ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ

ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ - 12 2 - ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ
ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ - Untitled design - ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ

ທິດ​ກໍ່າ:

      ອາທິດ​ຜ່ານ​ມາ​ນີ້, ທິດ​ກໍ່າ ​ໄດ້​ມີ​ໂອກາດ​ໄປ​ແຖວ​ເມືອງ​ຄູນ​ຄຳ ​ໄດ້​ຍິນ​ປະຊາຊົນ​ເຂົາ​ຈົ່ມ​ສູ່​ຟັງ​ວ່າ: ​ເຕັມທີ​ແລ້ວ​ສະພາບ​ດຽວ​ນີ້ ຈີນ​ໄປ​ລົງທຶນ​ປູກ​ກ້ວຍ​ຢູ່​ເຂດ​ບ້ານ​ພູ​ຊາດ​ເລາະ​ຂຶ້​ນ​ໄປ​ຫາ​ເຂດ​ບ້ານ​ໂພນ​ທອງ​ມີ​ແຕ່​ສວນ​ກ້ວຍ​ຈີນ​ເຈືອ​ລະ​ເນືອ​ເຕັມ​ຄັບທີບ. ປັດຈຸບັນ​ກ້ວຍ​ທີ່​ປູກ​ພວມ​ງອກ​ງາມ ​ເພາະ​ເຂົາ​ນຳ​ໃຊ້​ສານ​ເຄມີ​ປົນ​ນ້ຳຫົດ ​ເພື່ອ​ກະ​ຕຸ້ນ​ໃຫ້​ມັນ​ເຕີບ​ໃຫຍ່​ໄວ, ຫາກ​ເຕັມທີ່​ແຕ່​ຄົນ​ຜູ້​ຢູ່​ໃກ້​ຄຽງ ​ແລະ ກາຍ​ໄປມາ​ຜ່ານ​ເສັ້ນທາງ​ຮູ້ສຶກ​ມີ​ກິ່ນ​ເໝັນ​ສາບ​ຄາວ​ປິວ​ໄປ​ຕາມ​ກະ​ແສ​ລົມ ບໍ່​ຮູ້​ວ່າ​ຈະ​ໄປ​ຕົກ​ຢູ່​ໃສ, ທາງ​ໃດ​ແດ່. ​ອະນາຄົດ​ຕໍ່ໜ້າ​ກໍ​ຍັງ​ບໍ່​ທັນ​ຮູ້​ວ່າ​ຈະ​ມີ​ຜົນ​ກະທົບ​ແນວ​ໃດ​ແກ່​ປະຊາຊົນ, ສັດສາ​ວາ​ສິ່ງ ​ແລະ ປູ​ປາ​ນານ້ຳທີ່ຢູ່​ບໍລິ​ເວນ​ພື້ນທີ່​ດັ່ງກ່າວ.

     ​ເວົ້າ​ເລື່ອງ​ການ​ລົງທຶນ​ປູກ​ກ້ວຍ ມັນ​ກໍ​ບໍ່​ສະ​ເພາະ​ແຕ່​ແຖວ​ເມືອງ​ຄູນ​ຄຳ ​ແຂວງ​ຄຳ​ມ່ວນ, ຍັງ​ມີ​ອີກ​ຫລາຍ​ບ່ອນ, ຫລາຍ​ເຂດ​ແຂວງ​ໃນ​ທົ່ວ​ປະ​ເທດ ​ໂດຍ​ສະ​ເພາະ​ແມ່ນ​ບັນດາ​ແຂວງ​ພາກ​ກາງ ​ແລະ ພາກ​ເໜືອ ນັບ​ແຕ່​ນະຄອນຫລວງ​ວຽງ​ຈັນ​ຂຶ້ນ​ໄປ​ຮອດ​ອຸດົມ​ໄຊ, ຫລວງ​ນ້ຳທາ ​ແລະ ​ແຂວງ​ອື່ນໆ​ທີ່​ມີ​ການ​ລົງທຶນ​ປູກ. ​ໃນ​ສອງ​ສາມ​ປີຜ່ານມາ ລາວ​ເຮົາ​ກໍ​ມີ​ລາຍ​ຮັບ​ຈາກ​ການ​ປູກ​ກ້ວຍ ​ເພື່ອ​ສົ່ງ​ອອກ​ຫລາຍ​ຮ້ອຍ​ລ້ານ​ໂດ​ລາ​ຕໍ່​ປີ. ການ​ສົ່ງ​ອອກ​ກ້ວຍ​ໄປ​ຕ່າງປະ​ເທດ​ຖື​ເປັນ​ລາຍ​ຮັບ​ໜຶ່ງ​ຂອງ ສປປ ລາວ​ເຮົາ ນັບ​ແຕ່​ມີ​ການ​ເປີດ​ກວ້າງ​ການ​ລົງທຶນ​ເປັນຕົ້ນມາ. ຜູ້​ທີ່​ມາ​ລົງທຶນ​ລາຍ​ໃຫຍ່​ເປັນ​ຕົວ​ຫລັກໆ​ກໍ​ແມ່ນ​ນັກ​ລົງທຶນ​ຈາກ ສປ ຈີນ.

