​ຄຳ​ມ່ວນ​ດິນ​ແດນ​ທ່ອງ​ທ່ຽວ​

​ຄຳ​ມ່ວນ​ດິນ​ແດນ​ທ່ອງ​ທ່ຽວ​ - 52 3 - ​ຄຳ​ມ່ວນ​ດິນ​ແດນ​ທ່ອງ​ທ່ຽວ​
​ຄຳ​ມ່ວນ​ດິນ​ແດນ​ທ່ອງ​ທ່ຽວ​ - Untitled design - ​ຄຳ​ມ່ວນ​ດິນ​ແດນ​ທ່ອງ​ທ່ຽວ​

ທິດ​ກໍ່າ:

     ​ແຂວງ​ຄຳ​ມ່ວນ​​ເປັນ​ແຂວງ​ພາກ​ກາງຂອງ​ປະ​ເທດ​ທີ່​ອຸດົມສົມບູນ​ໄປ​ດ້ວຍ​ແຫ​ລ່ງທຳ​ມະ​ຊາດ​ອັນ​ສວຍ​ສົດ​ງົດ​ງາມ, ​ມີ​ແມ່ນ້ຳລຳ​ເຊ, ພູຜາ​ປ່າ​ໄມ້, ດິນ​ດອນ​ຕອນ​ຫຍ້າ, ທົ່ງ​ນາ​ປ່າ​ເຂົາ​ທີ່​ຫລາກ​ຫລາຍ ​ແລະ ສະຫລັບ​ສັບ​ຊ້ອນ ກາຍ​ເປັນ​ສະຖານ​ທີ່​ທ່ອງ​ທ່ຽວ​ທຳ​ມະ​ຊາດ​ທີ່​ໜ້າ​ໄປ​ສຳຜັດ​ທ່ຽວ​ຊົມ, ​ໃນ​ນັ້ນ ສະຖານ​ທີ່​ທ່ອງ​ທ່ຽວ​ທີ່​ພວມ​ໄດ້​ຮັບ​ຄວາມ​ນິຍົມ​ສົນ​ໃຈ​ຈາກ​ແຂກ​ພາຍ​ໃນ ​ແລະ ຕ່າງປະ​ເທດ​ໃນ​ປັດຈຸບັນ ກໍ​ຄື​ຖ້ຳກອງ​ລໍ, ຖ້ຳປາຝາ, ຖ້ຳນາງ​ແອ່ນ, ​ຖ້ຳນ້ຳລອດ, ຂຸນ​ກອງ​ແລງ, ທ່າ​ຝຣັ່ງ, ​ເຂື່ອນ​ນ້ຳ​ເທີນ, ພູຜາ​ມ່ານ ​ແລະ ​ແຫ່ງ​ອື່ນໆ. ຈຸດ​ພິ​ເສດ​ທີ່​ໂດດ​ເດັ່ນ​ຂອງ​ແຂວງ​ຄຳ​ມ່ວນ​ແມ່ນ​ມີ​ຜາ​ຫີນ​ຕັ້ງຢັ່ງຢາຍ​ເດຍລະດາດ​ສະຫລັບ​ສັບ​ຊ້ອນ​ຢູ່​ຫລາຍ​ແຫ່ງ. ຢູ່​ອ້ອມ​ແອ້ມ​ເລາະ​ຕີນ​ຜາ​ມີ​ສາຍ​ນ້ຳ, ມີ​ປ່າ​ດົກໜາ ​ແລະ ບາງ​ບ່ອນ​ກໍ​ມີ​ທົ່ງ​ນາ​ອັນ​ກວ້າງຂວາງ​ ກາຍ​ເປັນ​ພາບ​ວິວທິວ​ທັດ​ທີ່​ໜ້າ​ປະ​ທັບ​ໃຈ.

