ການ​ຜະລິດ​ໝາກ​ນາວ​ນອກ​ລະດູ

ການ​ຜະລິດ​ໝາກ​ນາວ​ນອກ​ລະດູ - 47 - ການ​ຜະລິດ​ໝາກ​ນາວ​ນອກ​ລະດູ
ການ​ຜະລິດ​ໝາກ​ນາວ​ນອກ​ລະດູ - Untitled design - ການ​ຜະລິດ​ໝາກ​ນາວ​ນອກ​ລະດູ

​ໂດຍ: ທ. ​ໄພທູນ ມູນ​ເສນາ

ໝາກ​ນາວ​ເປັນ​ພືດ​ໄມ້​ໃຫ້​ໝາກ​ຕະກູນ​ສົ້ມປະ​ເພດ​ໜຶ່ງ​ທີ່​ນິຍົມ​ກັນ​ປູກ​ເປັນ​ຈຳນວນ​ຫລວງຫລາຍ, ​ເຊິ່ງ​ແຫ​ລ່ງທີ່​ມັກ​ປູກ​ຫລາຍ​ທີ່​ສຸດ​ແມ່ນ​ຢູ່ປະ​​ເທດ​ໄທ​ຄື: ​ແຂວງ​ເພັດ​ບູລີ, ນະຄອນ​ສີ​ທຳ​ມະ​ລາດ, ສຸລາ​ດທານີ, ນະຄອນ​ສະຫວັນ, ສະມຸດ​ສາຄອນ, ນະຄອນ​ປະຖົມ, ພິຈິດ ​ແລະ ຊຽງ​ໃໝ່. ສຳລັບ​ຢູ່ ສປປ ລາວ ​ແມ່ນ​ຢູ່​ແຂວງວຽງ​ຈັນ, ຫລວງ​ພະ​ບາງ, ​ໄຊ​ຍະ​ບູລີ ​ແລະ ​ແຂວງ​ຈຳປາ​ສັກ ຈຶ່ງ​ຈັດ​ໄດ້​ວ່າ​​ເປັນ​ພືດ​ຊະນິດ​ໜຶ່ງ​ທີ່​ມີ​ຄວາມ​ສຳຄັນ​ທາງ​ເສດຖະກິດ ​ເຊິ່ງຕະຫລາດ​ມີ​ຄວາມ​ຕ້ອງການ​ສູງ​ຕະຫລອດ​ປີ ​ແລະ ຈາກ​ອັດຕາ​ການ​ເພີ່ມ​ຂຶ້ນຂອງ​ພົນລະ​ເມືອງ ​ແລະ ການ​ຂະຫຍາຍຕົວ​ທາງ​ດ້ານ​ເສດຖະກິດ​ທີ່​ມີ​ແນວ​ໂນ້ມສູງ​ລວມທັງ​ການ​ຂະຫຍາຍຕົວ​ຂອງ​ພາກ​ອຸດ​ສະຫະ​ກຳ ​ເຊິ່ງມີ​ການ​ນຳ​ໝາກ​ນາວ​ມາ​ໃຊ້​ເປັນ​ວັດຖຸ​ດິບ​ຢ່າງ ຫລວງຫລາຍ ຈຶ່ງ​ເຮັດ​ໃຫ້​ໝາກ​ນາວ​ມີ​ບົດບາດ​ສຳຄັນ​ທາງ​ດ້ານ​ການຄ້າ​ຫລາຍ​ຂຶ້ນ, ​ໂດຍ​ສະ​ເພາະ​ໃນ​ຊ່ວງ​ລະດູ​ແລ້ງ​ຄື: ​ເດືອນ​ມີນາ-​ເມສາ ຂອງ​ທຸກໆ​ປີ, ໝາກ​ນາວ​ຈະ​ມີ​ລາຄາ​ສູງ​ກວ່າ ປົກກະຕິ​ຄື: ມີ​ລາຄາ​ໜ່ວຍ​ລະ 1.000-1.500 ກີບ, ທັງ​ນີ້ ກໍ​ເນື່ອງ​ມາ​ຈາກ​ໃນຊ່ວງ​ລະດູ​ແລ້ງ​ຈະ​ມີ​ຜົນ​ຜະລິດ​ໝາ​ກນາວ​ອອກ​ສູ່​ຕະຫລາດ​ໜ້ອຍ.