      ​ແນວ​ໃດ​ກໍ​ຕາມ, ​ເວົ້າ​ເຖິງ​ການ​ລົງທຶນ​ປູກ​ກ້ວຍ​ເປັນ​ສິນຄ້າ​ເພື່ອ​ສົ່ງ​ອອກ​ມັນ​ບໍ່​ໄດ້​ໝາຍ​ເຖິງ​ພັກ ​ແລະ ລັດຖະບານ​ເຮົາ​ຫ້າມ​ບໍ່​ໃຫ້​ປູກ, ​ແຕ່​ສິ່ງ​ສຳຄັນ​ຕ້ອງ​ເປັນ​ມິດ​ກັບ​ທຳ​ມະ​ຊາດ​ໃຫ້​ຫລາຍ​ທີ່​ສຸດ. ໝາຍ​ຄວາມ​ວ່າ ຕ້ອງ​ປອດ​ສານພິດ, ສະອາດ ​ແລະ ​ເປັນ​ມິດ​ກັບ​ສິ່ງ​ແວດ​ລ້ອມ, ບໍ່​ໃຫ້​ທຳລາຍ​ທຳ​ມະ​ຊາດ​ຈົນ​ເກີດ​ເຫດ ທັງ​ບໍ່​​ໃຫ້ມີ​ຜົນ​ກະທົບ​ຕໍ່​ການ​ດຳລົງ​ຊີວິດ​ຂອງ​ຄົນ, ສັດສາ​ວາ​ສິ່ງ ​ແລະ ສິ່​ງ​ແວດ​ລ້ອມ​ອ້ອມ​ຂ້າງ​ຢ່າງ​ເດັດຂາດ. ​ໃນ​ເງື່ອນ​ໄຂ​ທີ່​ປະ​ເທດ​ຊາດ​​ພວກ​ເຮົາ​ພວມ​ເລັ່ງລັດ​ພັດທະນາ ມັນ​ກໍ​ມີ​ຫລາຍ​ຂົງ​ເຂດ​ທີ່​ຈະ​ຕ້ອງ​ໄດ້​ບຸກ​ເບີກ​ສ້າງສາ ​ເພື່ອ​ຄວາມ​ຈະ​ເລີ​ນຮຸ່ງ​ເຮືອງ​ຂອງ​ຊາດ. ປັດຈຸບັນ ປະ​ເທດ​ຊາດ​ຂອງ​ພວກ​ເຮົາ​ຍັງ​ຢູ່​ໃນ​ເງື່ອນ​ໄຂ​ທຸກ​ຍາກ ​ແລະ ດ້ອຍ​ພັດທະນາ. ການ​ທີ່​ຈະ​ສ້າງ​ໃຫ້​ປະ​ເທດ​ລາວ​ກາຍ​ເປັນ​ປະ​ເທດ​ທີ່​ຮັ່ງມີ​ສີ​ສຸກ​ນັ້ນ ມັນ​ຕ້ອງ​ໄດ້​ຜ່ານ​ໄລຍະ​ປະຫວັດສາດ ​ໂດຍ​ນຳ​ໃຊ້​ທ່າ​ແຮງ​ທີ່​ບົ່ມ​ຊ້ອນ ​ເປັນຕົ້ນ​ແມ່ນ​ສ້າງ​ຄົນ​ເພື່ອ​ເປັນ​ທຶນຮອນ​ອັນ​ປະ​ເສີດ​ຂອງ​ຊາດ. ນອກຈາກ​ນັ້ນ ກໍ​ຈຳ​ເປັນ​ນຳ​ໃຊ້​ທ່າ​ແຮງ​ທາງ​ດ້ານ​ເສດຖະກິດ​ຢ່າງ​ມີ​ຄຸນຄ່າ ​ແລະ ມີ​ຜົນ​ປະ​ໂຫຍ​ດສູງ​ສຸດ. ປະ​ເທດ​ລາວ​ເຮົາ​ເປັນ​ດິນ​ແດນ​ອູ່​ເຂົ້າອູ່​ປາ, ມີ​ດິນ​ດອນ​ຕອນ​ຫຍ້າ, ມີ​ຫ້ວຍ​ນ້ຳລຳ​ເຊ ​ແລະ ພູຜາ​ປ່າ​ໄມ້​ທີ່​ອຸດົມສົມບູນ. ສິ່ງ​ເຫລົ່າ​ນີ້​ລ້ວນ​ແລ້ວ​ແຕ່​ເປັນ​ຊັບພະຍາກອນ​ທຳ​ມະ​ຊາດ​ທີ່​ຈະ​ເຮັດ​ໃຫ້​ປະ​ເທດ​ຊາດ​ຮັ່ງມີ​ເຂັ້ມ​ແຂງ​ໃນ​ອະນາຄົດ. ນອກຈາກ​ສິ່ງ​ທີ່​ກ່າວ​ມາ​ນີ້​ແລ້ວ, ຢູ່​ພື້ນນ້ຳ, ຢູ່​ໃຕ້​ດິນ​ຍັງ​ມີ​ບໍ່​ແຮ່​ຊະນິດ​ຕ່າງໆ​ທີ່​ຈະ​ຕ້ອງ​ໄດ້​ຂຸດ​ຄົ້ນຂຶ້ນມາ ​ເພື່ອ​ເປັນ​ທຶນຮອນ​ພັດທະນາ​ສ້າງສາ​ປະ​ເທດ​ຊາດ​ໃຫ້​ຮັ່ງມີ​ເຂັ້ມ​ແຂງ ​ແລະ ຈະ​ເລີ​ນຮຸ່ງ​ເຮືອງ​ໃນ​ຕໍ່​ໄປ.

ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ - Wave100S AD to Website 2020 0 - ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ

       ​ເພາະສະນັ້ນ, ​ເພື່ອ​ໃຫ້​ສອດຄ່ອງ​ກັບ​ແນວທາງ​ນະ​ໂຍບາຍ​ຂອງ​ພັກ ​ແລະ ລັດຖະບານ ການ​ພັດທະນາ​ທາງ​ດ້ານ​ກະສິກຳ ​ໂດຍ​ສະ​ເພາະ​ແມ່ນ​ການ​ປູກ​ກ້ວຍ​ເພື່ອ​ສົ່ງ​ອອກ​ເຮັດ​ແນວ​ໃດ​ກໍ​ເຮັດ​ຕ້ອງ​ໃຫ້​ຕິດ​ພັນ​ກັບ​ການ​ອະນຸລັກ​ຮັກສາ​ທຳ​ມະ​ຊາດ ​ແລະ ສິ່ງ​ແວດ​ລ້ອມ​ໃຫ້​ດີ​ທີ່​ສຸດ ຫລື ຖ້າ​ຫາກ​ມີ​ຜົນ​ກະທົບ​ໃນ​ທາງ​ລົບ​ກໍ​ໃຫ້​ມີ​ໜ້ອຍ​ທີ່​ສຸດ ອັນ​ສຳຄັນ​ແມ່ນ​ພະຍາຍາມ​ຫລີກ​ເວັ້ນຜົນ​ກະທົບ​ຕໍ່​ຊີວິ​ດອິນ​ຊີ​ຂອງ​ຄົນ, ສັດສາ​ວາ​ສິ່ງ ​ແລະ ສະພາບ​ແວດ​ລ້ອມ​ອ້ອມ​ຕົວ​ເຮົາ. ຜົນ​ຜະລິດ​ທີ່​ເຮົາ​ໄດ້​ມາ​ກໍ​ຕ້ອງ​ປາສະຈາກ​ສານ​ເຄມີ, ​ໄດ້​ຄຸນ​ນະພາ​ບມາດຕະຖານ ​ແລະ ​ເປັນ​ທີ່​ຍອມຮັບ​ຂອງ​ຕະຫລາດ​ພາຍ​ນອກ. ກົງກັນຂ້າມ ຖ້າ​ພວກ​ເຮົາ​ຫາກ​ບໍ່ຄຳນຶງ​ເຖິງ​ການ​ອະນຸລັກ​ຮັກສາ​ສິ່ງ​ແວດ​ລ້ອມ​ມີ​ແຕ່​ທຳລາຍ​ເພື່ອ​ຜົນ​ປະ​ໂຫຍດຂອງ​ຕົນ​ເອງ​ເປັນ​ຫລັກ ຜົນ​ກະທົບ​ຕາມ​ມາ​ມັນ​ກໍ​ຄື​ທຳ​ມະ​ຊາດ​ໄດ້​ເຫືອດ​ຫາຍ​ໄປ​ຈາກ​ຄົນ​ແຕ່ລະ​ໄລຍະ. ຈາກ​ນັ້ນ ​ໂທດຕາມ​ມາ​ກໍ​ຄື​ໂຣຄາ​ພະຍາດ​ຊະນິດ​ຕ່າງໆ​ເກີດ​ຂຶ້ນຈາກ​ສານ​ເຄມີ ​ເຊິ່ງບໍ່​ຕ່າງ​ຫຍັງ​ກັບ​ຂ່າວ​ຄາວ​ຊ່າ​ລື​ກັນ​ຄື​ດັ່ງ​ທຸກ​ວັນ​ນີ້.