     ສ່ວນວ່າ​ແມ່ນ້ຳລຳ​ເຊ​ນັ້ນ, ສາຍ​ໃຫຍ່ໆ​ກໍ​ແມ່ນ​ແມ່ນ້ຳຂອງ, ຖັດລົງ​ມາກໍ​ມີນ້ຳ​ເຊ​ຫລາຍ​ສາຍ​ຄື: ​ນ້ຳ​ຫີນ​ບູນ, ນ້ຳ​ເທີນ, ນ້ຳ​ໂດນ, ນ້ຳປະກັນ ​ແລະ ​ເຊບັ້ງ​ໄຟ. ບັນດາ​ແມນ້ຳ​ລຳ​ເຊ​ເຫລົ່າ​ນີ້​ນອກຈາກ​ເອື້ອອຳນວຍ​ໃຫ້​ແກ່ການ​ຜະລິດ​ປູກຝັງ​ແລ້ວ ຍັງ​ເປັນ​ແຫ​ລ່ງທ່ອງ​ທ່ຽວ​ທີ່​ສວຍ​ງາມ ​ເໝາະ​ແກ່​ການ​ລ່ອງ​ເຮືອ​ທ່ຽວ​ຊົມ​ທຳ​ມະ​ຊາດ​ຕາມ​ຫ້ວຍ​ນ້ຳລຳ​ເຊ ​ເພາະ​ສາຍ​ນ້ຳບາງ​ແຫ່ງ​ມີ​ສີຂຽວ​ສົດ​ໃສ​ທີ່​ຫາ​ຊົມ​ໄດ້​ຍາກ ຈຶ່ງ​ສາມາດ​ເວົ້າວ່າ: ​ເມື່ອ​ເອີ່ຍ​ເຖິງ​​ແຂວງ​ຄຳ​ມ່ວນ​ແລ້ວ ອັນ​ທີ່​ໜ້າ​ສົນ​ໃຈກໍ​ຈະ​ແມ່ນ​ແຫ​ລ່ງທ່ອງ​ທ່ຽວ​ທຳ​ມະ​ຊາດ​ແຫ່ງ​ນີ້ ​ແລະ ນອກຈາກ​ຖ້ຳທີ່​ຂຸດ​ຄົ້ນພົບ​ເຫັນ​ແລ້ວ ກໍ​ຍັງ​ມີ​ຖ້ຳອີກ​ຫລາຍ​ແຫ່ງ​ທີ່​ຍັງ​ບໍ່​ທັນ​ຂຸດ​ຄົ້ນ​ໃຫ້​ກາຍ​ເປັນ​ແຫ​ລ່ງທ່ອງ​ທ່ຽວ​ໃນ​ລະດັບ​ທ້ອງ​ຖິ່ນ ຫລື ລະດັບ​ຊາດໃນ​ອະນາຄົດ ​ແລະ ​ຈະ​ກາຍ​ເປັນ​ແຂວງ​ໜຶ່ງ​ທີ່​ມີ​ທ່າ​​ແຮງດ້ານ​ການທ່ອງທ່ຽວ​ທຳ​ມະ​ຊາດ​ອັນ​ອຸດົມສົມບູນ​ ສາມາດ​ສ້າງ​ລາຍ​ຮັບ​ໃຫ້​ແຂວງ ກໍ​ຄື​ປະ​ເທດ​ຊາດ​ໄດ້​ຢ່າງ​ຫລວງຫລາຍ.

     ​ແນວ​ໃດ​ກໍ​ຕາມ, ສິ່ງ​ທີ່​ໜ້າ​ເປັນ​ຫ່ວງ​ນັ້ນກໍ​ຄື ຄວາມ​ຍືນ​ຍົງ​ຂອງ​ທຳ​ມະ​ຊາດ ​ແລະ ສິ່ງ​ແວດ​ລ້ອມ, ​ການ​ປົກ​ປັກ​ຮັກສາ​ຊີວະ​ນາໆ​ພັນ ​ເພາະວ່າ​ໃນ​ແຕ່ລະ​ເດືອນ​ແຕ່ລະ​ປີ​ມີ​ປະຊາຊົນ​ໃນ​ທ້ອງ​ຖິ່ນ​ຊອກ​ຢູ່​ຫາ​ກິນ, ມີ​ການ​ຖາກ​ຖາງ​ປ່າ​ໄມ້​ບຸກລຸກທັງ​ສັດ​ນ້ຳ, ສັດປ່າ ​ໂດຍ​ສະ​ເພາະ​ແມ່ນ​ຊອກ​ຢູ່​ຫາ​ກິນ​ແບບ​ດັບ​ສູນ​ໃຊ້​ໄຟຟ້າ​ຊ໊ອດປາ​ເກືອບ​ຂາດ​ແມ່ນ້ຳລຳ​ເຊ, ຂາດ​ຫ້ວຍ​ຂາດ​ໜອງ. ອີກ​ສິ່ງ​ໜຶ່ງ​ທີ່​ຄວນ​ເບິ່ງ​ຄືນ​ນັ້ນ ​ແມ່ນ​ຄ່າ​ບໍລິການ​ແຫ​ລ່ງທ່ອງ​ທ່ຽວ​ບາງ​ແຫ່ງ​​ຂ້ອນ​ຂ້າງ​ແພງ ​ເບິ່ງ​ຄື​ບໍ່​ທັນ​ສົມ​ເຫດ​ສົມ​ຜົນ​ເທົ່າ​ທີ່​ຄວນ. ຕົວຢ່າງ​ປີ້​ເຂົ້າ​ຖ້ຳນາງ​ແອ່ນ​ຕອນ​ ທິດ​ກໍ່າ ​ໄປ​ສຳຜັດ​ແມ່ນ​ເກັບ 20.000 ກີບ​ຕໍ່​ຄົນ, ​ເຂົ້າ​ໄປ​ຮອດ​ປາກ​ຖ້ຳຕ້ອງ​ໄດ້​ຊື້ປີ້​ເຂົ້າຊົມ​ຖ້ຳຕື່ມ​ອີກ, ​ແຕ່​ວ່າ​ປັດຈຸບັນ​ນີ້​ຍັງ​ຈະ​ຄື​ເກົ່າ ຫລື ບໍ່ ​ເພາະ​ດົນ​ແລ້ວ​ບໍ່​ໄດ້​ໄປ​ສຳຜັດ​ອີກ​ຕື່ມ.