ດັ່ງນັ້ນ, ຈຶ່ງ​ເຮັດ​ໃຫ້​ຊາວ​ກະສິກອນ​ຈຳນວນ​ຫລາຍ​ຫັນ​ມາ​ສົນ​ໃຈ​​ໃນ​ການ​ປູກ​ໝາກ​ນາວ​ນອກລະດູ​ກັນ​ຫລາຍ​ຂຶ້ນ.

​        ໃນ​ນີ້​ສູນ​ຄົ້ນຄວ້າ​ພືດ​ຜັກ ​ແລະ ​ໄມ້​ໃຫ້​ໝາກ​ເປັນ​ສູນ​ໜຶ່ງ​ທີ່​ຂຶ້ນກັບ​ສະ​ຖາ​ບັນ​ຄົ້ນຄວ້າ​ກະສິກຳ ​ແລະ ປ່າ​ໄມ້ ​ແຫ່ງ​ຊາດ, ກະຊວງ​ກະສິກຳ ​ແລະ ປ່າ​ໄມ້ ​ເຊິ່ງມີໜ້າ​ທີ່​ຄົ້ນຄວ້າ​ທາງ​ດ້ານ​ເຕັກນິກ​ດ່ັງກ່າວ ຈຶ່ງ​ໄດ້​ສຶກສາຄົ້ນຄວ້າ​ທົດ​ລອງ ​ແລະ ສ້າງ​ຄູ່​ມື​ທາງ​ດ້ານ​ເຕັກນິກ​ການ​ຜະລິດ​ໝາກ​ນາວ​ນອກ​ລະດູ​ໃສ່​ແທ່ງ​ຊີມັງ ​ເພື່ອ​ເຜີຍ​ແຜ່​ເຕັກນິກ​ການ​ປູກ​ໝາກ​ນາວ​ນອກ​ລະດູ​ໃຫ້​ຊາວ​ກະສິກອນ​ໄດ້​ຮຽນ​ຮູ້ ​ແລະ ທົດ​ລອງ​ປູກ​ດ້ວຍ​ຕົນ​ເອງ​ໄດ້, ​ເຊິ່ງຂັ້ນຕອນ​ໃນ​ການ​ປູກ​ມີ​ຄື: ​

ການ​ຜະລິດ​ໝາກ​ນາວ​ນອກ​ລະດູ - 52 2 - ການ​ຜະລິດ​ໝາກ​ນາວ​ນອກ​ລະດູ

ແນວ​ພັນ:

ພັນ​ໝາກ​ນາວ​ທີ່​ຕະຫລາດ​ມີ​ຄວາມ​ຕ້ອງການ​ຫລາຍ​ແມ່ນ: ໝາກ​ນາວ​ແປ້ນ, ໝາກ​ນາວ​ແປ້ນ​ພິຈິດ, ໝາກ​ນາວ​ໄຂ່ ​ແລະ ໝາກ​ນາວ​ໜັງ ​ເຊິ່ງ​ເປັນ​ພັນ​ທີ່​ທົນ​ຕໍ່​ການ​ເຂົ້າທຳລາຍ​ຂອງ​ແມງ​ໄມ້ ​ແລະ ພະຍາດ, ​ເປັນ​ພັນ​ທີ່​ອອກດອກ​ຫລາຍ ​ແລະ ຈັບ​ໝາກ​​ໄດ້​ງ່າຍ.

ການ​ກຽມ​ແທ່ງ​ຊີມັງ:

​ແທ່ງ​ຊີມັງ ທີ່​ເໝາະ​ສົມ​ໃນ​ການ​ປູກ ຈະ​ມີ​ເສັ້ນຜ່າ​ສູນ​ກາງ​ຂະໜາດ 80-100 ຊຕມ, ສູງ 40-50 ຊຕມ ​ແລະ ​ຝາ​ສຳລັບ​ໄວ້​ຮອງ​ພື້ນ ​ເຊິ່ງມີ​ຂະໜາດ​ເທົ່າ​ກັນ​ກັບ​ແທ່ງ​ຊີມັງ.

ການ​ຜະລິດ​ໝາກ​ນາວ​ນອກ​ລະດູ - 56 4 - ການ​ຜະລິດ​ໝາກ​ນາວ​ນອກ​ລະດູ

ການ​ກຽມ​ດິນ​ປູກ:

ການ​ກຽມ​ດິນ​ປູກ​ມີ​ຢູ່ 2 ສູດ​ຄື:

ສູດ​ທີ 1: ປະກອບ​ມີ​ດິນ​ປູກຝັງ 2 ສ່ວນ, ​ແກ​ບ​ເຜົາ 2 ສ່ວນ, ຝຸ່ນ​ຄອກ 1 ສ່ວນ.

