ເສົາໄຟເສົາສາລະພັດສາຍ

- 35 1 - ເສົາໄຟເສົາສາລະພັດສາຍ
- Untitled design - ເສົາໄຟເສົາສາລະພັດສາຍ

ລູກເມືອງພວນ

ສະບາຍດີ ​ເພື່ອນ​ຜູ້​ອ່ານ​ທີ່​ຮັກ​ແພງ, ເວົ້າເລື່ອງເສົາໄຟເສົາສະພັດສາຍ ບໍ່ມີຢູ່ແຕ່ປະເທດເຮົາ ຢູ່ຕ່າງແດນກໍມີຫຼາຍ ໂດຍສະເພາະແມ່ນບັນດາປະເທດດ້ອຍພັດທະນາ ແລະ ປະເທດທີ່ກຳລັງພັດທະນາຈຳນວນໜຶ່ງ ຊຶ່ງນິຍົມກະຈາຍກະແສໄຟຟ້າດ້ວຍການດຶງສາຍໄປຕາມເສົາ ທີ່ເຄີຍເຮັດກັນມາຕັ້ງແຕ່ມື້ເກີດມີການນຳໃຊ້ກະແສໄຟຟ້າທຳອິດຂອງໂລກ​ເມື​່ອປະມານ​ທ້າຍສະຕະວັດ 18 ຫາຕົ້ນສະຕະວັດທີ 19 ຂອງການປະຕິວັດອຸດສາຫະກຳຄັ້ງທີ 2. ຈາກນັ້ນມາກໍກາຍເປັນປະເພນີ ແລະ ຕົວແບບສືບທອດກັນມາຈົນເຖິງທຸກວັນນີ້ ອັນເນື່ອງມາຈາກໃນເມື່ອກ່ອນບໍ່ທັນມີ​ຈິນຕະນາການເດີນສາຍໄຟໄປຕາມໃຕ້ດິນ, ພາຍຫຼັງສົງຄາມໂລກຄັ້ງທີສອງມານີ້ ໂດຍສະເພາະແມ່ນໃນຊຸມປີ 80 ຈຶ່ງໄດ້ເກີດມີແນວຄວາມຄິດເດີນສາຍໄຟໄປຕາມໃຕ້ດິນ. ການເດີນສາຍໄຟໄປຕາມໃຕ້ດິນຈະມີຄວາມສີວິໄລ,   ມີຄວາມເປັນລະບຽບຮຽບຮ້ອຍຈົບງາມ ແລະ  ຄວາມປອດໄພສູງກວ່າ ແຕ່ມີຄ່າໃຊ້ຈ່າຍສູງກວ່າ. ປັດຈຸບັນໄດ້ມີຫຼາຍປະເທດກະຈາຍພະລັງງານໄຟຟ້າດ້ວຍການເດີນສາຍໄປຕາມໃຕ້ດິນ. ເຖິງຢ່າງໃດກໍດີ ຂໍມາເວົ້າເລື່ອງເສົາໄຟເສົາສາລະພັດຢູ່ບ້ານເຮົາດີກວ່າ.

ຫຼາຍໆທ່ານຄົງຈະເຫັນເສົາໄຟຟ້າຢູ່ບ້ານເຮົາ ໂດຍສະເພາະແມ່ນເສົາໄຟຟ້າຢູ່ໃນຕົວເມືອງໃຫຍ່ ດັ່ງຢູ່ໃນນະຄອນຫຼວງວຽງຈັນ ຈະເຕັມໄປດ້ວຍສາລະພັດສາຍ: ສາຍໄຟຟ້ານ້ອຍໃຫຍ່, ສາຍໂທລະສັບຂອງຫຼາຍອົງກອນ, ສາຍ​ເຄເບິນຂອງຫຼາຍບໍລິສັດ ທີ່ດຳເນີນທຸລະກິດຂອງຕົນເອງ. ເມື່ຶອເບິ່ງແລ້ວບໍ່ເປັນໜ້າງາມຕາ, ເສຍທັດສະນີຍະພາບ, ບໍ່ມີຄວາມເປັນລະບຽບຮຽບຮ້ອຍສະອາດ​ງາມ​ຕາ ​ແລະ ຄວາມ​ປອດ​​ໄພ​ກໍ​ມີ​ໜ້ອຍ ແລະ ຍິ່ງໄປກວ່ານັ້ນ ຍັງມີຄວາມສ່ຽງເປັນຕະລາຍຂອງການເກີດໄຟຟ້າຊ໊ອດ ອັນພາໃຫ້ເກີດອັກຄີໄພ ເຮັດໃຫ້ຊັບສິນ ແລະ ຊີວິດວອດວາຍໄປຕັ້ງຫຼາຍຄັ້ງນັບບໍ່ຖ້ວນແລ້ວໃນໄລຍະທີ່ຜ່ານມາ.

