ລາວເລັ່ງຕິດຕັ້ງລະບົບດີຈີຕອນຄຸ້ມຄອງບໍລິຫານພາກລັດ

  ກອງປະຊຸມວຽກງານໄປສະນີ, ໂທລະຄົມມະນາຄົມແລະການສື່ສານ (ປທສ) ທີ່ໄດ້ຈັດຂຶ້ນເມື່ອມໍ່ໆມານີ້ ໃຫ້ຮູ້ວ່າ: ປັດຈຸບັນ, ຂະແໜງການດັ່ງກ່າວພວມເລັ່ງຕິດຕັ້ງລະບົບດີຈີຕອນໃຫ້ 18 ກະຊວງແລະຫ້ອງວ່າການສໍານັກງານນາຍົກລັດຖະມົນຕີໃຫ້ສາມາດເຊື່ອມຕໍ່ກັນໄດ້ໃນປີນີ້ເພື່ອຫັນການຄຸ້ມຄອງລັດເປັນທັນສະໄໝ ແລະ ສືບຕໍ່ຂະຫຍາຍການນໍາໃຊ້ລະບົບຫ້ອງການທັນສະໄໝ (e-Of­fice) ໃຫ້ໄດ້ 6 ພາກສ່ວນຢູ່ສູນກາງຄື: ຫ້ອງວ່າການສໍານັກງານນາຍົກລັດຖະມົນຕີ, ສະພາແຫ່ງຊາດ, ກະຊວງພາຍໃນ, ແຜນການແລະການລົງທຶນ, ສຶກສາທິການແລະກິລາແລະກະຊວງຖະແຫລງຂ່າວ, ວັດທະນະທໍາແລະທ່ອງທ່ຽວ, ພ້ອມທັງອະນຸມັດຍ່ານຄື້ນຄວາມຖີ່ໃຫ້ຜູ້ປະກອບການບໍລິການໂທລະຄົມມະນາຄົມໄດ້ທົດລອງລະບົບ 5G ແລະ ສືບຕໍ່ສ້າງມາດຕະຖານເຕັກນິກບໍລິການໄປສະນີແບບເອເລັກໂຕຣນິກ (e-post) ທີ່ມີຄຸນນະພາບເພື່ອຮອງຮັບກັບລະບົບການຄ້າທັນສະໄໝ(E-commerce)ໃນອະນາຄົດ.

ທ່ານ ທອງໃສ ຊານໄຊຍະ ຮອງລັດຖະມົນຕີກະຊວງດັ່ງກ່າວໃຫ້ຮູ້ວ່າ: ປີຜ່ານມາ, ຂະແໜງການຂອງຕົນໄດ້ສໍາເລັດຜົນໃນການພັດທະນາລະບົບຕ່າງໆເພື່ອຮັບໃຊ້ເຂົ້າໃນການຄຸ້ມຄອງລັດຫັນເປັນທັນສະໄໝ, ໂດຍສະເພາະແມ່ນສໍາເລັດການທົດລອງນໍາໃຊ້ລະບົບອອກໃບຮັບຮອງເອເລັກໂຕຣນິກແຫ່ງຊາດ National Root Certification Authority (NRCA) ເພື່ອກຽມຄວາມພ້ອມໃນການເຮັດທຸລະກໍາທາງການເງິນຜ່ານອອນລາຍ,ໃຫ້ບໍລິການສູນຂໍ້ມູນເອເລັກໂຕຣນິກແກ່ບັນດາອົງການຈັດຕັ້ງລັດແລະເອກະຊົນ,ເປັນຕົ້ນແມ່ນການຝາກເວັບໄຊທີ່ມີລະບົບຄວາມປອດໄພສູງ, ບໍລິການລະບົບອີເມວທາງການ, ບໍລິການເຊີເວີ,ສ້າງລະບົບຫ້ອງການທັນສະໄໝ (E-Office) ລວມທັງລະບົບອີເມວ, ຈັດກອງປະຊຸມທາງໄກສຳລັບພາກລັດແລະລະບົບບໍລິການປະຕູດຽວຖານຂໍ້ມູນພາກລັດ (e-Govern­ment portal).

ນອກນີ້, ຍັງໄດ້ລິເລີ່ມພັດທະນາໂຄງການຫັນເປັນທັນສະໄໝໃນການຊຳລະສະສາງແລະການເກັບລາຍຮັບເຂົ້າງົບປະມານ,ພັດທະນາລະບົບຕິດຕາມກວດກາໄພຄຸກຄາມທາງໄຊເບີ (Cyber attack Monitoring Sys­tem),ຕິດຕັ້ງລະບົບເຕັກນິກເພື່ອຮັບແຈ້ງເຫດສຸກເສີນທາງຄອມພີວເຕີ (RTIR), ລະບົບຕິດຕາມແລະກວດຈັບການໂຈມຕີລະບົບເຄືອຂ່າຍ (Tsu­bame Sensor), ລະບົບແຈ້ງເຕືອນ, ເຜີຍແຜ່ຄວາມຮູ້ໃຫ້ແກ່ສັງຄົມ (Web Server) ແລະລະບົບຄວາມປອດໄພເທີງເວັບໄຊ (SSL Certificate), ສ້າງແຜນການນໍາໃຊ້ CA ເຂົ້າກັບລະບົບ e-office, ລະບົບ i-office, e-tax ຂອງກະຊວງການເງິນ,ສ້າງຄູ່ກະແຈຂັ້ນສູງສຸດ (Root CA), ຄູ່ກະແຈລັດຖະບານ (Government CA), ຄູ່ກະແຈສາທາລະນະ (Public CA), ສ້າງສະຖານີກວດກາຄື້ນຄວາມຖີ່ວິທະຍຸສື່ສານແບບບໍໍ່ມີຄົນປະຈຳ (Re­mote Monitoring Station) 2 ແຫ່ງຢູ່ສະໜາມບິນສາກົນວັດໄຕແລະເຂດເມືອງຈັນທະບູລີນະຄອນຫລວງວຽງຈັນແລະວຽກງານອື່ນໆກໍມີການພັດທະນາເປັນກ້າວໆເພື່ອແນໃສເຮັດໃຫ້ແຜນພັດທະນາເສດຖະກິດ-ສັງຄົມແຫ່ງຊາດຫັນສູ່ລະບົບທັນສະໄໝເທື່ອລະກ້າວ.

error: Alert: Content is protected !!