ສູດ​ທີ 2: ປະກອບ​ມີ​ດິນ​ປູກຝັງ 2 ສ່ວນ, ​ແກບ​ເຜົາ 1 ສ່ວນ, ຂຸຍ​ກາບ​ໝາກພ້າວ 1 ສ່ວນ, ​ເສດ​ໃບສຳ​ສາ ຫລື ຝຸ່ນ​ບົ່ມ 1 ສ່ວນ​ມາ​ປະສົມ​ກັນ​ຄົນ​ໃຫ້​ລະອຽດ​ແລ້ວ​ເອົາ​ລົງ​ຮອງ​ກົ້ນ​ແທ່ງ ຊີມັງ ​ເພື່ອ​ເລັ່ງ​ໃຫ້​ຕົ້ນໝາກ​ນາວ​ມີ​ການ​ຂະຫຍາຍຕົວ ​ແລະ ຈະ​ເລີ​ນ​ເຕີບ​ໃຫຍ່​ໄດ້​ດີ.

ການ​ປູກ.

​ເວລາ​ເອົາ​ຕົ້ນໝາກ​ນາວ​ລົງ​ໃສ່​ໃນ​ແທ່ງ​ໃນ​ແທ່ງ​ຊີມັງ ບໍ່​ຄວນ​ໃຫ້​ຖົງ​ດິນ​ແຕກ ​ເພາະ​ຈະ​ເຮັດ​ໃຫ້​ຮາກ​ຂາດ, ການ​ປູກ​ໜາວ​ນາວ​ໃສ່​ໃນ​ແທ່ງ​ຊີມັງນີ້ ສາມາດ​ບັງຄັບ​ໃຫ້​ຕົ້ນໝາກ​ນາວ​ຂາດ ນ້ຳ​ໄດ້ ​ໂດຍ​ສະ​ເພາະ​ໃນ​ຊ່ວງ​ລະດູຝົນ, ​ເມື່ອ​ນຳ​ຕົ້ນໝາກ​ນາວ​ລົງ​ໃນ​ແທ່ງ​ຊີມັງ ຄວນ​ຕັ້ງຕົ້ນ ​ໃຫ້​ຊື່, ​ເອົາ​ດິນ​ທີ່​ປະສົມ​ໄວ້​ລົງ​ໃນ​ແທ່ງ​ປະມານ 60 ຊຕມ​ແລ້ວ​ກົດ​ດິນ​ລົງ​ໃຫ້​ແໜ້ນ, ​ໃຊ້​ໄມ້​ປັກ ຫລັກ​ໄວ້​ຂ້າງ​ຕົ້ນໝາກ​ນາວ ​ແລ້ວ​ມັດ​ຕິດ​ໄວ້​ໃຫ້​ແໜ້ນ​ເພື່ອ​ປ້ອງ​ກັນ​ລົມ​ພັດ​ໄປມາ ​ແລະ ບໍ່​ໃຫ້​ມີ​ການ​ກະທົບກະ​ເທືອ​ນຕໍ່ຕົ້ນໝາກ​ນາວ, ຫົດ​ນ້ຳ​ໃຫ້​ເປັນ​ປົກກະຕິ, ປະມານ 8-9 ​ເດືອນ​ຕົ້ນໝາກ​ນາວ​ກໍ​ຈະ​ເລີ​ນ​ເຕີບ​​ໂຕ ​ແລະ ສາມາດ​ໃຫ້​ຜົນ​ຜະລິດ​ໄດ້.

