5 ນິໄສທີ່ເຮັດໃຫ້ເຮົາເປັນແຟນທີ່ໜ້າຮັກ, ມີສະເໜ່ ແລະ ເປັນໂຕຂອງໂຕເອງ

- 33 1 - 5 ນິໄສທີ່ເຮັດໃຫ້ເຮົາເປັນແຟນທີ່ໜ້າຮັກ, ມີສະເໜ່ ແລະ ເປັນໂຕຂອງໂຕເອງ
- Untitled design - 5 ນິໄສທີ່ເຮັດໃຫ້ເຮົາເປັນແຟນທີ່ໜ້າຮັກ, ມີສະເໜ່ ແລະ ເປັນໂຕຂອງໂຕເອງ

ທ່ານ ມາຣິອະ ອາຄິຢາມະ ຜູ້ຂຽນໜັງສືເລື່ອງ “ທຸກສິ່ງເກີດຂຶ້ນຈາກເຮົາ 100% ຄວາມຮັກກໍຄືກັນ”ຜູ້ບໍລິຫານລະດັບສູງຂອງບໍລິສັດ Creative Power Japan.inc ແລະ ຜູ້ລິເລີ່ມສ້າງ CPM ຫລື Creative Power Method ເຊິ່ງເປັນການຮຽນຮູ້ຜ່ານການຝຶກປະຕິບັດ “ປ່ຽນຄວາມຄິດໃຫ້ເປັນຄວາມຈິງ”ໃຫ້ຄຳແນະນຳພ້ອມຂໍ້ຄິດດີໆໃນການປັບປ່ຽນ, ແກ້ໄຂບັນຫາ, ຄວາມຄິດ ແລະ ພຶດຕິກຳຂອງເຮົາ ເພື່ອໃຫ້ເຮົາປະສົບຄວາມສຳເລັດ ແລະ ສົມ ຫວັງໃນຄວາມຮັກແບບງ່າຍໆເອົາໄວ້ 5 ຂໍ້ ດັ່ງນີ້ :

     1. ຍິ້ມຢູ່ສະເໝີ : ທ່ານເຄີຍໄດ້ຍິນບໍ່ວ່າ ບໍ່ມີໃຜບໍ່ງາມໃນເວລາຍິ້ມເພາະຮອຍຍິ້ມສະແດງເຖິງຄວາມໜ້າຮັກ, ເປັນເຕັກນິກງ່າຍໆທີ່ເຮັດໃຫ້ທ່ານມີສະເໜ່ເພີ່ມຂຶ້ນອີກຫລວງຫລາຍ, ບໍ່ວ່າໃຜກໍມັກຄົນອາລົມດີ, ອັດທະຍາໄສດີ ແລະ ມີຮອຍຍິ້ມຫວານໆໃຫ້ແກ່ກັນຢູ່ສະເໝີ. ສະນັ້ນລອງຍິ້ມໃຫ້ຫລາຍຂຶ້ນ, ຍິ້ມໃຫ້ກັບທຸກບັນຫາທີ່ເຂົ້າມາໃນຊີວິດ, ຍິ້ມໃຫ້ກັບຄົນທີ່ທ່ານຮັກ ລວມເຖິງລອງຍິ້ມໃຫ້ກັບຄົນທີ່ທ່ານບໍ່ມັກນຳ ພຽງເທົ່ານີ້ທ່ານກໍເປັນຄົນທີ່ໜ້າຮັກ, ໜ້າຄົບຫາ, ກ້າທີ່ຈະເຂົ້າມາລົມເປີດບົດສົນທະນາກັບທ່ານຫລາຍຂຶ້ນ.

