ໂອຍ ! ຍັງເປັນທຸກກັບການປະມູນ

- advert banner 728 90 728x90 - ໂອຍ ! ຍັງເປັນທຸກກັບການປະມູນ

ວານ​ນີ້ມີ​ເພື່ອນ​ນັກທຸລະກິດ​ທີ່​ມີ​ຊື່​ສຽງ​ຜູ້​ໜຶ່ງ​ຢູ່​ລາວ​ເຮົາ​ໄດ້​ໂທລະສັບ​ສະ​ແດງ​ຄວາມ​ຄິດ​ເຫັນ​ເຖິງ​ຄວາມ​ບໍ່​ໂປ່​ງ​ໃສ​ຂອງ​ການ​ປະ ມູນບາງໂຄງການຢູ່ລາວເຮົາມາຫາກອງບັນນາທິການໜັງສືພິມລາວພັດທະນາພວກເຮົາວ່າ: ບໍລິສັດຂອງເພິ່ນໄດ້ຮ່ວມປະມູນ ໂຄງການໜຶ່ງກັບຫລາຍໆບໍລິສັດຄິດວ່າຈະໄດ້ຮັບຄວາມຍຸຕິທຳຕໍ່ການປະມູນຄັ້ງນັ້ນ, ແຕ່ໃນເມື່ອເປີດຊອງປະມູນແລ້ວກໍຍັງມີ ການລ໋ອບບີກັນ ດ້ວຍຮູບການຕໍ່ລອງເຈລະຈາຕ່າງໆນາໆນຳກັນ ລະຫວ່າງຜູ້ປະມູນ ແລະ ເຈົ້າຂອງໂຄງການເບິ່ງຢ່າງຂາດຄວາມ ໂປ່ງໃສ. ໃນຂະນະທີ່ທ່ານນາຍົກລັດຖະມົນຕີ ກໍຄືກະຊວງການເງິນ ໄດ້ອອກລະບຽບການ ແລະ ເນັ້ນໃຫ້ທຸກໂຄງການກໍ່ສ້າງ ແລະ ການຈັດຊື້ຈັດຈ້າງຕ່າງໆຂອງລັດຕ້ອງໃຫ້ມີການປະມູນຢ່າງໂປ່ງໃສ ແລະ ຮັບປະກັນໄດ້ຄວາມຍຸຕິທຳຂອງມັນ, ທັງນີ້ກໍເພື່ອແນ ໃສ່ຕ້ານ ແລະ ສະກັດກັ້ນການສວຍໂອກາດ ເພື່ອຜົນປະໂຫຍດໃດໜຶ່ງຈາກໂຄງການປະມູນດັ່ງກ່າວ, ພ້ອມເນັ້ນປະຢັດ ແລະ ຕ້ານ ການຟຸມເຟືອຍຂອງການນຳໃຊ້ງົບປະມານຂອງລັດໃຫ້ມີຜົນ.

- new3 - ໂອຍ ! ຍັງເປັນທຸກກັບການປະມູນ

ກໍດັ່ງຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 09/ນຍ, ລົງ ວັນທີ 19 ພຶດສະພາ 2017 ວ່າດ້ວຍການປະຢັດລາຍຈ່າຍງົບປະມານຂອງລັດກໍໄດ້ລະບຸແຈ້ງວ່າ: ທຸກໆໂຄງການລົງທຶນຂອງລັດ ຕ້ອງປະຕິບັດການຄັດເລືອກ ແລະ ປະມູນຕາມກົດໝາຍ ແລະ ລະບຽບການກຳນົດຢ່າງເຂັ້ມງວດ, ມີການປະເມີນມູນຄ່າໂຄງ ການຕາມກຳນົດໝາຍ, ເຕັກນິກ ແລະ ລາຄາຫົວໜ່ວຍຂອງແຕ່ລະຂະແໜງການວາງອອກຢ່າງເຄັ່ງຂັດ, ຫ້າມເດັດຂາດບໍ່ໃຫ້ ມີການມອບໂຄງການໃຫ້ບໍລິສັດໃດໜຶ່ງປະຕິບັດໂດຍບໍ່ຜ່ານການປະມູນ ເພື່ອຮັບປະກັນໃຫ້ການນຳໃຊ້ທຶນຖືກຕ້ອງ, ປະຢັດ, ໂປ່ງໃສ, ມີປະສິດທິຜົນ ແລະ ຮັບປະກັນຄຸນນະພາບຂອງໂຄງການ. ດັ່ງນັ້ນ ຖ້າພວກເຮົາບໍ່ມີຄວາມເຂັ້ມງວດກັບລະບຽບການດັ່ງ ກ່າວແລ້ວ ກໍຍິ່ງຈະເຮັດໃຫ້ລັດສູນເສຍທຶນຮອນຢ່າງມະຫາສານດັ່ງຜ່ານມາ.

- lattana 1 - ໂອຍ ! ຍັງເປັນທຸກກັບການປະມູນ
error: Content is protected !!