ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ

ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ - 1 10 - ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ
ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ - Untitled design - ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ

​ໂດຍ: ທິດກໍ່າ

ເມື່ອ​ຕັ້ງ​ໂຈດກັນ​ວ່າ ​ເປັນ​ຫຍັງ​ຈຶ່ງ​ມີ​ພັກ​ປະຊາຊົນ​ປະຕິວັດ​ລາວ​ກຳ​ເນີ​ດ​ເກີດ​ຂຶ້ນ ​ແລະ ​ໄດ້​ກຳ​ອຳນາດ​ຊີ້​ນຳ-ນຳພາ​ບໍລິຫານ​ບ້ານ​ເມືອງ​ຄື​ດັ່ງ​ທຸກ​ວັນ​ນີ້ ? ຄຳ​ຕອບ​ກໍ​ຍ້ອນ​ວ່າ ​ໃນ​ປະຫວັດສາດ​ກ່ອນ​ໜ້າ​ນີ້ສາມ​ສີ່​ຮ້ອຍ​ປີຜ່ານມາ ລາວ​ຕົກ​ເປັນ​ຫົວ​ເມືອງ​ຂຶ້ນຂອງ​ສະຫຍາມ​ເປັນ​ເວລາ 114 ປີ. ຈາກ​ສະຫຍາມ​ແລ້ວ​ກໍ​ຕໍ່​ໃສ່​ຈັກກະພັດ​ຝຣັ່ງ ​ແລະ ອາ​ເມ​ລິ​ກາ. ​ໃນ​ເງື່ອນ​ໄຂ​ທີ່​ຕົກ​ເປັນ​ປະ​ເທດ​ຊະລາ​ດ ​ແລະ ​ເປັນ​ຫົວ​ເມືອງ​ຂຶ້ນຂອງ​ຊາດ​ອື່ນ​ນັ້ນ ກໍ​ໄດ້​ມີ​ຂະ​ບວນການ​ຕໍ່ສູ້​ຂອງ​ບຸກຄົນ, ກຸ່ມ​ຄົນ​ທີ່​ຮັກຊາດຮັກແຜ່ນດິນເຊັ່ນ: ໃນໄລຍະເປັນປະເທດຊະລາດຂອງສະ ຫຍາມກໍມີຂະບວນການ​ຕໍ່ສູ້​ຂອງ​ສົມ​ເດັດ​ເຈົ້າອານຸວົງ ​ແຕ່​ກໍ​ຖືກ​ປະລາ​ໄຊ, ຊ້ຳບໍ່​ໜຳ ຍັງ​ຖືກ​ສະຫຍາມ​ສັງຫານ​ແບບ​ລ້າງ​ໂຄດ. ພໍ​ຕົກ​ມາ​ເປັນ​ຫົວ​ເມືອງ​ຂຶ້ນຂອງ​ຈັກກະພັດ​ຝຣັ່ງກໍ​ມີ​ຂະ​ບວນການ​ຕໍ່ສູ້​ຂອງ​ພໍ່​ກະ​ດວດ, ​ເຈົ້າຟ້າ​ປັດ​ໄຈ, ອົງ​ແກ້ວ, ອົງ​ກົມມະ​ດຳ, ຍາຄູ​ຂີ້​ຫອມ, ນາຍຄູ​ຄຳ ​ແລະ ຜູ້​ອື່ນໆ​ທີ່​ຮັກ​ຊາດ​ໃນ​ສອງ​ຝັ່ງ​ແມ່ນ້ຳຂອງ​ ​ແຕ່​ກໍ​ຖືກ​ປາບ​ປາມ ​ແລະ ປະລາ​ໄຊ​ລົງ​ຕາມ​ການ​ເວລາ. ຈາກ​ນັ້ນມາ​ໃຊ້​ຊຸມ​ປີ 1940 ກໍ​ມີ​ຂະ​ບວນການ​ແນວ​ລາວ​ອິດສະຫລະ ພາຍ​ໃຕ້​ການ​ນຳພາ​ຂອງ​ເຈົ້າ​ເພັດ​ຊະລາ​ດ ສຸດ​ທ້າຍ​ມາ​ກໍ​ແຕກ​ແຫງ​ຍ້ອນ​ແນວ​ຄິດ ​ແລະ ອຸດົມ​ການ​ຂອງ​ແຕ່ລະຄົນ​ມີ​ຄວາມ​ຂັດ​ແຍ່ງ​ແຕກ​ຕ່າງ​ກັນ.

