ເຕັກນິກການຜະລິດເມັດພັນສາລີແບບປະສົມ

ເຕັກນິກການຜະລິດເມັດພັນສາລີແບບປະສົມ - 49 - ເຕັກນິກການຜະລິດເມັດພັນສາລີແບບປະສົມ
ເຕັກນິກການຜະລິດເມັດພັນສາລີແບບປະສົມ - 174233 - ເຕັກນິກການຜະລິດເມັດພັນສາລີແບບປະສົມ

ຮຽບຮຽງ​ໂດຍ: ຂັນ​ວິຈິດ

  1. ປະຫວັດຄວາມເປັນມາ.

​ແນວ​ພັນ​ສາລີ​​ແບບປະສົມ LVN 10 ​ເປັນ​ທີ່​ຮູ້​ກັນ​ຢ່າງ​ກວ້າງຂວາງ​ໃນ​ກຸ່ມ​ຂອງ​ຊາວ​ກະສິກອນ​ຜູ້​ຜະລິດ​ສາລີ. ​ແນວ​ພັນ​ນີ້​ແມ່ນ​ສະ​ຖາ​ບັນ​ຄົ້ນຄວ້າ​ສາລີ​ຂອງ​ຫວຽດນາມ ​ໄດ້​ທຳ​ການ​ສຶກສາຄົ້ນຄວ້າ​ເປັນ​ເວລາ 28 ປີ ຈຶ່ງ​ສຳ​ເລັດ. ປັດຈຸບັນ​ນີ້ ສສ ຫວຽດນາມ ​ໄດ້​ຜະລິດ​ເມັດ​ພັນ​ສາລີ LVN10 ສົ່ງ​ອອກ​ຂາຍ​ໄປ​ຍັງ​ປະ​ເທດ​ຕ່າງໆ ​ໃນ​ທະວີບອາຊີ ​ແລະ ​ເຂດ​ແຄ້ວ​ນ. ສຳລັບ​ປະ​ເທດ​ເຮົາ​ໃນ​ປັດຈຸບັນ​ການ​ຜະລິດ​ເມັດ​ພັນ​ສາລີ​ແມ່ນ​ມີ​ທ່າ​ອ່ຽງ​ເພີ່ມ​ຂຶ້ນຢ່າງ​ຕໍ່​ເນື່ອງ, ຄວາມ​ຮຽກຮ້ອງ​ຕ້ອງການ​ທາງ​ດ້ານ​ແນວ​ພັນ​ກໍ​ຫລາຍ​ຂຶ້ນ ຈຶ່ງ​ຈຳ​ເປັນ​ຕ້ອງ​ໄດ້​ຊື້​ແນວ​ພັນ​ທີ່​ນຳ​ເຂົ້າມາ​ຈາກ​ຕ່າງປະ​ເ​ທດ​ເຊັ່ນ: ປະ​ເທດ​ໄທ ​ແລະ ສສ ຫວຽດນາມ ​ເປັນຕົ້ນ.

ເຕັກນິກການຜະລິດເມັດພັນສາລີແບບປະສົມ - 445 2 - ເຕັກນິກການຜະລິດເມັດພັນສາລີແບບປະສົມ
  • ວິທີການຜະລິດເມັດພັນ.
    • ການຄັດເລືອກສະຖານທີ່.

ສະຖານ​ທີ່​ຜະລິດ​ເມັດ​ພັນ​ສາລີ​ຄວນ​ເປັນ​ບ່ອນ​ທີ່​ດິນ​ມີ​ຄວາມ​ອຸດົມສົມບູນ ບໍ່​ເປັນ​ແຫ​ລ່ງທີ່​ສະ​ສົມ​ພະຍາດ ​ແລະ ​ແມງ​ໄມ້, ​ເປັນ​ບ່ອນ​ທີ່​ຫ່າງ​ຈາກ​ພື້ນທີ່​ປູກ​ສາລີ ພັນ​ອື່ນ​ຢ່າງ​ໜ້ອຍ 800 ​ແມັດ ຫລື ​ໄລຍະ​ຫ່າງ​ທາງ​ດ້ານ​ເວລາ​ຂອງ​ການ​ປູກ ສາລີ​ພັນ​ອື່ນ 21ວັນ ​ເປັນ​ຢ່າງ​ໜ່ອຍ.

  • ການກຽມພື້ນທີ່.

