ພ້ອມກັນຕ້ານວິກິດໂຄວິດ-19

- 76 - ພ້ອມກັນຕ້ານວິກິດໂຄວິດ-19
- Untitled design - ພ້ອມກັນຕ້ານວິກິດໂຄວິດ-19

 ໂດຍ: ທິດ​ກໍ່າ

     ​ເຖິງ​ວ່າ​ປະ​ເທດ​ເຮົາ​ຍັງ​ບໍ່​ທັນ​ມີ​ໃຜ​ຕິດ​ເຊື້ອ​ໄວຣັສສາຍ​ພັນ​ໃໝ່​ນີ້ (​ໂຄ​ວິດ-19) ​ແຕ່ສິ່ງ​ສຳຄັນ​ພວກ​ເຮົາ​ກໍ​ບໍ່​ຄວນ​ພາກັນ​ປະໝາດ ​ເພາະ​ເຊື້ອພະຍາດ​ມັນ​ບໍ່​ເຂົ້າຂ້າງ​ອອກ​ຂາ​ໃຜ ​ເພາະ​ປະ​ເທດ​ເຮົາ​ກັບ ສປ ​ຈີນ ​ມີ​ຊາຍ​ແດນ​ຕິດ​ຈອດ​ກັນ, ປະຊາຊົນ​ສອງ​ປະ​ເທດ​ໄດ້​ທ່ອງ​ທ່ຽວ​ໄປ​ມາ​ຄ້າຂາຍ​ຢ່າງ​ບໍ່​ຂາດ​ໄລຍະ. ​ໃນ​ຍຸກ​ນີ້ ຄົນ​ຈີນ​ໄດ້​ເຂົ້າມາ​ເຮັດ​ທຸລະ​ກິດ​ການ​ງານ​ຢູ່​ລາວ​ເຮົາມີ​ຈຳນວນ​ຫລວງຫລາຍ​ພໍ​ສົມຄວນ ​ເພາະສະນັ້ນ ຖ້າ​ເວົ້າ​ເຖິງ​ຄວາມ​ສ່ຽງ​ໃນ​ການ​ຕິດ​ເຊື້ອພະຍາດ​ມັນ​ກໍ​ສູງ. ຈຸດ​ດີ​ທາງ​ສະຖານະ​ພາບ ​ແລະ ພູມ​ສັນຖານ​ຂອງ​ປະ​ເທດ​ເຮົາ​ນັ້ນ​ເປັນ​ປະ​ເທດ​ນ້ອຍ, ພົນລະ​ເມືອງ​ໜ້ອຍ, ຄວາມ​ແອ​ອັດ​ຂັດ​ສົນ​ຍັງ​ມີ​ໜ້ອຍ​ຖ້າ​ທຽບ​ໃສ່​ບ້ານ​ເພິ່ນ​ມີ​ພົນລະ​ເມືອງ​ເປັນຕື້ໆ. ອີກ​ປະການ​ໜຶ່ງ ປະ​ເທດ​ຊາດ​ຂອງ​ພວກ​ເຮົາ​ນັ້ນ ສະພາບ​ດິນ​ຟ້າ​ອາກາດ​ຍັງ​ຂ້ອນ​ຂ້າງ​ສົດ​ໃສ ຍ້ອນ​ມີ​ທຳ​ມະ​ຊາດ, ພູຜາ​ປ່າ​ໄມ້, ຫ້ວຍ​ນ້ຳລຳ​ເຊ, ດິນ​ດອນ​ຕອນ​ຫຍ້າ​ອຸດົມສົມບູນ. ສິ່ງ​ເຫລົ່າ​ນີ້​ລະ​ເປັນ​ເງື່ອນ​ໄຂ​ໃຫ້​ສະພາບ​ດິນ​ຟ້າ​ອາກາດ​ສະອາດ, ສົດ​ຊື່ນ​ບໍລິສຸດ ສົມທົບ​ກັບ​ຮີດຄອງ​ປະ​ເພນີ​ວັດທະນະທຳ​ຂອງ​ຄົນ​ລາວ, ​ເຊື້ອຊາດ​ລາວ​ໄດ້​ເປັນ​ເງື່ອນ​ໄຂ​ໃຫ້​ໂຣຄາ​ພະຍາດ​ຕ່າງໆ​ເຫີ​ນຫ່າງ​ຈາກ​ຄົນ​ລາວ​ບໍ່​ຫລາຍ​ກໍ​ໜ້ອຍ. ຄາດ​ວ່າ​ໃນ​ອະນາຄົດ​ຕໍ່ໜ້າ ຖ້າ​ຄົນ​ລາວ​ເຮົາ​ທຸກ​ຄົນ​ຫາກ​ພ້ອມ​ກັນ​ອະນຸລັກ​ຮັກສາ ​ແລະ ສ້າງ​ມັນ​ຂຶ້ນມາ​ຄຽງ​ຄູ່​ກັບ​ການ​ດຳລົງ​ຄົງ​ຕົວ​ຂອງ​ຄົນ​ລາວ ມັນ​ກໍ​ຍິ່ງ​ໝັ້ນຄົງ ​ແລະ ຈະ​ເຮັດ​ໃຫ້​ຊີວິດ​ອິນ​ຊີ​ຂອງ​ຄົນ​ລາວ​ເຮົາ​ອາຍຸ​ຍືນ​ຍາວ​ນານ.

