ນຳ​ໃຊ້​ລາງວັນ​ສາກົນ​ເປັນ​ກຳລັງ​ໃຈ​ປັບປຸງ​ການທ່ອງ ທ່ຽວ​ລາວ

ນຳ​ໃຊ້​ລາງວັນ​ສາກົນ​ເປັນ​ກຳລັງ​ໃຈ​ປັບປຸງ​ການທ່ອງ ທ່ຽວ​ລາວ - 35 4 - ນຳ​ໃຊ້​ລາງວັນ​ສາກົນ​ເປັນ​ກຳລັງ​ໃຈ​ປັບປຸງ​ການທ່ອງ ທ່ຽວ​ລາວ
ນຳ​ໃຊ້​ລາງວັນ​ສາກົນ​ເປັນ​ກຳລັງ​ໃຈ​ປັບປຸງ​ການທ່ອງ ທ່ຽວ​ລາວ - AGL banner - ນຳ​ໃຊ້​ລາງວັນ​ສາກົນ​ເປັນ​ກຳລັງ​ໃຈ​ປັບປຸງ​ການທ່ອງ ທ່ຽວ​ລາວ

     ໜັງສືພິມ​ວຽງ​ຈັນທາ​ມ ສະບັບ​ວັນ​ທີ 20 ​ເດືອນ​ກຸມພາ​ ​ເດືອນ​ນີ້​ໄດ້​ງະ​ຮິມ​ສົບ​ໃຫ້ ຈານ​ແຫຍ່​ ປ່ອຍ​ສຽງ​ດ້ວຍ​ຄວາມ​ດີ​ໃຈ​ອອກ​ມາ​ວ່າ: “​ເຫັນ​ບໍລະ ? ມັນ​ຊິ​ໂປ້​ບັດ​ຫລ້າ ໝາກ​ແຕງຄ້າງ​ໜ່ວຍ​ປາຍ !” ຄິດ​ວ່າ​ໃຜ​ໄດ້​ອ່ານ​ບົດ​ໃນ​ໜັງສືພິມ​ສະບັບ​ນັ້ນກໍ​ຄົງ​ຈະ​ມີ​ຄວາມ​ຮູ້ສຶກ​ເຊັ່ນ​ດຽວ​ກັນ ​ເພາະ​ໃນ​ໄລຍະ​ຜ່ານ​ມາ ​ເມື່ອ​ເວົ້າ​ເຖິງ​ບັນຫາ​ການທ່ອງທ່ຽວ​ແລ້ວ ຫລາຍ​ຄົນ​ກໍ​ຍັງ​ມີ​ຄວາມ​ກັງວົນ​ສົນ​ໃຈ​ກ່ຽວ​ກັບ​ຫລາຍໆ​ບັນຫາ​ທີ່​ຍັງ​ເປັນ​ອຸປະສັກ ​ເຮັດ​ໃຫ້​ອຸດສາຫະກຳ “ສົ່ງ​ອອກ​ກັບ​ທີ່” (ຄວາມ​ໝາຍ​ຂອງ​ອຸດສາຫະກຳ​ທ່ອງ​ທ່ຽວ) ບໍ່​ເບັ່ງ​ບານ​ເທົ່າ​ທີ່​ຄວນ​ຈະ​ເປັນ​ໄປ.

