ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ

ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ - 65 2 - ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ
ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ - Untitled design - ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ

ເມື່ອບໍ່ດົນມານີ້, ໄດ້ມີສື່ອອນລາຍນຳສະເຫນີກໍລະນີເຫດການທີ່ມີນໍ້າຂຸ່ນຜິດປົກກະຕິ ແລະ ພົບເຫັນປາຕາຍຈຳນວນຫລາຍ ຢູ່ບົນສາຍແມ່ນ້ຳລີກ ແລະ ຈາກນັ້ນໃນວັນທີ 17 ກຸມພານີ້, ຫ້ອງວ່າການເມືອງກາສີ ແຂວງວຽງຈັນ ກໍໄດ້ອອກແຈ້ງການຫ້າມປະຊາຊົນຜູ້ຢູ່ລຽບຕາມແຄມນ້ຳດັ່ງກ່າວ ບໍ່ໃຫ້ເອົາປາຕາຍມາກິນ, ບໍ່ໃຫ້ບໍລິໂພກນ້ຳ ແລະ ຫ້າມລົງອາບນ້ຳໃນເຂດທີ່ມີຄວາມສ່ຽງດັ່ງກ່າວ,  ໃນຂະນະດຽວກັນ ນັກຂ່າວໜັງສືພິມລາວພັດທະນາພວກເຮົາ ກໍໄດ້ສອບຖາມໄປຍັງທ່ານ ສີທົນ ແສງພະຈັນ ເຈົ້າເມືອງດັ່ງກ່າວ ໃຫ້ຮູ້ວ່າ: ເຫດການປາຕາຍເປັນຈຳນວນຫລວງຫລາຍນີ້ ແມ່ນເກີດຂຶ້ນແທ້ ຍ້ອນການຮົ່ວໄຫຼຂອງສານເຄມີທີ່ເຮັດໃຫ້ຄອນກຼີດແຂງຕົວໄວຂອງບໍລິສັດກໍ່ສ້າງແຫ່ງໜຶ່ງທີ່ພວມດຳເນີນງານຢູ່ບົນສາຍນ້ຳດັ່ງກ່າວ ໃນບໍລິເວນເມືອງກາສີ ແຂວງວຽງຈັນ, ແຕ່ມາຮອດວັນທີ 18 ກຸມພານີ້, ສະພາບນໍ້າແມ່ນຢູ່ໃນເກນປົກກະຕິ ແລະ ບໍ່ພົບເຫັນປາຕາຍອີກ ຍ້ອນການຢຸດຕິທຳງານຂອງບໍລິສັດ ເພື່ອດຳເນີນການປັບປຸງແກ້ໄຂ.

ເຈົ້າເມືອງກາສີ ເປີດເຜີຍວ່າ: ພາຍຫລັງເກີດມີສະພາບນ້ຳເປັນພິດດັ່ງກ່າວໃນສາຍນ້ຳລີກ ອັນໄດ້ສົ່ງຜົນກະທົບໃຫ້ການດຳລົງຊີວິດຂອງປະຊາຊົນ 7 ບ້ານທີ່ອາ​ໄສຢູ່ລຽບແຄມນ້ຳດັ່ງກ່າວຄື: ບ້ານວຽງແກ້ວ, ນາແທ່ນ, ວຽງຄຳ, ບ້ານວຽງ, ໂພຄຳ, ນາມອນ ແລະ ບ້ານເມືອງເຄິ່ງ. ດັ່ງນັ້ນ ທາງອໍານາດການປົກຄອງຈຶ່ງໄດ້ແຕ່ງຕັ້ງໜ່ວຍງານສະເພາະກິດລົງກວດກາ, ເກັບກຳຂໍ້ມູນຕົວຈິງ ແລະ ເຫັນວ່ານ້ຳເປັນສີຂຸ່ນໆ, ເມື່ອເປັນແນວນັ້ນ ຈຶ່ງໄດ້ຫາລື ແລະ ອອກແຈ້ງການຫ້າມປະຊາຊົນບໍ່ໃຫ້ນຳເອົານ້ຳ ແລະ ປາທີ່ຕາຍມາບໍລິໂພກຢ່າງເດັດຂາດ ແລະ ໄດ້ນຳເອົາຕົວຢ່າງນ້ຳໄປກວດກາ ໂດຍທາງພະແນກຊັບພະຍາກອນທຳມະຊາດ ແລະ ສິ່ງແວດລ້ອມຢັ້ງຢືນວ່າ: ສາເຫດແມ່ນເກີດຈາກການຮົ່ວໄຫຼຂອງສານເຄມີທີ່ເຮັດໃຫ້ຄອນກຼີດແຂງຕົວໄວຂອງບໍລິສັດກໍ່ສ້າງແຫ່ງໜຶ່ງຢູ່ເມືອງກາສີ. ຕໍ່ກັບເຫດການນີ້, ທາງເມືອງກໍໄດ້ແຈ້ງໃຫ້ບໍລິສັດດັ່ງກ່າວຢຸດການຜະລິດຊົ່ວຄາວ ແລະ ໃຫ້ເລັ່ງແກ້ໄຂບັນຫາສິ່ງແວດລ້ອມທີ່ເກີດຂຶ້ນ.

