ບັນຫາພາສາລາວແກ້ງ່າຍ ຖ້າເຮັດຫລາຍກວ່າເວົ້າ
ໃນປັດຈຸບັນ ເວົ້າໄດ້ວ່າວົງການສື່ຂອງພວກເຮົາໃຫ້ຄວາມສົນໃຈບັນຫາພາສາລາວລື່ນໄລຍະຜ່ານມາຫລາຍທົບເທົ່າ, ໜັງສືພິມລາຍວັນເກືອບທຸກສະບັບມີຄໍລຳປະຈຳກ່ຽວກັບການໃຊ້ພາສາລາວໃຫ້ຖືກຕ້ອງ, ບໍ່ຊອດ-ຊີດ, ບໍ່ແປກປົນກັບພາສາອື່ນໆ.
ບັນດາຄໍລຳທີ່ວ່ານີ້ ລ້ວນແຕ່ມີຊື່ຊວນອ່ານເຊັ່ນ: “ຮັກພາສາລາວ”, “ພາສາລາວມື້ລະໜ້ອຍ”, “ພາສາພາເສຍ” ແລະ ອື່ນໆ. ສ່ວນທີ່ບໍ່ມີຄໍລຳປະຈຳກໍມີບົດຄວາມອອກມາເປັນແຕ່ລະໄລຍະ.
ນອກຈາກສື່ສິ່ງພິມແລ້ວ, ສື່ເອເລັກໂຕຣນິກກໍມີລາຍການພິເສດ ເພື່ອຊີ້ແນະກ່ຽວກັບການໃຊ້ ແລະ ການພັດທະນາພາສາລາວໃຫ້ຄົງຢູ່ຄູ່ກັບຊາດ ແລະ ມີບາດກ້າວຂະຫຍາຍຕົວຕາມຍຸກສະໄໝ. ຄຳຂວັນເຕືອນໃຈທີ່ບອກວ່າ: “ເສຍພາສາເສຍຊາດ” ນັ້ນ ຖືກຍົກຂຶ້ນມາເວົ້ານັບມື້ຖີ່.
ທີ່ເປັນໜ້າຊົມເຊີຍແຮງກໍຄືເຫລົ່າສະມາຄົມນັກປະພັນລາວ, ສະມາຄົມສົ່ງເສີມການອ່ານ, ສິລະປະວັນນະຄະດີກໍລ້ວນແຕ່ສຸມຄວາມພະຍາຍາມ ເພື່ອປົກປັກຮັກສາ ແລະ ພັດທະນາພາສາລາວໃຫ້ກ້າວໜ້າທັນສະໄໝ. ຖ້າເບິ່ງຕາມຄວາມພະຍາຍາມທີ່ກາຍເປັນກະແສຟົດຟື້ນດັ່ງກ່າວແລ້ວ ແນ່ນອນພວກເຮົາທຸກຄົນກໍຄົງມີຄວາມໝັ້ນໃຈຢ່າງແນບແໜ້ນໃນຜົນສຳເລັດທີ່ຍາດມາໄດ້.
ແຕ່ໃນສະພາບຄວາມເປັນຈິງແລ້ວ ເສັ້ນທາງສູ່ຄວາມເປັນເອກະພາບໃນການໃຊ້ພາສາລາວນັ້ນຍັງອີກດົນຈຶ່ງຈະຢື້ເຖິງ. ຍ້ອນຫຍັງ ? ແນ່ນອນຄຳຖາມນີ້ຖ້າຈະໃຫ້ຕອບລະອຽດກໍຄົງໃຊ້ເວລາບໍ່ແມ່ນຂອງຄ່ອຍ, ແຕ່ຖ້າໃຫ້ຕອບສັ້ນໆແລ້ວ ຈານແຫຍ່ ຂໍບອກພຽງວ່າ ມັນເປັນຍ້ອນແນວຄິດໃນຕົວ ແລະ ຕາຍຕົວຂອງບຸກຄົນ ເຊິ່ງລວມທັງກະໂຕຂອງເຮົາເອງຫັ້ນທີ່ບໍ່ຍອມປ່ຽນແປງ ດ້ວຍເຫດຜົນພຽງວ່າ: “ເຮົາເຄີຍໃຊ້ເຄີຍເວົ້າແນວນັ້ນມາແຕ່ດົນແລ້ວ, ເຮົາປ່ຽນບໍ່ໄດ້ ເພາະບໍ່ລຶ້ງ”.