     ໜັງສືພິມ​ວຽງ​ຈັນທາ​ມ ສະບັບ​ທີ່​ກ່າວ​ມາ​ຂ້າງ​ເທິງ​ນັ້ນ ​ໄດ້​ບອກ​ຂ່າວ​ດີ​ວ່າ: ​ແວນ​ເດີ​ລັດ (Wanderlust) ວາລະສານ​ການທ່ອງທ່ຽວ​ທີ່​ມີ​ຊື່​ສຽງ​ຂອງ​ປະ​ເທດ​ອັງກິດ ​ໄດ້​ຈັດ​ປະ​ເທດ​ລາວ​ພວກ​ເຮົາ​ເປັນ​ແຫ​ລ່ງທ່ອງ​ທ່ຽວ​ຍອດ​ນິຍົມ​ອັນ​ດັບ​ທີ 3 ຂອງ​ໂລກ ຮອງ​ຈາກ​ປະ​ເທດ​ມາ​ນີບີ ​ແລະ ​ເປຣູ (ຜ່ານ​ມາ ຈານ​ແຫຍ່ ​ໂຊກ​ດີ​ໄດ້​ໄປ​ເຫັນ 2 ປະ​ເທດ​ນີ້​ມາ​ແລ້ວ) ​ໂດຍ​ຜ່ານ​ການ​ເກັບ​ກຳ​ຄະ​ແນນ​ສຽງ​ຈາກ​ຊາວ​ອັງກິດຫລາຍ​ກວ່າ 500 ຄົນ. ນີ້​ເປັນ​ເທື່ອ​ທີ​ສອງ​ທີ່​ວາລະ​ລື​ຊື່​ສະບັບ​ນີ້​ໄດ້​ມອບ​ລະດັບ​ອັນ​ຊົງ​ກຽດ​ໃຫ້​ປະ​ເທດ​ຂອງ​ພວກ​ເຮົາ. ຂ່າວ​ບອກ​ວ່າ: ທາງ​ວາລະສານ​ໄດ້​ມອບ​ລາງວັນ​ຢັ້ງຢືນ​ອັນ​ດັບ​ດັ່ງກ່າວ ​ໂດຍ​ແມ່ນ​ທ່ານ​ທູດ​ໃຫຍ່ ພົງ​ສະຫວັນ ສີ​ສຸລາ​ດ ປະຈຳ​ປະ​ເທດ​ອັງກິດ ​ເປັນ​ຜູ້​ຮັບ. ສ່ວນ​ທ່ານ ສູນ ​ມະ​ນິວົງ ຫົວໜ້າກົມ​ການ​ຕະຫລາດ​ທ່ອງ​ທ່ຽວ ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ ກໍ​ໄດ້​ມີ​ຄຳ​ເຫັນ​ກ່ຽວ​ກັບ​ເລື່ອງ​ນີ້ ​ໃນ​ວັນ​ທີ 19 ​ເດືອນ​ນີ້​ວ່າ:  ລາງວັນ​ຢັ້ງຢືນ​ຂອງ​ວາລະສານ Wanderlust ຈະ​ຊ່ວຍ​ໃຫ້​ມີ​ຜູ້​ສົນ​ໃຈ​ຢາ​ກຮູ້​ຢາກ​ເຫັນ​ປະ​ເທດ​ລາວ​ຫລາຍ​ຂຶ້ນ.

     ​ເລື່ອງ​ນີ້​ເວົ້າອີກ​ຖືກ​ອີກ, ຖ້າ​ພວກ​ເຮົາ​ບໍ່​ເກັ່ງ​ແທ້ ບໍ່​ດີ​ແທ້ ​ເຫດ​ໃດ​ວາລະສານ​ທີ່​ໂດ່​ງດັງ​ລະດັບ​ໂລກ​ຈຶ່ງ​ໃຫ້​ຄະ​ແນນ​ສູງ​ເກືອບ​ຈຸ​ເມກ​ຄື​ແນວ​ນີ້ ?