ການ​ບຳລຸງ​ຕົ້ນ ​ແລະ ຕັດ​ດອກ-ຕັດ​ໝາກ​ອອກ:

​ໃນ​ຊ່ວງ​ຕົ້ນ​ເດືອນ 7 ຕ້ອງ​ບຳລຸງ​ຕົ້ນ​​ໃຫ້​ສົມບູນ, ​ໃສ່​ຝຸ່ນ​ຄອກ 10 ກິ​ໂລ ​ແລະ ປຸ໋ຍ​ເຄມີ ສູດ 46:00:00 ຈຳນວນ 1 ບ່ວງ​ແກງ ​ໂຮຍ​ໃສ່​ໜ້າດິນ​ອ້ອມ​ຕົ້ນໝາກ​ນາວ. ​ເມື່ອ​ຮອດ​ເດືອນ 8 ​ໃບ​ອ່ອນ​ທີ່ຢູ່​ຍອດ​ສຸດຈະ​ກາຍ​ເປັນ​ໃບ​ທີ່​ບໍ່​ອ່ອນ ຫລື ບໍ່​ແກ່​ເກີນ​ໄປ (​ໄລຍະ​ໃບ​ເຄິ່ງ​ແກ່​ເຄິ່ງອ່ອນ), ​ໃນ​ໄລຍະ​ນີ້​ໃຫ້​​ໃສ່ປຸ໋ຍ​ເຄມີ​ສູດ 13:13:21 ຖ້າ​ຫາກ​ມີດ​ອກ ຫລື ​ເປັນ​ໝາກ​ໃຫ້ ປິດ​ດອກ ​ແລະ ໝາກ​ທີ່​ເປັນ​ໃນ​ລະດູ​ການ​ທີ່​ເຮົາ​ບໍ່​ຕ້ອງການ​ນີ້​ອອກ​ໃຫ້​ໝົດ​ເພື່ອ​ໃຫ້​ໄປ​ອອກດອກ ​ແລະ ໝາກ ​ໃນ​ຊ່ວງລະດູ​ການ​ທີ່​ເຮົາ​ຕ້ອງການ.

ການ​ຜະລິດ​ໝາກ​ນາວ​ນອກ​ລະດູ - Wave100S AD to Website 2020 0 - ການ​ຜະລິດ​ໝາກ​ນາວ​ນອກ​ລະດູ
ການ​ຜະລິດ​ໝາກ​ນາວ​ນອກ​ລະດູ - 674 - ການ​ຜະລິດ​ໝາກ​ນາວ​ນອກ​ລະດູ

ການ​ຄຸມ​ແທ່ງ​ເພື່ອ​ໃຫ້​ຕົ້ນໝາກ​ນາວ​ໂຊມ (​ແຫ່ວ) ​ເພື່ອ​ເລັ່ງການ​ອອກດອກ:

​ໃຫ້​ນຳ​ເອົາ​ດິນ​ປູກຝັງ​ປະສົມ​ກັບ​ຝຸ່ນ​ຄອກ​ລົງ​ຕື່ມ​ໃສ່​ແທ່ງ​ຊີມັງ​ໃຫ້​ເຕັມ, ​ໃຊ້​ຜ້າ​ຢາງພລາດ​ສະ ຕິກ​ຄຸມ​ອ້ອມ​ແທ່ງ​ຊີມັງ​ໄວ້​ແລ້ວ​ມັດ​ໃຫ້​ແໜ້ນ, ອາດ​ຈະ​ເຮັດ​​ໃນ​ຊ່ວງ​ເດືອນ 9 ​ເພາະ​ບ້ານ​ເຮົາ ຊ່ວງ​ນີ້​ຈະ​ເປັນ​ຊ່ວງ​ທີ່​ຝົນ​ຍັງ​ຕົກ​ຢູ່, ສະນັ້ນ, ຕ້ອງ​ໄດ້​ເຮັດ​ໃຫ້​ຕົ້ນໝາກ​ນາວ​ໂຊມ (​ແຫ່ວ) ​ໂດຍ​ປົກ​ຄຸມ​ແທ່ງ​ໄວ້ ດ້ວຍ​ຜ້າ​ຢາງ​ໃສ​ເພື່ອ​ປ້ອງ​ກັນ​ບໍ່​ໃຫ້​ນ້ຳ​ເຂົ້າ​ໄປ​ໃນ​ແທ່ງ ( ​ເຮັດ​ໃຫ້​ຕົ້ນໝາກ​ນາວ​ຂາດ​ນ້ຳ) ​ໃຫ້​ປົກ​ຄຸມ​ໄວ້ 20 ມື້ ຈະ​ສັງ​ເກດ​ເຫັນ​ໄດ້​ທີ່​ໃບ​ຂອງຕົ້ນໝາກ​ນາວ​ຈະ​ເລີ່​ມມ້ວນ​ເຂົ້າ, ​ໃນ​ເມື່ອ​ສັງ​ເກດ​ເຫັນ​ໃບ​ມ້ວນ​ເຂົ້າ​ແລ້ວ​ໃຫ້​ເອົາ​ຖົງ​ທີ່​ຄຸມ​ແທ່ງ​ນັ້ນອອກ​ແລ້ວ​ຫົດ​ນ້ຳ​ໃຫ້​ເປັນ​ປົກກະຕິ.

