ຫ້າມ​ຈູດ​ປ່າ​ດັນ​ໄປ​ຈູດ​ຫຍ້າ​ຢູ່​ຫາດ​ດອນ​ຈັນ

- 1 7 - ຫ້າມ​ຈູດ​ປ່າ​ດັນ​ໄປ​ຈູດ​ຫຍ້າ​ຢູ່​ຫາດ​ດອນ​ຈັນ
- Untitled design - ຫ້າມ​ຈູດ​ປ່າ​ດັນ​ໄປ​ຈູດ​ຫຍ້າ​ຢູ່​ຫາດ​ດອນ​ຈັນ

ໂດຍ: ທິດ​ກໍ່າ

ເຫດ​ໄຟ​ໄໝ້​ປ່າ​ຫຍ້າ​ຢູ່​ຫາດ​ດອນ​ຈັນ​ປາກົດ​ວ່າ​ມີ​ມາ​ສອງ​ຄັ້ງ​ແລ້ວ ​ແລະ ​ໃນແຕ່ລະຄັ້ງ​ໃນ​ເວລາ​ໄຟ​ພວມ​ລຸກລາມ​ໄໝ້ ​ເຮັດ​ໃຫ້​ຜູ້​ຄົນ​ທີ່​ທ່ອງ​ທ່ຽວ​ໄປມາ, ຊອກ​ຢູ່​ຫາ​ກິນ​ແຖວ​ໃກ້​ຄຽງ​ພາກັນ​ຮື​ຮາ ​ແລະ ​ໂຫ່​ໄປ​ເບິ່ງ​ໄປ​ຊົມ ​ແລະ ພາກັນ​ຖ່າຍຮູບ​ສົ່ງ​ອອກ​ເປັນ​ຂ່າວ​ຄາວ​ຜ່ານ​ໂລກ​ອອນ​ລາຍ​ໄປ​ທົ່ວ​ໂລກ. ​ເຫດ​ໄຟ​ໄໝ້​ຄັ້ງທຳ​ອິດ ພໍ​ຮອດ​ເຊົ້າມື້​ໃໝ່​ມາ​ເຫັນ​ຊາກ​ຄົນ​ຕາຍ​ດຳ​ຂື່​ຫລື​ຕີນ​ມື​ຊີ້​ຟ້າ​ແບບ​ປິດສະໜາ​ຈຳນວນ​ໜຶ່ງ​ສົບ ຈົນ​ມາ​ຮອດ​ມື້ນີ້​ກໍ​ຍັງ​ບໍ່​ທັນ​ມີ​ແຫ​ລ່ງຂ່າວ​ຄາວ​ບົ່ງ​ບອກ​ເຖິງ​ສາ​ເຫດ ​ແລະ ກໍ​ບໍ່​ຮູ້​ວ່າ​ເປັນ​ຄົນ​ຢູ່​ໃສ, ບ້ານ​ໃດ, ​ເມືອງ​ໃດ, ປະ​ເທດ​ໃດ, ​ເປັນ​ລູກ​ຫລານ​ໃຜ ​ແລະ ສາ​ເຫດການ​ຕາຍ​ຄື​ແນວ​ໃດ​ເລີຍ​ມິດ​ຫາຍ​ໄປ​ຕາມ​ການ​ເວລາ ກໍ​ສະ​ແດງ​ວ່າ​ຕາຍ​ໄປ​ລ້າໆ (ຕາຍ​ຟຣີ) ນັ້ນ​ເອງ. ຢູ່​ຕໍ່​ມາ​ອີກ​ບໍ່ພໍ​ຮອດ​ສອງ​ເດືອນ ຄື​ໃນ​ຕອນ​ທ່ຽງ​ຂອງ​ວັນ​ທີ 27 ກຸມພາ​ຜ່ານ​ມາ​ນີ້​ເອງ ພັດ​ມີ​ເຫດ​ໄຟ​ໄໝ້​ຕື່ມ​ອີກ​ໃນ​​ບໍລິ​ເວນ​ຫາດ​ດອນ​ຈັນ. ​ແຕ່​ວ່າ​ເຫດ​ໄຟ​ໄໝ້​ຄັ້ງທີ​ສອງ​ນີ້​ບໍ່​ເຫັນ​ມີ​ແຫ​ລ່ງຂ່າວ​ຄົນ​ເຈັບ​ຄົນ​ຕາຍ, ຜົນ​ເສຍ​ຫາຍ​ແຕ່​ປະການ​ໃດ.

