ມາດ​ຕະການ​ຮັບ​ມື Covid-19 ທີ່​ເຂັ້ມງວດ​ຂອງ​ຈີນ

ມາດ​ຕະການ​ຮັບ​ມື covid-19 ທີ່​ເຂັ້ມງວດ​ຂອງ​ຈີນ - 69 1 - ມາດ​ຕະການ​ຮັບ​ມື Covid-19 ທີ່​ເຂັ້ມງວດ​ຂອງ​ຈີນ
ມາດ​ຕະການ​ຮັບ​ມື covid-19 ທີ່​ເຂັ້ມງວດ​ຂອງ​ຈີນ - 174233 - ມາດ​ຕະການ​ຮັບ​ມື Covid-19 ທີ່​ເຂັ້ມງວດ​ຂອງ​ຈີນ

      ຕອນ​ນີ້​ຕ້ອງ​ບອກ​ວ່າ… ສະຖານະ​ການ​ຕ່າງປະ​ເທດ (ນອກ​ຈີນ) ຂ້ອນ​ຂ້າງ​ໜ້າ​ເປັນ​ຫ່ວງ ​ເພາະ​ເລີ່​ມພົບ​ຜູ້​ຕິດ​ເຊື້ອ Covid ຫລາຍ​ປະ​ເທດ​ທົ່ວ​ໂລກ ທັງ​ອາຊີ, ​ເອີຣົບ, ອາ​ເມ​ລິ​ກາ ລວມໆ​ແລ້ວ​ຄື 56 ປະ​ເທດ ​ແລະ ບາງ​ປະ​ເທດ​ເຂົ້າສູ່​ໄລຍະ​ການ​ແຜ່​ເຊື້ອ​ເຟສທີ 3 ​ແປ​ວ່າ: ສາມາດ​ຕິດ​ຕໍ່​ຈາກ​ຄົນ​ສູ່​ຄົນ​ພາຍ​ໃນ​ປະ​ເທດ​ໄດ້ ​ແລະ ​ແຜ່​ເປັນ​ວົງ​ກວ້າງ (​ໂດຍ​ຄົນ​ຜູ້ນັ້ນບໍ່​ໄດ້​ເດີນທາງ​ໄປ​ປະ​ເທດ​ສຸ່ມ​ສ່ຽງ) ​ເຮັດ​ໃຫ້​ຈຳນວນ​ຜູ້​ຕິດ​ເຊື້ອ​ເພີ່ມ​ສູງ​ຂຶ້ນ​ແບບ​ບໍ່​ຢຸດ. ກຣາບ​ເຕີບ​ໃຫຍ່​ແບບ Exponencial ປະ​ເທດ​ທີ່​ໜ້າ​ເປັນ​ຫ່ວງ​ຕອນ​ນີ້​ຄື: ສ.​ເກົາຫລີ ຕິດ 3.105 ຄົນ, ອິຕາ​ລີ 888 ຄົນ, ອີຣານ 593 ຄົນ, ຍີ່ປຸ່ນ 240 ຄົນ. ​ແຕ່​ໃນ​ຂະນະ​ທີ່​ຈີນ… ປະ​ເທດ​ທີ່​ເປັນຕົ້ນຕໍ ​ແລະ ມີ​ຈຳນວນ​ຜູ້​ຕິດ​ເຊື້ອຫລາຍ​ທີ່​ສຸດ​ໃນ​ໂລກ ພັດ​ມີ​ສະຖານະ​ການ​ທີ່​ດີຂຶ້ນ ຈຳນວນ​ຜູ້​ຕິດ​ເຊື້ອລາຍ​ວັນ​ຖື​ວ່າ​ໜ້ອຍ​ລົງ, ຈຳນວນ​ປິ່ນປົວ​ເພີ່ມ​ຂຶ້ນ​ເລື້ອຍໆ ນັບ​ແຕ່​ໄລຍະ​ເດືອນ​ມັງກອນ ຈາກ​ຜູ້​ຕິດ​ເຊື້ອສະ​ສົມ​ທັງ​ໝົດ 79.394 ຄົນ ຕອນ​ນີ້​ຫລຸດ​ເຫລືອ​ຕິດ​ເຊື້ອ 37.357 ຄົນ​ແລ້ວ. ໝາຍ​ຄວາມ​ວ່າ: ຫລຸດ​ລົງ​ກວ່າ​ເຄິ່ງໜຶ່ງ​ແລ້ວ ຄື 53% (ຂໍ້​ມູນ​ວັນ​ທີ 29/2/2020).

