ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ

ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ - 63 3 - ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ
ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ - Untitled design - ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ

ທິດ​ກໍ່າ:

     ມາ​ຮອດ​ປັດຈຸບັນ, ​ເຫັນ​ວ່າ​ອຸດສາຫະກຳ​ການທ່ອງທ່ຽວ​ຂອງ​ປະ​ເທດ​ເຮົາ​ໄດ້​ເລີ່​ມມີ​ການ​ພັດທະນາ​ເຕີບ​ໃຫຍ່​ດີ​ຂຶ້ນ​ເທື່ອ​ລະ​ກ້າວ. ສິ່ງ​ທີ່​ສະ​ແດງ​ອອກ​ໃຫ້​ເຫັນ​ຢ່າງ​ປະຈັກ​ຕາກໍ​ຄື​ໃນ​ປີ 2019 ​ໂອກາດ​ຈັດ​ປີ​ທ່ອງ​ທ່ຽວ ລາວ-ຈີນ ກໍ​ສາມາດ​ດຶງ​ດູດ​ນັກ​ທ່ອງ​ທ່ຽວ​ຈີນ​ເຂົ້າມາ​ທ່ຽວ​ລາວ​ເຖິງ 1 ລ້ານ​ຄົນ. ມາ​ໃນ​ປີ 2020 ນີ້​ເອງ, ລາວ​ເຮົາ​ກໍ​ໄດ້​ຮັບ​ລາງວັນ​ຊະນະ​ເລີດ​ອັນ​ດັບ​ທີ 3 ປະ​ເທດ​ຍອດ​ນິຍົມ​ແຫ່ງ​ການທ່ອງທ່ຽວ ​ໂດຍ​ແມ່ນ​ວາລະສານ​ການທ່ອງທ່ຽວ Wanderlust ຂອງ​ປະ​ເທດ​ອັງກິດ​ເປັນ​ຜູ້​ຈັດ​ອັນ​ດັບ​ປະຈຳ​ປີ 2020 (Wanderlust Reader Travel Award 2020). ສ່ວນ​ເມືອງ​ຫລວງ​ພະ​ບາງ​ກໍ​ຖື​ວ່າ​ໄດ້​ເປັນອັນ​ດັບ​ໜຶ່ງ​ຂອງ​ໂລກ​ມາ​ໄດ້​ສາມ​ສີ່​ປີ​ຊ້ອນ​ທີ່​ເປັນ​ເມືອງ​ຍອດ​ນິຍົມ​ໃນ​ການທ່ອງທ່ຽວ​ລະດັບ​ໂລກ. ນອກຈາກ​ນັ້ນ ​ໃນ​ປີ 2019 ນະຄອນຫລວງ​ວຽງ​ຈັນ​ເຮົາ​ກໍ​ໄດ້​ຮັບ​ລາງວັນ​ເມືອງ​ທ່ອງ​ທ່ຽວ​ສະອາດ ​ແລະ ຍັງ​ມີ​ຫລາຍ​ບໍລິສັດ, ຫລາຍ​ໂຮງ​ແຮມ​ໄດ້​ຮັບ​ລາງວັນ​ມາດ​ຕະຖານ​ການທ່ອງທ່ຽວ​ໃນ​ລະດັບ​ທີ່​ແຕກ​ຕ່າງ​ກັນ. ຈາກ​ການ​ເຕີບ​ໃຫຍ່​ໃນ​ລັກສະນະ​ຕັ້ງໜ້າ​ທີ່​ກ່າວ​ມາ​ຂ້າງ​ເທິງ​ນັ້ນ ກໍ​ເຫັນ​ວ່າ​ອຸດສາຫະກຳ​ການທ່ອງທ່ຽວ​ຂອງ​ບ້ານ​ເຮົາ​ນັບ​ມື້ມີ​ການ​ພັດທະນາ ​ແລະ ຂະຫຍາຍຕົວ​ດີ​ຂຶ້ນ​ເລື້ອຍໆ.