     ອີງ​ໃສ່​ສະພາບ​ການ​ຂອງ​ໂລກ​ໄດ້​ເກີດ​ມີ​ຂະ​ບວນການ​ກອມ​ມູນິດ​ສາກົນ, ມະຫາ​ປະຕິວັດ​ເດືອນ​ຕຸລາ​ຂອງ​ສະຫະພາບ​ໂຊ​ວຽດ ​ແລະ ຂະ​ບວນການ​ຕໍ່ສູ້​ທີ່​ກ້າວໜ້າ​ໃນ​ໂລກ ​ໄດ້​ເຮັດ​ໃຫ້​ປະທານ ​ໂຮ່ຈີ​ມິນ ​ເດີນທາງ​ໄປ​ຊອກ​ສະ​ແຫວ​ງຫາ​ເສັ້ນທາງ​ການ​ຕໍ່ສູ້​ເພື່ອ​ປົດ​ປ່ອຍ​ສາມ​ປະ​ເທດ​ອິນດູຈີນ​ອັນ​ມີ​ຫວຽດນາມ, ລາວ ​ແລະ ກຳປູ​ເຈຍ​ທີ່​ຍັງ​ຕົກ​ເປັນ​ຫົວ​ເມືອງ​ຂຶ້ນຂອງ​ຈັກກະພັດ​ຝຣັ່ງ. ຈົນ​ມາ​ຮອດ​ຊຸມ​ປີ 1930 ພັກ​ກອມ​ມູນິດ​ຈີນ​ຈຶ່ງ​ໄດ້​ຮັບ​ການ​ສ້າງຕັ້ງຂຶ້ນຢ່າງ​ແໜ້ນໜາ ​ແລະ ​ເປັນ​ຕົນ​ເປັນ​ໂຕ. ສະ​ເພາະ​ຄົນ​ລາວ​ເຮົາ​ທີ່​ໄດ້​ເຂົ້າຮ່ວມ​ໃນ​ຂະ​ບວນການ​ກອມ​ມູນິດ​ອິນ​ດູ​ຈີນ​ກໍ​ມີ​ທ່ານ ປະທານ ​ໄກສອນ ພົມວິຫານ ​ໄດ້​ເປັນ​ສະມາຊິກ​ພັກ ທັງ​ໄດ້​ເຂົ້າຮ່ວມ​ໃນ​ຂະ​ບວນການ​ຕໍ່ສູ້​ປະຕິວັດ, ທັງ​ຖືກ​ມອບ​ໝາຍ​ໃຫ້​ມາ​ເຄື່ອນ​ໄຫວ​ຢູ່​ເຂດ​ລາວ​ເໜືອ​ຊຽງ​ຮຸ່ງ​ພຽງ​ສາແຂວງ​ຫົວພັນ​ໃນ​ສະ​ໄໝ​ນັ້ນ.

