ພ້ອມກັນສ້າງກິດຈະກຳລະນຶກວັນສ້າງຕັ້ງພັກ

- 77 1 - ພ້ອມກັນສ້າງກິດຈະກຳລະນຶກວັນສ້າງຕັ້ງພັກ
- 174233 - ພ້ອມກັນສ້າງກິດຈະກຳລະນຶກວັນສ້າງຕັ້ງພັກ

ໂດຍ: ທິດ​ກໍ່າ

     ຍັງ​ອີກ​ສອງ​ອາທິດ​ກວ່າໆ, ວັນ​ສ້າງຕັ້ງພັກ​ປະຊາຊົນ ປະຕິວັດ​ລາວ ກໍ​ຈະ​ໄດ້​ໝູນວຽນ​ມາ​ບັນຈົບ​ຄົບຮອບ​ອີກ​ວາລະ​ໜຶ່ງ ຄື​ວັນ​ທີ 22 ມີນາ 1955. ມາ​ຮອດ​ປີ​ນີ້ ຖື​ວ່າ​ມີ​ອາຍຸ​ຄົບຮອບ 65 ປີ​​ເຕັມ. ຖ້າ​ທຽບ​ໃສ່​ສະຖານະ​ອາຍຸ​ສັງຂານ​ຂອງ​ຄົນ​ເຮົາ​ກໍ​ຢູ່​ໃນ​ຊ່ວງ​ໄວ​ຊະລາ, ຮັບ​ພັກຜ່ອນ​ບຳນານ​ໄປ​ຕາມ​ການ​ເວລາ​ແຫ່ງ​ການ​ດຳ​ລົງ​ຄົງ​ຕົວ​ຂອງ​ຄົນ​ເຮົາ ຫລື ຖ້າ​ຢູ່​ໃນ​ຂັ້ນການ​ນຳ​ຂອງ​ພັກ ​ແລະ ລັດຖະບານ​ກໍ​ຍັງ​ເປັນ​ຄົນ​ແຂງ​ແຮງ, ສົມບູນ​ມີ​ຄຸນ​ນະ​ວຸດ, ມີ​ປະສົບ​ປະການ, ມີ​ບົດຮຽນ​ແຫ່ງ​ການ​ຕໍ່ສູ້​ປະຕິວັດ ​ແລະ ສາມາດ​ນຳພາ​ປະ​ເທດ​ຊາດ​ບ້ານ​ເມືອງ​ມາ​ຢ່າງ​ແຫລກ​ແຫລວ​ໂຊກ​ໂຊນ​ມາ​ເປັນ​ເລີດ. ຕະຫລອດ​ໄລຍະ 65 ປີຜ່ານມາ ພາຍ​ໃຕ້​ການ​ນຳພາ​ຂອງ​ພັກ ການ​ປະຕິວັດ​ລາວ ກໍ​ຄື​ພາລະກິດ​ສ້າງສາ ​ແລະ ພັດທະນາ​ປະ​ເທດ​ຊາດ, ພວກ​ເຮົາ​ໄດ້​ຮັບ​ໄຊຊະນະ​ຢ່າງ​ໃຫຍ່​ຫລວງ ສົມ​ກັບ​ຄວາມ​ມຸ້ງ​ມາດ​ປາຖະ​ນາ​ຂອງ​ປວງ​ຊົນລາວ​ທັງ​ຊາດ. ການ​ທີ່​ໄດ້​ຮັບ​ໄຊຊະນະ​ຢ່າງ​ໃຫຍ່​ຫລວງ​ທີ່​ຍາດ​ມາ​ໄດ້​ນັ້ນ, ພັກ​ປະຊາຊົນ​ປະຕິວັດ​ລາວ​ໄດ້​ເປັນ​ແກນ​ນຳ​ໃນ​ການ​ນຳພາ​ຕໍ່ສູ້, ​ເປັນ​ສູນ​ກາງ​ສະໝອງ​ກົນ ​ເພື່ອ​ວາງ​ຍຸດ​ທະ​ສາດ, ຍຸດທະວິທີ, ສິລະ​ປະຍຸດ​ໃນ​ການ​ຕໍ່ສູ້​ກັບ​ສັດຕູ​ແຕ່ລະ​ໄລຍະ ນັບ​ແຕ່​ການ​ຕໍ່ສູ້​ຕ້ານ​ລັດທິ​ລ່າ​ເມືອງ​ຂຶ້ນ​ແບບ​ເກົ່າ, ​ແບບ​ໃໝ່​ຂອງ​ຈັກກະພັດ​ຝຣັ່ງ ​ແລະ ອາ​ເມ​ລິ​ກາ.