      ​ແນວ​ໃດ​ກໍ​ຕາມ, ​ເມື່ອ​ກ່າວ​ເຖິງ​ໂຣຄາ​ພະຍາດ​ທີ່​​ເກີດ​ຂຶ້ນ​ໃນ​ຍຸກ​ນີ້ ມັນ​ສັບ​ມະ​ປິ​ທັງ​ສັບສົນ​ວຸ້ນວາຍ​ໄປ​ທົ່ວ​ໂລກ. ອັນ​ສາ​ເຫດ​ກໍ​ຍ້ອນ​ມະນຸດ​ເຮົາ​ສ້າງ​​ຂຶ້ນມາ​ເອງ ​ເປັນຕົ້ນ​ໃຊ້​ສານ​ເຄມີ​ເຂົ້າ​ໃນ​ການ​ຜະລິດ, ​ໃຊ້​ສານ​ກະ​ຕຸ້ນ​ຕ່າງໆ​ເຂົ້າ​ໃນ​ອາຫານ​ການ​ກິນ, ປະປ່ອຍ​ສະພາບ​ຄວາມ​ເປິະ​ເປື້ອນ​ເໜົ່າ​ເໝັນຕາ​ມສະຖານ​ທີ່​ສາທາລະນະ​ ​ແລະ ກໍລະນີ​ອື່ນໆ. ນອກຈາກ​ນັ້ນ ການ​ຜະລິດ​ວັດຖຸ​ສິ່ງຂອງ, ຜະລິດ​ສາດຕຣາອາວຸດ​ມາ​ລ້າງຜານ​ກັນ​ບາງ​ຢ່າງ​ກໍ​ຈຳ​ເປັນ​ໄດ້​ນຳ​ໃຊ້​ສານ​ເຄມີ​ມາ​ເປັນ​ຫລັກ. ​ເມື່ອ​ຜະລິດ​ແລ້ວ​ກໍ​ນຳ​ໄປ​ທົດ​ລອງ ​ແລະ ຈາກ​ຫລາຍ​ກໍລະນີ, ຫລາຍ​ອັນ​ພັນ​ຢ່າງ​ຈົນ​ເຮັດ​ໃຫ້​ໂລກ​ທີ່​ພວກ​ເຮົາ​ອາ​ໄສ​ຢູ່​ຮ້ອນຮົນ​ອົນທະການ​ຈົນ​ເຮັດ​ໃຫ້​ຊັ້ນບັນຍາກາດ​ເຕັມ​ໄປ​ດ້ວຍ​ພະຍາດ. ຈາກ​ສິ່ງ​ຕ່າງໆ​ທີ່​ໄດ້​ກ່າວ​ມາ​ຂ້າງ​ເທິງ​ນີ້ ​ເປັນ​ເງື່ອນ​ໄຂ​ໃຫ້​ໂລກ​​ເຮົາ​ເກີດ​ພະຍາດ​ບາດ​ເຍົາ​ຊະນິດ​ຕ່າງໆ​ຕາມ​ຂະ​ບວນວິວັດ​ຂອງ​ການ​ພັດທະນາ​. ກໍ​ດັ່ງ​ມີ​ເຊື້ອພະຍາດ​ຊະນິດ​ໃໝ່​ໂຄ​ໂຣນາ ຫລື ອັນ​ທີ່​ເອີ້ນ​ວ່າ: ​ໂຄ​ວິດ-19 ນີ້​ເອງ.