       ອີກ​ປະການ​ໜຶ່ງ, ​ເມື່ອ​ທົບ​ທວນ​ເບິ່ງ​ໄລຍະ​ປະຫວັດສາດ​ແຫ່ງ​ການ​ຕໍ່ສູ້​ຂອງ​ວິລະ​ກະສັດ ​ແລະ ຄົນ​ລາ​ວຜູ້​ຮັກ​ຊາດ​ໃນ​ໄລຍະ​ຜ່ານ​ມາ​ລ້ວນ​ແລ້ວ​ແຕ່​ຖືກ​ປະລາ​ໄຊ​ດ້ວຍ​ຫລາຍ​ປັດ​ໄຈ ​ແລະ ຫລາຍ​ສາ​ເຫດ, ​ແຕ່​ປັດ​ໄຈ​ອັນ​ສຳຄັນ​ກວ່າ​ໝູ່​ໝົດ​ກໍ​ແມ່ນ​ຂາດ​ພັກ​ຊີ້​ນຳ-ນຳພາ​ຢ່າງ​ຖືກຕ້ອງ​ສ່ອງ​ໃສ. ການ​ຕໍ່ສູ້​ສະ​ໄໝ​ກ່ອນ​ກໍ​ເປັນ​ພຽງ​ເກີດ​ຈາກ​ແນວ​ຄວາມ​ຄິດ​ຮັກ​ຊາດ​ຮັກ​ແຜ່ນດິນ​ແລ້ວ​ກໍ​ຊັກ​ຊວນ​ອວນ​ຕ້ານ​ກັນ​ເປັນ​ກຸ່ມ​ກ້ອນ, ມີ​ຫົວໜ້າ​ນຳພາ​ຕໍ່ສູ້​ແບບ​ຫົວ​ຊົນ​ຝາ​ ຂາດ​ການ​ນຳ, ຂາດ​ແນວທາງ, ຂາດ​ເສົາຄ້ຳ, ຂາດ​ບ່ອນ​ອີງ​ທີ່​ເປັນ​ຫົວ​ກະທິ​ແກນ​ກາງຂອງ​ຂະ​ບວນການ​ຕໍ່ສູ້ ຈຶ່ງ​ມີ​ການ​ປະລາ​ໄຊ​ຢ່າງ​ລຽນຕິດ​ສິ້ນ​ເຊີງ. ຍົກ​ຕົວຢ່າງ​ການ​ຕໍ່ສູ້​ຂອງ​ຂະ​ບວນການ​ແນວ​ລາວ​ອິດສະຫລະ​ໃຕ້​ການ​ນຳພາ​ຂອງ​ເຈົ້າ​ເພັດ​ຊະລາ​ດ​ໃນ​ຂັ້ນຕົ້ນຊຸມ​ປີ 1940 ​ເຊິ່ງ​ໃນ​ນັ້ນກໍ​ມີ​ສະ​ເດັດ​ເຈົ້າສຸພນຸວົງ ​ແລະ ພັກ​ພວກ​ຜູ້​ອື່ນໆ​ດ້ວຍ​ກັນ ສຸດ​ທ້າຍ​ມາ​ເຈົ້າ​ເພັດ​ຊະລາ​ດກໍ​ຂໍ​ລີ້​ໄພ​ການ​ເມືອງ​ຢູ່​ໄທ, ຄຳ​ມ້າວ, ສຸວັນນະ​ພູມ​ມາ, ກະຕ່າຍ ​ແລະ ຜູ້​ອື່ນໆ​ຄືນ​ມາຍ​ອມຝຣັ່ງ. ສ່ວນ​ປະທານ ສຸພາ​ນຸວົງ ທີ່​ຍັງ​ບໍ່​ຍອມ​ຕັດສິນ​ໃຈ​ໄປ​ຫວຽດນາມ​ພົບ​ປະທານ ​ໂຮ່ຈີ​ມິນ ​ແລະ ຕໍ່​ມາ​ກໍ​ພົບ​ກັບ​ປະທານ ​ໄກສອນ ພົມວິຫານ ທັງ​ສອງ​ທ່ານ​ກໍ​ຈັບ​ມື​ຖື​ແຂນ​ກັນ​ເປັນ​ພະລັງ ທັງ​ຮ່ວມ​ກັບ​ຂະ​ບວນການ​ຕໍ່ສູ້​ປະຕິວັດ​ກອມ​ມູນິດ​ອິນດູຈີນ​ໃນ​ເວລາ​ຕໍ່​ມາ.

      ພາຍຫລັງ​ມີ​ພັກ​ກອມ​ມູນິດ​ອິນດູຈີນ​ຊີ້​ນຳ-ນຳພາ​ຂະ​ບວນການ​ປະຕິວັດ​ໃນ​ສາມ​ຊາດ​ກ​ເລີ່​ມມີ​ປັດ​ໄຈ​ອັນ​ໃໝ່​ແຫ່ງ​ໄຊຊະນະ ​ແລະ ນັບ​ມື້​ເຕີບ​ໃຫຍ່​ຂຶ້ນຢ່າງ​ເຂັ້ມ​ແຂງ ຈຶ່ງ​ກໍ່​ໃຫ້​ເກີດ​ມີ​ການ​ແຍກ​ພັກ​ອອກ​ເປັນ​ສາມ​ພັກ​ຄື: ພັກ​ປະຊາຊົນ​ປະຕິວັດ​ລາວ​ເຮົາ​ໃນ​ປັດຈຸບັນ, ພັກ​ກອມ​ມູນິດ​ຫວຽດນາມ ​ແລະ ພັກ​ປະຊາຊົນ​ກຳປູ​ເຈຍ. ສະ​ເພາະ​ຂະ​ບວນການ​ຕໍ່ສູ້​ຂອງ​ປະຊາຊົນ​ລາວ ພາຍຫລັງ​ປະທານ ​ໄກສອນ ພົມວິຫານ ​ໄດ້​ພົບ​ກັບ​ທ່ານ ປະທານ ສຸພາ​ນຸວົງ ກໍ​ພ້ອມ​ກັນ​ປັບປຸງ​ຄືນ​ຂະ​ບວນການ​ແນວ​ລາວ​ອິດສະຫລະ​ທີ່​ໄດ້​ລົ້ມສະຫລາຍ​ມາ​ກ່ອນ​ນັ້ນ​ໃຫ້​ລຸກຂຶ້ນມາ​ໃໝ່. ວັນ​ທີ 22 ​ເດືອນ​ມີນາ 1955 ພັກ​ປະຊາຊົນ​ປະຕິວັດ​ລາວ​​ໄດ້ຮັບ​ການ​ສ້າງຕັ້ງຂຶ້ນຢ່າງ​ເປັນ​ທາງ​ການ ກອງ​ປະຊຸມ​ໄດ້​ມອບ​ໝາຍ​ໃຫ້​ປະ​ທານ ​ໄກສອນ ພົມວິຫານ ​ເປັນ​ເລຂາທິການ​ໃຫຍ່​ຂອງ​ພັກ​ຜູ້​ທຳ​ອິດ, ມອບ​ໝາຍ​ໃຫ້​ປະທານ ສຸພາ​ນຸວົງ ​ເປັນ​ປະທານ​ແນວ​ລາວ​ອິດສະຫລະ ທັງ​ອອກ​ໜ້າ​ອອກ​ຕາ​ໃນ​ຂະ​ບວນການ​ຕໍ່ສູ້​ປະຕິວັດ ​ເພາະ​ການ​ເຄື່ອນ​ໄຫວ​ຂອງ​ພັກ​ໃນ​ຍຸກ​ສົງຄາມ​ຫົວລ້ຽວຫົວ​ຕໍ່​ທຸກ​ຢ່າງ​ແມ່ນ​ຍັງ​ປິດ​ລັບ.

ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ - Wave100S AD to Website 2020 0 - ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ

     ນັບ​​ແຕ່​ມື້ນັ້ນມາ, ຂະ​ບວນການ​ຕໍ່ສູ້​ປະຕິວັດ​ຂອງ​​ແນວ​ລາວ​ອິດສະຫລະ​ກໍ​ໄດ້​ເລີ່​ມປາກົດ​ຕົວ​ຂຶ້ນມາ​ໃໝ່ ​ໂດຍ​ມີ​ພັກ​ຊີ້​ນຳ-ນຳພາ​ຢ່າງ​ຖືກຕ້ອງ​ສ່ອງ​ໃສ, ມີ​ແນວທາງ, ມີ​ເປົ້າໝາຍ​ການ​ປະຕິວັດ​ຢ່າງ​ຄັກ​ແນ່​ຄື: ພາລະກິດ​ການ​ປະຕິວັດ​ລາວ​ແມ່ນ​ເພື່ອ​ປົດ​ປ່ອຍປະ​ເທດ​ຊາດ​ອອກ​ຈາກ​ແອກ​ຄອບ​ຄອງ​ຂອງ​ຈັກກະພັດ​ຜູ້​ຮຸກ​ຮານ, ຍ້ອນ​ມີ​ການ​ຊີ້​ນຳ-ນຳພາ​ຂອງ​ພັກ ຂະ​ບວນການ​ຕໍ່ສູ້​ປະຕິວັດ​ຂອງ​ປະ​ເທດ​ເຮົາ​ກໍ​ນັບ​ມື້​ເຕີບ​ໃຫຍ່​ເຂັ້ມ​ແຂງ ​ແລະ ​ໄດ້​ຮັບ​ໄຊຊະນະ​ຕະຫລອດ​ມາ, ມີ​ການ​ຕໍ່ສູ້​ຕີ​ສັດຕູ​ຢູ່​ບ່ອນ​ໃດ​ກໍ​ຢູ່​ໃນ​ທ່າ​ໄດ້​ປຽບ, ທັງ​ໄດ້​ຮັບ​ໄຊຊະນະ, ສະໝໍລະພູມ​ນ້ອຍ​ໃຫຍ່​ທີ່​ດຸ​ເດືອດ​ຂ້ຽວຂາດ​ກໍ​ສາມາດ​ທັບ​ມ້າງ​ບຸກທະລຸ​ເຮືອນ​ຮັງ​ຂອງ​ຝ່າຍ​ກົງກັນຂ້າມ​ຢ່າງ​ລຽນຕິດ. ນອກຈາກ​ການ​ຕໍ່ສູ້​ທາງ​ດ້ານ​ການ​ທະຫານ​ແລ້ວ​ກໍ​ໄດ້​ຄຽງ​ຄູ່​ກັບ​ການ​ຕໍ່ສູ້ທາງ​ດ້ານ​ການ​ເມືອງ, ​ໃຊ້​ວິທີ​ຕຶກ​ເບັດ​ສາຍ​ແລບ​ໃນ​ການ​ເຈລະຈາ​ທຸກ​ຄັ້ງ, ທັງ​ປຸກລະດົມ​ມວນ​ຊົນ, ປະຊາຊົນ​ຜູ້​ຮັກ​ຊາດ​ເຂົ້າຮ່ວມ​ການ​ປະຕິວັດ​ເປັນ​ພຶງ​ເປັນ​ແພ ​ແລະ ​ເປັນ​ຂະ​ບວນຟົດຟື້ນຈົນ​ແກ່ຍາວ​ມາ​ຮອດ​ປີ 1975 ຈຶ່ງ​ສາມາດ​ປົດ​ປ່ອຍປະ​ເທດ​ຊາດ​ໄດ້​ຢ່າງ​ສົມບູນ, ລຶບລ້າງ​ລະບອບ​ລາຊາທິປະ​ໄຕ​ທີ່​ໄດ້​ປົກຄອງ​ບ້ານ​ເມືອງ​ມາ​ຫລາຍ​ຮ້ອຍ​ປີ​ມີ​ແຕ່​ທຸກ​ກັບ​ທຸກ, ຊ້ຳບໍ່​ໜຳ ​ເສຍ​ຊາດ, ​ເສຍ​ແຜ່ນດິນ ​ແລະ ​ເສຍ​ພົນລະ​ເມືອງ​ໄປ​ກາຍ​ເຄິ່ງຂອງ​ປະ​ເທດ ຍ້ອນ​ໃຜ​ກໍ​ຍາດ​ຊີງກັນ​ເປັນ​ເຈົ້າ, ຢາກ​ເປັນ​ໃຫຍ່​ເປັນ​ໂຕ.