     2. ຍອມຮັບ ແລະ ຊື່ມຊົມຜູ້ອື່ນຢ່າງຈິງໃຈ : ບໍ່ວ່າໃຜກໍມັກຄຳຍ້ອງຍໍຊົມເຊີຍ ໂດຍສະເພາະຄຳຍ້ອງຍໍທີ່ມາຈາກໃຈ, ຍ້ອງດ້ວຍຄວາມຈິງໃຈ. ເມື່ອເຮົາຍອມຮັບ ແລະ ຊື່ນຊົມຜູ້ອື່ນຢ່າງຈິງໃຈ ເຮົາກໍຈະໄດ້ຮັບຄຳຍ້ອງຍໍຊົມເຊີຍ ແລະ ການຍອມຮັບຈາກຜູ້ອື່ນກັບມາເຊັ່ນກັນ. ເວລາທີ່ຮູ້ສຶກວ່າໃຜເຮັດດີ, ໃຜນິໄສໜ້າຮັກ, ຢ່າລືມທີ່ຈະກ່າວຄຳຍ້ອງຍໍຊົມເຊີຍບຸກຄົນເຫລົ່ານັ້ນແດ່ ການກະທຳເລັກໆນ້ອຍໆນີ້ຈະຊ່ວຍໃຫ້ເຂົາຮູ້ສຶກໝັ້ນໃຈ ແລະ ມີກຳລັງໃຈທີ່ຈະເຮັດສິ່ງດີໆເຫລົ່ານັ້ນຕໍ່ໄປ ທັງຍັງເປັນການເພີ່ມສະເໜ່ໃຫ້ກັບໂຕທ່ານນຳ.

     3. ຍອມຮັບໃນສິ່ງທີ່ເຮົາເປັນ : ກ່ອນທີ່ຈະຮັກໃຜ ຢ່າລືມຮັກໂຕເອງສາກ່ອນ. ກ່ອນທີ່ຈະຮູ້ຈັກ ແລະ ເຂົ້າໃຈຄົນອື່ນ ຄົນທຳອິດທີ່ທ່ານຄວນເຮັດຄວາມຮູ້ຈັກ, ເຮັດຄວາມເຂົ້າ ໃຈ ແລະ ຍອມຮັບໃນໂຕຕົນຂອງເຂົາໃຫ້ໄດ້ສາກ່ອນ ກໍແມ່ນໂຕຂອງທ່ານເອງ. ລອງສັງເກດ ແລະ ພິຈາລະນາຕົນເອງຢ່າງທີ່ໂຕທ່ານເປັນແທ້ໆ ໂດຍປາສະຈາກອັກຄະຕິ, ຍອມຮັບໃນຂໍ້ດ້ອຍ, ຂໍ້ບົກພ່ອງ, ຊົມເຊີຍຕົນເອງໃນຂໍ້ດີທີ່ເຮົາມີ, ປັບປຸງແກ້ໄຂ, ພັດທະນາໂຕເຮົາໃຫ້ດີຍິ່ງຂຶ້ນ, ເຊົາເວົ້າກັບໂຕເອງໃນດ້ານລົບ ແຕ່ໝັ່ນໃຫ້ກຳລັງໃຈຕົນເອງຢູ່ສະເໝີ ເພາະການເວົ້າເຖິງຕົນເອງໃນດ້ານລົບມີແຕ່ຈະເປັນການບັ່ນທອນກຳລັງໃຈຂອງເຮົາໃຫ້ຫລຸດໜ້ອຍລົງ. ໝັ່ນໃຫ້ກຳລັງໃຈຕົນເອງໃຫ້ຫລາຍຂຶ້ນ ເຊັ່ນ : ປ່ຽນຈາກການ ຈົ່ມວ່າ ເມື່ອຍເປັນການ ຂອບ ໃຈຕົນເອງທີ່ອຸດສາຫະຕັ້ງໃຈເຮັດວຽກ ຫລື ນຶກເຖິງຕົນເອງໃນດ້ານດີ ເຊັ່ນ : ເຮົາເກັ່ງ”“ເຮົາດຸໝັ່ນ” “ສູ້ຕໍ່ໄປພຽງເທົ່ານີ້ກໍເຮັດໃຫ້ກຳລັງໃຈຂອງທ່ານເພີ່ມຫລາຍຂຶ້ນໄດ້ແລ້ວ.