     ​ເພາະສະນັ້ນ, ຈຶ່ງ​ຖື​ວ່າ​ພັກ​ປະຊາຊົນ ປະຕິວັດ​ລາວ ສຸດ​ທີ່​ມີ​ບຸນຄຸນ​ຕໍ່​ປະ​ເທດ​ຊາດ​ບ້ານ​ເມືອງ. ຖ້າ​ພວກ​ເຮົາ​ຢາກ​ຮູ້​ວ່າ ພັກ​ເຮົາ​ມີ​ບຸນຄຸນ​ຕໍ່​ຊາດ​ບ້ານ​ເມືອງ​ສໍ່າ​ໃດ​ນັ້ນ ຕ້ອງ​ໄດ້​ຫວນ​ຄືນ​ເບິ່ງ​ປະຫວັດສາດ​ແຫ່ງ​ການ​ຕໍ່ສູ້​ທີ່​ລະ​ອິດ​ລະ​ອ້ຽວ​ຂອງ​ຊາດ​ລາວ​ຄົນ​ລາວ​ເຮົາ​ແຕ່​ລະ​ຍຸກ​ແຕ່ລະ​ສະ​ໄໝ​ເປັນຕົ້ນມາ​ເຊັ່ນ: ການ​ຕໍ່ສູ້​ກູ້​ຊາດ​ ​ໂດຍ​ການ​ນຳພາ​ຂອງ​ສົມ​ເດັດ​ເຈົ້າອານຸວົງ ກໍ​ຖືກ​ສະຫຍາມ​ຂ້າ​ລ້າງ​ໂຄດ, ຂະ​ບວນການ​ຕໍ່ສູ້​ຂອງ​ພໍ່​ກະ​ດວດ, ອົງ​ແກ້ວ​ກົມມະ​ດຳ, ​ເຈົ້າຟ້າ​ປັດ​ໄຈ​ ​ແກ່ຍາວ​ມາ​ຮອດ​ຍຸກ​ການ​ນຳພາ​ຂອງ​ຂະ​ບວນການ​ແນວ​ລາວ​ອິດສະຫລະ ພາຍ​ໃຕ້​ການ​ນຳພາ​ຂອງ​ເຈົ້າ​ເພັດ​ສະ​ລາດ ກໍ​ຖືກ​ຝຣັ່ງປາບ​ປາມ, ປະລາ​ໄຊ​ເງີຍ​ຫົວ​ບໍ່​ຂຶ້ນ, ຊ້ຳບໍ່​ໜຳ​ພັດ​ມີ​ສະມາຊິກ​ຈຳນວນ​ໜຶ່ງບໍ່​ເດັດດ່ຽວ​ເຄິ່ງໆ​ກາງໆ ສຸດ​ທ້າຍ​ມາ​ກໍ​ໄປ​ຍອມ​ກັບ​ຝຣັ່ງ ຍ້ອນ​ພາຍ​ໃນ​ແຕກ​ແຫງ.