      ​ໄປ​ຄຽງ​ຄູ່​ກັບ​ການ​ເຕີບ​ໃຫຍ່​ທາງ​ດ້ານ​ຄຸນ​ນະພາ​ບ​ແລ້ວ, ສະຖານ​ທີ່​ທ່ອງ​ທ່ຽວ​ໃນ​ແຕ່ລະ​ເຂດ​ແຂວງ​ກໍ​ພວມ​ໄດ້​ຮັບ​ການ​ປັບປຸງ ​ແລະ ມີ​ແຫ​ລ່ງທ່ອງ​ທ່ຽວ​ເພີ່ມ​ຂຶ້ນ​ເລື້ອຍໆ. ອັນ​ໂດດ​ເດັ່ນ​ທີ່​ສຸດ​ກໍ​ແມ່ນ​ສະຖານ​ທີ່​ທ່ອງ​ທ່ຽວ​ທາງ​ດ້ານ​ວັດທະນະທຳ ​ແລະ ທຳ​ມະ​ຊາດ. ປັດຈຸບັນ ສະຖານ​ທີ່​ທ່ອງ​ທ່ຽວ​ດ້ານ​ວັດທະນະທຳ​ທີ່​ເປັນ​ມໍລະດົກ​ຂອງ​ໂລກ​ກໍ​ມີ​ສາມ​ແຫ່ງ​ແລ້ວຄື: ​ເມືອງ​ຫລວງ​ພະ​ບາງ, ວັດ​ພູ​ຈຳປາ​ສັກ ​ແລະ ​ໄຫຫີນ​ຊຽງ​ຂວາງ, ສ່ວນ​ທາງ​ດ້ານ​ວັດທະນະ​ທຳ​ອີກ​ອັນ​ໜຶ່ງ​ກໍ​ແມ່ນ​ສຽງ​ແຄນ​ລາວ​ນັ້ນ​ເອງ. ປັດຈຸບັນ ທາງ​ລັດຖະ ບານ ກໍ​ຄື​ຂະ​ແໜງ​ການ​ກ່ຽວຂ້ອງພວມ​ຄົ້ນຄວ້າ​ເງື່ອນ​ໄຂ​ແຫລ່ງ​ທ່ອງ​ທ່ຽວ​ທຳ​ມະ​ຊາດ​ພູ​ຫີນ​ໜາມ​ໜໍ່​ເປັນ​ມໍລະດົກ​ຂອງ​ໂລກ.