ການ​ເປີດ​ຜ້າ​ຢາງ​ຄຸມ​ແທ່ງ ​ແລະ ການ​ໃສ່​ປຸ໋ຍ:

​        ໃຫ້​ເປີດ​ຜ້າ​ຢາງ​ອອກ ​ແລະ ​ໃສ່​ປຸ໋ຍ​ເຄມີ​ສູດ 8: 24:24 ຫລື 15:15:15 ຈຳນວນ 1 ບ່ວງ​ແກງ/ຕົ້ນ, ຫົດ​ນ້ຳ​ໃຫ້​ປຽກ​ຊຸ່ມ​ຢູ່​ສະ​ເໝີ​ຈົນ​ກວ່າ​ຕົ້ນໝາກ​ນາວ​ຈະ​ປົ່ງ​ໃບ​ໃໝ່ ​ແລະ ອອກດອກ.  ​ເມື່ອ​ຕົ້ນໝາກ​ນາວ​ໄດ້​ຮັບ​ນ້ຳກໍ​ຈະ​ແຕກ​ໃບ​ອ່ອນ​ອອກ​ມາ​ພ້ອມ​ກັບ​ດອກ, ​ໄລຍະ​ນີ້​ເຮົາ​ຄວນ​ບົວ ລະ​ບັດ​ຮັກສາ​ດອກ​ທີ່​ເປັນ​ໃນ​ຊຸດ​ນີ້​ໃຫ້​ດີ ​ເພື່ອ​ໃຫ້​ເປັນ​ໝາກ ​ແລະ ​ເຮົາ​ກໍ​ຈະ​ສາມາດ​ເກັບ​ຜົນ​ຜະ ລິດ​ໄດ້​ທັນ​ໃນ​ຊ່ວງ​ລະດູ​ແລ້ງ​ນີ້​ພໍດີ.

ການ​ອອກດອກ ​ແລະ ຈັບ​ໝາກ​:

​        ໃນ​ຊ່ວງ​ທີ່​ໝາກ​ນາວ​ອອກດອກ ​ແລະ ​ໃຫ້​ຜົນ​ຜະລິດ​ນັ້ນ, ຕົ້ນໝາກ​ນາວ​ຈະ​ຕ້ອງການ​ດູ​ແລ ​ແລະ ບົວລະບັດ​ຮັກສາ​ເປັນ​ຢ່າງ​ດີ, ​ເນື່ອງ​ຈາກ​ວ່າ​ພັນ​ທີ່​ເຮົາ​ເອົາ​ມາ​ປູກ​ໃສ່​ແທ່ງ​ຊີງ​ນີ້​ເປັນ ໝາກ​ນາວ​ພັນ​ແປ້ນ​ພິຈິດ ​ເຊິ່ງຈະ​ອອກດອກ ​ແລະ ຈັບ​ໝາກ​ຫລາຍ, ຖ້າ​ເປັນ​ໝາກ​ຫລາຍ ງ່າ​ໝາກ​ນາວ​ຈະ​ກົ່ງ​ລົງ​ຕິດ​ດິນ, ​ເວລາ​ຫົດ​ນ້ຳດິນ​ຈະ​ຟົ້ງ​ໃສ່​ໝາກ​ນາວ, ຈະ​ເຮັດ​ໃຫ້​ເກີດ​ການ ຕິດ​ເຊື້ອພະຍາດ​ໄດ້​ສະນັ້ນ, ຕ້ອງ​ໄດ້​ເຮັດ​​ເສົາຄ້ຳ​ໂດຍ​ໃຊ້​ໄມ້​ຝັງ​ອ້ອມ​ຮອບ 4 ດ້ານ ​ແລ້ວ​ເຮັດ ຮາວ​ໃສ່​ເພື່ອ​ຮອງ​ຮັບ​ນ້ຳໜັກ​ຂອງ​ງ່າ​ໝາກ​ນາວ​ທີ່​ກົ່ງ​ລົງ​ມາ.