- Wave100S AD to Website 2020 0 - ພ້ອມກັນສ້າງກິດຈະກຳລະນຶກວັນສ້າງຕັ້ງພັກ

     ນັບ​ແຕ່​ມີ​ພັກ​ກອມ​ມູນິດ​ອິນດູຈີນ​ໄດ້​ກຳ​ເນີ​ດ​ເກີດ​ຂຶ້ນ​ໃນ​ຊຸມ​ປີ 1930 ​ແລະ ມາ​ຮອດ​ວັນ​ທີ 22 ​ເດືອນ​ມີນາ 1955 ພັກ​ປະຊາຊົນ ປະຕິວັດ​ລາວ ​ໄດ້​ແຍກ​ໂຕ​ອອກ​ຈາກ​ພັກ​ກອມ​ມູນິດ​ອິນດູຈີນ ​ແລະ ​ໄດ້​ຮັບ​ການ​ສ້າງຕັ້ງຂຶ້ນ​ເປັນ​ທາງ​ການ​ມາ​ແລ້ວ, ພັກ​ໄດ້​ນຳພາ​ຂະ​ບວນການ​ຕໍ່ສູ້​ປະຕິວັດ ນັບ​ແຕ່​ມື້ນັ້ນ​ເປັນຕົ້ນຈຶ່ງ​ໄດ້​ຮັບ​ໄຊຊະນະ​ສົມ​ກັບ​ຄວາມ​ມຸ່ງ​ມາດ​ປາຖະໜາ. ​ໃນ​ຍຸກ​ການ​ຕໍ່ສູ້​ປະຕິວັດ​ນັ້ນ ພັກ​ເຮົາ​ຍັງ​ເຄື່ອນ​ໄຫວ​ປິດ​ລັບ ​ໂດຍ​ແມ່ນ​ປະທານ ​ໄກສອນ ພົມວິຫານ ​ເປັນ​ແກນ​ນຳ ​ໄດ້​ພ້ອມ​ກັນ​ກັບ​ໝູ່​ຄະນະ​ຫັນ​ມາ​ປັບປຸງ​ຂະ​ບວນການ​ແນວ​ລາວ​ອິດສະຫລະ​ຄືນ​ໃໝ່, ຈາກ​ຂະ​ບວນການ​ແນວ​ລາວ​ອິດສະຫລະ​ມາ​ເປັນ​ແນວ​ລາວ​ຮັກ​ຊາດ ກາຍ​ເປັນ​ຄັນ​ທຸງ​ຕໍ່ສູ້​ປະຕິວັດ​ໃນ​ທຸກ​ຮູບ​ແບບ ​ເພື່ອ​ຜະ​ເຊີນ​ກັບ​ສັດຕູ​ໂຕ​ໃຫຍ່ໆ​ຂອງ​ຊາດ.

