮົາ​ນັ້ນ​ເອງ ​ເປັນຕົ້ນວ່າ​ຈາກ​ທຳ​ມະ​ຊາດ​ມາສູ່​ຄົນ, ຈາກ​ຄົນ​ໄປ​ສູ່​ສັດ, ຈາກ​ສັດ​ໄປ​ສູ່​ທຳ​ມະ​ຊາດ​ໃນ​ສາມ​ຢ່າງ​ນີ້​ກາຍ​ເປັນ​ວົງ​ຈອນອັນ​ເປັນ​ທີ່​ມາ​ຂອງ​ພະຍາດ​ຊະນິດ​ຕ່າງໆ​ມາ​ທຳລາຍ​ຊີວິດ​ອິນ​ຊີ​ຂອງ​ມວນ​ມະນຸດ​ໃນ​ໂລກ. ​ໃນ​ສະ​ໄໝ​ພໍ່​ແມ່​ປູ່ຍ່າຕາ ​ນາຍ​ເຮົາ​ເອີ້ນ​ວ່າ: ຮ່າ​​ເຂົ້າບ້ານ. ບາງ​ທ້ອງ​ຖິ່ນ​ເມື່ອ​ເກີດ​ໂຣກລະບາດ​ຂຶ້ນມາຍາ​ມ​ໃດ ມີ​ຄົນ​ຕາຍ​ຫລາຍ​ຈົນ​ເຖິງ​ຂັ້ນຍ້າຍ​ບ້ານ ຫລື ບາງ​ທ້ອງ​ຖິ່ນ​ທີ່​ມີ​ການ​ເຊື່ອ​ຖື​ແບບ​ງົມງວາຍ​ກໍ​ວ່າ​ເປັນ​ນຳ​ຜີ​ເຂັດ​ຜີ​ຂວງ.

- Wave100S AD to Website 2020 0 - ​ໂຣກລະບາດ​ມັນ​ເກີດ​ຈາກ​ສະພາວະ​ແວດ​ລ້ອມ

      ​ເມື່ອ​ຕັ້ງ​ໂຈດ​ກັນ​ວ່າ: ​ເພື່ອ​ຫລີກ​ລ່ຽງ​ໂຣຄາ​ພະຍາດ ຫລື ​ໂຣກລະບາດ​ຕ່າງໆ ​ເຮົາ​ຕ້ອງ​ພາກັນ​ເຮັດ​ແນວ​ໃດ ? ຄຳ​ຕອບ​ກໍ​ຄື ຕ້ອງ​ພາກັນ​ປົກ​ປັກ​ຮັກສາ​ສະພາວະ​ແວດ​ລ້ອມ​ໃຫ້​ດີ​ຢູ່​ສະ​ເໝີ ​ເປັນຕົ້ນຢູ່​ສະອາດ, ກິນ​ສະອາດ, ປົກ​ປັກ​ຮັກສາ​ທຳ​ມະ​ຊາດ ​ແລະ ສິ່ງ​ແວດ​ລ້ອມ​ໃຫ້​ດີ​ຍືນ​ຍົງ ​ແລະ ​ເປັນ​ມິດ​ກັບ​ທຳ​ມະ​ຊາດ ​ເພາະ​ສິ່ງ​ເຫລົ່າ​ນີ້​ເປັນ​ບໍ່​ເກີດ​ຂອງ​ຄວາມ​ສົດ​ຊື່ນປາສະຈາກ​ໂຣກ​ໄພ​ໄຂ້​ເຈັບ​ຕ່າງໆ. ​ໄປ​ຄຽງ​ຄູ່​ກັນນັ້ນ, ​ເຮົາ​ກໍ​ຕ້ອງ​ເປັນ​ຄົນ​ຕັ້ງຫລັກ​ຢູ່​ໃນ​ສິນ​ທຳ ບໍ່​ທຳລາຍ​ທຳ​ມະ​ຊາດ ​ແລະ ສິ່ງ​ແວດ​ລ້ອມ​ຈົນ​ເກີ​ນ​ເຫດ, ບໍ່​ບຽດບຽນ​ສັດ ​ແລະ ມະນຸດ​ທີ່ຢູ່​ບົນ​ໂລກ​ນີ້​ດ້ວຍ​ກັນ ​ເພາະ​ການ​ທີ່​ບໍ່​ບຽດບຽນ​ເຊິ່ງກັນ ​ແລະ ກັນນັ້ນ ຄື​ເສັ້ນທາງ​ແຫ່ງ​ຄວາມສຸກ ​ແລະ ຄວາມ​ຍືນ​ຍົງ​ຂອງ​ຊີວິດ.