       ໃນ​ຊຸມ​ປີ​ຫລັງໆ​ມາ​ນີ້ ປະ​ເທດ​ລາວ​ພວກ​ເຮົາ​ໄດ້​ຮັບ​ຫລາຍ​ລາງວັນ​ຂັ້ນສູງ​ດ້ານ​ການທ່ອງທ່ຽວ​ຈາກ​ພາກພື້ນ ​ແລະ ສາກົນ ​ໂດຍ​ພູດ​ໃຫຍ່ໆ​ນັ້ນຕົກ​ເປັນ​ຂອງ​ນະຄອນຫລວງ​ພະ​ບາງ, ຫລຸດ​ລັ່ນ​ລົງ​ມາ​ກໍ​ແມ່ນ​ວັງ​ວຽງ, ຈຳປາ​ສັກ, ​ເຂດ​ທ່ອງ​ທ່ຽວ​ອະນຸລັກ​ປ່າ​ທຳ​ມະ​ຊາດນ້ຳກັດ, ນ້ຳຫ້າ, ​ເຂດ​ອະນຸລັກ​ເສືອ​ໂຄ່ງ​ພັນ​ລາວ​ແທ້ ​ແລະ ອື່ນໆ. ຄະ​ແນນ​ນິຍົມ ​ແລະ ລາງວັນ​ຈາກ​ວາລະສານ Wanderlust ​ແມ່ນ​ອີງ​ໃສ່​ລະດັບ “ຄວາມ​ພໍ​ໃຈ” ຫລື ຄວາມ​ປະ​ທັບ​ໃຈ​ຂອງ​ນັກ​ທ່ອງ​ທ່ຽວ​ທີ່​ໄດ້​ມາ​ເຫັນ-ຊົມ​ບ້ານ​ເມືອງ​ຂອງ​ພວກ​ເຮົາ​ດ້ວຍ​ຕາ​ຕົນ​ເອງ.

ນຳ​ໃຊ້​ລາງວັນ​ສາກົນ​ເປັນ​ກຳລັງ​ໃຈ​ປັບປຸງ​ການທ່ອງ ທ່ຽວ​ລາວ - Wave100S AD to Website 2020 0 - ນຳ​ໃຊ້​ລາງວັນ​ສາກົນ​ເປັນ​ກຳລັງ​ໃຈ​ປັບປຸງ​ການທ່ອງ ທ່ຽວ​ລາວ

     ​ແນວ​ໃດ​ກໍ​ດີ, ສຸພາສິດ​ເຕືອນ​ໃຈ​ຂອງ​ລາວ​ເຮົາ​ຫລາຍ​ບົດ​ເຊັ່ນ: “ຫວານ​ເປັນ​ລົມ ຂົມ​ເປັນ​ຢາ” ຫລື “ອົດສົ້ມ​ໄດ້​ກິນ​ຫວານ” ນັ້ນ ​ໄດ້​ສອນ​ຄົນ​ລາວ​ເຮົາ​ບໍ່​ໃຫ້​ເພີດ​ເພີນ​ຈົນ​ລືມ​ໂຕ​ຕໍ່​ຄຳ​ຍ້ອງຍໍ​ສັນລະ​ເສີນ. ລາງວັນ ​ແລະ ຄະ​ແນນ​ນັ້ນມີ​ການ​ຜັນ​ແປ​ໄປ​ຕາມ​ກະ​ແສ, ວັນ​ໜຶ່ງ​ດີ​ມື້ໜ້າ​ອາດ​ປ່ຽນ​ເປັນ​ຮ້າຍ. ລະດັບ​ຄວາມ​ພູມ​ໃຈ​ຂອງ 8.500 ຄົນຜ່ານ​ວາລະສານ Wanderlust ກ່ຽວ​ກັບ​ການທ່ອງທ່ຽວ​ປະ​ເທດ​ພວກ​ເຮົາ​ນັ້ນບໍ່​ໄດ້​ບອກ​ວ່າ​ເປັນຄວາມ​ພູມ​ໃຈ​ຮອບດ້ານ, ມັນ​ອາດ​ເປັນ​ດ້ານ​ໃດ​ດ້ານ​ໜຶ່ງ​ກໍ​ເປັນ​ໄດ້. ​ໄລຍະ​ການ​ຕີ​ລາຄາເພື່ອ​ໃຫ້​ຄະ​ແນນ​ນັ້ນ ກໍ​ເຮັດ​ໃຫ້​ຂອບ​ເວລາ​ສະ​ເພາະ​ແຕ່​ເດືອນ​ທັນວາ 2018 – ພະຈິກ 2019. ການ​ປະຕິວັດ​ລາວ​ພວກ​ເຮົາ​ໄດ້​ຮັບ​ຜົນສຳ​ເລັດ​ຢ່າງ​ສົມບູນ ດ້ວຍ​ຄວາມ​ທະ​ນົງ​ໃຈ​ໃນ​ໄຊ​ຊະນະ ​ແລະ ດ້ວຍ​ການ​ໝູນ​ໃຊ້​ບົດຮຽນ​ຄວາມ​ຜິດພາດ​ທີ່​ຂົມ​ຂື່ນ. ການ​ປອງ​ດອງ ​ແລະ ​ໂຮມ​ລາວ​ຄັ້ງທີ 3 ​ໄດ້​ຮັບ​ຜົນສຳ​ເລັດ​ກໍ​ຍ້ອນ​ຮູ້​ຖອດ​ຖອນ​ບົດຮຽນ​ຈາກ​ຄວາມ​ຜິດພາດ​ໃນ​ການ​ໂຮມ​ລາວ 2 ຄັ້ງກ່ອນ​ໜ້ານັ້ນບໍ່​ແມ່ນ​ຫວະ ?.