     ຈີນ​ຂ້ອນ​ຂ້າງ​ເຂັ້ມງວດ​ຫລາຍ ​ແລະ ອາດ​ຈະ​ມີ​ບາງ​ຢ່າງ​ທີ່​ມາ​ປັບ​ໃຊ້​ກັບ​ພວກ​ເຮົາ​ໄດ້: ມາ​ເບິ່ງ​ວ່າ ຈີນ​ຮັບ​ມື​ແນວ​ໃດ​ແດ່ …? (ສະ​ເພາະ​ເມືອງ Hangzhou ​ເປັນ​ຫລັກ):

  1. ​​ເນື່ອງ​ຈາກ​ສະຖານະ​ການ​ທ້າຍ​ເດືອນ​ມັງກອນ​ທີ່​ອາດ​ຈະ​ເອົາ​ບໍ່​ຢູ່ ​ເພື່ອ​ຫລຸດ​ໂອກາດ​ການ​ແຜ່​ເຊື້ອ​ໄວຣັສ ຈີນ​ເລີຍ​ອອກ​ມາດ​ຕະການ​ໃຫ້​ຄົນ​ອອກ​ມາ​ຊື້​ເຄື່ອງ​ກິນ​ເຄື່ອງ​ໃຊ້​ໄດ້ 2 ວັນ 1 ຄັ້ງ​ເທົ່າ​ນັ້ນ ​ແລະ ຄອບຄົວ​ໜຶ່ງ​ອອກ​ໄດ້​ພຽງ 1 ຄົນ. ສ່ວນ​ໃຜ​ທີ່ຢູ່​ຫໍ​ພັກ​ຄົນ​ດຽວ ​ໃຫ້​ອອກ​ໄດ້ 3 ວັນ 1 ຄັ້ງ ທຸ​ກຄົນ​ຈະ​ຕ້ອງ​ມີ​ບັດ​ໃຫ້​ເຈົ້າໜ້າ​ທີ່​ກວດ​ວ່າ​ອອກ​ໄປ​ມື້​ໃດ, ​ໄປ​ຈັກ​ໂມງ​ກັບ​ຈັກ​ໂມງ.
  2. ທຸກ​ຄົນ​ອອກ​ຈາກ​ເຮືອນ​ຕ້ອງ​ໃສ່​ຜ້າ​ອັດ​ປາກ​ຕະຫລອດ ມີ​ເຈົ້າໜ້າ​ທີ່​ຄອຍ​ກວດ ​ໃຜ​ບໍ່​ໃສ່​ຜ້າ​ອັດ​ປາກ​ຈະ​ຖືກ​ປະກາດ​ໃຫ້​ໃສ່ ຈົນ​ກວ່າ​ຈະ​ໃສ່. ສຳລັບ​ນັກຮຽນ​ຕ່າງປະ​ເທດ​ທີ່​ຍັງ​ອາ​ໄສ​ຢູ່​ຫໍ​ພັກ​ມະຫາວິທະຍາ​ໄລ Hangzhou normal university ມີ​ການ​ແຈກ​ຜ້າ​ອັດ​ປາກ​ໃຫ້​ອາທິດ​ລະ 1 ອັນ​ຕໍ່ 1 ຄົນ.
  3. ​ໃຊ້​ເຕັກ​ໂນ​ໂລ​ຊີ​ໃນ​ການ​ຊ່ວຍ​ຄັດ​ກອງ​ປະ​ເພດ​ຄົນ ທຸກ​ຄົນ​ຢູ່​ບ່ອນ​ນັ້ນຈະ​ມີ​ແອັບ Alipay ຢູ່​ແລ້ວ ຕ້ອງ​ເຂົ້າ​ໄປ​ລົງທະບຽນ ​ເອີ້ນ​ວ່າ: Health code. ຈາກ​ນັ້ນ​ໂທລະສັບ​ຈະ Track ​ເຮົາ​ເລີຍ ວ່າ​ໄປ​ໃສ​ມາ​ແດ່, ຖ້າ​ຢູ່​ແຕ່​ໃນ​ພື້ນທີ່​ປອດ​ໄພ Code ​ເຮົາ​ຈະ​ຂຶ້ນ​ເປັນ​ສີຂຽວ, ​ແຕ່​ຖ້າ​ເຂົ້າ​ໄປ​ພື້ນທີ່​ສ່ຽງ​ມາ Code ຈະ​ປ່ຽນ​ເປັນ​ສີສົ້ມ (ຕ້ອງ​ກັກ​ຕົວ 7 ວັນ) ໜັກ​ກວ່າ​ນັ້ນສີ​ແດງ (ກັກ​ຕົວ 14 ວັນ) ຈົນ​ກວ່າ​ຈະ​ເປັນ​ສີຂຽວ​ຈຶ່ງ​ອອກ​​ໄດ້. ສ່ວນ​ໃຜ​ທີ່​ບັງ​ເອີນ​ຂຶ້ນລົດ​ໄຟ​ສາຍ​ທີ່​ຫາ​ກໍ​ກວດ​ພົບ​ວ່າ​ມີ​ຜູ້​ຕິດ​ເຊື້ອ​ໃນ​ສາຍ​ນັ້ນ ​ເຈົ້າໜ້າ​ທີ່​ຈະ​ຕິດຕາມ​ເລີຍ ​ເພື່ອ​ເຝົ້າລະວັງ​ອາການ.
  4. ສຳລັບ​ຄົນ​ໄປ​ເຮັດ​ວຽກ ກ່ອນ​ເຂົ້າວຽກ​ຕ້ອງ​ກວດ Health code ກັບ​ອຸນຫະພູມ​ກ່ອນ (ຖ້າ​ເປັນ​ສີຂຽວ + ອຸນຫະພູມ​ປົກກະຕິ ​ຈຶ່ງ​ອະນຸຍາດ​ໃຫ້​ເຂົ້າອາຄານ​ໄດ້).
  5. ການ​ຂຶ້ນລິບ ປຸ່ມ​ກົດ​ຈະ​ມີ​ແຣຟພລາສຕິກ​ຕິດ​ໄວ້ ​ເຊິ່ງຈະ​ມີ​ແມ່​ເຮືອນ​ມາ​ປ່ຽນ​ທຸກ​ຊົ່ວ​ໂມງ ຈຳກັດ​ຄົນ​ເຂົ້າລິບ​ບໍ່​ໃຫ້​ແອ​ອັດ.
  6. ການ​ຢືນ​ລຽນ​ແຖວ​ຊື້ອາຫານ ຈະ​ມີ​ສະຕິ​ກ​ເກີ້​ຕິດ​ຢູ່​ພື້ນ ​ເພື່ອ​ໃຫ້​ຢືນ​ເວັ້ນ​ໄລຍະ​ຫ່າງ​ກັນ (ບໍ່​ໃຫ້​ຢືນ​ເຂົ້າ​ແຖວ​ໃກ້ໆ​ກັນ​ຄື​ປົກກະຕິ)
  7. ການ​ກິນ​ເຂົ້າຢູ່​ຮ້ານ​ອາຫານ ​ໃຫ້​ນັ່ງ​ໄດ້​ໂຕະ​ລະ​ຄົນ ບໍ່​ມີ​ການ​​ເຈລະຈາ​ກັນ​ລະຫວ່າງ​ກິນ.
  8. Taxi ຈະ​ມີ​ປລາສະຕິກ​ກັ້ນລະຫວ່າງ ຜູ້ຂັບ ​ແລະ ຜູ້​ໂດຍສານ.
  9. ສຳລັບ​ຄົນ​ທີ່ຢູ່​ນອກ​ປະ​ເທດ ​ເຊັ່ນ​ນັກ​ສຶກສາ​ຕ່າງປະ​ເທດ ຕ້ອງ​ເຂົ້າ​ໄປ​ລົງທະບຽນ Health code ​ແລະ ຖືກ Track ​ເຊັ່ນ​ກັນ.
  10. ນັກ​ສຶກສາທຸກ​ຄົນ​ຕ້ອງ​ສົ່ງ Report ​ໃຫ້​ມະຫາວິທະຍາ​ໄລ​ທຸກ​ວັນ, ທຸກ​ຄົນ​ຈະ​ມີ QRcode ​ໃຫ້​ສະ​ແກນ ​ແລ້ວ​ຕິກ​ຕອບ​ຄຳ​ຖາມ​ເຊັ່ນ: ມື້ນີ້​ມີ​ອາການ​ປ່ວຍ ຫລື ບໍ່, ​ໄອ, ຈາມ, ຫວັດ, ​ໄຂ້ ຫລື ສະບາຍດີ, ​ໄດ້​ໄປ​ຫາ​ໝໍ ຫລື ​ໂຮງໝໍ​ບໍ່, ​ໄດ້​ຕິດ​ຕໍ່​ສຳຜັດ​ກັບ​ຄົນ, ບໍລິ​ເວນ​ທີ່​ຕ້ອງ​ສົງ​ໄສ ຫລື ບໍ່.