ຫຼຽວເບິ່ງເສົາໄຟເສົາໃດກໍເຕັມໄປດ້ວຍສາລະພັດສາຍ ຮ້າຍກວ່າໄຍແມງມຸມ ເບິ່ງແລ້ວບໍ່ມີຄວາມຈົບງາມຈັກໜ້ອຍເລີຍ, ມີບາງເສົາກໍອ່ຽງເນີ້ງຈົນສິຫັກກໍບໍ່ເຫັນເຈົ້າໜ້າທີ່ກ່ຽວຂ້ອງລົງໄປກວດກາປົວແປງແຕ່ຢ່າງໃດ ປະໄວ້ຈັ່ງຊັ້ນ ບໍ່ຮູ້ວ່າຈະເກີດອັນຕະລາຍຂຶ້ນເມື່ອໃດ ​ແລະ ​ເບິ່ງ​ຢ່າງ​ໜຶ່ງ​ກໍ​ເຫັນ​ໃຈ​ເບື້ອງ​ໄຟຟ້າ ​ເຊິ່ງ​ເປັນ​ຜູ້​ລົງທຶນ​ສ້າງ​ຕາ​ຂ່າຍ​ໄຟຟ້າ​ແບບ​ນີ້​ຂຶ້ນມາ​ແລ້ວ ພວກ​ສາຍ​ອື່ນໆ​ກໍ​ກາຍ​ເປັນ​ແມ່​ກາ​ຝາກ​ເກາະ​ຫ້ອຍ​ກິນ​ຢ່າງ​ບໍ່​ໄດ້​ລົງທຶນ​ພໍ​ເທົ່າ​ໃດ. ດັ່ງນັ້ນ ຖ້າພວກເຮົາຫາກເບິ່ງເລື່ອງນີ້ເປັນເລື່ອງເລັກໆນ້ອຍໆ ພວກເຮົາຈະຕ້ອງໃຊ້ຄ່າແພງໃນອະນາຄົດ ໃນເມື່ອເກີດບັນຫາຂຶ້ນມາ ໂດຍສະເພາະແມ່ນອັກຄີໄພ, ໄຟຊ໊ອດ ແລະ ດູດຄົນຕາຍ, ສາຍໄຟຂາດ ໝໍ່ແປງພັງ, ພະລັງງານໄຟຟ້າຕົກ ສົ່ງຜົນກະທົບຕໍ່ກິດຈະການທຸລະກິດ ​ແລະ ອື່ນໆ ໃນເມື່ອບໍ່ທັນຫຼ້າທັນສວຍ ອົງກອນ ແລະ ພາກສ່ວນກ່ຽວຂ້ອງຈົ່ງໄດ້ຮີບຮ້ອນແກ້ໄຂບັນຫານີ້ໃຫ້ມີຄວາມເປັນລະບຽບຮຽບຮ້ອຍຈົບງາມ ແລະ ມີຄວາມປອດໄພຕໍ່ຊີວິດອິນຊີ ແລະ ຊັບສິນຂອງປະຊາຊົນ ແລະ ຍັງສ້າງທັດສະນີຍະພາບໃນຕົວເມືອງມີ​ຄວາມ​ງົດງາມອີກດ້ວຍ.

- Wave100S AD to Website 2020 0 - ເສົາໄຟເສົາສາລະພັດສາຍ
- WhatsApp Image 2020 05 27 at 5 - ເສົາໄຟເສົາສາລະພັດສາຍ
- WhatsApp Image 2020 05 27 at 5 - ເສົາໄຟເສົາສາລະພັດສາຍ
error: Alert: ເນື້ອຫາຂ່າວມີລິຂະສິດ !!