      ດັ່ງ​ພວກ​ເຮົາ​ຮັບ​ຮູ້​ນຳ​ກັນ​ແລ້ວ​ວ່າ: ປະ​ເທດ​ລາວ​ເຮົາ​ໃນ​ຍຸກ​ອະດີດຕະ ການ​ມາ​ນານ​ຫລາຍ​ຮ້ອຍ​ຫລາຍ​ພັນ​ປີ​ມາ​ເຄີຍ​ມີ​ປະຫວັດສາດ​ເລື່ອງ​ລື​ເປັນ​ແດນ​ແຫ່ງ​ອະລິຍະ​ທຳ ​ໂດຍ​ສະ​ເພາະ​ແມ່ນ​ຍຸກ​ຂອງ​ພະຍາ​ຟ້າ​ງຸ່ມ​ມະຫາລາດ​ທ້ອນ​ໂຮມ​ແຜ່ນດິນ​ລ້ານ​ຊ້າງ, ຍຸກ​ຂອງ​ພະ​ເຈົ້າສຸລິຍະ​ວົງສາ ​ແລະ ຍຸກ​ຂອງ​ເຈົ້າ​ໄຊ​ເສດ​ຖາ​ທິລາດ ທີ່​ໄດ້​ສ້າງ​ວັດວາອາ​ຮາມ, ສິລະ​ປະກຳ, ສະຖາປັດຕະຍະກຳ, ວັນນະຄະດີ​ຈະ​ເລີ​ນຮຸ່ງ​ເຮືອງ​ເລື່ອງ​ລື​ໄປ​ທົ່ວ​ໂລກ ຈົນ​ມີ​ແຂກ​ຕ່າງ​ດ້າວ ທ້າວ​ຕ່າງ​ແດນ​ຈາກ​ປະ​ເທດ​ເອີຣົບ​ເຂົ້າມາ​ພົວພັນ​ຢ້ຽມຢາມ ​ເພື່ອ​ທຳ​ມາ​ຄ້າຂາຍ​ແລກປ່ຽນ​ວັດທະນະທຳ ​ເປັນຕົ້ນ​ແມ່ນ​ປະ​ເທດ​ໂຮ​ນລັງ. ​ແຕ່​ກໍ​ໜ້າ​ເສຍດາຍ ພໍ​ຕົກ​ເຂົ້າມາ​ໃນ​ຍຸກ​ລ້ານ​ຊ້າງ​ຕອນ​ປາຍ ​ໄດ້​ກາຍ​ເປັນ​ສາມ​ກົກ​ຈົນ​ເຮັດ​ໃຫ້​ປະ​ເທດ​ລ້ານ​ຊ້າງ​ຕ້ອງ​ຕົກ​ຢູ່​ໃນ​ຊາຕາ​ອາພັບ ກາຍ​ເປັນ​ປະ​ເທດ​ຊະລາ​ດຂອງ​ສະ ຫຍາມ 114 ປີ ທັງ​ເສຍ​ຊາດ​ເສຍ​ແຜ່ນດິນ, ​ເສຍ​ພົນລະ​ເມືອງ​ໄປ​ກາຍ​ເຄິ່ງຂອງ​ປະ​ເທດ. ພໍ​ຕົກ​ມາ​ໃນ​ຍຸກ​ຊຸມ​ປີ 1950 ມາ​ຮອດ​ຊຸມ​ປີ 1970 ປະ​ເທດ​ລາວ​ກໍ​ຕົກ​ເປັນຫົວ​ເມືອງ​ຂຶ້ນຂອງ​ຈັກກະພັດ​ຜູ້​ຮຸກ​ຮານ. ຈາກ​ຊາຕາ​ອາພັບ​ດັ່ງກ່າວ ​ໄດ້​ເຮັດ​ໃຫ້​ປະ​ເທດ​ລາວ​ເສຍ​ວັດທະນະທຳ, ​ເສຍ​ຊັບ​ສິນ, ​ເສຍ​ເຄື່ອງ​ຄ້ຳຂອງ​ຄູນ​ຂອງ​ບ້ານ​ເມືອງ​ຈົນ​ນັບ​ບໍ່​ຖ້ວນ.

ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ - Wave100S AD to Website 2020 0 - ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ

      ພໍ​ຕົກ​ມາ​ໃນ​ຍຸກ​ປີ 1975 ​ເປັນຕົ້ນມາ ພາຍ​ໃຕ້​ການ​ນຳພາ​ຂອງ​ພັກ ​ແລະ ລັດຖະບານ ​ໄດ້​ມີ​ການ​ປົກ​ປັກ​ຮັກສາ ​ແລະ ສ້າງສາ​ປະ​ເທດ​ຊາດ​ທຸກ​ສິ່ງ​ຢ່າງ​ມີ​ການ​ປັບປຸງ ​ແລະ ກໍ່ສ້າງ​ຂຶ້ນ​ໃໝ່ ເຮັດ​ໃຫ້​ປະ​ເທດ​​ເຮົາ​ມີບົດບາດ ​ແລະ ພັດທະນາ​ເຕີບ​ໃຫຍ່​ຂຶ້ນ​ເລື້ອຍໆ ​ເຊິ່ງໜຶ່ງ​ໃນ​ນັ້ນ​ແມ່ນ​ອຸດສາຫະກຳ​ການທ່ອງທ່ຽວ​ທີ່​ເປັນ​ຂໍ​ກຸນ​ແຈ​ໃຫ້​ປະ​ເທດ​ຊາດ. ຖ້າ​ຈະ​ມາ​ສົມ​ທຽບ​ໃສ່​ລະບອບ​ເກົ່າ​ໃນ​ຍຸກ​ລາຊາ​ປົກຄອງ​ສອງ​ສາມ​ຮ້ອຍ​ປີຜ່ານມາ ຂະ​ແໜງ​ການທ່ອງທ່ຽວ​ແມ່ນ​ຍັງ​ບໍ່​ມີ​ອັນ​ໃດ​ເລື່ອງ​ລື ​ແລະ ​ເປັນ​ມໍລະດົກ​ໂລກ​ຄື​ບ້ານ​ເພິ່ນ​ເມືອງ​ທ່ານ. ກົງກັນຂ້າມ ມີ​ແຕ່​ເປັນ​ຂ້ອຍ​ຂ້າ, ທຸກ​ຍາກ​ລຳບາກ, ຊ້ຳບໍ່​ໜຳ ຍິ່ງ​ເສຍ​ເອກະລາດ, ປະຊາທິປະ​ໄຕ, ປະ​ເທດ​ຊາດ​ທຸກ​ຍາກ ​ແລະ ດ້ອຍ​ພັດທະນາ​ຈົນ​ເປັນ​ຊຳ​ເຮື້ອ​ແກ່ຍາວ​ມາ​ເຖິງ​ທຸກ​ວັນ​ນີ້.

     ​ເຖິງ​ຢ່າງ​ໃດ​ກໍ​ດີ, ມາ​ຮອດ​ຍຸກ​ນີ້ ​ພັກ ​ແລະ ລັດຖະບານ ​ໄດ້​ນຳພາ​ປະ​ເທດ​ຊາດ​ອອກ​ຈາກ​ຄວາມທຸກ​ຍາກ, ອີກ​ບໍ່​ນານ​ກໍ​ຈະ​ໄດ້​ເຫັນ​ປະ​ເທດ​ເຮົາ​ໄດ້​ລຶບ​ຊື່​ອອກ​ຈາກ​ປະ​ເທດ​ທີ່​ທຸກ​ຍາກ ​ແລະ ດ້ອຍ​ພັດທະນາ. ​ໄປ​ຄຽງ​ຄູ່​ກັນນັ້ນ ອຸດສາຫະກຳ​ການທ່ອງທ່ຽວ​ກໍ​​ຍິ່ງ​ຈະເຕີບ​ໃຫຍ່​ສົດ​ໃສ ຖ້າ​ຮ່ວມ​ໃຈ​ພ້ອມ​ກັນບຸກທະລຸ​ນັບ​ແຕ່​ດຽວ​ນີ້​ເປັນຕົ້ນ​ໄປ “​ໃຜ​ວ່າ​ເມືອງ​ລາວ​ເສົ້າ​ເຊົາ​ເດີ້​ຢ່າ​ຟ້າວ​ວ່າ ມັນ​ຊິ​ໂປ້​ບາດ​ຫລ້າ ໝາກ​ແຕງຊ້າງ​ໜ່ວຍ​ປາຍ”.

ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ - WhatsApp Image 2020 05 27 at 5 - ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ
ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ - WhatsApp Image 2020 05 27 at 5 - ການທ່ອງທ່ຽວ​ຈະ​ສົດ​ໃສ​ຖ້າ​ຮ່ວມ​ໃຈ​ບຸກທະລຸ

Comment

    AffiliateLabz
    24/02/2020 - 12:01 pm

    Great content! Super high-quality! Keep it up! 🙂

Comments are closed.

error: Alert: ເນື້ອຫາຂ່າວມີລິຂະສິດ !!