     ດັ່ງ​ພວກ​ເຮົາ​ຮູ້​ນຳ​ກັນ​ແລ້ວ​ວ່າ ການ​ຜະລິດ​ບໍ່​ວ່າ​ໃນ​ຂົງ​ເຂດ​ໃດ​ກໍ​ຕາມ ຖ້າ​ເຮົາ​ໃຊ້​ສານ​ເຄມີ​ຫລາຍ​ເທົ່າ​ໃດ ຜົນ​ກະທົບ​ຕາມ​ມາ​ກໍ​ຄື​ໂຣກລະບາດ, ​ເກີດ​ໂຣຄາ​ພະຍາດ ​ເພາະ​ສະພາວະ​ສິ່ງ​ແວດ​ລ້ອມ​ມີ​ການ​ປ່ຽນ​ແປງ​ດັບ​ສູນ. ນອກ ຈາກ​ນັ້ນ ກໍ​ເກີດ​ຮ້ອນ, ​ເກີດ​ໜາວ, ​ເກີດ​ພາຍຸ​ລົມ​ແດງ, ​ເກີດ​ແຜ່ນດິນ​ຍະ, ​ແຜ່ນດິນ​ໄຫວ, ​ເກີດ​ແລ້ງ, ​ເກີດ​ຖ້ວມ. ທັງ​ໝົດ​ທີ່​ກ່າວ​ມາ​ນີ້ ມັນ​ລ້ວນ​ແລ້ວ​ແຕ່​ມາຈາກ​ຄົນ​ໄປ​ທຳລາຍ​ທຳ​ມະ​ຊາດ​ຍ້ອນ​ຄວາມ​ຢາກ, ຄວາມ​ກະຫາຍ, ຄວາມ​ໂລບ​ມາກ​ໂລພາ​ຂອງ​ມະນຸດ​ເຮົາ. ​ເພາະສະນັ້ນ ​ໃນ​ຕໍ່ໜ້າ ​ແລະ ຍາວ​ນານ ບໍ່​ວ່າ​ຢູ່​ແຫ່ງ​ຫົນ​ຕຳ​ບົນ​ໃດ ຖ້າ​ມີ​ການ​ທຳລາຍ​ທຳ​ມະ​ຊາດ ​ແລະ ສິ່ງ​ແວດ​ລ້ອມ​ໄປ​ຕິກໆ ປ່າ​ໄມ້, ປ່າ​ເຫລົ່າ​ເປົ່າ​ແປນ​ໂທດ​ຕາ​ມມາ​ບໍ່​ໄວ​ກໍ​ຊ້າທຳລາຍ​ທຳ​ມະ​ຊາດ​ສິ່ງ​ແວດ​ລ້ອມ​ຫລາຍ​ຄົນ​ກໍ​ຈະ​ຕາຍ​ໄວ ຍ້ອນ​ເກີດ​ພະຍາດ ​ແລະ ​ໂຣກລະບາດ​ຄື​ເຂົາ​ຊ່າ​ລື​ກັນ​ທຸກ​ວັນ​ນີ້.

ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ - WhatsApp Image 2020 05 27 at 5 - ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ
ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ - WhatsApp Image 2020 05 27 at 5 - ທຳລາຍ​ສິ່ງ​ແວດ​ລ້ອມ​ທຳ​ມະ​ຊາດ​ຫລາຍ​ຄົນ​ກໍ​ຕາຍ​ໄວ
error: Alert: ເນື້ອຫາຂ່າວມີລິຂະສິດ !!