       ທ່ານເຈົ້າເມືອງ ໃຫ້ຮູ້ອີກວ່າ: ມາຮອດປັດຈຸບັນ ສະພາບນໍ້າລີກ ແມ່ນຢູ່ໃນເກນປົກກະຕິແລ້ວ ແລະ ບໍ່ພົບເຫັນປາຕາຍອີກ,  ແຕ່ຍັງຕ້ອງຫ້າມເອົານ້ຳມາບໍລິໂພກ, ອາບ ແລະ ກິນປາຈາກແມ່ນໍ້າລີກອີກໄລຍະຫນຶ່ງກ່ອນ ເພາະຍັງລໍຖ້າຜົນການກວດກາຄຸນນະພາບນໍ້າຈາກວິຊາການຂອງຫ້ອງການສິ່ງແວດລ້ອມ ຈຶ່ງຢືນຢັນໄດ້ວ່າປອດໄພ ຫລື ບໍ່ ?.
      

ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ - Wave100S AD to Website 2020 0 - ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ

ທ່ານ ພູຜ່ານ ພູວົງ ຫົວຫນ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງກາສີ ໃຫ້ຮູ້ວ່າ: ສະພາບປາຕາຍແມ່ນຫ່າງຈາກຈຸດທີ່ມີການກໍ່ສ້າງປະມານ 1 ກິໂລແມັດ, ມີປາຕາຍລວມແລ້ວປະມານ 7 ຫາ 8 ກິໂລ, ຫຼັງຈາກພົບເຫັນນໍ້າຂຸ່ນຜິດປົກກະຕິ ແລະ ມີປາຕາຍ ທາງເມືອງ ແລະ ພາກສ່ວນກ່ຽວຂ້ອງກໍໄດ້ຮີບຮ້ອນລົງຕິດຕາມ, ກວດກາເພື່ອສະກັດກັ້ນບໍ່ໃຫ້ມີຜົນກະທົບຮ້າຍແຮງຕໍ່ສິ່ງແວດລ້ອມ ແລະ ສັງຄົມ ແລະ ທາງວິຊາການຂອງບໍລິສັດກໍຢືນຢັນວ່າ: ແມ່ນຍ້ອນມີການຜິດພາດທາງເຕັກນິກໃນການກໍ່ສ້າງຂອງຕົນແທ້ ຈຶ່ງເຮັດໃຫ້ເກີດການຮົ່ວໄຫລຂອງສານພິດດັ່ງກ່າວ, ແຕ່ມາເຖິງປັດຈຸບັນແມ່ນໄດ້ແກ້ໄຂເປັນທີ່ຮຽບຮ້ອຍແລ້ວ.

ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ - WhatsApp Image 2020 05 27 at 5 - ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ
ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ - WhatsApp Image 2020 05 27 at 5 - ຮູ້ແລ້ວສາເຫດປາຕາຍຢູ່ນ້ຳລີກເມືອງກາສີ
error: Alert: ເນື້ອຫາຂ່າວມີລິຂະສິດ !!