     ​ແນວ​ໃດ​ກໍ​ດີ, ສຳລັບ​ປະ​ເທດ​ລາວ, ຄົນ​ລາວ​ເຮົາ​ທີ່​ຍັງ​ປອດ​ກ່ຽວ​ກັບ​ພະຍາດ​ນີ້, ພວກ​ເຮົາ​ກໍ​ຈົ່ງ​ພ້ອມ​ກັນ​ຫລີກ​ລ່ຽງ ​ແລະ ຕ້ານ​ພະຍາດ​ດັ່ງກ່າວ​ໃຫ້​ພົ້ນຈາກ​ວິ​ກິດ​ຄັ້ງນີ້​ໃຫ້​ມີ​ຄວາມ​ປອດ​ໄພ​ສູງ​ສຸດ. ສ່ວນ​ຮູບ​ການ, ວິທີ​ການ​ຫລີກ​ລ່ຽງ ​ແລະ ຕ້ານ​ພະຍາດ​ດັ່ງ​ກ່າວ​ມັນ​ກໍ​ຂຶ້ນກັບ​ຕົວ​ເຮົາ​ເອງ​ເປັນ​ຫລັກ ​ເປັນຕົ້ນຮັກສາ​ສຸຂະພາບ​ດ້ວຍ​ການ​ອອກກຳລັງ​ກາຍ​ເປັນ​ປົກກະຕິ, ອາບ​ນຳ​ເຊົ້າສວຍ​ແລງ, ໝັ່ນລ້າງ​ຕີນ​ມື​ດ້ວຍ​ນ້ຳຢາ​ທີ່​ມີ​ຄຸນ​ນະພາ​ບ, ກິນ​ອາຫານ​ທີ່​ສະອາດ​ປອດ​ສານພິດ​ຖືກ​ເວລາ, ຜັກ​ຜ່ອນ​ໃຫ້​ຖືກ​ຍາມ, ນອນ​ໃຫ້​ຖືກ​ເວລາ, ຮັກສາ​ສິນ​ພາວະນາ​​ເທົ່າ​ທີ່​ເຮັດ​ໄດ້. ນອກຈາກ​ນັ້ນ ຢູ່​ຕາມ​ບໍລິ​ເວນ​ເຮືອນ​ຊານ​ບ້ານ​ຊ່ອງ​ຕ້ອງ​ທຳ​ຄວາມ​ສະອາດ, ປອດ​ໂປ່​ງສົດ​ໃສ​ໄຮ້​ຄວາມ​ເປິະ​ເປື້ອນ, ກິ່ນສາບ​ເໝັນ ອັນ​ຈະ​ເປັນ​ບໍ່​ເກີດ​ຂອງ​ພະຍາດ​ບາດ​ເຍົາ​ຕ່າງໆ. ຕາມ​ແຫ​ລ່ງຂ່າວ​ຈາກ​ຂະ​ແໜງ​ການ​ກ່ຽວຂ້ອງ​ເພິ່ນ​ບອກ​ວ່າ: ​ເຊື້ອ​ໂຣກສາຍ​ພັນ​ໃໝ່​ໂຄ​ວິດ-19 ຢ້ານ​ຄວາມ​ສະອາດ, ຢ້ານ​ຄວາມ​ຮ້ອນ​ເກີນ 56 ອົງສາ, ຢ້ານ​ແອນ​ກໍ​ຮໍ, ຢ້ານ​ຄົນ​ມັກ​ເຫລົ້າມັກ​ເບຍ, ຢ້ານ​ຄົນ​ມີ​ສິນ​ທຳ​ປະຈຳ​ໃຈ ​ແລະ ຢ້ານ​ຄົນ​ຍ່າງ​ໄປມາ​ໂດດດ່ຽວ​ຄົນ​ດຽວ. ສິ່ງ​ທີ່​ໂຄ​ໂຣນາ​ບໍ່​ຢ້ານ​ສາມາດ​ຕິດ​​ແປດ​ໄດ້​ງ່າຍໆ​ນັ້ນ ກໍ​ຄື​ຄວາມ​ໜາວ, ຄວາມ​ເຢັນ, ຄວາມ​ເປິ​ະ​ເປື້ອນ​ເໜົ່າ​ເໝັນ, ບ່ອນ​ສັບສົນ​ຊຸມ​ຊົນ​ຫລາຍ​ຄົນ, ຢູ່​ຮ່ວມ​ກັນ, ກິນ​ຮ່ວມ​ກັນ, ນອນ​ຮ່ວມ​ກັນ. ອັນ​ສຳຄັນ​ທີ່​ສຸດ ​ເມື່ອ​ເຫັນ​ວ່າ​ຕົນ​ເອງ​ມີ​ອາການ​ເປັນຫວັດ, ​ເປັນ​ໄອ​ໄຂ້​ຜິດ​ປົກກະຕິ​ໃຫ້​ຂ້ຽວ​ລາຍ​ງານ ​ແລະ ​ໄປ​ຫາ​ແພດ​ໝໍ​ກວດກາ​ເບິ່ງ​ສຸຂະພາບ​ທັນທີ, ບໍ່​ຄວນ​ຖື​ເບົາ ​ເພາະ​ພະຍາດ​ຊະນິດ​ນີ້​ຖ້າ​ເປັນ​ແລ້ວ​ປົບ​ບໍ່​ທັນ​ແມ່ນ​ເຢສສະ​ມູ​ໄຣສະຖານ​ດຽວ. ພະຍາດ​ສາຍ​ພັນ​ໃໝ່​ໂຄ​ໂຣນາ​ມັນ​ແຕກ​ຕ່າງ​ກັບ​ພະຍາດ​ສໍ້​ລາດ​ບັງ​ຫລວງ​ຢ່າງ​ຂາດ​ຂັ້ນ ​ເຊັ່ນ​ວ່າ​ຜູ້​ຕິດ​ເຊື້ອພະຍາດ​ສໍ້​ລາດ​ບັງ​ຫລວງ​ກາຍ​ເປັນ​ຄົນ​ເສາະ​ໃສ​ທ້ອງ​ໂຊ່ນໆ, ມີ​ຄຳ​ເຕັມ​ຄໍ, ​ເຕັມ​ແຂນ, ມີ​ລົດ​ຂີ່​ຄັນ​ຫລູຫລາ, ມີ​ຄະ​ລື​ຫາດ​ຫລາຍ​ຫລັງ, ມີ​ເມຍ​ມູນ​ເມຍ​ມັງ​ຫລາຍ​ຄົນ, ​ໄປມາ​ທາງ​ໃດ​ຜຶ້ງຜາຍ, ​ໂອ້​ອວດ​ໂອ​ຫັງ, ປາກກ້າ​ວ່າ​ແຂງ, ​ໃຊ້​ຖານະ​ຕຳ​ແໜ່​ງ​ໄປ​ຫາ​ເລາະ​ສະ​ແຫວ​ງຫາ​ຜົນ​ປະ​ໂຫຍ​ດ​ແກ່​ຕົນ​ເອງ ​ແລະ ກຸ່ມ​ກ້ອນ. ​ແຕ່​ວ່າ​ເຊື້ອພະຍາດ​ໂຄ​ໂຣນາ​ມັນ​ກໍ​ຢ້ານ​ພວກ​ນີ້​ຄື​ກັນ ​ເພາະ​ເຂົາ​ມີ​ພິກ​ໄຫວ​ເປັນ​ເລີດ, ສາມ​າດ​ເອົາ​ຕົວ​ຫລົບ​ຫລີກ​ຢ່າງ​ທັນ​ການ​ໄດ້​ຍ້ອນ​ຊັບ​ສິນ​ເງິນ​ຄຳ.