        ພື້ນທີ່​ຕ້ອງ​ຖາງ​ອະນາ​ໄມ​ໃຫ້​ລະອຽດ, ​ໄຖ​ຕາກ​ແດດ​ປະ​ໄວ້ 7-10 ວັນ ​ແລ້ວ​ຈຶ່ງ​ມາ​ໄຖ​ຄົ້ນຄືນ. ​ເມື່ອ​ໄຖ​ສຳ​ເລັດ​ແລ້ວ​ກໍ​ເອົາ​ຝຸ່ນ​ຄອກ​ລົງ​ໃສ່​ໃນ​ອັດຕາ 4 ​ໂຕນ/​ເຮັກຕາ. ຈາກ​ນັ້ນ, ຈຶ່ງ​ຄາດ ​ແລະ ຍົກ​ຮ່ອງ​ທີ່​ມີ​​ໄລຍະ​ຫ່າງ​ກັນ​ຂອງ​ຮ່ອງ 60 ຊັງ​ຕີ​ແມັດ ຄວາມ​ກວ້າງ​ຂອງ​ຮ່ອງ​ແມ່ນ 20 ຊັງ​ຕີ​ແມັດ.

  • ການກຽມເມັດພັນ.

​ເມັດ​ທີ່​ເປັນ​ສາຍ​ພັນ​ແມ່ນ​ມີ​ສອງ​ຊະນິດ​ຄື: ພັນ​ຜູ້ (​ເມັດ​ຜູ້) ​ແລະ ພັນ​ແມ່ (​ເມັດ​ແມ່) ຕ້ອງ​ແຊ່​ເມັດ​ຜູ້​ກ່ອນ 8 ຊົ່ວ​ໂມງ​ແລ້ວ​ຈຶ່ງ​ແຊ່​ເມັດ​ແມ່ (​ໃຊ້​ເວລາ​ແຊ່​ນ້ຳ 8 ຊົ່ວ​ໂມງ, ​ເມັດ​ຜູ້ ​ແລະ ​ແມ່​ຫ້າມ​ປົນ​ກັນ) ຈາກ​ນັ້ນກໍ​ເອົາ​ມາ​ບົ່ມ​ໃສ່​ຂີ້ຊາຍ​ຮອງ​ດ້ວຍ​ພາຊະນະ​ປະ​ໄວ້​ໜຶ່ງ​ວັນ ຈຶ່ງ​ນຳ​ໄປ​ປູກ.

ເຕັກນິກການຜະລິດເມັດພັນສາລີແບບປະສົມ - 7693 - ເຕັກນິກການຜະລິດເມັດພັນສາລີແບບປະສົມ
  • ວິທີການປູກ.

ອັດຕາ​ການ​ປູກ​ລະຫວ່າງ​ເມັດ​ພັນ​ຜູ້​ກັບ​​ເມັດ​ພັນ​ແມ່​ແມ່ນ 1/4 ໝາຍ​ຄວາມ​ວ່າ​ໜຶ່ງ​ແຖວ​ຜູ້​ຕໍ່​ສີ່​ແຖວ​ແມ່. ​ໄລຍະ​ຫ່າງ​ຂອງ​ການ​ປູກ​ແມ່ນ 25X75 ຊັງ​ຕີ​ແມັດ ອັດຕາ​ການ​ປູກ​ແມ່ນ​ສອງ​ເມັດ​ຕໍ່​ຂຸມ, ​ເມື່ອ​ງອກ​ຂຶ້ນມາ ຈຶ່ງ​ຖອນ​ແຍກ​ອອກ​ເຫລືອ​ໄວ້​ໜຶ່ງ​ຕົ້ນຕໍ່​ຂຸມ.

  • ການກຳຈັດຕົ້ນປົນ.

​ເມື່ອ​ສາລີ​ງອກ​ຂຶ້ນມາ​ໄດ້ 10-15 ວັນ ກໍ​ຖອນ​ແຍກ​ອອກ ​ແລະ ກຳຈັດ​ຕົ້ນປົນ ​ເຮົາ​ສັງ​ເກດ​​ເບິ່ງ​ຫາກ​ເຫັນ​ວ່າ ມີ​ຕົ້ນທີ່​ຜິດ​ປົກກະຕິ ຫລື ​ແຕກ​ຕ່າງ​ຈາກ​ໝູ່ ​ໃຫ້ ທຳລາຍ​ຖິ້ມ, ການ​ກຳຈັດ​ຕົ້ນປົນ ​ແມ່ນ​ຕ້ອງ​ໄດ້​ປະຕິບັດ​ຕະຫລອດ​ລະດູ​ການ​ຜະລິດ.

ເຕັກນິກການຜະລິດເມັດພັນສາລີແບບປະສົມ - Wave100S AD to Website 2020 0 - ເຕັກນິກການຜະລິດເມັດພັນສາລີແບບປະສົມ
  • ການໃສ່ຝຸ່ນ.

ອັດຕາ​ຝຸ່ນ​ທີ່​ກຳນົດ​ແມ່ນ 60-30-30 ​ໂດຍ​ແບ່ງ​ໃສ່​ສາມ​ໄລຍະ​ດັ່ງ​ນີ້: ​ໃນ​ອັດ ຕາ​ຈັກ 100 ກິ​ໂລ/ຮຕ.