​ຄຳ​ມ່ວນ​ດິນ​ແດນ​ທ່ອງ​ທ່ຽວ​ - Wave100S AD to Website 2020 0 - ​ຄຳ​ມ່ວນ​ດິນ​ແດນ​ທ່ອງ​ທ່ຽວ​

     ​ເວົ້າ​ເລື່ອງ​ລາຍ​ໄດ້​ຈາກ​ການທ່ອງທ່ຽວ​ກາຍ​ເປັນ​ອຸດສາຫະກຳ​ໜຶ່ງ​ທີ່​ສ້າງ​ລາຍ​ຮັບ​ໃຫ້​ປະ​ເທດ​ຊາດ​ບ້ານ​ເມືອງ. ສຳລັບລາວ​ເຮົາ, ອົງການ​ສາກົນ​ໄດ້​ຈັດ​ຢູ່​ໃນ​ອັນ​ດັບ​ຕົ້ນຂອງ​ໂລກ​ທີ່​ມີ​ການ​ພັດທະນາ​ການທ່ອງທ່ຽວ​ທີ່​ໄວ​ທີ່​ສຸດ​. ຈາກ​ປະ​ເດັນ​ດັ່ງກ່າວ​ກໍ​ເຫັນ​ວ່າ​ພວກ​ເຮົາ​ຄວນ​ຊື່ນ​ຊົມ ​ແລະ ສຳລັບ​ຢູ່​ແຂວງ​ຄຳ​ມ່ວນ ທາງ​ພັກ​-ລັດຖະບານ​ເຮົາ ກໍ​ຄື​ຂະ​ແໜງ​ການ​ກ່ຽວຂ້ອງ​ພວມ​ຄົ້ນຄວ້າ​ຜາ​ຫີນ​ໜາມ​ໜໍ່​​ເຂົ້າ​ເປັນ​ມໍລະດົກ​ໂລກ​ກໍ​ເພາະ​ຜາ​ດັ່ງກ່າວ​ມີ​ການ​ເຊື່ອມ​ຕໍ່​ກັບ​ຊາຍ​ແດນ​ຫວຽດນາມ, ​ແຕ່​ວ່າ​ທາງ​ເບື້ອງຫວຽດ ນາມ​ໄດ້​ກາຍ​ເປັນ​ມໍລະດົກ​ຂອງ​ໂລກ​ໄປ​ແລ້ວ.

      ການ​ທີ່​ແຂວງ​ຄຳ​ມ່ວນ​ມີ​ຈຸດ​ພິ​ເສດ​ທາງ​ດ້ານ​ພູມີ​ປະ​ເທດ, ມີ​ຜູ​ພາ​ປ່າ​ໄມ້, ຫ້ວຍ​ນ້ຳລຳ​ເຊ​ອັນ​ສວຍ​ສົດ​ງົດ​ງາມ​ເໝືອນ​ມີ​ສິ່ງ​ສັກສິດ​ມາ​ເສກ​ສັນ​ປັ້ນ​ແຕ່ງ​ໃຫ້​ພວກ​ເຮົາ​ໄດ້​ນຳ​ໃຊ້, ​ເພາະສະນັ້ນ ພວກ​ເຮົາ​ຄວນ​ອະນຸລັກ​ຮັກສາ​ໃຫ້​ຍືນ​ຍົງ​ໝັ້ນຄົງ​ໄປ​ຄຽງ​ຄູ່​ກັບ​ຄົນ​ແຂວງ​ຄຳ​ມ່ວນ ກໍ​ຄື​ປະຊາຊົນ​ລາວ​ບັນດາ​ເຜົ່າ ​ເພາະ​ຊັບ​ສິນ​ເຫລົ່າ​ນີ້​ລະ​ຈະ​ພາ​ໃຫ້​ພວກ​ເຮົາ​ຮັ່ງມີ​ໃນ​ອະນາຄົດ​ຢ່າງ​ແນ່ນອນ.

​ຄຳ​ມ່ວນ​ດິນ​ແດນ​ທ່ອງ​ທ່ຽວ​ - WhatsApp Image 2020 05 27 at 5 - ​ຄຳ​ມ່ວນ​ດິນ​ແດນ​ທ່ອງ​ທ່ຽວ​
​ຄຳ​ມ່ວນ​ດິນ​ແດນ​ທ່ອງ​ທ່ຽວ​ - WhatsApp Image 2020 05 27 at 5 - ​ຄຳ​ມ່ວນ​ດິນ​ແດນ​ທ່ອງ​ທ່ຽວ​
error: Alert: ເນື້ອຫາຂ່າວມີລິຂະສິດ !!