- Wave100S AD to Website 2020 0 - ພ້ອມກັນຕ້ານວິກິດໂຄວິດ-19

     ນີ້​ລະ​ຄື​ບັນຫາ​ຂອງ​ພະຍາດ​ທີ່​ເກີດ​ມາ​ໃນ​ໂລກ​ວາຕະ​ສົງສານ​ຂອງ​ຄົນ​ເຮົາ. ໝົດ​ບັ້ນ​ໂຄ​ໂຣນາ​ກໍ​ຍັງ​ບໍ່​ຮູ້​ວ່າ​ຈະ​ມີ​ພະຍາດ​ອັນ​ໃດ​ມາ​ຮາວີ​ມະນຸດ​ເຮົາ​ອີກ. ​ເພາະສະນັ້ນ ຖ້າ​ຜູ້​ໃດ​ບໍ່​ຢາກ​ຕາຍ​ໄວ​ກໍ​ຂໍ​ໃຫ້​ພ້ອມ​ກັນ​ຫລີກ​ລ່ຽງ ​ແລະ ຕ້ານ​ມັນ​ໃຫ້​ສຸດ​ຂັ້ນສຸດ​ຂີດ.

- WhatsApp Image 2020 05 27 at 5 - ພ້ອມກັນຕ້ານວິກິດໂຄວິດ-19
- WhatsApp Image 2020 05 27 at 5 - ພ້ອມກັນຕ້ານວິກິດໂຄວິດ-19
error: Alert: ເນື້ອຫາຂ່າວມີລິຂະສິດ !!