ການ​ຜະລິດ​ໝາກ​ນາວ​ນອກ​ລະດູ - 23 3 567x1024 - ການ​ຜະລິດ​ໝາກ​ນາວ​ນອກ​ລະດູ

ຫລັງ​ຈາກ​ຈາກ​ໝາກ​ນາວ​ຈະ​ເລີ​ນ​ເຕີບ​ໃຫຍ່​​ມາ​ຊ່ວງ​ໃດ​ໜຶ່ງ​ແລ້ວ, ຖ້າ​ເຮົາ​ປ່ອຍ​ໃຫ້​ຈະ​ເລີ​ນ​ເຕີບ​ໃຫຍ່​ໄປ​ຕາມ​ທຳ​ມະ​ຊາດ ຊົງ​ຟຸ່ມ​ກໍ​ຈະ​ໜາ​ທຶບ, ກິ່ງ​ກ້ານ​ກໍ​ຈະ​ສານ​ກັນ​ບໍ່​ເປັນ​ລະບຽບ.

ສະນັ້ນ, ​ເຮົາ​ຈະ​ຕ້ອງ​ໄດ້​ມີ​ການ​ຕັດ​ແຕ່ງ​ຊົງ​ຟຸ່ມ​ຂອງຕົ້ນໝາກ​ນາວ​ໂດຍ​ສະ​ເພາະ​ກິ່ງ​ທີ່​ໂດ່​ງ ຊື່​ຂຶ້ນ​ໄປ​ໃນ​ຊົງ​ຟຸ່ມ​ນັ້ນ​ແມ່ນ​ໃຫ້​ຕັດ​ອອກ, ​ເພາະ​ກິ່ງ​ພວກ​ນີ້​ຈະ​ເປັນ​ກິ່ງທີ່​ຍາດ​ແຍ່ງ​ກິນ​ອາຫານ, ນ້ຳ ​ແລະ ຈະ​ບໍ່​ໃຫ້​ຜົນ​ຜະລິດ​ນຳ​ອີກ​ດ້ວຍ. ດັ່ງນັ້ນ, ​ເມື່ອ​ເຫັນ​ກິ່ງ​ຊື່​ໂດ່​ງຂຶ້ນມາ​ຄວນ​ຕັດ​ຖິ້ມ​ເພື່ອ ​ໃຫ້​ຊົງ​ຟຸ່ມ​ປອດ​ໂປ່​ງ ​ແລະ ບໍ່​ໃຫ້​ເປັນ​ບ່ອນ​ລີ່​ຊ່ອນ​ຂອງ​ແມງ​ໄມ້ ​ແລະ ພະຍາດ.

ພະຍາດ​ທີ່​ສຳຄັນ:

ການ​ປູກ​ໝາກ​ນາວ​ແຕ່​ລະ​ພັນ ຊາວ​ກະສິກອນ​ຄວນ​ເອົາ​ໃຈ​ໃສ່​ປ້ອງ​ກັນ​ແມງ​ໄມ້ ​ແລະ ພະຍາດ​ຕ່າງໆ ທີ່​ຈະ​ລະບາດ​ຂຶ້ນ ອັນ​ເຮັດ​ໃຫ້​ເກີດ​ຄວາມ​ເສຍ​ຫາຍ​ມາສູ່​ຜົນ​ຜະລິດ, ​ເຊິ່ງພະຍາດ​ທີ່​ມັກ​ເກີດ​ຂຶ້ນຄື:

  • ພະຍາດ​ແຄ່ງ​ເກີ້ ​ເຮັດ​ໃຫ້​ຜົນ​ຜະລິດ​ເສຍ​ຫາຍ, ຜູ້​ບໍລິ​ໂພ​ກບໍ່​ຕ້ອງການ.
  • ພະຍາດ​ໃບ​ແກ້ວ ຂາດ​ທາດ​ສັງ​ກະສິ (zn).
  • ພະຍາດຢາງ​ໄຫລ.

ແມງ​ໄມ້​ທີ່​ສຳຄັນ:

ບົ້ງຊອນ​ໃບ: ບົ້ງຈຳພວກ​ນີ້​ເກີດ​ຈາກ​ແມງ​ກະ​ເບື້ອກາງຄືນ​ມາ​ວາງ​ໄຂ່​ໃສ່​ໃບ່​ອ່ອນ,  ​ເມື່ອ​ເກີດ​ເປັນ​ບົ້ງ​ແລ້ວ​ມັນ​ຈະ​ທຳລາຍ​ໃບ​ອ່ອນ.