  • ​ເລັ່ງຄັ້ງທີ 1 ​ເມື່ອ​ສາລີ​ມີ 2-3 ​ໃບ​ແທ້ ​ໃສ່ 1/3 ຢູ​ເລຍ (N) ​ແລະ ½ ຂອງ​ກາລີ (K).
  • ​ເລັ່ງຄັ້ງທີ 2 ​ເມື່ອ​ສາລີ​ມີ 5-7 ​ໃບ​ແທ້​ໃສ່ 1/3 ຢູ​ເລຍ (N) ​ແລະ 1 ສ່ວນ​ຂອງ​ກາລີ (K).
  • ​ເລັ່ງຄັ້ງທີ 3 ​ເມື່ອ​ສາລີ​ມີ 9-10 ​ໃບ​ແທ້​ແມ່ນ​ໃສ່​ສ່ວນ​ທີ່​ຍັງ​ເຫລືອ​ໃຫ້​ໝົດ.
    • ການຖອດດອກຜູ້ຂອງຕົ້ນແມ່.

​ເມື່ອ​ສາລີ​ຕົ້ນ​ແມ່​ພັນ​ເລີ່​ມຕົ້ນອອກດອກ (ຊໍ່​ດອກ​ຜູ້) ກໍ​ຖອດ​ຖິ້ມ​ໃຫ້​ໝົດ​ທຸກ​ແໜງ ​ແລະ ທຸກ​ຕົ້ນກ່ອນ​ທີ່​ມັນ​ຈະ​ກະຈາຍ​​ເກສອນ. ​ແຕ່​ການ​ຖອດ​ດອກ​ຕ້ອງ​ລະວັງ​ຢ່າ ​ໃຫ້​ໃບ​ວິ ຫລື ​ໃບສຸດ​ອອກ​ນຳ, ຕ້ອງ​ປະຕິບັດ​ທຸກ​ມື້ຈົນ​ກວ່າ​ດດອກ​ຈະ​ອອກ​ໝົດ​ອອກ​ຕົ້ນ.

  • ການເອົາເກສອນຜູ້ (ຕົ້ນຜູ້).

​ເມື່ອ​ເຫັນ​ວ່າ​ດອກ​ຜູ້​ຂອງຕົ້ນຜູ້​ບານ​ເຕັມທີ່ ​ແລະ ພ້ອມ​ທີ່​ຈະ​ກະຈາຍ​ເກສອນ ນຳ​ເອົາ​ອຸປະກອນ​ທີ່​ເປັນ​ປຼາສະຕິ​ກ​ເຊັ່ນ: ຊາມ, ຄຸ ມາ​ຮອງ​ຮັບ​ເອົາ​ເກສອນ ​ໂດຍ​ຄ່ອຍໆ ​ໂນ້ມ​ແຊງ​ດອກ​ລົງ​ໃສ່​ຊາມ​ແລ້ວ​ເຄາະ​ຄ່ອຍໆ​ເພື່ອ​ເອົາ​ເກສອນ. ການ​ເຄາະ​ເອົາ​ເກສອນ​ຄວນ​ລະວັງ​ຢ່າ​ໃຫ້​ຊໍ່​ດອກ​ຫັກ.

  • ການປະສົມພັນ.

ຫລັງ​ຈາກ​ທີ່​ກຽມ​ເກສອນ​ແລ້ວ​ກໍ​ເລີ່​ມລົງມື​ປະສົມ​ພັນ​ໄດ້​ເມື່ອ​ດອກ​ແມ່ (​ໄໝ) ຍາວ​ປະມານ 3 ຊັງ​ຕີ​ແມັດ​ຂຶ້ນ​ໄປ. ການ​ປະສົມ​ພັນ​ແມ່ນ​ໃຊ້​ອຸປະກອນ​ທີ່​ຫາ​ງ່າຍ​ເຊັ່ນ: ກ້ອງ​ແປ້ງ, ຂົນ​ໄກ່, ຍອງ​ຝ້າຍ​ມາ​ຕັກ ຫລື ຈຸບ​ເອົາ​ເກສອນ​ໄປ​ໃສ່​ດອກ​ແມ່ ​ແລະ ຄວນ​ປະຕິບັດ​ທຸກ​ເຊົ້າ​ແຕ່​ເວລາ 8-10 ​ໂມງ​ ​ແລະ ຕອນ​ແລງ 3-5 ​ໂມງ ອຸນຫະພູມ 23-28 ອົງສາ ​ແລະ ຄວາມ​ຊຸ່ມ 80-90% ​ແມ່ນ​ເໝາະ​ສົມ​ທີ່​ສຸດ. ພາຍຫລັງ​ທີ່​ປະສົມ​ພັນ​ສຳ​ເລັດ​ແລ້ວ ຫລື ລະອອງ​ເກສອນ​ຜູ້​ກະຈາຍ​ໝົດ​ແລ້ວ​ໃຫ້​ຕັດ​ຕົ້ນຜູ້​ຖິ້ມ.