     ຈະ​ເຫັນ​ໄດ້​ວ່າ… ຈີນ​ພະຍາຍາມ​ກັກ​ກິດຈະກຳ​ຕ່າງໆ​ບໍ່​ໃຫ້​ຄົນ​ມາ​ຢູ່​ລວມ​ແອ​ອັດ​ກັນ ກະທັ້ງຢືນ​ລຽນ​ແຖວ​ຍັງ​ເວັ້ນ​ໄລຍະ​ຫ່າງ ​ເພື່ອ​ຫລຸດ​ໂອກາດ​ຕິດ​ເຊື້ອ​ໃຫ້​ໄດ້​ຫລາຍ​ທີ່​ສຸດ.

     ຈີນ​ພະຍາຍາມ​ຄັດ​ກອງ ​ແລະ ຫາ​ຜູ້​ທີ່​ມີ​ໂອກາດ​ຕິດ​ເຊື້ອ​ໃຫ້​ໄດ້​ໄວ​ທີ່​ສຸດ ​ໂດຍ​ການ​ໃຊ້​ເຕັກ​ໂນ​ໂລ​ຊີ​ຊ່ວຍ Track ​ເພື່ອ​ຈະ​ໄດ້​ແຍກ​ຄົນ​ເຫລົ່ານັ້ນອອກ​ມາ​ເຝົ້າລະວັງ ​ແລະ ບໍ່​ໃຫ້​ໄປ​ຕິດ​ໃຜ​ຕໍ່​ເພີ່ມ.

     ຈີນ​ເອົາ​ຈິງ ​ແລະ ​ເຂັ້ມງວດ​ຫລາຍ ທັງ​ຄົນ​ໃນ​ປະ​ເທດ ມີ​ເຈົ້າໜ້າ​ທີ່​ຄອຍຄຸມ ​ແລະ ກວດກາ​ຕະຫລອດ ​ແລະ ຍັງ​ເຝົ້າລະວັງ​ໄປ​ເຖິງ​ຄົນ​ທີ່ຢູ່​ນອກ​ປະ​ເທດ​ທີ່​ມີ​ໂອກາດ​ກັບ​ມາ​ໃນ​ອະນາຄົດ​ນຳ​ອີກ.

ມາດ​ຕະການ​ຮັບ​ມື covid-19 ທີ່​ເຂັ້ມງວດ​ຂອງ​ຈີນ - Wave100S AD to Website 2020 0 - ມາດ​ຕະການ​ຮັບ​ມື Covid-19 ທີ່​ເຂັ້ມງວດ​ຂອງ​ຈີນ

     ມາ​ເຖິງ​ປັດຈຸບັນ ຈຳນວນ​ຜູ້​ຕິດ​ເຊື້ອຢູ່​ຈີນ​ຫລຸດ​ລົງ​ເຖິງ​ເຄິ່ງໜຶ່ງ​ແລ້ວ ຍົກ​ເວັ້ນມົນທົນ Hubei ທີ່​ມີ​ເມືອງ​ອູ່​ຮັ່ນທີ່​ຍັງ​ຕິດ​ເຊື້ອສະ​ສົມ​ຢູ່​ຫລາຍ (34.617 ຄົນ) ​ສ່ວນ​ຢູ່ Hangzhou ​ເຫລືອ​ຜູ້​ຕິດ​ເຊື້ອພຽງ 10 ຄົນ​ເທົ່າ​ນັ້ນ.

     ມາດ​ຕະການ​ຕ່າງໆ… ອາດ​ຈະ​ເຂັ້ມງວດ ​ແລະ ຫຍຸ້ງຍາກ​ສຳລັບ​ບາງ​ຄົນ ​ແຕ່​ຕ້ອງ​ຍອມຮັບ​ວ່າ… ​ເຮັດ​ໃຫ້​ຜົນ​ໄດ້​ຮັບ​ໃນ​ຈີນ​ດີ​ຂຶ້ນ​ເລື້ອຍໆ.

    ​ແຕ່​ຢ່າງ​ໃດ​ກໍ​ຕາມ… ດີ​ທີ່​ສຸດ​ຄື ທຸກ​ຄົນ​ຊ່ວຍ​ກັນ​ຮັບຜິດຊອບ​ຕົນ​ເອງ ​ໃສ່​ຜ້າ​ອັດ​ປາກ ລ້າງ​ມື​ເລື້ອຍໆ ບໍ່​ໄປ​ບ່ອນ​ຊຸມ​ຊົນ​ແອ​ອັດ ​ເຝົ້າລະວັງ​ຕົນ​ເອງ​ຫລັງ​ຈາກ​ກັບ​ຈາກ​ພື້ນທີ່​ສ່ຽງ. ຖ້າ​ຕ່າງ​ຄົນ​ຕ່າງ​ຮັບຜິດຊອບ​ຕົນ​ເອງ​ໄດ້​ດີ ​ໂອກາດ​ການ​ແຜ່​ລະບາດ​ກໍ​ຈະ​ຫລຸດ​ໜ້ອຍ​ລົງ.

ມາດ​ຕະການ​ຮັບ​ມື covid-19 ທີ່​ເຂັ້ມງວດ​ຂອງ​ຈີນ - WhatsApp Image 2020 05 27 at 5 - ມາດ​ຕະການ​ຮັບ​ມື Covid-19 ທີ່​ເຂັ້ມງວດ​ຂອງ​ຈີນ
  • 1095 Posts
  • 0 Comments
iLike/LPN/20
error: Alert: ເນື້ອຫາຂ່າວມີລິຂະສິດ !!