      ພໍ​ຕົກ​ມາ​ຮອດ​ໄລຍະ​ໃໝ່ ຄື​ໄລຍະ​ປະ​ເທດ​ຊາດ​ເປັນ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ພັກ​ເຮົາ​ໄດ້​ກຳ​ອຳນາດ ​ແລະ ​ໄດ້​ນຳພາ​ປະຊາຊົນ​ບັນດາ​ເຜົ່າ​ສ້າງສາ​ພັດທະນາ​ປະ​ເທດ​ຊາດ​ເປັນ​ເວລາ 40 ກວ່າ​ປີ ປະ​ເທດ​ຊາດ​ມີ​ຄວາມ​ຈະ​ເລີ​ນຮຸ່ງ​ເຮືອງ​ຄື​ດັ່ງ​ເຮົາ​ເຫັນ​ທຸກ​ວັນ​ນີ້. ຍ້ອນ​ໝາກຜົນ​ຂອງ​ການ​ປະຕິວັດ ກໍ​ຄື​ໝາກຜົນ​ແຫ່ງ​ການ​ນຳພາ​ຂອງ​ພັກ​ປະຊາຊົນ ປະຕິວັດ​ລາວ ​ໃນ​ໂອກາດ​ວັນ​ສ້າງຕັ້ງພັກ ວັນ​ທີ 22 ມີນາ​ທີ່​ຈະ​ມາ​ເຖິງ ພວກ​ເຮົາ​ທຸກ​ຄົນ ​ໂດຍ​ສະ​ເພາະ​ບັນດາ​ສະຫາຍ​ສະມາຊິກ​ພັກ ຕະຫລອດ​ປະຊາຊົນ​ບັນດາ​ເຜົ່າ​ຄວນ​ໄດ້​ຈົດ​ຈຳ​ລຳ​ລຶກ ​ແລະ ສ້າງ​ກິດຈະກຳ​ຕ່າງໆ ​ເພື່ອ​​ໃຫ້​ມີ​ຄວາມ​ໝາຍ​ທາງ​ດ້ານ​ປະຫວັດສາດ​ຂອງ​ພັກ. ການ​ຈັດ​ກິດຈະກຳ​ນີ້​ອາດ​ມີ​ຫລາຍ​ຮູບ​ແບບ, ຫລາຍ​ວິທີ ສຸດ​ແລ້ວ​ແຕ່​ເງື່ອນ​ໄຂ​ຂອງ​ທ້ອງ​ຖິ່ນ, ຂອງ​ອົງຄະ​ນະ​ພັກ​ຢູ່​ບ່ອນ​ນັ້ນໆ. ​ແຕ່​ໂຕ​ອັນ​ສຳຄັນ​ທີ່​ສຸດ​ແມ່ນ​ພ້ອມ​ກັນ​ຕັ້ງໜ້າ​ເຮັດ​ໜ້າ​ທີ່​ວິຊາ​ສະ​ເພາະ​ທີ່​ພັກ ​ແລະ ລັດຖະບານ​ໄດ້​ມອບ​ໝາຍ​ໃຫ້. ພ້ອມ​ກັນ​ຕ້ານ ​ແລະ ສະກັດ​ກັ້ນບັນດາ​ປາກົດ​ການ​ຫຍໍ້​ທໍ້​ໃນ​ສັງຄົມ ​ເປັນຕົ້ນບັນຫາ​ການ​ສໍ້​ລາດ​ບັງ​ຫລວງ, ບັນຫາ​ຢາ​ເສບ​ຕິດ, ຄ້າ​ມະນຸດ, ການ​ຄ້າຂາຍ​ເຖື່ອນ​ຕ່າງໆ. ບັນດາ​ສະຫາຍ​ສະມາຊິກ​ພັກ​ທີ່ຢູ່​ໃກ້​ກັບ​ເງິນ​ກໍ​ຕ້ອງ​ເກັບ​ລາຍ​ຮັບ​ໃຫ້​ໄປ​ເຖິງ​ເປົ້າ, ຜູ້​ເຮັດ​ວຽກ​ທາງ​ການ​ເມືອງ​ກໍ​ໃຫ້​ຫລ້ອນ​ໜ້າ​ທີ່ ບໍ່​ຫລີກ​ວຽກ​ໜັກ​ມັກ​ວຽກ​ເບົາ. ພິ​ເສດ​ໃນ​ໄລຍະ​ປັດຈຸບັນ ພວກ​ເຮົາ​ພວມ​ຢູ່​ໃນ​ຊ່ວງ​ກອງ​ປະຊຸມ​ໃຫຍ່​ສາມ​ຂັ້ນຂອງ​ພັກ. ໜ້າ​ທີ່​ອັນຕົ້ນຕໍ​ຂອງ​ສະມາຊິກ​ພັກ ຄື​ສັນ​ຫາ​ເອົາ​ສະມາຊິກ​ພັກ​ທີ່​ດີ, ທີ່​ເກັ່ງ, ມີ​ຄວາມ​ສັດ​ຊື່​ຕໍ່​ພັກ, ຕໍ່​ປະ​ເທດ​ຊາດ ​ແລະ ປະຊາຊົນ​ເຂົ້າມາ​ເປັນ​ຜູ້ນຳ​ໃນ​ແຕ່ລະ​ທ້ອງ​ຖິ່ນ ​ເພື່ອ​ນຳພາ​ບໍລິຫານ​ບ້ານ​ເມືອງ, ຫລີກ​ເວັ້ນຢ່າງ​ເດັດຂາດ ​ເອົາ​ຄົນ​ໂກງ, ຄົນ​ກິນ​ເຫັນ​ແຕ່​ຜົນ​ປະ​ໂຫຍ​ດສ່ວນ​ຕົວ​ເຂົ້າມາ​ຢູ່​ໃນ​ກົງຈັກ​ຂອງ​ພັກ ​ແລະ ລັດ. ຢາກ​ເຮັດ​ໄດ້​ຄື​ດັ່ງ​ວ່າ ຕ້ອງ​ມີ​ວິ​ໃສ​ທັດ​ຢ່າງ​ກວ້າງ​ໄກ, ​ເບິ່ງ​ໂລກ​ໃນ​ແງ່​ບວກ, ​ເບິ່ງ​ຄົນ​ຢ່າງ​ສັດຈະ​ວິພາກ, ​ເບິ່ງ​ບັນຫາ​ຢ່າງ​ຊັດ​ເຈນ ​ເຂົາ​ຈຶ່ງ​ເອີ້ນ​ວ່າ​ສະມາຊິກ​ພັກ​ໃນ​ຍຸກ​ໃໝ່​ໄຟ​ແຮງ.

- WhatsApp Image 2020 05 27 at 5 - ພ້ອມກັນສ້າງກິດຈະກຳລະນຶກວັນສ້າງຕັ້ງພັກ
error: Alert: ເນື້ອຫາຂ່າວມີລິຂະສິດ !!