ເຕັກນິກການຜະລິດເມັດພັນສາລີແບບປະສົມ - 4653 - ເຕັກນິກການຜະລິດເມັດພັນສາລີແບບປະສົມ

  • ການເກັບກູ້.

​ເມື່ອ​ເຫັນ​ວ່າ​ສາລີ​ສຸກ​ແກ່​ເຕັມທີ່​ກໍ​ເກັບ​ກູ້​ໂລກ. ຫລັງ​ຈາກ​ເກັບ​ມາ​ແລ້ວ​ໃຫ້​ຕາກ ຝັກ​ຢ່າງ​ໜ້ອຍ 4 ​ແດດ​ຈຶ່ງ​ນຳ​ໄປ​ແກະ​ເມັດ​ແລ້ວ​ຕາກ​ອີກ 8 ​ແດດ ຈົນ​ກວ່າ​ຄວາມ​ຊຸ່ມ​ເຫລືອ 8% ຈິ່ງ​ນຳ​ໄປ​ຄັດ​ເມັດ, ຈັດ​ເກດ ​ແລະ ກຸ່ມ​ສີ​ຈຶ່ງ​ນຳ​ໄປ​ບັນຈຸ ​ໃສ່​ຖົງ​ຫຸ້ມ​ຫໍ່​ລະອຽດ.

  • ຜົນໄດ້ຮັບຈາກການຜະລິດ.
  • ມີ​ແນວ​ພັນ​ສາລີ​ໄວ້​ປູກ​ໃນ​ປີ​ຕໍ່​ໄປ.
  • ມີ​ລາຍ​ຮັບ​ຈາກ​ການ​ຂາຍ​ແນວ​ພັນ​ສາລີ ​ແລະ ຜົນ​ຜະລິດ​ໃນ​ລະດູ​ຖັດ​ໄປ.
  • ສາມາດ​ຫລຸດຜ່ອນ​ການ​ນຳ​ເຂົ້າ​ເມັດ​ພັນ​ສາລີ​ຈາກ​ຕ່າງປະ​ເທດ.

ການຜະລິດເມັດພັນສາລີລູກປະສົມຄວນເອົາໃຈໃສ່ດັ່ງນີ້:

  1. ຕ້ອງ​ຕິດຕາມ​ຂໍ້​ມູນ​ອຸຕຸນິຍົມ ​ເພື່ອ​ຮັບປະກັນ​ໄລຍະ​ປະສົມ​ພັນ​ບໍ່​ໃຫ້​ຖືກ​ຊ່ວງ​ທີ່​ມີ​ຝົນຕົກ​ຫລາຍ ​ແລະ ສະພາບ​ອາກາດ​ເໝາະ​ສົມ.
  2. ການ​ກຳຈັດ​ຕົ້ນປົນ, ​ເດັດ​ດອກ​ຜູ້​ຂອງຕົ້ນ​ແມ່ ​ແລະ ປະສົມ​ພັນ ຄວນ​ເອົາ​ໃຈ​ໃສ່ ​ເປັນ​ພິ​ເສດ​ເພື່ອ​ຮັບປະກັນ​ການ​ກາຍພັນ.
  3. ​ເມື່ອ​ເຄາະ​ເອົາ​ເກສອນ​ໄດ້​ແລ້ວ​ກໍ​ປະສົມ​ພັນ​ໂລດ​ບໍ່​ຄວນ​ປະ​ໄວ້​ດົນ​ເກີນ​ 12 ຊົ່ວ​ໂມງ ​ເພາະ​ອັດຕາ​ການ​ປະສົມ​ພັນ​ຕິດ​ຈະ​ຫລຸດ​ລົງ.

ແຫ​ລ່ງຂໍ້​ມູນ: ສູນ​ຄົ້ນຄວ້າ​ກະສິກຳ ​ແລະ ປ່າ​ໄມ້ ພາກ​ເໜືອ​ສະ​ຖາ​ບັນ​ຄົ້ນຄວ້າ​ກະສິກຳ ​ແລະ ປ່າ​ໄມ້ ​ແຫ່ງ​ຊາດ.

ເຕັກນິກການຜະລິດເມັດພັນສາລີແບບປະສົມ - WhatsApp Image 2020 05 27 at 5 - ເຕັກນິກການຜະລິດເມັດພັນສາລີແບບປະສົມ
error: Alert: ເນື້ອຫາຂ່າວມີລິຂະສິດ !!