ຈານແຫຍ່ ຈຳບໍ່ລືມຄຳເວົ້າຂອງນັກປະພັນ-ນັກພາສາສາດຄົນໜຶ່ງທີ່ບອກວ່າ: “ການທີ່ຈະໄປຊີ້ແນະຜູ້ນັ້ນຜູ້ນີ້ໃຫ້ໃຊ້ພາສາລາວຖືກຕ້ອງນັ້ນ ກ່ອນອື່ນໝົດຕົນເອງຕ້ອງເວົ້າເອງ-ໃຊ້ເອງໃຫ້ຖືກຕ້ອງກ່ອນ”.
ທ່ານເວົ້າຕໍ່ວ່າ: ຕົວຢ່າງງ່າຍໆ ກໍຄືໃຫ້ຖາມຕົນເອງວ່າ: ຕົນເອງ “ຮ້ອຍ” ຫລືເວົ້າ “ລ້ອຍ” ຖ້າຍັງເວົ້າ “ລ້ອຍ” ແທນຄຳວ່າ “ຮ້ອຍ” (100) ແລ້ວ ຂໍຢ່າຟ້າວໄປສອນຄົນອື່ນໃຊ້-ເວົ້າພາສາລາວໃຫ້ຖືກຕ້ອງເທື່ອ ເພາະຂະໜາດຄຳວ່າ “ຮ້ອຍ” ກໍຍັງເວົ້າບໍ່ເປັນ ຫລື ບໍ່ຍອມປ່ຽນ.
ໄດ້ຍິນແນວນັ້ນ ຈານແຫຍ່ ກໍເລີຍຢຶດຖືເປັນເຂັມທິດວ່າ: ຜູ້ທີ່ຍັງເວົ້າໜຶ່ງລ້ອຍ, ສອງລ້ອຍ, ຫ້າລ້ອຍ, ພັນເກົ້າລ້ອຍນັ້ນ ຈະມາແນະນຳເລື່ອງພາສາລາວໃຫ້ ຈານແຫຍ່ ບໍ່ໄດ້ເດັດຂາດ, ຈານແຫຍ່ ຈະບໍ່ຍອມຟັງເລີຍ.
ຄັ້ງໜຶ່ງເຄີຍລົມກັບຜູ້ນຳລະດັບເຈົ້າກະຊວງ. ທ່ານບອກວ່າ: ເລື່ອງປ່ຽນຊື່ “ບ້ານພັກ” ເປັນ “ເຮືອນພັກ” ຫັ້ນ ບໍ່ເປັນບັນຫາສຳລັບເຮົາ, ແຕ່ຊິປ່ຽນຄຳວ່າ “ເດີ່ນໜ້າບ້ານ-ຫລັງບ້ານ” ມາເປັນ “ເດີ່ນໜ້າເຮືອນ-ເດີ່ນຫລັງເຮືອນ” ນັ້ນ ໂອຍ ! ມັນຍາກ, ມັນເປັນສີຂັດໆໃນປາກວາດໃດວາດໜຶ່ງນີ້ລະ ເພາະບໍ່ລຶ້ງ.
ການປ່ຽນແປງທຸກຢ່າງຕ້ອງເຮັດຄົບຊຸດ, ອາດຈະເຮັດເປັນຂັ້ນຕອນ ແຕ່ກໍຕ້ອງໃຫ້ຄົບຊຸດ. ສຳຄັນທີ່ສຸດຕ້ອງເລີ່ມຈາກຕົວເຮົາເອງນີ້ລະກ່ອນ !.