      ກ່າວ​ເຖິງ​ຫາດ​ດອນ​ຈັນ, ​ເຄີຍ​ມີ​ຕຳນານ​ຄຽງ​ຄູ່​ກັບ​ນະຄອນ​ສີ​ສັດຕະ​ນາຄະ​ນາ​ຄຸດ​ອຸດຕຣະມະນີ. ​ເບື້ອງ​ແຄມ​ຝັ່ງ​ທ່າ​ວັດ​ຈັນ​ລົງ​ໄປ​ຮອດ​ຂົວ​ຂາວ​ບ້ານ​ວັດ​ນາກ​ມີນ້ຳຂອງ​ໄຫລ​ຜ່ານ​ກວ້າງ​ເກືອບ 300 ​ແມັດ ​ແລະ ​ເລິກ​ປະມານ​ສອງ​ຫາ​ສາມ​ແມັດ. ຢູ່​ຫາດ​ດອນ​ຈັນ​ຍັງ​ມີ​ບ້ານ​ເຮືອນ​ປະຊາຊົນ​ເປັນ​ສາມ​ສີ່​ສິບ​ຫລັງ ​ເອີ້ນ​ວ່າ: ບ້ານ​ຫາດ​ດອນ​ຈັນ. ຢູ່​ສົ້ນຫາດ​ດ້ານ​ໃຕ້, ດ້ານ​ເໜືອ ​ແລະ ບໍລິ​ເວນ​ອ້ອມ​ແອ້ມ​ແຄມ​ຫາດ​ດ້ານ​ຕາ​ເວັນ​ຕົກ ​ແລະ ຕາ​ເວັນ​ອອກກໍ​ເຕັມ​ໄປ​ດ້ວຍ​ສວນ​ຜັກ, ສວນໝາກອຶ, ໝາກ​ແຕງ, ສວນ​ມັນ​ດ້າງມັນ​ເຜົາ ​ແລະ ໝາກ​ເຜັດ​ໝາກ​ເຂືອ​ຂອງ​ຊາວບ້ານ​ຫາດ​ດອນ​ຈັນ​ຂຽວ​ອຸ່ມ​ທຸ່ມ​ເຈືອ​ລະ​ເນືອ​ເຕັມ​ຄັບທີບ. ບັນດາ​ຜົນລະປູກ​ທີ່​ວ່າ​ນີ້ ​ແຕ່​ລະມື້ຊາວ​ສວນ​ຫາດ​ດອນ​ຈັນ​ໄດ້​ເກັບ​ກູ້​ເອົາ​ມາ​ຈຳໜ່າຍ​ຕາມ​ແຄມ​ທາງ, ທັງ​ສະໜອງ​ຕະຫລາດ​ເຊົ້າລ້ຽງ​ໄທ​ວຽງ​ຈັນ​ຈົນ​ອີ່ມ​ພີ​ມີ​ຜະຫຍາ​ມາ​ຫລາຍ​ເຊັ່ນ​ຄົນ. ຕາມ​ປະຫວັດ​ເມືອງ​ວຽງ​ຈັນ​ ນ້ຳທີ່​ໄຫລ​ຜ່ານ​ຫາດ​ເປັນ​ຄອນ​ດອນ​ຈັນ ນັບ​ແຕ່​ບ້ານ​ຂຸນ​ຕາ​ລົງ​ໄປ​ສຸດ​ບ້ານ​ວັດ​ນາກ ​ເອີ້ນ​ວ່າ: ນ້ຳຮ້ວຍ​ນ້ອຍ​ອ້ອຍ​ໜູ ມີ​ປູ​ປາ​ອຸດົມສົມບູນ​ຕຶກ​ແຫ​ໃສ່​ເບັດ​ໃສ່​ມອງ​ຖ້າ​ຢາກ​ຂ້າມ​ໄປ​ຊອກ​ຢູ່​ຫາ​ກິນ​ຢູ່​ເບື້ອງຫາດ​ກໍ​ຕ້ອງ​ໄດ້​ຂີ່​ເຮືອ​ຂ້າມ.