      ນັບ​ແຕ່​ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ກ້າວ​ສູ່​ການ​ສ້າງສາ​ພັດທະ ນາຕະຫລອດ​ໄລຍະ 40 ກວ່າ​ປີ​ມາ​ນີ້, ພັກ ​ແລະ ລັດຖະບານ​ເຮົາ​ໄດ້​ວາງ​ແນວທາງ​ສ້າງສາ​ປະ​ເທດ​ຊາດ​ດ້ວຍ​ການ​ເພິ່ງ​ຕົນ​ເອງ, ກຸ້ມ​ຕົນ​ເອງ​ ສ້າງ​ຄວາມ​ເຂັ້ມ​ແຂງ​ດ້ວຍ​ຕົນ​ເອງ. ​ໃນ​ການ​ສ້າງສາ​ເສດຖະກິດ​ຂອງ​ຊາດ​ນັ້ນຕ້ອງ​ເປັນ​ມິດ​ກັບ​ສິ່ງ​ແວດ​ລ້ອມ, ຢູ່​ແບບ​ຍືນ​ຍົງ, ການ​ຜະລິດ​ທຸກ​ຢ່າງ​ຕ້ອງ​ຫັນ​ຈາກ​ການ​ນຳ​ໃຊ້​ເຄມີ​ໄປ​ສູ່​ຊີວະ​ພາບ​ທີ່​ສະອາດ​ສົດ​ໃສ​ ອັນ​ເປັນ​ທີ່​ມາ​ຂອງ​ການ​ດຳລົງ​ຊີວິດ​ແບບ​ຍືນ​ຍົງ​ຍາວ​ນານ. ​ເພາະສະນັ້ນ ກໍ​ຂໍ​ຊົມ​ເຊີຍ​ການ​ນຳ​ນະຄອນຫລວງ​ວຽງ​ຈັນ​ທີ່​ມີ​ເປົ້າສ້າງ​ນະຄອນຫລວງ 5 ສີຂຽວ​ຄື: ​ເສັ້ນທາງ​ສີຂຽວ, ສຳນັກງານ​ອົງການ, ​ເຄຫາ​ສະຖານ, ​ໂຮງຮຽນ​ໂຮງໝໍ ​ແລະ ວັດ​ວາສີ​ຂຽວ, ສວນສາທາລະນະ​ສີຂຽວ, ສວນ​ປູກ​ຕົ້ນ​ໄມ້ ​ແລະ ຟື້ນຟູ​ປ່າ​ສີຂຽວ ​ແລະ ​ໂຮງ​ຈັກ​ໂຮງງານ​ສີຂຽວ. ຖ້າ​ຫາກ​ພາກັນ​ເຮັດ​ໄດ້​ຕາມ​ຄຳ​ຂວັນ, ຄຳ​ເວົ້າຄຳ​ວ່າ​ອີ່ຫລີ ບໍ່​ວ່າ​ແຕ່​ນະຄອນ ຫລວງ​ວຽງ​ຈັນ​ຈະ​ມີ​ຄວາມ​ສວຍ​ງາມ​ສີຂຽວ​ຢ່າງ​ດຽວ ທັງ​ມີ​ອາກາດ​ສົດ​ຊື່ນ, ປອດ​ສານພິດ​ຕ່າງໆ ສິ່ງ​ນີ້​ລະ​ທີ່​ຈະ​ເຮັດ​ໃຫ້​ຄົນ​ນະຄອນຫລວງ​ຢູ່​ແບບ​ຍືນ​ຍົງ ບໍ່​ພາກັນ​ປົບ​ໜີ​ຍ້ອນ​ໂຣກລະບາດ​ອະສໍຣະພິດ​ຕ່າງໆ.

- WhatsApp Image 2020 05 27 at 5 - ​ໂຣກລະບາດ​ມັນ​ເກີດ​ຈາກ​ສະພາວະ​ແວດ​ລ້ອມ
- WhatsApp Image 2020 05 27 at 5 - ​ໂຣກລະບາດ​ມັນ​ເກີດ​ຈາກ​ສະພາວະ​ແວດ​ລ້ອມ
error: Alert: ເນື້ອຫາຂ່າວມີລິຂະສິດ !!