ເຜີຍແຜ່ເຊື່ອມຊຶມເອກະສານສໍາຄັນຂອງພັກ

ກອງປະຊຸມເຜີຍແຜ່ ແລະ ເຊື່ອມຊຶມເອກະສານສໍາຄັນຂອງພັກ-ລັດ, ໄດ້ຈັດຂຶ້ນໃນວັນທີ 14 ກຸມພານີ້, ຢູ່ນະຄອນຫຼວງວຽງຈັນ, ໂດຍການເປັນປະທານຂອງທ່ານ ພັນຄໍາ ວິພາວັນ ຜູ້ປະຈໍາການ ຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ເພື່ອໃຫ້ຄະນະພັກ, ກະຊວງ, ອົງການ ແລະ ທ້ອງຖິ່ນໄດ້ເຊື່ອມຊຶມ, ກໍາແໜ້ນ ແລະ ພ້ອມກັນຈັດຕັ້ງຜັນຂະຫຍາຍ ໃນແຕ່ລະຄົງເຂດວຽກງານ ກໍຄືໂຄງການຕ່າງໆ ນັບທັງພາຍໃນ ແລະ ການຮ່ວມມືກັບປະເທດເພື່ອນມິດ ໃຫ້ເຂົ້າສູ່ຕົວຈິງ ແລະ ມີປະສິດທີຜົນສູງ. ພ້ອມທັງໃຫ້ກະກຽມສະເຫຼີມສະຫຼອງວັນປະຫວັດສາດສໍາຄັນຂອງຊາດເຊັ່ນ: ວັນສ້າງຕັ້ງພັກ ປະຊາຊົນປະຕິວັດລາວ ຄົບຮອບ 65 ປີ, ວັນຊາດທີ 2 ທັນວາ ຄົບຮອບ 45 ປີ, ວັນເກີດປະທານ ໄກສອນ ພົມວິຫານ ຜູ້ນໍາທີແສນເຄົາລົບຮັກ ຄົບຮອບ 100 ປີ ແລະ ວັນສໍາຄັນອື່ນໆ ໃຫ້ເຕັມໄປດ້ວຍບັນຍາກາດເບີກບານມ່ວນຊື່ນ, ມີຄວາມເອກອ້າງພາກພູມໃຈຕໍ່ໝາກຜົນໃນການປົກປັກຮັກສາ ແລະ ສ້າງສາພັດທະນາປະເທດຊາດ.

ກອງປະຊຸມ, ໄດ້ຍົກໃຫ້ເຫັນຜົນການເຄື່ອນໄຫວວຽກງານຕ່າງປະເທດຂອງການນໍາພັກ-ລັດ ໃນປີ 2019 ເປັນຕົ້ນມາ,ຜົນສໍາເລັດຂອງການຢ້ຽມຢາມ ແລະ ເຮັດວຽກຢູ່ ສສ ຫວຽດນາມ, ສປ ຈີນ ແລະ ລາຊະອານາຈັກກໍາປູເຈຍ ຂອງທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.

ໃນໂອກາດນີ້, ທ່ານ ພັນຄໍາ ວິພາວັນ ໄດ້ເນັ້ນໃຫ້ຜູ້ເຂົ້າຮ່ວມກອງປະຊຸມ ຈົ່ງຍົກສູງຄວາມຮັບຜິດຊອບການເມືອງ ໃນການສືບຕໍ່ນໍາໄປຄົ້ນຄວ້າເຊື່ອມຊຶມ ແລະ ຜັນຂະຫຍາຍ ເຂົ້າໃນແຕ່ລະຂົງເຂດວຽກງານທີ່ຕົນຮັບຜິດຊອບຢ່າງເປັນເຈົ້າການ, ຖືເອົາໝາກຜົນຂອງການພົວພັນຮ່ວມມືກັບບັນດາປະເທດເພື່ອນມິດ ກໍຄືການສະເຫຼີມສະຫຼອງວັນປະຫວັດສາດສໍາຄັນຂອງຊາດ, ຂອງພັກ ໃນປີ 2020 ໃຫ້ເປັນຂະບວນການທີ່ແຂງແຮງ, ຟົດຟື້ນຕໍ່ເນື່ອງໃນຂອບເຂດທົ່ວປະເທດ, ເພື່ອສືບຕໍ່ຍູ້ແຮງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 10 ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8 ໃຫ້ມີຜົນສໍາເລັດຕາມລະດັບຄາດໝາຍ ແລະ ລື່ນຄາດໝາຍວາງໄວ້, ຕິດພັນກັບການກະກຽມດໍາເນີນກອງປະຊຸມໃຫຍ່ ຄັ້ງທີ 11 ຂອງພັກ ໃນຕົ້ນປີ 2021 ດ້ວຍຖ່ວງທ່າທີ່ໜັກແໜ້ນ ແລະ ໃຫ້ເປັນຂະບວນການກວ້າງຂວາງຂອງທົ່ວປວງຊົນລາວບັນດາເຜົ່າ.

ຂ່າວໃຫ້ຮູ້ອີກວ່າ: ໃນໂອກາດເຂົ້າຮ່ວມ ແລະ ໂອ້ລົມກອງປະຊຸມ ວຽກງານອົບຮົມທົ່ວປະເທດ ໃນວັນທີ 13 ກຸມພານີ້,  ທ່ານ ພັນຄໍາ ວິພາວັນ ຍັງໄດ້ເນັ້ນໃຫ້ຄະນະໂຄສະນາອົບຮົມ ສຸມໃສ່ໂຄສະນາ, ສຶກສາອົບຮົມຕ້ານ, ຕີຖອຍບັນດາປະກົດການຫຍໍ້ທໍ້ ຢູ່ພາຍໃນພັກ ແລະ ໃນສັງຄົມ, ຕິດພັນກັບການສ້າງສະຕິເຄົາລົບ, ປະຕິບັດລັດຖະທໍາມະນູນ, ກົດໝາຍ, ກົດລະບຽບພັກ, ພ້ອມກັນນັ້ນ ກໍໂຕ້ຕອບຕໍ່ຖ້ອຍທໍານອງຂອງພວກບໍ່ດີ ທີ່ສວຍໃຊ້ບາງປະກົດການຫຍໍ້ທໍ້ ໂຄສະນາບິດເບືອນ, ໃສ່ຮ້າຍປ້າຍສີ, ໂຈມຕີຕໍ່ການນໍາພາຂອງພັັກ, ຫວັງທໍາລາຍຄວາມເຊື່ອໝັ້ນຂອງປະຊາຊົນຕໍ່ພັກ ແລະ ລະບອບຂອງພວກເຮົາ. ພ້ອມທັງໃຫ້ຄົ້ນຄວ້າທິດສະດີ ແລະ ພຶດຕິກໍາຂອງພັກ, ຄົ້ນຄວ້າປະຫວັດການເຄື່ອນໄຫວຂອງບັນດາທ່ານຜູ້ນໍາ, ພ້ອມທັງເອົາໃຈໃສ່ເຜີຍແຜ່ອອກສູ່ສັງຄົມ ໃຫ້ກວ້າງຂວາງ, ປະກອບສ່ວນໃນການປັບປຸງຄວາມເຂັ້ມແຂງຂອງພັກ ໃນຂົງເຂດວຽກງານການເມືອງ-ແນວຄິດ, ພ້ອມນັ້ນ, ກໍໃຫ້ເອົາໃຈໃສ່ປັບປຸງລະບົບກົນຈັກການຈັດຕັ້ງຂອງຄະນະໂຄສະນາອົບຮົມ ແຕ່ສູນກາງລົງຮອດທ້ອງຖິ່ນໃຫ້ມີຄວາມໜັກແໜ້ນ, ເຂັ້ມແຂງສົມຄູ່ກັບພາລະບົດບາດ ແລະ ຄວາມສໍາຄັນຂອງວຽກງານນີ້, ເອົາໃຈໃສ່ສ້າງ-ຍົກລະດັບຖັນແຖວພະນັກງານທີ່ເຮັດວຽກໂຄສະນາອົບຮົມຂອງພັກຢ່າງເປັນລະບົບ, ຕໍ່ເນື່ອງດ້ວຍການສົມທົບສ້າງກັບວຽກງານຕົວຈິງ, ທັງສົ່ງໄປຮຽນຢູ່ພາຍໃນ ແລະ ຕ່າງປະເທດ ແລະ ຖືສໍາຄັນການສ້າງໃຫ້ມີຖັນແຖວພະນັກງານວິຊາການທີ່ເກັ່ງ, ຊໍານານງານດ້ານຕ່າງໆ ເປັນຕົ້ນ: ນັກຄົ້ນຄວ້າຂີດຂຽນເກັ່ງ, ນັກໂຄສະນາ-ປາຖະກະຖາເກັ່ງ. ພ້ອມນັ້ນ ກໍຕ້ອງປັບປຸງເນື້ອໃນ, ຮູບການ, ວິທີການຂອງວຽກງານໂຄສະນາອົບຮົມໃຫ້ສອດຄ່ອງ, ຕິດແທດກັບສະພາບ ແລະ ຄວາມຮຽກຮ້ອງຕ້ອງການຕົວຈິງ ຂອງໜ້າທີ່ການເມືອງ, ແທດກັບແຕ່ລະເປົ້າໝາຍ, ມີຄຸນນະພາບ ແລະ ມີປະສິດທິຜົນສູງຂຶ້ນກວ່າເກົ່າ.

error: Alert: Content is protected !!