     ພໍ​ຕົກ​ມາ​ເຖິງ​ຍຸກ​ນີ້, ຫາດ​ດອນ​ຈັນ​ໄດ້​ປ່ຽນ​ໄປ​ຢ່າງ​ຫລັງ​ມື​ເປັນ​ໜ້າ​ມື ຈົນ​ຄົນ​ຮຸ້ນ​ໃໝ່​ໄວ​ຄະນອງ​ບໍ່​ຮູ້​ວ່າ​ທຳ​ມະ​ຊາດ​ຫາດ​ດອນ​ຈັນ​ແຕ່​ກີ້​ກັບ​ດຽວ​ນີ້​ມັນ​ແຕກ​ຕ່າງ​ກັນ​ປານ​​ໃດ ?. ການ​ປ່ຽນ​ແປງ, ປ່ຽນ​ໄປ​ຂອງ​ຫາດ​ດອນ​ຈັນ​ສະ​ໄໝ​ນີ້ຄື: ບ້ານ​ຫາດ​ດອນ​ຈັນ​ໄດ້​ມະ​ຫັບ​ມະຫາຍ​ໄປ​ຕາມ​ການ​ເວລາ ຍ້ອນ​ການ​ສ້າງສາ​ພັດທະນາ. ອັນ​ສອງ​ມາກໍ​ແມ່ນ​ບໍ່​ມີ​ເຄື່ອງ​ປູກ​ຂອງ​ຝັງ​ທີ່​ໄດ້​ເຄີຍ​ນຳ​ເອົາ​ມາ​ລ້ຽງ​ໄທ​ວຽງ​ຈັນ​ຄື​ເກົ່າ​ອີກ. ສ່ວນ​ອັນ​ທີ​ສາມ​ກໍ​ບໍ່​ໄດ້​ຂີ່​ເຮືອ​ຂ້າມ​ໄປ​ຊອກ​ຢູ່​ຫາ​ກິນ​ຢູ່​ຫາດ​ເບື້ອງນັ້ນອີກ ຍ້ອນ​ສາຍ​ນ້ຳຂອງ​ເຫືອດ​​ແຫ້ງ ມີ​ຫາດ​ຊາຍ​ປົ່ງ​ຂຶ້ນ​ໃນ​ແຕ່ລະ​ປີ ຈົນ​ວ່າ​ບໍ່​ມີ​ຮອດ​ນ້ຳ​ໄຫລ​ຜ່ານ. ນອກຈາກ​ນັ້ນ ສິ່ງ​ໃໝ່ໆ​ທີ່​ເກີດ​ຂຶ້ນມາ​ທົດ​ແທນ​ໃນ​ຍຸກ​ບ້ານ​ເມືອງ​ຈະ​ເລີ​ນນັ້ນ ກໍ​ຄື​ມີ​ຕຶກ​ຫ້າງ​ຮ້ານ, ມີ​ໂຮງ​ແຮມ, ຖະໜົນ​ຫົນທາງ​ລຽບ​ຕາມ​ແຄມ​ຂອງ ກາງຄືນ​ມາ​ກໍ​ມີ​ການ​ບໍລິການ​ຂາຍ​ສິນຄ້າ​ຕ່າງໆ ​ເຊິ່ງ​ເຂົາ​ເອີ້ນ​ວ່າ: ຕະຫລາດ​ກາງຄືນ. ພໍ​ເຖິງ​ຍາມ​ແລງ​ມາ ຊາວ​ນະຄອນຫລວງ​ວຽງ​ຈັນ​ກໍ​ຈະພາກັນ​ໄປ​ທ່ອງ​ທ່ຽວ, ພັກຜ່ອນ​ຢ່ອນ​ອາລົມ​ຍ່າງ​ຊົມ​ວິວທິວ​ທັດ, ຊົມ​ປ່າ​ຫຍ້າ​ຢູ່​ຫາດ​ດອນ​ຈັນ​ເປັນພຶງ​ເປັນ​​ແພ ​ແລະ ພວມ​ພັດທະນາ​ໃຫ້​ກາຍ​ເປັນ​ສະຖານ​ທີ່​ສຸກ​ສັນ​ຫັນ​ສາ​ນັດ​ພົບ​ກັນ​ໃນ​ຍາມຣາຕີ​ການ​ຂອງ​ຊາວ​ນະຄອນຫລວງວຽງ​ຈັນ​ອີກ​ແຫ່ງ​ໜຶ່ງ. ຍິ່ງ​ໄປ​ກວ່າ​ນັ້ນ ພໍ​ເຖິງ​ຍາມ​ບຸນ​ອອກ​ພັນ​ສາ, ບຸນຊ່ວງ​ເຮືອ, ບຸນປີ​ໃໝ່ ພວກ​ທີ່​ສວຍ​ໂອກາດ​ຫາ​ກິນນຳ​ຫາດ​ດອນ​ຈັນ​ກໍ​ພາກັນ​ຕາຕີ່ຕາລານ​ຈັບຈອງ​ເອົາ​ດິນ​ດອນ​ຕອນ​ຫຍ້າ ນັບ​ທັງ​ຂອບ​ເຂດ​ສະຖານ​ທີ່​ບໍລິ​ເວນ​ແຄມ​ຂອງ ​ເພື່ອ​ຫາ​ລາຍ​ໄດ້​ຈົນ​ມີ​ເງິນ​ມີ​ຄຳ​ເຕັມ​ໄຖ່, ​ເຕັມ​ຖົງ​​ເປັນ​ຈຳນວນ​ບໍ່​ໜ້ອຍ.