ບົ້ງກັດ​ໃບ: ບົ້ງຈຳພວກ​ນີ້​ເກີດ​ຈາກ​ແມງກະ​ເບື້ອກາງ​ເວັນ​ມາ​ວາງ​ໄຂ່​ໃສ່​ໃບ, ​ແລ້ວ​ເກີດ​ເປັນ​ບົ້ງຂຶ້ນມາ​ມັນ​ຈະ​ທຳລາຍ​ໃບ​ແກ່.

ເພັ້ຍ​ໄຟ: ມັກ​ເຂົ້າທຳລາຍ​ໃນ​ຊ່ວງ​ຕິດ​ໝາກ.

ການ​ເກັບ​ກ່ຽວ:

ຫລັງ​ຈາກ​ໝາກ​ນາວ​ອອກດອກ, ​ເປັນ​ໝາກ​ໄດ້ 4-5 ​ເດືອນ ຈຶ່ງ​ສາມາດ​ເກັບ​ກ່ຽວ​ຜົນ ຜະລິດອອກ​ສູ່​ຕະຫລາດ​ໄດ້, ທັງ​ນີ້​ກໍ​ຂຶ້ນຢູ່​ກັບ​ພັນ ​ແລະ ຊ່ວງ​ເດືອນ​ທີ່​ບັງຄັບ, ບໍ່​ຄວນ​ປ່ອຍ​ໃຫ້​ໝາກ​ນາວ​ທີ່​ແກ່​ແລ້ວ​ຢູ່​ຕົ້ນນານ​ເກີນ​ໄປ​ເພາະ​ຈະ​ເປັນ​ການສິ້ນ​ເປື້ອງອາຫານ​ມາ​ລ້ຽງ​ໝາກ​ອາດ​ຈະ​ເຮັດ​ໃຫ້​ຕົ້ນຊຸດ​ໂຊມ​ໄດ້.

​        ໃນ​ນາມ​ສູນ​ຄົ້ນຄວ້າ​ພືດ​ຜັກ ​ແລະ ​ໄມ້​ໃຫ້​ໝາກ, ມີ​ຄວາມ​ພາກພູມ​ໃຈ​ເປັນ​ຢ່າງ​ຍິ່ງ​ທີ່​ໄດ້ ​ເປັນ​ສ່ວນ​ໜຶ່ງ​ຂອງ​ສັງຄົມ​ດ້ວຍ​ການ​ເປັນ​ສື່​ກາງ​ໃນ​ການ​ລວບ​ລວມຂໍ້​ມູນ​ທາງ​ດ້ານ​ເຕັກ ນິກກ່ຽວ​ກັບ​ການ​ປູກ​ພືດ​ລວມ​ເຖິງ​ວິທີ​ການ​ແກ້​ໄຂ​ບັນຫາ​ຕ່າງໆ ​ເພື່ອ​ຊຸກຍູ້​ຊາວ​ກະສິກອນ ​ແລະ ຜູ້​ສົນ​ໃຈ​ໄດ້​ນຳ​ໄປ​ປະຕິບັດ​ຕົວ​ຈິງ ​ແລະ ປະກອບ​ອາຊີບ​ໄດ້ ​ເພື່ອ​ສ້າງ ລາຍ​ຮັບ​ທີ່​ໝັ້ນຄົງ​ໃຫ້​ແກ່​ຄອບຄົວ, ຖ້າ​ມີ​ທ່ານ​ໃດ​ສົນ​ໃຈ​ສາມາດ​ຕິດ​ຕໍ່​ຫາ​ສູນ​ຄົ້ນຄວ້າ​ພືດ​ຜັກ ​ແລະ ​ໄມ້​ໃຫ້​ໝາກ, ​ໂທ: 021 360 377; 020 55605272.

ການ​ຜະລິດ​ໝາກ​ນາວ​ນອກ​ລະດູ - WhatsApp Image 2020 05 27 at 5 - ການ​ຜະລິດ​ໝາກ​ນາວ​ນອກ​ລະດູ
ການ​ຜະລິດ​ໝາກ​ນາວ​ນອກ​ລະດູ - WhatsApp Image 2020 05 27 at 5 - ການ​ຜະລິດ​ໝາກ​ນາວ​ນອກ​ລະດູ
error: Alert: ເນື້ອຫາຂ່າວມີລິຂະສິດ !!