     4. ໃຫ້ອິດສະຫລະກັບໂຕເອງ ແລະ ຄົນທີ່ເຮົາຮັກ​ : ເຖິງວ່າເຮົາຈະຮັກກັນຫລາຍປານໃດ ແຕ່ບໍ່ວ່າໃຜກໍຕ້ອງການເວລາສ່ວນໂຕແດ່, ໃຫ້ອິດສະຫລະແກ່ໂຕທ່ານ ແລະ ຄົນທີ່ທ່ານຮັກແດ່ ບໍ່ວ່າຈະເປັນອິດສະຫລະທາງຄວາມຄິດ, ອິດສະຫລະໃນການທີ່ຈະເດີນທາງທ່ອງທ່ຽວ, ສັງສັນ, ພົບປະຜູ້ຄົນ, ອິດສະຫລະໃນການຕັດສິນໃຈເລືອກເຮັດໃນສິ່ງ ທີ່ຕົນເອງມັກ ແລະ ໃຫ້ອິດສະຫລະໃນການ ຢູ່ຕາມລຳພັງແດ່.

- Wave100S AD to Website 2020 0 - 5 ນິໄສທີ່ເຮັດໃຫ້ເຮົາເປັນແຟນທີ່ໜ້າຮັກ, ມີສະເໜ່ ແລະ ເປັນໂຕຂອງໂຕເອງ

    ຍິ່ງທ່ານຜູກມັດຄົນທີ່ທ່ານຮັກເອົາໄວ້ຫລາຍເທົ່າໃດ ກໍຍິ່ງເປັນການບີບໃຫ້ຄົນຮັກຂອງທ່ານຮູ້ສຶກອຶດອັດ ເຮັດໃຫ້ການຢູ່ກັບທ່ານບໍ່ມີຄວາມສຸກ, ມີແຕ່ຈະຍິ່ງຢາກຖອຍໜີຫ່າງຈາກທ່ານຫລາຍຂຶ້ນຕື່ມ.

    ຄວາມຮັກທີ່ຕັ້ງຢູ່ເທິງຄວາມຫວາດລະແວງ, ເຄືອບແຄງສົງໄສ ແລະ ວິຕົກກັງວົນ ຍ່ອມເປັນຄວາມຮັກທີ່ບໍ່ມີຄວາມສຸກ, ມີແຕ່ຈະເຮັດໃຫ້ທຸກຄົນທຸກຝ່າຍຮູ້ສຶກອຶດອັດ. ໃຫ້ອິດສະຫລະກັບໂຕທ່ານ ແລະ ເຂົາແດ່ ເພື່ອໃຫ້ແຕ່ລະຄົນມີຄວາມສຸກກັບອິດສະຫລະຂອງຕົນເອງ ແລະ ມີຄວາມສຸກກັບການຢູ່ຮ່ວມກັນ.

     5. ເຮັດໃນສິ່ງທີ່ເຮັດໄດ້ ແລະ ເຮັດຕໍ່ໄປເລື້ອຍໆ : ຂັ້ນຕອນສຸດທ້າຍໃນການປະສົບຄວາມສຳເລັດໃນຄວາມຮັກ ແມ່ນການຕັ້ງເປົ້າໝາຍກັບຕົນເອງ, ເຮັດເປົ້າໝາຍ ແລະ ຄວາມຕັ້ງໃຈຂອງເຮົານັ້ນໃຫ້ຈະແຈ້ງຫລາຍຂຶ້ນ ແລ້ວເຮັດສິ່ງນັ້ນຕໍ່ໄປຢ່າງຕໍ່ເນື່ອງ. ໃຫ້ຄວາມສຳຄັນກັບການຜູກມິດໄມຕີ ຫລື ເປັນພັນທະມິດກັບຜູ້ຄົນ ຫາກທ່ານລອງໃຊ້ ເວລາແຕ່ລະມື້ໄປກັບການເບິ່ງແຍງເອົາໃຈໃສ່ຄົນທີ່ຢູ່ຕໍ່ໜ້າ ທ່ານຈະພົບຄວາມປ່ຽນແປງໃນທຸກຄວາມສຳພັນ.

- WhatsApp Image 2020 05 27 at 5 - 5 ນິໄສທີ່ເຮັດໃຫ້ເຮົາເປັນແຟນທີ່ໜ້າຮັກ, ມີສະເໜ່ ແລະ ເປັນໂຕຂອງໂຕເອງ
- WhatsApp Image 2020 05 27 at 5 - 5 ນິໄສທີ່ເຮັດໃຫ້ເຮົາເປັນແຟນທີ່ໜ້າຮັກ, ມີສະເໜ່ ແລະ ເປັນໂຕຂອງໂຕເອງ
error: Alert: ເນື້ອຫາຂ່າວມີລິຂະສິດ !!