     ນັບ​ແຕ່​ປະ​ເທດ​ຊາດ​ບ້ານ​ເມືອງ​ເຮົາ​ໄດ້​ສ້າງຕັ້ງລະບອບ​ປະຊາທິປະ​ໄຕ​ປະຊາຊົນ ປ່ຽນ​ຊື່​ປະ​ເທດ​ຈາກ​ພະຣາຊາ​ອານາຈັກ​ມາ​ເປັນ​ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ (ສປປ ລາວ) ກໍ​ມີ​ອາຍຸ​ໄດ້ 45 ປີ​ແລ້ວ, ອາຍຸ​ຂອງ​ພັກ​ເຮົາ​ກໍ​ໄດ້ 65 ປີ​ແລ້ວ. ຍ້ອນ​ມີ​ການ​ຊີ້​ນຳ-ນຳພາ​ຂອງ​ພັກ​ປະຊາຊົນ​ປະຕິວັດ​ລາວ ບ້ານ​ເມືອງ​ຂອງ​ພວກ​ເຮົາ​ຈຶ່ງ​ມີ​ການ​ສ້າງສາ​ພັດທະນາ ​ແລະ ມີ​ຄວາມ​ສະຫງົບ​ສຸກ​ຮົ່ມ​ເຢັນ​ ດັ່ງ​ທີ່​ເຫັນ​ໃນ​ທຸກ​ວັນ​ນີ້. ອີກ​ບໍ່​ນານ​ເກີນ​ລໍ ສປປ ລາວ​ເຮົາ ກໍ​ຈະ​ໄດ້​ປະກາດ​ເປັນ​ປະ​ເທດ​ທີ່​ລຶບລ້າງ​ອອກ​ຈາກ​ຄວາມທຸກ​ຍາກ ​ແລະ ດ້ອຍ​ພັດທະນາ. ທຸກ​ສິ່ງ​ທຸກ​ຢ່າງ​ທີ່​ກ່າວ​ມາ​ນີ້​ແມ່ນ​ຍ້ອນ​ການ​ຊີ້​ນຳ-ນຳພາ​ຂອງ​ພັກ ​ແລະ ​ໄດ້​ເຕີບ​ໃຫຍ່​ໃນ​ຂະ​ບວນວິວັດ​ແຫ່ງ​ການ​ຕໍ່ສູ້​ປະຕິວັດ​ທີ່​ເອົາ​ເປັນ​ເອົາ​ຕາຍ​ຈຶ່ງ​ສາມາດ​ກູ້​ເອົາ​ໄຊຊະນະ​ຈົນ​ມາ​ເຖິງ​ທຸກ​ວັນ​ນີ້.

ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ - WhatsApp Image 2020 05 27 at 5 - ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ
ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ - WhatsApp Image 2020 05 27 at 5 - ພັກ​ກຳ​ເນີ​ດ​ເຕີບ​ໃຫຍ່​ໃນ​ຂະ​ບວນການ​ຕໍ່ສູ້​ປະຕິວັດ
error: Alert: ເນື້ອຫາຂ່າວມີລິຂະສິດ !!