     ດັ່ງນັ້ນ, ຈຶ່ງ​ຢາກ​ຂໍ​ໃຫ້​ພວກ​ເຮົາ​ນຳ​ໃຊ້​ຄະ​ແນນ​ຍ້ອງຍໍ ກໍ​ຄື​ລາງວັນ​ຍອດ​ຢ້ຽມ​ຂອງ​ສາກົນ ​ແລະ ພາກພື້ນກ່ຽວ​ກັບ​ການທ່ອງທ່ຽວ​ບ້ານ​ເຮົາ​ທັງ​ໝົດ​ເປັນ​ຢາ​ກຳລັງ​ໃຈ​ໃນ​ການ​ແກ້​ໄຂ​ບັນຫາ​ທີ່​ກົດ​ໜ່ວງ​ຈັງຫວະ​ການ​ພັດທະນາ​ການທ່ອງທ່ຽວ​ເຊັ່ນ: ລາຄາ​ສິນຄ້າ, ອາຫານ​ການ​ກິນ​ແພງ​ເກີນ​ເຫດ, ການ​ເກັບ​ບໍລິການ​ຊ້ຳຊ້ອນ, ຄວາມ​ປອດ​ໄພ​ຂອງ​ນັກ​ທ່ອງ​ທ່ຽວ, ຄ່າ​ບໍລິການ​ທີ່​ຫລຸດ​ໂຕນ​ກັນ​ລະຫວ່າງ​ນັກ​ທ່ອງ​ທ່ຽວ​ພາຍ​ໃນ​ກັບ​ນັກ​ທ່ອງ​ທ່ຽວ​ຕ່າງປະ​ເທດ, ຈັນ​ຍາ​ບັນ​ຂອງ​ຜູ້ນຳ​ທ່ຽວ, ບັນຫາ e-tourism, ອັດທະຍາ​ໄສ-ນ້ຳ​ໃຈ​ຮັບ​ແຂກ​ບ້ານ​ແຂກ​ເມືອງ​ຂອງ​ຄົນ​ລາວ​ພວກ​ເຮົາ ​ແລະ ພິ​ເສດ​ສຸດໆ ກໍ​ຄື​ການ​ກະຈາຍ​ລາຍ​ໄດ້​ຂອງ​ການທ່ອງທ່ຽວ​ສູ່​ຄົນ​ທ້ອງ​ຖິ່ນ​ຢ່າງ​ສົມ​ເຫດ​ສົມ​ຜົນ. ​ເຮັດ​ໄດ້​ສໍ່າ​ນີ້​ ບໍ່​ມີ​ໃຜ​ຍ້ອງ​ການທ່ອງທ່ຽວ​ລາວ​ກໍ​ເບັ່ງ​ບານ​ໄດ້.     ​

ນຳ​ໃຊ້​ລາງວັນ​ສາກົນ​ເປັນ​ກຳລັງ​ໃຈ​ປັບປຸງ​ການທ່ອງ ທ່ຽວ​ລາວ - lattana 1 - ນຳ​ໃຊ້​ລາງວັນ​ສາກົນ​ເປັນ​ກຳລັງ​ໃຈ​ປັບປຸງ​ການທ່ອງ ທ່ຽວ​ລາວ
error: Alert: Content is protected !!