- Wave100S AD to Website 2020 0 - ຫ້າມ​ຈູດ​ປ່າ​ດັນ​ໄປ​ຈູດ​ຫຍ້າ​ຢູ່​ຫາດ​ດອນ​ຈັນ

     ສິ່ງ​ທີ່​ໜ້າ​ວິຕົກ​ກັບ​ຫາດ​ດອນ​ຈັນ​ໃນ​ຍຸກ​ນີ້, ພໍ​ເລີກ​ງານ, ​ເລີກ​ບຸນ​ໄປ​ແລ້ວ ມີ​ແຕ່​ຂີ້​ເຫຍື້ອ​ເຕັມ​ໄປ​ຄັບທີບ. ຢູ່​ກະ​ໂຕ​ຫາດ​ດອນ​ຈັນ​ກໍ​ມີ​ປ່າ​ຫຍ້າ, ປ່າ​ເລົ່າ​ຮົກ​ປົກ​ຫຸ້ມ ​ເບິ່ງ​ຄື​ບໍ່​ມີ​ພາກສ່ວນ​ໃດ​ຫລຽວ​ແລ, ຫລຽວ​ລໍ່າ. ​ແຕ່​ວ່າ​ໃນ​ທາງ​ກົງກັນຂ້າມ ພໍ​ໃກ້​ຈະ​ເຖິງ​ຍາມ​ບຸນ​ຍາມ​ທານ ຫາດ​ດອນ​ຈັນ​ຈະ​ກາຍ​ເປັນ​ເງິນ​ເປັນ​ຄຳ ​ແລ້ວ​ພວກ​ສວຍ​ໂອກາດ​ໜ້າ​ເລືອດ​ທັງຫລາຍ​ກໍ​ຈະພາກັນ​ແລ່ນ​ຍາດ​ຄຸບ​ຈົນ​ໜ້າຜາກ​ຊິ​ຕຳ​ກັນ. ​ເກີນວ່າ​ມັນ​ຄັກ​ສົມ​ພໍດີ​ແຕ່​ມີ​ພວກ​ຈັງ​ໄຮ​ເອົາ​ໄຟ​ໄປ​ຈູດ, ພວກ​ທີ່​ຈູດ​ນັ້ນຈັກ​ວ່າ​ເປັນ​ຄົນ​ດີ, ຄົນ​ຮ້າຍ ຫລື​ວ່າ ຄົນ​ບໍ່​ເຕັມ​ສະຫລຶງ. ພໍ​ຈູດ​ໄປ​ແລ້ວ​ພັດ​ເຫັນ​ຊາກ​ສົບ​ຄົນ​ຕາຍ​ດອຍ​ຕີນ​ມື​ຊີ້ຂຶ້ນຟ້າ​ເກ່​ເດ. ນີ້​ລະ​ຄື​ສະພາບ​ຂອງ​ຫາດ​ດອນ​ຈັນ​.

     ​ເຖິງ​ຢ່າງ​ໃດ​ກໍ​ດີ, ຕາມ​ທິດ​ກໍ່າ​ຄິດ ​ເພື່ອ​ຢາກ​ໃຫ້ຫາ​ດດອນ​ຈັນ​ຢູ່​ຄຽງ​ຄູ່​ກັບ​ໄທ​ວຽງ​ຈັນ​ຕໍ່​ໄປພາຍ​ໜ້າ ທັງ​ຫັນ​ເອົາ​ຫາດດອນ​ຈັນ​ໃຫ້​ເປັນ​ດອນ​ເງິນ​ດອນ​ຄຳ ຂະ​ແໜງ​ການ​ກ່ຽວຂ້ອງ​ຄວນ​ໄດ້​ຄຳນຶງ​ເຖິງ​ການ​ປົກ​ປັກ​ຮັກສາ​ໃຫ້​ສະອາດ​ຈົບງາມ ທັງ​ມີ​ຄຸນຄ່າ​ໃຫ້​ເສດຖະກິດ​ຂອງ​ບ້ານ​ເມືອງ. ​ໃນ​ເງື່ອນ​ໄຂ​ພັກ-ລັດ​ເຮົາ​ພວມ​ເລັ່ງສົ່ງ​ເສີມ​ການ​ຜະລິດ​ຂະໜາດ​ນ້ອຍ, ຂະໜາດ​ກາງ ຄວນ​ໃຫ້​ກຸ່ມ​ຜະລິດ​ກະສິກຳ​ອິນ​ຊີ​ໄປ​ບຸກ​ເບີກ​ປູກ​ພືດ​ຜັກ​ຍາມ​ແລ້ງ ​ເພື່ອ​ລ້ຽງ​ໄທ​ວຽງ​ຈັນ​ອາດ​ໄດ້​ເງິນ​ໄດ້​ຄຳ​ເປັນ​ກອບ​ເປັນ​ກຳ​ຍ້ອນ. ກົງກັນຂ້າມ ຖ້າ​ຫາກ​ປະປ່ອຍ​ໄປ​ຕາມ​ຍະຖາ​ກຳ ຫາດ​ດອນ​ຈັນ​ອາດ​ກາຍ​ເປັນ​ແຫ​ລ່ງຫາດ​ມະຫາປາ​ໄລ ຍ້ອນ​ພວກ​ຈັງ​ໄຮ​ເອົາ​ໄຟ​ໄປ​ຈູດ, ​ໄປ​ເສບ​ຢາ​ບ້າ, ​ໄປ​ຂ້າ​ກັນ​ຕາຍ, ສາລະພັດ​ຢ່າງ ຫລື ບໍ່​ກໍ​ອາດ​ມີ​ພວກ​ກຸ່ມ​ຄົນ​ບໍ່​ດີ​ສວຍ​ໃຊ້​ເປັນ​ແຫ​ລ່ງຊຸ້ມ​ຊ້ອນ​, ດັກ​ຊຸ້ມ​ເພື່ອ​ກໍ່​ຄວາມ​ວຸ້ນວາຍ​ໃນ​ກະ​ໂຕ​ນະຄອນຫລວງ​ວຽງ​ຈັນ​ກໍ​ເປັນ​ໄດ້. ຈຶ່ງ​ຂໍ​ສະ​ເໜີ​ໃຫ້​ທ່ານ​ເຈົ້າ​ເມືອງ​ຈັນທະ​ບູລີ ​ແລະ ສີ​ສັດຕະ​ນາກ​ໄປ​ຈອບ​ໄປ​ແລກັ້ງ​ໂກບ​ເບິ່ງ​ແດ່ ​ເພື່ອ​ຊອກ​ວິທີ​ທາງ​ຫລີກ​ເວັ້ນບໍ່​ໃຫ້​ພວກ​ຈັງ​ໄຮ​ເອົາ​ໄຟ​ໄປ​ຈູດ​ອີກ​ຕໍ່​ໄປ. ຖ້າ​ເຮັດ​ບໍ່​ໄດ້​ກໍ​ສະ​ແດງ​ວ່າ​ຄຳ​ສັ່ງ​ຫ້າມ​ຈູດ​ຂີ້​ເຫຍື້ອ, ຈູດ​ປ່າ​ຂອງ​ທ່ານ​ເຈົ້າຄອງ​ເປັນ​ອຳມະພາດ ບໍ່​ມີ​ຜົນ​ສັກສິດ​ ​ໄດ້​ແຕ່​ເວົ້າຢູ່​ໃນ​ຄຳ​ພີ​ດີກາ ​ແຕ່​ບໍ່​ມີ​ໃຜ​ນຳ​ເອົາ​ໄປ​ຈັດຕັ້ງປະຕິບັດ ມັນ​ກໍ​ປຸກ​ປານ​ຢາ​ບ້ານ​ຫ້ອມ​ນັ້ນ​ແລ !.

- WhatsApp Image 2020 05 27 at 5 - ຫ້າມ​ຈູດ​ປ່າ​ດັນ​ໄປ​ຈູດ​ຫຍ້າ​ຢູ່​ຫາດ​ດອນ​ຈັນ
- WhatsApp Image 2020 05 27 at 5 - ຫ້າມ​ຈູດ​ປ່າ​ດັນ​ໄປ​ຈູດ​ຫຍ້າ​ຢູ່​ຫາດ​ດອນ​ຈັນ
error: Alert: ເນື້ອຫາຂ່າວມີລິຂະສິດ !!